1. Jaqenakar munasitapatjja, ¿kunsa Jehová Diosajj lurawayi?

 JEHOVÁ DIOSAJJ wiñay jakiriwa ukat jiwasan wiñay jakañasatakejj kuns lurañasa ukwa sarakistu. Ukat uka arunakapajj janiw mayjtʼkiti. Bibliajj akham siwa: “Tatitun arupajj wiñayatakipuniwa” sasa (1 Ped. 1:23-25). ¡Jaqenakar munasitapat uka suma arunakap Bibliar qellqayatapatjja wal yuspärtanjja!

2. ¿Diosajj kun uñtʼañassa muni?

² Sutip taqeni uñtʼsna ukwa Jehová Diosajj muni. Alajjpachana, akapachana lurasïwipat Bibliajj parlki ukhaw Diosan, Jehová *, sutip qallt qalltpun ayti (Gén. 2:4). Kunapachatï Diosajj Moisesar Tunka Mandamientonak qalar qellqata churkäna ukhaw sutip walj kuti qellqatayna. Amtañäni, nayrïr mandamientojj akham sasaw qallti: “Nayätwa juman [Jehová] Tatitu Diosamajja” (Éxo. 20:1-17). Jehová Diosan Arupa ukat Sutipa chhaqtayañatakejj Supayajj wal chʼamachasiwayi, ukampis Taqe Kunjjaru Munañani Jehová Diosajj Arup jan chhaqtañapatakejj sumwa jarkʼaqawayi.

3. ¿Jehová Diosajj Bibliat kun uñtʼañassa muni?

³ Jaqenakajj Diosat kunayman amuyapjje. Ukampis Jehová Diosajj kunatï cheqäki uk uñtʼañaswa muni. Ukat kunatï cheqäki uk Biblia toqe yatichatapatjja, wal yuspärañasa (Salmo 43:3, 4 liytʼasiñapawa). Jaqenakajj aka ñanqha pachan chʼamakansa sarnaqapkchejja, jiwasajj ajay toqen qhananwa sarnaqtanjja (1 Juan 1:6, 7).

4, 5. ¿Kunsa 1931 maran katoqawaytanjja?

⁴ Cristianjamajja aski herencianïtänwa. Mä herenciajja, kuntï mä awk taykajj wawanakapar yatichki ukat uka  wawanakapajj yateqatap wawanakaparurak yatichki ukawa. Niya ukhamarakiw Jehová Diosan Qhanañchirinakapajj herencia katoqawaytanjja. Jehová Diosaw Bibliat sum amuytʼaña ukat kunatï Jupatsa amtäwinakapatsa cheqäki uk amuytʼañ yanaptʼawayistu. ¡Jehová Diosan sutip apañajj jiwasatakejj wali askipuniwa!

⁵ Ukasti mä herenciarakiwa, ukjja 1931 maranwa Columbus (Ohio, Estados Unidos) markan mä jachʼa tantachäwin katoqawaytanjja. Uka tantachäwitak wakichäwinjja aka pä letraw uñstäna “JW”. Uka toqet mä kullakajj akham sänwa: “Uka letranakajj kamsañs muni sasaw jilat kullakanakajj wal lupʼipjjäna” sasa. Ukarojja, julio 26, domingo uruw akham sasin qhanañchasïna: janiw Bibliat Yatjjatirinaka satäjjapjjañäniti, jan ukasti Jehová Diosan Qhanañchirinakapa satäjjañäniwa (inglés arunsti, Jehovahʼs Witnesses). ¡Uka urojj wali kusiskañapunïnwa! (Isaías 43:12 liytʼasiñapawa.) Mä jilatajj akham sasaw amtasiraki: “Tantachasirinakajj wali kusisitapuniw amparanakapa tʼajjllirapjjäna, uk janipuniw armkäti” sasa. Akapachanjja, janiw khitis uka suti apañ munkänti, ukampis uka sutimpi uñtʼatäñajj jiwasatakejj mä bendicionawa, ukat 80 maranakaw uka suti apasktanjja. ¡Kunja askisa Jehová Diosan Qhanañchirinakapäñajja!

6. ¿Kuna yatichäwinaksa Diosat mä herensjam katoqaraktanjja?

⁶ Jehová Diosan nayra yupaychirinakapat kunatï cheqäki ukwa Bibliajj parlistu. Ukasti Diosat katoqtan uka herenciarakiwa. Abraham, Isaac ukat Jacob chachanakat amuytʼañäni. Jupanakajja, kunjamsa Diosatakjam sarnaqapjjaspa uk familiapampejj sapa kutiw parltʼasipjjpachäna. Ukatwa José chachajj kunapachatï Potifaran warmipajj ikintasiñäni siskäna ukhajj Dios contra jan juchachaskänti (Gén. 39:7-9). Nayrïr patak maranakanjja, cristianjamajj kunsa lurapjjañapäna ukajja, arunakampi jan ukajj luratanakampiw mayninakar yatichasirïna. Apóstol Pablojja, Santa Cena amtañjja Jesusaw yatichitu sasaw tamanakar säna (1 Cor. 11:2, 23). Kunjamsa jichhürunakan Jehová Diosar yupaychañasa ukajj Biblian qellqatawa (Juan 4:23, 24 liytʼasiñapawa). Biblian yatichäwinakapajj taqe jaqenakaruw yanaptʼaspa, ukampisa Jehová Diosan yupaychirinakapakiw uk wali askit uñjtanjja.

7. ¿Diosan kawkïr arunakapas mä herenciarakejja?

⁷ Ukat jichhürunakanjja, ukhamarakiw Jehová Diosajj markapar yanaptʼi (Sal. 118:7). Kunjamsa Jupajj markapar jarkʼaqe ukjja, Bibliat apstʼat qellqatanakanwa liytʼtanjja. Ukat arknaqatas uñjaskstanjja, Diosamp jarkʼaqatäñat janiw pächasktanti. Bibliajj akham sistuwa: “Ukampis jumar tukjañäkis uka armajja janiw khitis jichhakam lurkiti. Khitinakatejj jumar juchañchapkätam ukanakarojj amuktʼayätawa. Ukwa nayajj [‘herencia’, NM] churta khitinakatejj nayar servipkitu ukanakarojja: ‘Atipjäwi’ Tatituw ukjja arsu” (Isa. 54:17). Uka arunakasti Diosan mä herenciaparakiwa. Ukhamasti,  Supayajj janipuniw wiñayatak tʼaqhesiykistaspati.

8. ¿Kunsa aka yatichäwina ukat jutïr yatichäwin yatjjataskañäni?

⁸ Supayajja kunaymanitwa Diosan Arup chhaqtayañ muni, ukhamata jaqenakajj Diosan sutipa ukat kunatï cheqäki uk jan yatipjjañapataki. Ukampis Supayajj janiw amtap phoqhawaykiti. Aka yatichäwinsa ukat jutïr yatichäwinsa, kunjamsa Diosajj Arup jarkʼaqawayi, ukat sutip jaqenakan uñtʼapjjañapataki ukat cheqa yatichäwinak uñtʼapjjañapatakis kunsa lurawayi ukwa yatjjataskañäni.

9-11. ¿Kunjamsa Jehová Diosajj Arup jarkʼaqawayi?

⁹ Kunayman jan waltʼäwinakas utjkchïnjja, Jehová Diosajj Arup jarkʼaqawayiwa. Mä qellqatajj akham siwa: ‘1229 maranjja, Concilio de Toulouse uka tantachäwinjja, Iglesia contra saytʼirinakampi chʼajjwasipkatapatwa jaqenakarojj pachpa arunakapat Biblia apnaqañat jarkʼapjjäna. Ukat 1234 maranjja, Tarragona (España) markan ukham yaqha tantachäwiw apasïna, ukansti James I chachaw pʼeqtäna, ukat ukham jarkʼañatakiw amtawayapjjarakïna. Ukat 1559 maranjja, Roma markan Católica Iglesian pʼeqtʼiri Pablo IV tatakuraw kawkïr qellqatanakas jan lurasiñapäki ukat jaqenakan jan utjañapäki uk mä lista apsutayna. Ukat Santo Oficiot permiso jan mayisajj janipuniw khitis Biblia lurañapäkänti ni apnaqañapäkänsa’ (Enciclopedia Cattolica).

¹⁰ Walja kutis jaqenakajj Biblia chhaqtayañataki chʼamachasiwayapkchejja, jichhürkam utjaskakiwa. Niya 1382 maranakanwa, John Wyclef ukat yanapirinakapampejj inglés arur Biblia jaqokipasipkäna. Biblia jaqokipiri yaqha chachajj William Tyndale satänwa, jupasti 1536 maranwa jiwayatäna. Mä lawar ñachʼkatatäkäna ukhajj akham sataynawa: “¡Tata, Inglaterra markankir reyiruy amuytʼayam!” sasa. Ukatsti juparojj jaychkatasaw ninampi phichkatapjjatayna.

¹¹ Bibliarojj waljanis uñisipkchïnjja, janiw chhaqtayawayapkiti. 1535 maranjja, Miles Coverdale sat chachaw inglés arur jaqokipat Biblia apsüna. Jupasti Tyndale chachajj Machaqa Testamento ukat Génesis librot Crónicas librokama Nayra Testamentot jaqokipkatayna uka qellqatanakamp yanaptʼasisaw uka Biblia jaqokipatayna. Ukat yaqhep libronakjja, latín arut Biblia uñjjatasa ukat alemán arur Martín Lutero chachajj jaqokipkatayna uka Biblia uñjjatasarakiw jaqokipatayna. Jichhürunakanjja, Traducción del Nuevo Mundo de las Santas Escrituras sat Biblia, waljaniw wali askit uñjapjje. Kunattejj qhana amuytʼkañawa, ukat kuntï nayra qellqatanakajj siskäna ukhamarjam jaqokipatawa ukat jaqenakar yatiyañatakis khustʼatarakiwa. Supayasa ukat jaqenakas chhaqtayañ munapkchejja, Jehová Diosajj jarkʼaqakipuniniwa.

12. ¿Kunjamsa Traducción del Nuevo Mundo sat Bibliajj Jehová Diosan sutip uñtʼapjjañapatakejj jaqenakar yanaptʼawayi?

¹² Jehová Diosajj Biblianwa sutip qellqayawayi, uksti Traducción del Nuevo Mundo sat Biblianwa qhan amuysnajja. Uka Biblia jaqokipirinakajja, nayra qellqatanakan kawkhanakantï Diosan, Jehová, sutipajj uñstkäna uka cheqanakaruw uchawayapjje. Ukat Hebreo Arut Qollan Qellqatanakanjja, 6.973 kutiw uñsti, ukat Griego Arut Qollan Qellqatanakan 237 kutiw uñstaraki. Traducción del Nuevo Mundo sat Bibliajja, phoqhatpacha jan ukajj chikataksa 116 arunakaruw jaqokipasiwayi, ukat 178.545.862 jilarakiw lurasiwayi.

13. Qalltatpachaw jaqejj Diosan sutip uñtʼäna sasajja, ¿kunatsa sissna?

¹³ Adanampi Evampejj Diosan sutip uñtʼapjjänwa ukat aytapjjarakïnwa sasaw Bibliajj qhanañchi. Ukat Uma Juicio qhepatjja, Cam chachajj Noé awkipar jan respetatapatjja, Noé chachajj akham sänwa: “[Jehová] Tatitu Diosajjay Sem chacharojj bendispan, Canaanasti [Cam chachan yoqapajj] esclavoparakïpan” sasa (Gén. 4:1; 9:26). Ukat Dios pachpaw akham sarakïna: “Nayätwa [Jehová] Tatitojj, ukarakiw sutijajja, janirakiw munkäti kunatejj nayar churañäki ukjja yaqhar churayañjja” sasa. Ukat saskakïnwa: “Nayätwa [Jehová] Tatitojja, janiw yaqhajj utjkiti, nayat yaqha Diosajj janiw utjkiti” sasa (Isa. 42:8; 45:5). Jehová Diosajja, taqenin uñtʼapjjañapatakiw sutip arjjatawayi. Ukat uka sutip aytañasa ukat Jupan Qhanañchirinakapjam uñtʼatäñas wali askiwa. ¿Diosan sutip yatiñajj wali kusiskañajjaya? (Sal. 20:5.)

14. ¿Diosan sutipajj kawkinsa uñstaraki?

¹⁴ Diosan sutipajj janiw Biblianak uñstkiti. Moabita Qalat parltʼañäni, uksti Dhiban (Dibón) markanwa jikjjatapjjatayna, uka markasti mar Muerto sat lamar qotat Inti jalsu toqerojj 21 kilometronak sarañankiwa. Uka qalansti Israel markankiri Omri reyin sutipaw qellqat uñsti ukat kunjamsa moabitanakajj Israel contra saytʼasipjjäna ukaw Mesa reyin aruparjamajj qellqataraki (1 Rey. 16:27, 28; 2 Rey. 1:1; 3:4, 5). Uka qalansti Diosan sutipaw hebreo arut aka letranakampi uñstaraki: YHWH. Ukat uka pusi letranakasti Lakís Cartanakanwa walja kuti uñstaraki, ukajj Israel markan jikjjatat jikʼillanakawa (cerámica).

15. ¿Kunas Septuaginta qellqatajja, ukat ukajj kunatsa munasïna?

¹⁵ Khitinakatï Biblia qalltan jaqokipapkäna ukanakaw Diosan sutip jan chhaqtañapatakejj yanaptʼawayapjjarakïna. Judionakajja, 607 nayrïr pacha maranwa Babilonia markar apata uñjasipjjäna, ukat 537 nayrïr pacha marakamaw ukan qheparapjjäna. Ukampis waljaniw Judá ukat Israel markar jan kuttʼapkänti. Ukat niya 200 nayrïr maranakanjja, walja judionakaw Egiptonkir Alejandría markar sarjjapjjäna, uka cheqan griego aruw parlasïna. Jupanakatakejj Hebreo Arut Qollan Qellqatanakwa griego arur jaqokipat munasïna. Griego arur jaqokipañjja 100 maranakanwa tukuyasïna. Ukasti Septuaginta sasin uñtʼatarakiwa, ukanjj Diosan sutipajj hebreo arut uñstarakiwa.

16. ¿Kunjamsa Bay Psalm Book librojj Diosan sutip apnaqe?

¹⁶ Diosan sutipajj Bay Psalm Book libronwa uñstaraki. Ukasti Inglaterra markankir jaqenakajj Norteamérica toqen jakapkäna ukanwa apsusïna. Nayrïr librjja 1640 maranwa apsusiwayi, ukanjja Salmonakwa hebreo arut inglés arur jaqokipasiwayi, ukampisa kunjamtï uka tiempon parlaskäna ukham qellqatänwa. Ukat Salmo 1:1, 2 qellqatanjamarakiw Diosan sutipajj uñsti, ukan akham siwa: khitinakatï ñanqha lurir jaqenakan amtayataparjam jan sarnaqki ukajja, “kusisiñan jaqewa”, jan ukasti “jupan kusisiñapajj Iehovah arupawa” sasa. Diosan sutipjjat jukʼamp qhanañchtʼäwinakjja, El nombre divino que durará para siempre sat folletonwa jikjjatsna.

17, 18. 1) ¿“Cheqa” siski ukajj kamsañs muni? 2) ¿Cheqap “suma arunaka[jj]” kunanakasa?

¹⁷ Wali kusisitaw “cheqa” parlir Diosar yupaychtanjja (Sal. 31:5). ¿“Cheqa” siski uka arojj kamsañs muni? Kunatï paski jan ukajj utjki ukawa. Bibliajj qellqaskäna uka arut “cheqa” sasin jaqokipatäki uka arojja, kunatï cheqäki, cheqapäki ukat atiniskayäki ukwa sañ muni.

¹⁸ Jehová Diosaw cheqa yatichäwinak jan chhaqtañapatakejj jarkʼaqawayi, ukat uka cheqa yatichäwinak jukʼamp yatjjatañasatakiw yanaptʼaskarakistu (2 Juan 1, 2). Cheqa yatichäwinak jukʼampwa amuyasktanjja, kunattejj “aski jaqenakan sarnaqäwinakapasti willjta qhanjamawa; phoqhatpach qhantañkamaw jukʼat jukʼat qhanti” (Pro. 4:18). “Arunakamasti cheqawa” sasaw Jesusajj mä oracionan Awkipar säna, jiwasajj ukhamwa amuyaraktanjja (Juan 17:17). Bibliajj cheqap “suma arunaka[nïwa]”, ukanakasti kunatï cristianonakajj iyawsktan ukanakawa (Gál. 2:14). ¿Uka cheqa yatichäwinakat mä qhawqhajj kawkïrinakasa? Kunatï Diosan sutipata, apnaqäwipata, Jesucriston loqtasïwipata, jiwatanakajj mä suytʼäwinïtapata ukat Diosan Reinopat cheqäki taqe ukanakawa. Supayajj kunaymanitsa cheqa yatichäwinak chhaqtayañ munkchïnjja, kunjamsa Diosajj jarkʼaqawayi uk jichhajj yatjjatañäni.

19, 20. ¿Khitïnsa Nemrod chachajja, ukat kuna amtapas jan phoqhasiwayki?

¹⁹ Uma Juicio qhepatjja, akham mä säwiw utjäna: ‘Jehová Diosaru kutkatasiri Nemrodjam jiwayiri’ sasa (Gén. 10:9, NM). Nemrod chachajj Jehová Diosan uñisiripänwa, ukat Supayaruw yupaychäna. Ukat uka pachparakwa Jesusan uñisirinakapajj lurapjjäna. Jesusasti jupanakarojj akham sänwa: “Jumanakan awkimajj Supayawa, jumanakajj Supayankapjjtawa. Kuntejj jupajj munki ukwa lurapjjaraktajja [...]. Janiw kunapachas jupajj cheq parlkiti” sasa (Juan 8:44).

²⁰ Nemrod chachaw Belén marksa ukat kawkïr markanakatï Tigris ukat Eufrates jawiranakampi muyuntatäpkäna uka markanaksa apnaqäna (Gén. 10:10). Ukat 2269 nayrïr pacha maranakanjja, inas jupajj Babel marka ukat jachʼa torre lurasiñapatak pʼeqtʼarakchïna. Uksti Jehová Diosan amtap jan phoqhasiñapatakiw luräna, luririnakasti akham sapjjänwa: “Jutapjjam, jichhajj mä jachʼa marka saytʼayañäni, ukhamarak torrepas alajjpachar puriñkama lurasipjjañäni. Ukhamatwa taqeninsa uñtʼatäñäni, ukatsti janirakiw taqe aka oraqpacharu aywitatkañäniti” sasa. Ukampis uka torre lurañ janiw tukuyapkänti, kunattejj Jehová Diosaw “taqe jaqenakan parlanakapjja mayjtʼayjjäna” ukat torre luririnakas oraqpacharuw aywitatawayjjapjjäna (Gén. 11:1-4, 8, 9). Supayajj jupakis yupaychayasiñ munkchïnjja, janiw amtapajj phoqhaskänti. Kunattejj Jehová Diosaw cheqa yupaychäwi jan chhaqtañapatak jarkʼaqawayi, ukat jichhürunakanjja sapürutjamaw Diosan yupaychirinakapajj jukʼampi jiljjattaski.

21, 22. 1) ¿Kunatsa kʼari yupaychäwejj cheqa yupaychäwi jan chhaqtayawayki? 2) ¿Kunsa jutïr yatichäwin yatjjataskañäni?

²¹ Cheqpachansa, kʼari yupaychäwejj janipuniw cheqa yupaychäwi chhaqtaykaspati. ¿Kunatsa? Suma Yatichiri Jehová Diosaw Arupa jan chhaqtañapatakejj jarkʼaqawayi, Juparakiw sutipsa jaqenakaru uñtʼayawayi ukat kunatï cheqäki uks yatichaskakistu (Isa. 30:20, 21). Kunapachatï Jehová Diosarojj kunjamtï Jupajj yupaychayasiñ munki ukham yupaychtan ukhajja, kusisitätanwa. Ukatwa Diosar yupaychañ toqetjja suma saytʼatäñasa, ukat taqe chuymarakiw Jehová Diosaru ukat qollan ajayupampi irpkistu ukar confiyañasa.

²² Jutïr yatichäwinjja aka toqenakatwa yatjjataskañäni: kunjamsa kʼari yatichäwinakajj uñstawayi, Bibliarjamajj kunjamsa ukanakan kʼarïtap amuysna ukat kunjamsa Jehová Diosajj cheqa yatichäwinakampi bendiciwayistu. Taqe ukanakajj Diosan suma herenciapawa.