Eski ou apresye nou leritaz spirityel?
Eski ou apresye nou leritaz spirityel?
“Bondye in pran swen depi okonmansman tou bann [nasyon] pour swazir parmi zot en pep pour son non.”—AKT 15:14.
KI OU TI POU REPONN?
Ki bann krwayans ki pa baze lo Labib e dan ki fason nou’n ganny proteze pour pa krwar dan zot?
Dan ki fason nou’n ganny delivre avek pese ek lanmor?
Ki ou latitid anver souvrennte Zeova e ou lentegrite anver li?
1, 2. (a) Kwa sa “latant David” e ki mannyer i ti pou ganny rekonstri? (b) Lekel ki servi ansanm konman bann serviter Zeova ozordi?
PANDAN en renyon enportan konsey direkter Zerizalenm lannen 49 N.L., disip Zak ti dir: “Simon [Pyer] in rakont nou konman Bondye in pran swen depi okonmansman tou bann [nasyon] pour swazir parmi zot en pep pour son non. Parol bann profet i dakor avek sa, parey Lekritir in deklare: ‘Apre sa mon pou retournen, e mon pou repar latant David ki’n tonbe. Mon pou relev sa ki’n tonm an-rin, e redres li, pour ki leres dimoun i rod Senyer, ensi ki tou bann nasyon ki port mon non. La sa ki [“Zeova,” NW] in dir. Limenm ki’n fer tou sa bann keksoz depi byen lontan.’”—Akt 15:13-18.
2 “Latant [ouswa lakour rwayal] David” ti tonbe kan Lerwa Tsidkya ti ganny retire konman lerwa. (Amos 9:11) Me, sa “latant” ti pou ganny rekonstri par Zezi, desandans David ki ti pou rennyen konman Lerwa pour touzour. (Ezek. 21:27; Akt 2:29-36) Parey Zak ti fer resorti dan sa renyon istorik, sa profesi Amos ti ganny akonplir ler bann zeritye sa Rwayonm ti konmans ganny rasanble parmi bann Zwif ek lezot nasyon. Ozordi, bann Kretyen swazir ki ankor lo later ek plizyer milyon “lezot mouton” i reini ansanm pour anons laverite dan Labib konman bann serviter Zeova.—Zan 10:16, NW.
PEP ZEOVA I FER FAS AVEK EN DEFI
3, 4. Ki mannyer pep Zeova ti sirviv spirityelman Babilonn?
3 Ler bann Zwif ti ganny anmennen an egzil Babilonn, i ti kler ki “latant David” ti’n tonbe. Vi ki fo larelizyon ti’n ranpli rezyon Babilonn, ki mannyer pep Bondye ti pou sirviv spirityelman pandan sa 70 an ki zot ti an egzil laba depi 607 A.N.L. ziska 537 A.N.L.? Dan menm fason ki nou osi nou sirviv konman pep Zeova dan sa lemonn ki anba kontrol Satan. (1 Zan 5:19) En leritaz spirityel byen ris ki’n ede pour ki nou sirviv.
4 Nou annan Parol Bondye Labib konman en parti nou leritaz. Bann Zwif ki ti an egzil Babilonn ti napa Lekritir Sakre an antye, me zot ti annan konnesans lo Lalwa Moiz, ki ti enkli osi sa Dis Komannman. Zot ti konn “bann kantik Siyon,” zot ti kapab rapel plizyer proverb e zot ti konn tre byen leksperyans bann premye serviter Zeova. Wi, sa bann egzile ti plere kan zot ti mazin Siyon e zot pa ti oubliy Zeova. (Lir Psonm 137:1-6. *) Sa ti gard zot vivan spirityelman, menm ler zot ti Babilonn laba kot i ti annan en kantite fo krwayans ek pratik.
TRINITE PA NOUVO
5. Ki laprev ki montre ki bann Babilonnyen ek Ezipsyen ti ador bann bondye trinite?
5 Dan letan lontan, trinite oubyen ador trwa bondye ti en laspe enportan larelizyon Babilonn. Enn sa bann krwayans ti enplik Sin (en bondye lalin), Shamash (en bondye soley), ek Ishtar (en bondye fertilite ek lager). Dan Lezip lontan, en bondye ti normalman marye avek en bondye madanm ki ti osi annan en garson pour li, e “zot ti form trwa bondye ouswa trinite kot sa papa pa ti touzour sa sef. Parler i ti ganny konsidere konman en prens, me sa bondye madanm ki ti bondye prensipal sa pei.” (New Larousse Encyclopedia of Mythology) Parmi bann bondye Ezipsyen, i ti annan Osiris, Isis ek zot garson Horus ki ti form en trinite.
6. Ki mannyer ou ti pou eksplik Trinite e dan ki fason nou’n ganny proteze pour pa krwar dan sa fo lansennyman?
6 Bann legliz Kretyen osi i krwar dan Trinite oubyen dan trwa bondye. Zot dir ki Papa, Garson ek lespri sen i form en sel Bondye. Me sa i en repros lo souvrennte Zeova, i konmsi i an trwa personn, e i annan zis en tyer lotorite. Pep Zeova in ganny proteze avek bann tel mansonz akoz zot dakor avek sa parol enspire: “Ekoute, O Izrael: Zeova nou Bondye, i en sel Zeova.” (Det. 6:4) Zezi ti sit sa parol, me eski i annan okenn vre Kretyen ki pa ti pou dakor avek li?—Mark 12:29.
7. Akoz i enposib pour en dimoun ki krwar dan Trinite batize pour senboliz son dedikasyon senser anver Bondye?
7 Sa fo krwayans konsernan Trinite i lekontrer avek sa lord ki Zezi ti donn son bann disip pour “fer tou pep vin [son] bann disip. Batiz zot o non di-Per, di-Fis e di-Sent-Espri.” (Mat. 28:19) Pour ganny batize konman en vre Kretyen e konman en Temwen Zeova, en dimoun i bezwen rekonnet siperyorite Zeova, nou Papa, ensi ki pozisyon ek lotorite Zezi, Garson Bondye. En kandida batenm i devret osi krwar ki lespri sen i lafors aktif Bondye, i pa form parti en Trinite. (Zen. 1:2) En dimoun ki kontinyen krwar dan Trinite pa pou zanmen kapab batize pour senboliz son dedikasyon senser anver Zeova. Pa nou vreman rekonesan ki nou leritaz spirityel i protez nou avek sa bann lansennyman ki dezonor Bondye!
PRATIK DEMONYAK I TIR SON VILEN LATET!
8. Ki pwennvi bann Babilonnyen konsernan bann bondye ek demon?
8 I ti annan en kantite fo lansennyman, fo bondye, demon ek pratik demonyak Babilonn akoz sa kantite pwennvi relizye ki ti egziste. The International Standard Bible Encyclopaedia i dir: “Bann demon ti dezyenm pli enportan apre bann bondye laba Babilonn, akoz zot ti annan pouvwar pour frap bann dimoun avek diferan maladi fizik ouswa mantal. En kantite sa bann larelizyon ti pe zis konsantre lo en lalit avek sa bann demon e partou kote dimoun ti pe fer lapriyer avek bann bondye pour ed zot lalit avek sa bann demon.”
9. (a) Apre legzil Babilonn, ki mannyer bokou Zwif ti les zot ganny enfliyanse par bann fo lansennyman relizye? (b) Ki mannyer nou ganny proteze avek sa danze pour volonterman rod kontak avek demon?
9 Apre legzil Babilonn, en kantite Zwif ti tonm dan bann pratik ki kont lansennyman Labib. Anmezir pwennvi bann Grek ti propaze, plizyer Zwif ti les zot ganny kontrole par bann demon akoz zot ti adopte sa pwennvi ki bann demon i kapab move ouswa bon. Nou leritaz spirityel i protez nou avek sa danze pour volonterman esey rod kontak avek bann demon akoz nou konnen ki Zeova i deteste pratik demonyak bann Babilonnyen. (Iza. 47:1, 12-15) Deplis, nou ganny gide par pwennvi Bondye lo pratik demonyak.—Lir Deterononm 18:10-12; * Revelasyon 21:8.
10. Kwa ki kapab ganny dir konsernan bann pratik ek krwayans Gran Babilonn?
10 Pa zis bann Babilonnyen ki ti pratik bann keksoz demonyak, bann siporter Gran Babilonn, lanpir mondyal fo larelizyon osi i fer li. (Rev. 18:21-24) The Interpreter’s Dictionary of the Bible i dir: “[Gran] Babilonn i enplik plis ki zis en lanpir ouswa kiltir. Son definisyon i pli baze lo son idolatri ki son pozisyon zeografik ouswa kan ki i ti aparet.” (Vol. 1, p. 338) Gran Babilonn i ankor egziste avek son ta pratik demonyak, idolatri ek lezot pese ankor, me i pa pou reste pour lontan.—Lir Revelasyon 18:1-5.
11. Ki lavertisman nou’n pibliye konsernan pratik demonyak?
11 Zeova ti dir: “Mon pa kapab siporte ki zot servi pouvwar mazik.” (Iza. 1:13) Pratik demonyak ti zwe en gran rol dan fason panse e swadizan spirityalite bann dimoun dan diznevyenm syek. Zion’s Watch Tower Me 1885 ti dir: “Sa krwayans ki dimoun mor i vivan dan en lot monn ouswa kondisyon i pa nouvo. I ti form parti bann lansennyman dan letan lontan e i sours tou bann lezann.” Sa lartik ti azoute ki bann demon in fer krwar ki zot bann dimoun mor oubyen lespri bann dimoun mor ki pe esey kominik avek bann dimoun vivan e akoz sa, bann demon in reisi enfliyans fason panse ek aksyon bokou dimoun. Enn nou bann premye liv avek tit What Say the Scriptures About Spiritism? i donn preski menm lavertisman, zis parey nou bann piblikasyon resan.
ESKI BANN NANM PE SOUFER DAN EN LOT LEMONN?
12. Salomon ti ganny enspire pour dir kwa konsernan kondisyon bann mor?
12 “Tou bann ki posed konnesans laverite,” i kapab reponn sa kestyon. (2 Zan 1) Nou sirman dakor avek parol Salomon: “En lisyen vivan i pli vomye ki en lyon mor. Annefe bann vivan i konnen ki zot pou mor; me bann mor, zot pa konn nanryen ditou . . . Tou sa ki ou lanmen i trouve pour fer, fer li avek ou lafors, parski napa ni travay, ni plan, ni konnesans, ni lasazes dan Seol [latonm bann imen] sa landrwa kot ou pe ale.”—Ekle. 9:4, 5, 10.
13. Dan ki fason bann Zwif ti ganny afekte par kiltir ek larelizyon Grek?
13 Bann Zwif ti dan en pozisyon pour konn byen laverite lo bann dimoun mor. Me, kan Lagres ti ganny divize ant bann zeneral Aleksann Legran, bann zefor ti pe ganny fer pour inifye Zida ek Siri atraver bann larelizyon ek kiltir Grek. An rezilta sa, bann Zwif ti aksepte sa fo lansennyman konmkwa nanm bann imen i imortel e ki i annan en lot lemonn kot zot kapab ganny tourmante. Bann Grek pa ti premye pour krwar dan en lot lemonn kot bann nanm i soufer, akoz bann Babilonnyen ti mazinen ki i ti “annan en lot lemonn . . . en monn efreyan . . . kot bann bondye ti dirize e bann demon ti byen for e vyolan.” (The Religion of Babylonia and Assyria) Wi, bann Babilonnyen ti krwar ki nanm i imortel.
14. Ki Zob ek Abraam ti konnen lo lanmor ek rezireksyon?
14 Menm si Zob, sa zonm drwat ti napa Labib, i ti konn laverite konsernan bann mor. I ti osi realize ki Zeova i en Bondye lanmour ki pou annan sa dezir pour resisit bann mor. (Zob 14:13-15) Abraam osi ti krwar dan rezireksyon. (Lir Ebre 11:17-19.) Vi ki i enposib pour resisit en dimoun ki pa kapab mor, sa bann zonm ki ti annan lakrent pour Bondye pa ti krwar ki nanm bann imen i imortel. San okenn dout, lespri sen Bondye ti ed Zob ek Abraam pour konpran leta bann dimoun mor e pour annan lafwa dan rezireksyon. Sa bann laverite i osi form parti nou leritaz.
DELIVRANS ATRAVER RANSON I ENPORTAN
15, 16. Dan ki fason nou’n ganny delivre avek pese ek lanmor?
15 Nou rekonesan ki Bondye in osi revel laverite konsernan sa mwayen ki i’n servi pour delivre nou avek pese ek lanmor ki nou’n erite avek Adan. (Rom. 5:12) Nou konnen ki Zezi “pa’n vin pour ganny servi me pour servi e pour donn son lavi konman en pri [oubyen ranson] pour liberasyon bokou dimoun.” (Mark 10:45) Pa i byen pour konnen ki nou’n ganny delivre par ranson ki Kris Zezi in peye!—Rom. 3:22-24.
16 Bann Zwif ek lezot nasyon dan premye syek ti bezwen repantir zot pese e demontre lafwa dan sakrifis Zezi. Si non, zot pa ti pou ganny pardonnen. Ozordi osi i parey. (Zan 3:16, 36) Si en dimoun i reste atase avek bann fo lansennyman parey Trinite ek nanm imortel, i pa pou kapab benefisye avek sa ranson. Me, nou nou kapab. Nou konn laverite lo “Garson byenneme [Bondye]. Par li, Bondye in delivre nou e i’n pardonn nou pese.”—Kol. 1:13, 14.
PERSEVERE KONMAN EN PEP POUR NON ZEOVA!
17, 18. Kote nou kapab trouv bann lenformasyon itil konsernan nou listwar e ki mannyer nou pou benefisye si nou tir en leson avek zot?
17 I annan en kantite ki ti kapab ganny dir konsernan vre lansennyman ki nou konnen, nou leksperyans konman serviter Bondye ek bann benediksyon spirityel e fizik ki nou gannyen. Pour plizyer dizenn lannen, Yearbook in koz lo bann leksperyans enteresan konsernan nou aktivite dan plizyer pei dan lemonn antye. Nou listwar i ganny rakonte dan sa de DVD Faith in Action, Parti 1 ek 2, e dan bann piblikasyon parey Jehovah’s Witnesses—Proclaimers of God’s Kingdom. Nou bann magazin osi i souvan rakont leksperyans tousan nou bann fer ek ser.
18 Nou benefisye si nou egzamin vre listwar lorganizasyon Zeova, parey pep Izrael ti benefisye kan zot ti reflesir lo lafason ki Bondye ti delivre zot dan lesklavaz Lezip. (Egz. 12:26, 27) Konman en zonm aze ki ti kapab rakont bann aksyon ekstraordiner Zeova, Moiz ti sipliy bann Izraelit: “Mazin letan pase, konsider bann lannen pase zenerasyon apre zenerasyon. Demann ou papa e li i pou kapab rakont ou, demann bann vyeyar e zot pou kapab dir ou.” (Det. 32:7) Konman ‘pep Zeova e bann mouton son laplenn,’ nou tou nou kontan pour loue li e koz avek lezot lo son bann aksyon pwisan. (Ps. 79:13) Deplis, i byen pour nou egzamin nou listwar, tir en leson avek e fer nou plan pour lavenir.
19. Vi ki nou annan lalimyer spirityel, ki nou devret fer?
19 Nou rekonesan ki nou pa pe ale vini dan fernwanr, me nou annan lalimyer spirityel sorti kot Bondye. (Prov. 4:18, 19) Alor, annou etidye Parol Bondye o profon e partisip avek devouman pour anons laverite avek lezot avek menm leta lespri ek lapriyer ki sa psalmis ti fer pour loue Souvren Senyer Zeova: “Mon pou koz lo ou ladrwatir, zis pour ou tousel. O Bondye, ou’n ansenny mwan depi mon zenes e ziska prezan mon ankor pe koz lo ou travay merveye. Menm ziska lavyeyes ek seve blan, O Bondye, pa kit mwan, ziska ki mon koz lo ou lebra for avek sa zenerasyon, lo ou pwisans avek tou sa bann ki pou vini.”—Ps. 71:16-18.
20. Ki kestyon enportan ki osi bezwen ganny reponn e ki mannyer ou santi anver zot?
20 Konman pep dedye Zeova, nou konn lenportans bann kestyon konsernan souvrennte Bondye ek lentegrite bann imen. Nou proklanm laverite ki Zeova i Souvren Liniver e i merit tou nou devosyon senser. (Rev. 4:11) Avek led son lespri sen, nou osi anons sa bon nouvel avek bann ki annan limilite, pans bann leker blese e rekonfort sa bann ki dan dey. (Iza. 61:1, 2) Malgre bann zefor Satan pour domin pep Bondye ek limanite, nou vreman apresye nou leritaz spirityel e nou determinen pour gard nou lentegrite anver Bondye e loue Souvren Senyer Zeova la konmela e pour touzour.—Lir Psonm 26:11; 86:12. *
[Not anba lo paz]
^ par. 4 Psonm 137:1-6: “1 O bor bann larivyer Babilonn, la nou ti asize. Nou ti osi plere ler nou ti mazin Siyon. 2 Dan sa lavil, nou ti met nou larp anpandan lo bann pye pepliye. 3 Akoz laba, bann ki ti fer nou prizonnyen ti demann nou parol en kantik, e bann ki ti sikann nou ti demann nou pour rezwir an dizan: ‘Sant pour nou en kantik Siyon.’ 4 Ki mannyer nou kapab sant en kantik pour Zeova lo en later etranze? 5 O Zerizalenm, si mon oubliy ou, fer mwan plito bliy mon lanmen drwat. Si mon ti aret mazin ou, 6 si mon ti aret fer Zerizalenm vin pli gran sours lazwa pour mwan, fer ki mon lalang i kol dan mon pale.”
^ par. 9 Deterononm 18:10-12: “10 Fodre pa ki i annan personn parmi zot ki fer son garson oubyen son fiy pas dan dife, ki devinen, ki fer mazik oubyen ki enterpret bann siny oubyen ki sorsye, 11 oubyen en dimoun ki zet en sor lo lezot oubyen ki konsilte en dimoun ki kominik avek demon oubyen ki predir bann levennman oubyen ki kominik avek bann mor. 12 Tou dimoun ki fer sa bann keksoz i en keksoz detestab pour Zeova e akoz sa bann keksoz detestab Zeova ou Bondye pe pous zot devan ou.”
^ par. 20 Psonm 26:11: “Tandis ki mwan, mon pou demontre lentegrite dan lafason ki mon marse. Liber mwan e montre mwan faver.” 86:12: “Mon loue ou, O Zeova mon Bondye, avek tou mon leker e mon pou glorifye ou non pour touzour.”
[Kestyon]
[Portre lo paz 8]
[Bwat lo paz 11]
Ki mannyer nou’n ganny proteze avek fo krwayans?
“Ekoute, O Izrael: Zeova nou Bondye, i en sel Zeova.”—Det. 6:4
“Mon pa kapab siporte ki zot servi pouvwar mazik.”—Iza. 1:13
“Bann mor, zot pa konn nanryen ditou.”—Ekle. 9:5, 10
You May Also Like
LATOUR VEYER (EDISYON LETID)
Annan lafwa solid ki Rwayonm Bondye pou akonpli son plan
Zeova ti servi sis lalyans pour garanti ki son Rwayonm pou akonpli son plan. Ki mannyer sa bann lalyans i kapab ranforsi nou lafwa?
