1, 2. (a) Kico tabata “e cas [of, tabernakel] di David” y con Dios a lanta esaki bek? (b) Ken ta Jehova su sirbidornan awe?

 DURANTE un reunion importante di e cuerpo gobernante cu a tuma luga na Jerusalem na aña 49 di nos era, discipel Santiago a bisa: “Simeon [Pedro] a conta detayadamente con Dios pa prome biaha a dirigi su atencion na e nacionnan pa saca for di nan un pueblo pa carga su nomber. Y e palabranan di e Profetanan ta cuadra cu esaki, manera ta para skirbi: ‘Despues di e cosnan aki lo mi bin bek y reconstrui e cas di David cu a basha abou; lo mi reconstrui su ruinanan y restaur’e, pa e hendenan cu resta, hunto cu hende di tur nacion, esta, hende cu ta carga mi nomber, por haci esfuerso pa busca Jehova. Esaki ta loke Jehova ta bisa, kende ta esun cu ta haci e cosnan aki y cu tabata conoci for di tempo antiguo.’”—Echo. 15:13-18.

² “E cas [reino of dinastia] di David” a basha abou ora nan a baha Rey Sedekias for di trono. (Amos 9:11) Sinembargo, e profecia di Amos ta mustra cu Dios lo a lanta e “cas”, of tabernakel, ey bek, esta nombra un otro rey—un descendiente di David, Hesus—pa ta Rey pa semper. (Eze. 21:27; Echo. 2:29-36) Y manera Santiago a indica, e profecia aki ta mustra tambe cu tanto Hudiu como hende di tur nacion lo a ser ungi pa goberna hunto cu Hesus den cielo. Awe, e cristiannan ungi cu ainda ta riba tera y miyones di Hesus su ‘otro carnenan’ ta Jehova su sirbidornan. Hunto nan ta predica e berdad di Bijbel awe.—Juan 10:16.

3, 4. Kico a yuda e Hudiunan cu tabata na Babilonia keda spiritualmente fuerte?

³ Ora e Hudiunan a ser hiba den cautiverio na Babilonia na aña 607 prome cu nos era, tabata bisto cu  “e tabernakel di David” a basha abou. Babilonia tabata pesta cu religion falso. Con e pueblo di Dios lo por a keda fiel durante 70 aña den exilio na Babilonia? Wel, esey ta di e mes manera cu e pueblo di Dios awe ta keda fiel den e mundo di Satanas. (1 Juan 5:19) Como sirbidor di Jehova, nos tin nos herencia spiritual cu ta yuda nos keda fiel.

⁴ Parti di nos herencia spiritual ta e Palabra di Dios. E Hudiunan cu tabata den exilio na Babilonia no tabatin henter e Bijbel. Nan tabata conoce solamente e Ley di Moises cu su Dies Mandamento. Nan tabata sa “e canticanan di Sion”, nan por a corda hopi proverbio y nan tabata conoce hopi relato di otro sirbidornan di pasado cu a keda fiel na Jehova. E Hudiunan den exilio tabata yora pasobra nan kier a bay nan tera bek. Si, nan no a lubida Jehova. (Lesa Salmo 137:1-6.) Tur esaki a yuda nan keda spiritualmente fuerte a pesar cu nan tabata rondona pa siñansa- y practicanan pagano na Babilonia.

5. Ki sorto di dios trinitario hende den antiguo Babilonia y Egipto tabata adora?

⁵ For di antiguedad, hende tabata adora tres dios den un. E Babilonionan, por ehempel, tabata adora un dios trinitario cu tabata consisti di Sin (e dios di luna), Shamash (e dios di solo) y Ishtar (e diosa di guera y fertilidad). Den Egipto di antiguedad, nan tabatin e creencia cu mayoria di nan diosnan ta casa y tin yiu y cu cada famia divino tabata un trinidad cu a consisti di un dios tata, dios mama y dios yiu. Aunke e tres diosnan aki hunto tabata un dios, nan no tabata igual: Tin ora, un tabatin mas poder of autoridad cu e otro, dependiendo di e rol cu e tabatin na un dado momento. Un dios trinitario di Egipto a consisti di e dios Osiris, e diosa Isis y nan yiu homber Horus.

6. Kico e siñansa di Trinidad ta encera, y con nos a libra nos mes di e siñansa falso aki?

⁶ Awe cristiandad tambe ta papia di un Trinidad: Dios Tata, Dios Yiu y Spirito Santo. Pero e siñansa aki ta ofende Dios, pasobra e ta duna e impresion cu Jehova no ta Todopoderoso sino apenas un tercera parti di un supuesto dios. Pero e pueblo di Dios si a libra nan mes di e siñansa falso ey pasobra nan ta kere den e palabranan inspira aki: “Tende, o Israel, Jehova nos Dios ta un Jehova.” (Deu. 6:4, NW) Hesus a cita e palabranan aki, y cristiannan berdadero ta convenci di esey.—Mar. 12:29.

7. Dicon un hende cu ta kere den Trinidad no por batisa como Testigo di Jehova?

⁷ E doctrina di Trinidad ta bay contra e mandato cu Hesus a duna su siguidornan pa ‘haci hende di tur nacion su discipel, y batisa nan den nomber di e Tata y di e Yiu y di spirito santo.’ (Mat. 28:19) Esaki ta nifica cu un persona cu kier batisa como cristian berdadero, esta como un Testigo di Jehova, mester reconoce cu e Tata ta un Dios supremo y cu e tin autoridad riba su Yiu, Hesus. Ademas, e mester compronde cu spirito santo ta e forsa activo di Dios y no parti di un Trinidad. (Gen. 1:2, NW) Pues, un persona cu ta sigui kere den Trinidad no por batisa como simbolo di su dedicacion na Jehova Dios. Nos ta masha contento cu, debi na nos herencia spiritual, nos no ta bay tras di un siñansa falso cu ta deshonra Dios.

8. Segun e Babilonionan, ki poder e demoñonan y e diosnan tabatin?

⁸ Aparte di kere den dios falso, doctrina pagano y demoño, e Babilonionan tabata kere tambe den spiritismo cu tabata  un practica comun pa nan. E buki The International Standard Bible Encyclopaedia ta bisa cu e Babilonionan tabata kere cu demoño por dal hende cu maleza. Pesey, nan tabata resa pidi nan diosnan pa proteha nan contra e demoñonan.

9. (a) Con bin hopi Hudiu a cuminsa kere den ideanan religioso falso? (b) Dicon nos si ta ser proteha contra e peligernan di spiritismo?

⁹ Despues cu e Hudiunan a sali for di sclavitud na Babilonia, hopi di nan a cuminsa bay tras di ideanan religioso falso. Segun cu conceptonan Griego a bira mas popular, hopi Hudiu a bira victima di influencia di demoño pasobra nan a cuminsa kere cu mescos cu tin mal demoño tin bon demoño tambe. Pero Bijbel ta spierta nos pa keda leu di cosnan di demoño, pasobra nos sa cu Dios a condena e practicanan spiritista cu tabata tuma luga na Babilonia. E spiertamento aki tambe ta parti di nos herencia spiritual. (Isa. 47:1, 12-15) Si, Jehova su punto di bista tocante spiritismo ta un proteccion pa nos.—Lesa Deuteronomio 18:10-12; Revelacion 21:8.

10. Di unda Babilonia e Grandi a haya su creencianan y practicanan pagano?

¹⁰ No ta den antiguo Babilonia so nan tabata practica spiritismo. Awe, hopi hende cu ta apoya Babilonia e Grandi, e imperio mundial di religion falso, tambe ta mete cu spiritismo. (Rev. 18:21-24) Religion falso di awendia realmente tin hopi similaridad cu religion di antiguo Babilonia for di unda nan creencianan y practicanan pagano a origina. Pronto Babilonia e Grandi lo ser destrui pa motibo di tur su practicanan spiritista, idolatria y otro picanan.—Lesa Revelacion 18:1-5.

11. Ki spiertamento nos a publica tocante spiritismo?

¹¹ Jehova a declara: “Mi no por soporta e uzo di poder magico.” (Isa. 1:13, NW) Den siglo 19, hopi hende tabata practica spiritismo. Pesey, e Zion’s Watch Tower di mei 1885 a trata e topico ey. E revista a bisa: ‘E creencia cu e mortonan ta na bida y cu nan ta den un otro mundo no ta nada nobo. E creencia aki tin su raiz den mitologia y tabata parti di religionnan di antiguedad.’ Ademas, e revista a indica cu ta e demoñonan ta papia cu e bibonan y haci comosifuera ta e mortonan ta papia, y di e manera ey, e demoñonan ta influencia conducta y manera di pensa di hopi hende. E foyeto Kico e Scritura Ta Bisa Tocante Spiritismo? (na Ingles) cu a ser publica algun aña despues a duna spiertamentonan similar, mescos cu algun di nos publicacionnan mas recien.

12. Kico Dios a inspira Salomon pa bisa tocante e mortonan?

¹² “Tur [hende] cu a siña conoce e berdad” por contesta e pregunta ey. (2 Juan 1) Si, nos ta di acuerdo cu Salomon, kende a bisa: “Un cacho bibo ta mihor cu un leon morto. Pasobra e bibonan sa cu nan lo muri, ma e mortonan no sa nada ... Tur loke bo man haya pa haci, hacie cu tur bo forsa; pasobra no tin ni actividad ni planificacion ni sabiduria den Seol [graf], caminda bo ta bay.”—Ecl. 9:4, 5, 10.

13. Con religion y cultura Griego a influencia e Hudiunan?

¹³ E Hudiunan lo mester tabata sa e berdad encuanto morto. Pero despues cu Grecia a ser dividi entre e generalnan di Alehandro e Grandi, gobernantenan Griego a purba di uni Juda y Siria forsando e pueblo Hudiu pa acepta religion y cultura Griego. Di e manera ey, e Hudiunan a cuminsa kere den e siñansanan  falso cu e alma ta inmortal y cu e ta ser tormenta den un otro mundo. No ta e Griegonan a bin cu e idea cu tin un luga invisibel caminda e mortonan ta sufri, ya cu segun e buki The Religion of Babylonia and Assyria ta e Babilonionan tabata kere cu a existi un otro mundo caminda diosnan y demoñonan cu hopi poder tabata tortura hende. Si, e Babilonionan tabata kere cu alma ta inmortal.

14. Kico Job y Abraham tabata sa encuanto morto y resureccion?

¹⁴ Aunke e homber husto Job no tabatin e Scritura, e tabata sa e berdad encuanto morto. E tabata sa tambe cu si e muri, Jehova, nos Dios amoroso, lo tabata ansioso pa resucit’e. (Job 14:13-15) Abraham tambe a kere den resureccion. (Lesa Hebreonan 11:17-19.) Como cu ta imposibel pa resucita un persona cu no por muri nunca, e hombernan aki no a kere cu alma ta inmortal. Sin duda, Dios su spirito santo a yuda tanto Job como Abraham compronde den ki condicion e mortonan ta y pone fe den resureccion. E berdadnan aki tambe ta parti di nos herencia.

15, 16. Con nos ta ser rescata for di pica y morto?

¹⁵ Nos ta masha contento cu Dios a revela tambe con e lo libra nos di e pica y morto cu nos a hereda for di Adam. (Rom. 5:12) Nos sa cu Hesus “no a bin pa ser sirbi, sino pa sirbi y pa duna su alma como rescate a cambio di hopi hende.” (Mar. 10:45) Ta importante pa sa tocante “e liberacion cu ta basa riba e rescate cu Cristo Hesus a paga.”—Rom. 3:22-24.

¹⁶ Den prome siglo, tanto Hudiu como personanan no Hudiu mester a arepenti di nan picanan y pone fe den e sacrificio  di rescate di Hesus pa nan por a haya pordon. Mescos ta conta pa nos awe. (Juan 3:16, 36) Si un hende ta sigui kere den doctrina falso, tal como Trinidad y inmortalidad di alma, e no por beneficia di e rescate. Pero nos si ta beneficia di esaki. Dicon? Pasobra nos sa e berdad encuanto e “Yiu stima [di Dios], pa medio di ken nos a haya nos liberacion mediante e rescate, esta, pordon di nos picanan.”—Col. 1:13, 14.

17, 18. Unda nos por haya informacion valioso encuanto nos historia, y dicon nos ta beneficia di loke nos ta siña tocante dje?

¹⁷ Nos por sigui papia hopi cos mas tocante loke Dios ta siña nos, tocante e experencianan cu nos ta pasa aden como su sirbidornan y di e bendicionnan spiritual y material cu nos ta ricibi. Pa decadanan caba, nos Anuarionan ta contene relatonan emocionante di nos actividadnan rond mundo. Nos por siña tambe di e historia di Testigonan di Jehova si nos wak e videonan Un Historia di Fe Bibo, Parti 1 y 2, y lesa publicacionnan manera Testigonan di Jehova—Proclamadornan di e Reino di Dios (tur disponibel na Spaño). Nos revistanan tambe ta contene hopi experencia conmovedor tocante nos kerido rumannan den fe.

¹⁸ Un analisis balansa di e historia di Jehova su organisacion lo beneficia nos hopi, mescos cu e pueblo di Israel a beneficia ora nan a reflexiona riba e manera cu Jehova a libra nan for di sclavitud na Egipto. (Exo. 12:26, 27) Ora Moises tabata di edad avansa, el a bisa e Israelitanan: “Corda e dianan di prome aya, considera e añanan di tur generacion. Puntra bo tata, y e lo conta bo, bo ancianonan, y nan lo bisa bo.” (Deu. 32:7) Como ‘Jehova su pueblo y carnenan cu e ta pastorea’, cu goso nos tur ta duna alabanza na dje y conta hende di su obranan poderoso. (Sal. 79:13) Ademas, loke nos ta siña for di nos historia como pueblo di Jehova lo yuda nos sigui sirbie.

19. En bista cu nos tin e luz di e berdad, kico nos mester haci?

¹⁹ Nos ta masha contento cu nos tin e luz di e berdad di Dios y no ta cana den scuridad. (Prov. 4:18, 19) Pesey, laga nos sigui studia e Palabra di Dios diligentemente y predica e berdad cu celo na otronan. Nos tin e mesun sintimento cu e salmista cu a bisa: “Lo mi bin cu e echonan poderoso di Señor DIOS; lo mi menciona bo husticia, di bo so. O Dios, bo a siña mi for di mi hubentud; y te ainda mi ta declara bo obranan maraviyoso. Y hasta ora mi bira bieu, cu cabey blanco, o Dios, no bandona mi, te ora mi declara bo poder na e generacion aki, bo poder na tur esnan cu ta bin.”—Sal. 71:16-18.

20. Kico nos ta reconoce, y kico ta bo actitud relaciona cu esaki?

²⁰ Como Jehova su pueblo, nos ta reconoce cu ta e tin derecho di goberna humanidad y cu hende mester keda fiel na dje. Pesey, nos ta proclama e berdad incuestionabel aki: Jehova ta e Soberano di henter universo, kende merece e adoracion di henter nos curason. (Rev. 4:11) Y cu yudansa di su spirito, nos ta predica e bon noticia na hende afligi, yuda hende cu curason kibra y consola esnan tristo. (Isa. 61:1, 2) A pesar di Satanas su esfuersonan envano pa goberna humanidad, incluso e pueblo di Dios, nos ta determina pa keda fiel na nos Señor Soberano Jehova. Danki na nos herencia spiritual, nos por keda fiel y sigui alaba Jehova pa semper.—Lesa Salmo 26:11; 86:12.