Natyitilwa ko Santo Domingo, ko República Dominicana, tuveekuana, ame ndyinkhelo. Ovotate ankho velilongesa unene kosikola iya ankho vahanda okutekulila ovana vavo pokati kovanthu ovawa, novakuatyili. Etyi ankho kuakamba omanima ekuana opo ndyikutulwe, ovotate velivasile nono misionaliu mbongeleya itiwa Mormon. Vahuvile navo mokonda ankho vavala nawa nokuateta nawa onondyeli, navo avahande ombunga yetu yoko República Dominicana ilipake Mongeleya ya Jesus Cristo dos Santos dos Últimos Dias ine Ongeleya Mormon.

Etyi nekula, ankho ndyihole unene ovilinga vilingwa mongeleya Mormon, nokuna onthilo onene nombunga, novituwa oviwa. Ankho ndyilimphanda unene mokonda ndyikahi mongeleya Mormon iya ankho ndyina omphango yokukala omisionaliu yongeleya oyo.

Etyi natuukisa omanima 18, atuilukila ko Estados Unidos opo ndyikalongeswe mosikola onene vali. Etyi palamba enima, me muhikuena nomulume wae, Onombangi mba Jeova, aveya okupila meumbo lietu ko Flórida. Avetukongo tuende navo kotyonge tyilongesa Ombimbiliya. Andyihuvu unene etyi natala okuti aveho vekahi ponthele yange vatanga onotestu otyo vahoneka ovipuka vimwe. Naame andyiiti olapi nopapelo andyihimbika okuhoneka.

Etyi otyonge tyapwa, me muhikuena nomulume wae avamphopila okuti, mokonda ankho ndyihanda okukala omisionaliu yo Mormon, vapondola okunkhuatesako okulilongesa ovipuka vimwe konthele Yombimbiliya. Andyisoko okuti otyo tyikahi nawa mokonda ankho nanoñgonoka vali unene Omukanda wova Mormon tyipona Ombimbiliya.

Mokueenda kuetompho lietu motelefone konthele Yombimbiliya, me muhikuena nomulume wae apeho ankho vamphopila ndyeeleke omatavelo ange neetyi Ombimbiliya ilongesa. Ankho vahanda ndyilitaleleko etyi Ombimbiliya tyilityili ilongesa.

 Ankho ndyitavela ovipuka ovinyingi nalongeswa mongeleya Mormon, mahi ankho hityii inkha ovipuka ovio vielikuata Nombimbiliya. Me muhikuena anthumu o Despertai! 8 ya Novembro yo 1995, yalingwa no Nombangi mba Jeova, ankho ina ononthele mbupopia konthele yetyi tyilongeswa mongeleya Mormon. Andyihuvu unene mokonda ankho mo Mormon mulongeswa ovipuka ovinyingi nehei. Otyo atyimphe ondundo yokuovola mo Internete konthele yo Mormon opo ndyitale inkha etyi ankho tyikahi mo Despertai! otyotyili umwe. Ankho otyili umwe, iya andyityinoñgonoka vali nawa etyi nakatala mondyuo yapakua ovipuka vio Mormon kepundaumbo litiwa Utah.

Apeho ankho ndyisoka okuti Omukanda wo Mormon Nombimbiliya vipopia otyipuka tyike. Mahi etyi nahimbika okutanga nawa Ombimbiliya, namona okuti omalongeso o Mormon kaelikuatele nomalongeso Ombimbiliya. Mongeleka, mu Ezequiel 18:4 Ombimbiliya ipopia okuti ohande inkhia. Mahi, Omukanda wo Mormon, mu Alma 42:9 upopia okuti: “Ohande kaipondola okunkhia.”

Hamuene vala okuti omalongeso o Mormon kaavikuile, mahi tupu ankho ndyisukalala mokonda ova Mormon vapanda vali ovilongo vimwe. Mongeleka, valongesa okuti otyikunino tyo Endene ankho tyikala ko Estados Unidos Mepundaumbo lio Jackson, Missouri. Ononkhalamutwe mbongeleya mbupopia okuti “nthiki imwe Huku makaundapesa outumini wo Estados Unidos pala okutumina ohi aiho.”

Ame ankho nasukalala nokuti elongeso lio Mormon malihiki kovilongo ovikuavo, alo kotyilongo tyange. Moluotyo, nthiki imwe etyi natelefonalelwa nomukuendye wo Mormon ankho ukahi nokulongeswa opo akale omisionaliu, natomphola nae konthele yotyo. Nemupulile okuti inkha otyilongo tyae tyilwa notyilongo otyikuavo okuti makala tyafuapo pala okulwa nova Mormon votyilongo otyo. Nahuvile unene etyi akumbulula okuti eenga! Andyovola okunoñgonoka vali nawa omalongeso ongeleya yange iya andyikapopia nonkhalamutwe Yongeleya Mormon. Wamphopila okuti omakumbululo omapulo ange omaelema iya maakumbululwa nthiki imwe tyina otyimimi tyamayandyuluka vali nawa.

Mokonda hahambukilwe nekumbululo liae, andyilipulu nawa-nawa omokonda yatyi ankho ndyihandela okukala omisionaliu yo Mormon. Andyiimbuka okuti ankho ndyihanda okukala omisionaliu opo ndyikuateseko ovanthu vakuetu. Tupu ankho ndyihanda otyilinga otyo, opo ovanthu vakale nonthilo naame. Mahi Huku ankho hemunoñgonokele nawa. Namphila kohale pamwe ankho ndyitanga Ombimbiliya, kuame ankho itupu esilivilo. Ankho hii natyike konthele yevangelo lia Huku pala ohi novanthu.

Etyi nelilongesa Ombimbiliya no Nombangi mba Jeova, nanoñgonoka ovipuka ovinyingi, enyina lia Huku, netyi tyimoneka mononkhia, notyilinga tya Jesus mokufuiswapo kuevangelo lia Huku. Konyima andyihimbika okunoñgonoka nawa omukanda oo uhuvisa, nokupopila vakuetu konthele yotyili ankho ndyikahi nokulilongesa. Ame ankho ndyityiyale okuti Huku okuekahi, mahi pahe ndyipondola okupopia nae melikuambelo ngatyina Epanga liange liakolela vali. Nambatisalwa andyikala Ombangi ya Jeova mo 12 ya Kakwenye yo 2004, iya etyi palamba onohanyi epandu andyihimbika okuundapa movilinga viokuivisa omuvo auho.

Pahe, ndyikahiale nokuundapa mokueenda kuomanima etano mombala Yonombangi mba Jeova mouye auho ko Brooklyn, Nova York. Ndyina ehambu enene liokukuatesako okulinga Onombimbiliya, nomikanda omikuavo viomupika wekolelo, vikuatesako ovanthu ovanyingi mouye auho, tupu ndyitualako okukuatesako vakuetu okulilongesa konthele ya Huku.