1, 2. (a) Ngera mle “blil a David”? Ngmilekerang e lmuut el obekedechor? (b) E te rua techang a remesiungel a Jehovah er chelechang?

 NGAR er a miting er a chelechad er a ruungerachel el mla er ngii er a beluu er a Jerusalem er a rak er a 49 er a uriul er a Kristus, e a Jakobus a dilu el kmo: “A Simeon [Petrus] a mla ouchais el kmo a Dios a mle ketengel loldingel rar Chisentail e ngilteterir ar chedal ra chelsir el kirel a ngklel. A tikingir ar profet a dirrek el redomel ra ikang el llechukl el kmo, ‘Uriul er itiang e ak lmuut el mei, e lmuut lomekedechor ra mleukel blil a David; el meruul a ikel mlongkongk el mekedecherur, el kirel me tirikel mlo medechel me tirikel rokui el mlokedong a ngklek er bebrir el Chisentail a mo osiik ra Rubak; a Rubak, el ngikel olecholt a ikal tekoi ra irechar el mei, a dmu el uaisei.’”​—Rel. 15:13-18, BT.

² A “blil a David” a melutk el kirir a reking el mengilt er a chelsel a telungalek er ngii. E tiang a mleuukel er sera lemengai er a deruchall a ulebongel el king er a Juda el Sedekia. Engdi a ulaoch a mesaod el kmo a Dios a lmuut el mo “mekedecherur.” (Amo. 9:11) El belkul a kmo nglmuut el mo er ngii a ta er a king el Jesus el ngii a mei el okiu a klengelakel er a David. (Ese. 21:27; Rel. 2:29-36) Me a Jakobus a ulechotii el kmo tia el ulaoch a dirrek el ulemlaoch el kirir a Rechijudea me a Rechisentael el kmo te dirrek el mo ngellitel el king el obengkel a Jesus el ngar er a eanged. Me tirka el ngellitel me a rebetok el miliol el ‘kuk bebil el sib’ er a Jesus a omerk er a klumech el kirel a klemerang.​—Jn. 10:16.

3, 4. Ngerang a ngilsuterir a Rechijudea el ngar er a Babilon el mo kmeed er a Jehovah?

³ Sel taem er a lemengai a Rechijudea el mo kelebus er a Babilon e ngulebeketakl el kmo a “blil a David” a  mleuukel. A rechad er a Babilon a millisiich a klsuul el osisechakl. Me te milekerang a rechedal a Dios e mle sebechir el kiei el blak a rengrir er a chelsel aike el 70 el rak el lengar er a Babilon? Te mle ua rechedal a Jehovah er chelechang el melemolem el blak a rengrir er a chelsel a beluulechad er a Satan. (1 Jn. 5:19) Me a remesiungel a Jehovah a ngar er ngii a ileakl el dikesir el ngosuterir el melemolem el blak a rengrir.

⁴ Chelecha el taem e ngar er ngii a cherrungel el Biblia el ta er a dikesed er a Dios. A Rechijudea el mla er a Babilon a dimlak a cherrungel el Biblia er tir, engdi te mle medengei a Llach er a Moses me aike el Teruich el Llach. Te mle medengei a “chelitakl el kirel a Sion” me a betok el osisechakl. Te dirrek el mle medengei a chisir a rebebil er a irechar el tir a mle blak a rengrir el mo er a Jehovah. Me te lilangel el oureng el lmuut el mo er a belurir, e dirrek el dimlak lobes er a Jehovah. (Monguiu er a Psalm 137:1-6.) Me aika el rokui a ngilsuterir el mo kmeed er a Jehovah alta e te kiliei el teloi er a klsuul el osisechakl me a mekngit el omeruul er a beluu er a Babilon.

5. Ngera el omengull er a trinidad a luluumerang a rechad er a Babilon me a Ekipten er a irechar?

⁵ A irechar e a rechad a millisiich a omengull el kirel a trinidad el ngii a edei el uldak el chelid. El ua tiang, a ta er a omengull er a rechad er a Babilon el kirel a trinidad a chelid er a buil, chelid er a sils, me a chelid er a cheroll me a mekemad. E a rechad er a Ekipten a milengull er a edei el uldak el chelid el chedam, chedil me a ngalek. Me alta e aika el chelid a mle trinidad, engdi ngdimlak lomes el ua di losisiu. A ta er a chelid er a Ekipten a chelid el Osiris, chelid el dil el Isis, me a ngelekir el sechal el Horus.

6. Ngerang a Trinidad? E ngera uchul me a rechedal a Jehovah a diak loumerang er ngii?

⁶ Chelecha el taem e a Klsuul Klekristiano a olisechakl el kmo ngar er ngii a Trinidad, me a lechub e ngchimo el Dios el Chedam me a Ngalek me a Chedaol Reng. E tia el klaumerang a di rullii a Jehovah el mo mechitechut e le ngua lak el cherrungel el Dios. Me a rechedal a Dios a mukerreu me ngdiak el chelsechusem er tia el klsuul el osisechakl. Kede mla suubii el kmo a Jehovah el Dios er kid a di ngii el tang a Dios. (Dut. 6:4) Me a Jesus a ulemelekl aika el tekoi, me a remera el Kristiano a oumerang a tekingel.​—Mk. 12:29.

7. Ngera kirel a chad el mo oumerang el kirel a Dios er a uchei er a bo lemetecholb el mo mera el Kristiano?

⁷ A Jesus a dilu er a rulebengkel el mo meruul er a rechad el mo ‘obengkel, e melecholb er tir loba ngklel a Chedam, ma Ngalek, ma Chedaol Reng.’ (Mt. 28:19) E tiang a belkul a kmo a chad el soal el mo metecholb el mo mera el Kristiano e ta er a Resioning er a Jehovah a kmal kirel el oumerang el kmo a Chedam el Jehovah a ngar er ngii a klisichel el mengedereder er a Jesus el ngii a Ngelekel el mlei er tia el chutem el mo mad el olubet el tenget. Ngii el chad a kmal diak el kirel el mo oumerang el kmo a Chedaol Reng a tedebechel a Trinidad, e ngbai sel oureor el klisichel a Dios. (Gen. 1:2) Me tia el tekoi a tedebechel a ileakl el dikesed e le kede mo medengei el kmo a osisecheklel a Trinidad a di oltuub er a Dios e klsuul el tekoi.

8. A rechad er a Babilon te uluumerang a ngerang el kirir a rechelid er tir me a remekngit el anghel?

⁸ A rechad er a Babilon a uluumerang aike el chelid er tir e dirrek el uluumerang er a remekngit el anghel me a ngii di el tekoi er a olai. A The International Standard Bible Encyclopaedia a kmo a rechad er a  Babilon a uluumerang el kmo a remekngit el anghel a sebechir el olsecher er a rechad. Me te milluluuch el mo er a chelid er tir el olengit me lomekerreu er tir er a remekngit el anghel.

9. (a) Te milekerang a rebetok el chad er a Judea e suub a klsuul el osisechakl el kirir a remekngit el anghel? (b) Kede mekerang e mukerreu er a ngii di el tekoi er a olai?

⁹ A rebetok el Chijudea a mlo oumerang aika el klsuul el osisechakl er sel taem er a lengar er a Babilon. E a uriul e a rebetok er tir a mlo oumerang er sel uldesuir a Rechigrik el kmo a remekngit el anghel a sebechir el meruul a ungil. Engdi a Dios a mengelechel el kmo a ngii di el tekoi er a olai, me a omelasem el mengedecheduch er a remekngit el anghel a kdekudel e mekngit el tekoi. Me tia el klemerang a tedebechel a ileakl el dikesed. (Isa. 47:1, 12-15) Me kede mukerreu e le kede oltngakl a ngii di el tekoi er a olai el ua ledilung a Jehovah.​—Monguiu er a Duteronomi 18:10-12; Ocholt 21:8.

10. Ngmla er ker el mei a mekngit el omeruul me a cheleuid el uldasu er a Klou el Babilon?

¹⁰ Ngdi osisiu er chelechang, a rebetok el chedal a klsuul el klechelid a meruul a tekoi er a olai el di ua rechad er a Babilon er a irechar. Tiaikid a uchul me a Biblia a omekedong a rokui el klsuul el klechelid er tia el chutem el Klou el Babilon. (Och. 18:​21-24) Me aika el klsuul el klechelid a di uaike el klechelid er a Babilon er a irechar el lemlengai er ngii a cheleuid el uldasu me a mekngit el omeruul. Me a Klou el Babilon a di kmedu el mo nguemed e le ngii el melisiich a tekoi er a olai, omengull el bleob me a lmuut el bebil er a mekngit el tekoi.​—Monguiu er a Ocholt 18:1-5.

11. Ngera el uleklatk el kirel a tekoi er a olai a ngar er a babilenged?

¹¹ A Jehovah a kmo: Ngkmal “diak el sebechek el mtekengelii a renguk” er a ngii di el rolel a tekoi er a olai. Ngar er aike el rak er a 1800, e a rebetok el chad a mirruul a tekoi er a olai. Me sel Zion’s Watch Tower er a May 1885 a milsaod er tia el tekoi. Ngmillekoi el kmo aike el klechelid er a irechar a ullisechakl el kmo a rulekoad a dirk ngar, e aike el cheldecheduch el kirel a rokui el siukang er sel taem a milengai a uchetemel er a uldasu el kmo a rulekoad a dirk ngar e kiei er a ta er a beluulechad. Ngdirrek el melekoi el kmo a remekngit el anghel a meruul er tir el mo ua teletelel a mla mad el chad el melasem el mengedecheduch er a redi ngar, e tiang a mlo uchul e ngmlo sebechir el mengesuseu a uldesuir me a omerellir a rebetok el chad. Me sel uleakuchei el babilenged el What Say the Scriptures About Spiritism? a melisiich a osisiu el uleklatk, el di uaike el beches el babilenged er chelechang.

12. A Dios ngulemekrael er a Salomon el mo meluches a ngera el tekoi el kirir a rulekoad?

¹² “Tirkel rokui el medengelii a klemerang” a medengei el kmo a rulekoad a diak el chuarm er a ringel. (2 Jn. 1) A Salomon a milsaod el kirir tirke el ngar er a “beluu er a kodall” el debull el kmo: “Ele chad el bilis a bai ungil er a ulekoad el laion. A re chad a medengei el kmo te mo mad, e ngdi rulekoad a diak a ngeral lodengei. . . . A ngii di le ngerang el bo moruul er ngii, msisichau el rullii, e ng diak le bor ngii a ureor ma uldasu ma lechub e ng klemedengei ma lechub e le llomeserreng er a beluu er a kodall el kau a mor ngii.”​—Oli. 9:4, 5, 10.

13. Ngera el klaumerang me a siukang er a Rechigrik a blo loumerang er ngii a Rechijudea?

¹³ A Jehovah a di mla ouchais er a Rechijudea er a klemerang el kirir a rulekoad. Engdi sera lesiseb a Rechigrik el nguu a beluu er a Juda me a Siria, e te ulerrimel er a rechad el mo oltirakl a siukang me a klechelid  er tir. Me ngmlo uchul e a Rechijudea a mlo oumerang el kmo ngar er ngii a kmung ngerang el tuobed er a bedengel a mla mad el chad e melemolem el ngar. Te mlo oumerang el kmo ngtuobed el mo mukcharm er a chelsel a ta er a beluulechad. A Rechigrik a dimlak lekot el chad el mo oumerang er a basio er a ringel. A babier el The Religion of Babylonia and Assyria a kmo a rechad er a Babilon a uluumerang el kmo ngar er ngii a ta er a beluulechad el lekiei er ngii a remesisiich el chelid me a remekngit el anghel el omekcharm er a rechad. Me ngbleketakl el kmo a rechad er a Babilon a uluumerang el kmo ngar er ngii a ngar er a bedengel a chad el melemolem el ngar er a uriul er a lemad ngii el chad.

14. Ngera ngmle medengei a Job me a Abraham el kirel a kodall me a okiis?

¹⁴ Alta e a Job a dimlak a Biblia er ngii, engdi ngmle medengelii a klemerang el kirir a rulekoad. Ngdirrek el mle medengei el kmo a lsekum e ngmad e a betik a rengul el Jehovah el Dios a kmal semeriar el mo olekiis er ngii. (Job 14:13-15) A Abraham a dirrek el uluumerang er a okiis. (Monguiu er a Hebru 11:17-19.) Me ngbleketakl el kmo tirka el chad a dimlak loumerang el kmo a rulekoad a di ngar e kiei er a ta er a basio. Ngkmal diak el sebeched el olekiis er a chad el diak el sebechel el mad. A klisichel a Dios a ngilsuir a Job me a Abraham el mo oumerang er a okiis. Me aika el klemerang el tekoi a dirrek el dikesed er a Dios.

15, 16. Kede mekerang e mosobel er a klengit me a kodall?

¹⁵ Ngkired el oba omereng el saul e le Dios a mla subedid er a rolel e ngulsebelid er a klengit me a kodall. (Rom 5:12) Kede medengei el kmo a Jesus a “dimlak le mei el mo siungel, ng bai mlei el mo mesiou e tongetengii a klengar er ngii el mo ngbetir a re betok el chad.” (Mk. 10:45)  Ngdmeu a rengud e le kede medengelii a “ngubet el ngara Kristus Jesus.”​—Rom 3:22-24, BT.

¹⁶ A irechar e a rechad el mle sorir el musubes a kngterir a mle kirir el obult er a klengit el lurruul e mo oumerang er a olubet el tengetengel a Jesus. Me ngdi osisiu el kired er chelechang. (Jn. 3:16, 36) Me a lsekum a chad a soal el oumerang a klsuul el osisecheklel a Trinidad me a klengar er a chad el diak lengemed, e ngdiak el sebechel el nguu a klungiolel er a olubet el tenget. Engdi kid a sebeched e le kede medengelii a klemerang el kirel a Ngelekel a Dios, “el uchul osebeled, el melubet er kid er a klengit.”​—Kol. 1:13, 14.

17, 18. Ngsebeched el mesuub er a reksi er a Resioning er a Jehovah er ker? E ngera uchul me nguchul a klungioled a dosuub el kirel?

¹⁷ Tia el ileakl el dikesed a uldimukl er a bebil er a tekoi el Dios a olisechakl er kid, e dirrek el mla ngosukid e omekngeltengat er kid el kirel. Aike el Yearbook er kid a dirrek el louchais er kid er a rolel e a rechedal a Jehovah el meliuekl er a beluulechad a melemolem el mesiou er ngii. Ngdirrek el sebeched el mo medengelii a reksi er a Resioning er a Jehovah el ngar er aike el video el Faith in Action, Part 1 me a 2, me a babier el Jehovah’s Witnesses​—Proclaimers of God’s Kingdom. Me aike el magazine er kid a blechoel el ouchais el kirel a tekoi el dilubech el mo er a rudam me a rudos er kid.

¹⁸ Ngkmal ungil a dosuub el kirel a reksi er a Resioning er a Jehovah, el di ua rechad er a Israel el mle uchul a klungiolir sel losuub er a rolel e a Dios a ullengeseu er tir. (Exo. 12:26, 27) Sera lechudelang a Moses e ngdilu er a Rechisrael el kmo: “Molatk er a mla memong, er a ngar a mong; molengit er a demam me le sbedau er a ikel dilubech, molengit er a re mechuodel me louchais a chisel a ngar a mong.” (Dut. 32:7) Kede rokui el dmeu a rengud el oldanges er a Dios e ouchais er a rebebil el kirel aike el bla leruul. (Psa. 79:13) Me aike el tekoi el bla desuub er a reksi er a rechedal a Jehovah a dirrek el ngosukid el mo melemolem el mesiou er ngii.

19. Ngera kired el meruul e le kid el medengelii a klemerang?

¹⁹ Kede kmal oba omereng el saul e le kede medengelii a klemerang el kirel a Dios e kiei er a chelsel tia el mekngit el beluulechad. (Osi. 4:18, 19) Me dolemolem el mesuub er a Tekingel a Dios e domerk er ngii el mo er a rebebil. Kede di ua ta er a milluches er a psalm el dilu el kmo: “Ak mo oldanges er a llemeltem, e diak a ngodech el kuldanges er ngii. Dios, ser a kkekerei el mer chelechang el mullisechakl er ngak, mak dirk ouchais a mengasireng el omerellem. Dios, a bo kchuodel e kcheball, e lak mobes er ngak. Mobengkek el dimerkmo kuchisii a klisichem el mor a bek el cheroll el merael el mei.”​—Psa. 71:16-18.

20. A blakerreng er kid el mo er a Jehovah ngolechotel a ngerang? Ngua ngerang a uldesuem el kirel a llemeltel a Jehovah el mengedereder me a omengull el mo er ngii?

²⁰ Sel leblak a rengud el mo er a Jehovah e kede ochotii el kmo kede oumerang er sel llemeltel el mengedereder er kid, e ngii a dirrek el rredemelel a nguu a omengull er kid. (Och. 4:11) Me a Jehovah a meskid a klisichel el ngosukid el mo ouchais er a ungil chais el mo er a rebebil, e mesterir a ongelaod me a omelatk. (Isa. 61:1, 2) A Satan a kmal diak a techellel el mo mengedereder er a rechedal a Dios me a rokui el chad. Me a dikesed er a Dios a ngosukid me kede melemolem el mesisiich e kmeed er a Jehovah me bo el sebeched el mesiou er ngii er chelechang el mo cherechar.​—Monguiu er a Psalm 26:11; 86:12.