Ita hafolin ita-nia liman-rohan espirituál ka lae?
“Maromak . . . halibur husi jentiu sira povu ida ba Nia naran.”—APOS 15:14.
1, 2. (a) “David nia uma” mak kona-ba saida? Oinsá mak uma neʼe harii fali? (b) Sé mak serbí hamutuk nuʼudar Jeová nia povu ohin loron?
IHA tinan 49, kuandu grupu administradór halibur an iha Jerusalém, Tiago hatete: “Simão [Pedro] haktuir tiha oinsá Maromak hanoin uluknanain atu halibur husi jentiu sira povu ida ba Nia naran. Profeta nia liafuan laʼo mós nuneʼe, nuʼudar hakerek nanis: ‘Neʼe hotu tiha, Haʼu sei fila fali mai no harii fali David nia uma neʼebé monu tiha; husi nia rahun sira Haʼu sei harii nia no foti nia fali, atu ema sira neʼebé sei hela sei buka Naʼi, no mós jentiu sira neʼebé tan sira ema bolu Haʼu naran. Naʼi, neʼebé halo loloos buat hotu-hotu dehan nuneʼe, neʼebé ema hatene horiuluk kedas.’”—Apos 15:13-18.
2 “David nia uma” mak kona-ba liurai sira neʼebé mai husi David nia umakain. Ida-neʼe “monu tiha” kuandu liurai ikus husi rai-Judá, naran Zedequias, mak lakon ninia pozisaun nuʼudar liurai. (Amós 9:11) Maibé, uma neʼe sei harii fali ho liurai ida seluk, katak David nia bei-oan Jesus. (Eze 21:27; Apos 2:29-36) Tiago hatudu katak liafuan husi profeta Amós mós fó-hatene nanis katak ema judeu no ema jentiu sira sei hetan kose-mina atu sai liurai hodi ukun hamutuk ho Jesus iha lalehan. Ohin loron, ema kose-mina sira-neʼe hamutuk ho ema rihun ba rihun husi Jesus nia “bibi seluk” haklaken lia-loos husi Bíblia.—Joao 10:16.
EMA JUDEU SIRA SAI DADUR
3, 4. Saida deʼit mak ajuda ema judeu sira iha Babilónia atu hakbesik nafatin ba Jeová?
3 Kuandu ema judeu sira sai dadur iha Babilónia, ida-neʼe hatudu ho klaru katak “David nia uma” monu tiha ona. Tanba Babilónia neʼe nakonu ho relijiaun falsu, saida mak ajuda Maromak nia povu atu kontinua laran-metin ba Jeová durante tinan 70 neʼebé sira moris nuʼudar dadur? Buat neʼebé ajuda sira hanesan deʼit ho buat neʼebé ajuda Jeová nia povu ohin loron atu laran-metin nafatin iha Satanás nia mundu aat neʼe. (1 Joao 5:19) Neʼe mak liman-rohan espirituál neʼebé Jeová nia atan sira hetan.
4 Ohin loron, ita iha Bíblia kompletu nuʼudar liman-rohan neʼebé ita simu. Maski ema judeu sira iha Babilónia la iha Bíblia kompletu, maibé sira hatene Moisés nia Ukun-Fuan neʼebé inklui mós Ukun-Fuan Sanulu. Sira mós hatene “Sião nia knananuk sira”, konsellu diʼak barak husi Salomão no ema seluk, no istória kona-ba Maromak nia atan sira iha tempu uluk neʼebé hatudu laran-metin ba Jeová. Ema judeu sira-neʼe tanis hodi hanoin sira-nia rai, no sira la haluha Maromak Jeová. (Sal 137:3; lee Salmo 137:1, 2, 6. a) Buat sira-neʼe hotu ajuda sira atu hakbesik nafatin ba Jeová maski sira hela iha Babilónia neʼebé nakonu ho hanorin falsu no toman neʼebé la loos.
DOUTRINA TRINDADE LA’ÓS BUAT FOUN
5. Ema Babilónia no Egiptu iha tempu antigu fiar maromak trindade saida deʼit?
5 Iha tempu antigu, ema adora maromak trindade oioin. Porezemplu, ema Babilónia adora maromak trindade, katak maromak fulan nian, maromak loro-matan nian no maromak-feto hahoris oan no funu nian. Ema Egiptu adora família maromak nian, katak aman maromak, inan maromak ho oan maromak. Maski maromak sira-neʼe mak trindade, maibé ema hanoin katak maromak sira-neʼe la hanesan ba malu. Maromak trindade ida ba ema Egiptu mak maromak Orisis, maromak-feto Isis, no sira-nia oan Horus.
6. Saida mak doutrina Trindade? Tanbasá mak Jeová nia povu la fiar ida-neʼe?
6 Ohin loron, relijiaun kristaun barak mós hanorin doutrina Trindade, katak Aman Maromak, Oan Maromak no espíritu santu mós Maromak, sira naʼin-tolu Maromak ida deʼit. Maibé, hanorin ida-neʼe halo ema hanoin katak Jeová la iha forsa boot tanba nia parte ida deʼit husi Maromak. Jeová nia povu hetan protesaun husi hanorin falsu neʼe tanba Bíblia hatete katak “Jeová, ita-nia Maromak mak Jeová mesak ida deʼit”. (Deut 6:4) Jesus mós temi fali liafuan neʼe, no ema kristaun loos fiar buat neʼebé Jesus hatete.—Mc 12:29.
7. Ema neʼebé hakarak hetan batizmu nuʼudar ema kristaun loos tenke fiar saida kona-ba Maromak?
7 Jesus haruka ninia dixípulu sira atu “hanorin nasaun hotu-hotu; sarani sira hodi Aman, Oan no espíritu santu nia naran”. (Mt 28:19) Neʼe katak ema neʼebé hakarak hetan batizmu nuʼudar ema kristaun loos hodi sai Testemuña ba Jeová, ema neʼe tenke fiar katak Aman Jeová mak boot liu Jesus, no katak Jesus mak Maromak nia Oan neʼebé mai toʼo mundu atu fó ninia moris nuʼudar sakrifísiu. Ema neʼe mós tenke fiar katak espíritu santu mak Maromak nia forsa, laʼós parte husi Trindade. (Gên 1:2) Hatene lia-loos neʼe mak parte husi ita-nia liman-rohan espirituál, no ita kontente tebes tanba ida-neʼe proteje ita husi doutrina Trindade neʼebé la hatudu respeitu ba Maromak.
MATAN-DOOK NIA ATIVIDADE
8. Ema Babilónia fiar saida deʼit kona-ba maromak no demóniu sira?
8 Ema iha Babilónia laʼós fiar deʼit ba maromak sira, maibé sira mós fiar ba demóniu no matan-dook nia atividade oioin. Tuir livru ida, ema Babilónia fiar katak demóniu, ka anju aat sira, bele halo ema moras. Ema hanesan neʼe iha toman atu halo orasaun ba sira-nia maromak sira no husu protesaun husi anju aat sira.—International Standard Bible Encyclopaedia.
9. (a) Oinsá mak ema judeu barak komesa fiar hanorin falsu oioin? (b) Oinsá mak ita hetan protesaun husi matan-dook nia atividade?
9 Kuandu ema judeu sira moris nuʼudar dadur iha Babilónia, sira barak komesa fiar hanorin falsu oioin. Liutiha tempu balu, sira mós komesa fiar ema gregu nia hanoin katak demóniu balu aat maibé balu diʼak. Maibé, Maromak hatete katak hahalok naran deʼit neʼebé envolve ho demóniu sira mak sala no lori perigu ba ema. Hatene lia-loos ida-neʼe mós parte husi ita-nia liman-rohan espirituál. (Isa 47:1, 12-15) Ita hetan protesaun hodi halo tuir buat neʼebé Jeová hatete atu la simu matan-dook nia atividade.—Lee Deuteronômio 18:10-12; b Apokalipse 21:8.
10. Saida mak Babilónia Boot? Relijiaun falsu sira-nia hanorin no hahalok sira mai husi neʼebé?
10 Ohin loron, ema barak neʼebé tuir relijiaun falsu envolve an ho matan-dook nia atividade oioin, hanesan ho ema Babilónia iha tempu antigu. Tan neʼe mak Bíblia bolu relijiaun falsu hotu iha mundu neʼe nuʼudar Babilónia Boot. (Apok 18:21-24) Relijiaun falsu sira-neʼe hanesan duni ho relijiaun iha Babilónia iha tempu antigu tanba husi fatin neʼe mak habelar hanorin falsu no hahalok laloos. Hahalok sira-neʼe inklui matan-dook nia atividade, adora lulik no estátua sira, no hahalok sala seluk, maibé lakleur tan Maromak sei halakon Babilónia Boot neʼe.—Lee Apokalipse 18:1-5.
11. Ita-nia livru sira fó avizu saida kona-ba matan-dook nia atividade?
11 Maromak Jeová hatete katak nia “la bele tahan” ho matan-dook nia atividade. (Isa 1:13) Antes tinan 1900, ema barak iha rai-Estadus Unidus envolve an ho matan-dook nia atividade oioin. Tan neʼe, livru Zionʼs Watch Tower husi Maiu 1885 fó avizu kona-ba matan-dook nia atividade no envolve an ho anju aat sira. Livru neʼe hatete relijiaun iha tempu antigu hanorin katak ema mate sei moris hela, no hanorin falsu neʼe mak sai nuʼudar hun ba ema nia fiar oioin husi kultura hotu. Livru neʼe mós hatete katak anju aat sira finje sai ema neʼebé mate ona hodi kontakta ho sira neʼebé moris hela, no ida-neʼe halo ema barak fiar ba matebian. Ita-nia livru ida seluk neʼebé halo iha tempu uluk ho títulu What Say the Scriptures About Spiritism? mós fó avizu kona-ba neʼe, no ohin loron mós ita iha livru balu neʼebé koʼalia kona-ba neʼe.
EMA MATE TERUS IHA MUNDU SELUK KA LAE?
12. Maromak leno Salomão atu hatete saida kona-ba ema neʼebé mate ona?
12 Ema hotu neʼebé “hatene lia-loos” hatene katak ema mate la terus ida. (2 Joao 1) Salomão hatete: “Asu neʼebé moris diʼak liu fali leaun neʼebé mate. Tanba ema neʼebé moris hatene katak sira sei mate; maibé ema neʼebé mate ona, sira la hatene buat ida . . . Buat hotu neʼebé ó-nia liman bele halo, halo ida-neʼe ho ó-nia kbiit tomak, tanba la iha serbisu, ka planu, ka koñesimentu ka matenek iha rate, fatin ida neʼebé ó sei bá.”—Ecle 9:4, 5, 10.
13. Ema judeu sira simu fiar saida husi ema gregu nia relijiaun no kultura?
13 Jeová fó-hatene ona lia-loos kona-ba mate ba ema judeu sira. Maibé, kuandu ukun-naʼin sira husi rai-Grésia mak ukun Judá no Síria, sira koko atu habelar ema gregu nia relijiaun no kultura. Rezultadu mak ema judeu sira komesa fiar katak kuandu ema ida mate, parte ida husi ninia isin sei moris hela. Sira fiar katak parte ida-neʼe bá mundu seluk no hetan terus. Maibé, hanorin ida-neʼe laʼós ema gregu mak hahú. Livru ida hatete katak husi tempu uluk kedas ema Babilónia fiar ona kona-ba mundu seluk, no katak iha fatin neʼe demóniu no maromak sira neʼebé iha forsa boot haterus ema neʼebé mate ona. (The Religion of Babylonia and Assyria) Sin, ema Babilónia fiar katak ema nia klamar sei moris hela kuandu sira mate.
14. Job no Abraão hatene saida kona-ba mate no moris-hiʼas?
14 Maski Job la iha Bíblia, maibé nia hatene lia-loos kona-ba buat neʼebé akontese kuandu ema mate. Nia mós hatene katak maski nia mate, Maromak Jeová neʼebé domin sei hakarak halo nia moris hiʼas fali. (Jó 14:13-15) Abraão mós tau fiar ba moris-hiʼas. (Lee Ebreu 11:17-19.) Klaru katak Maromak nia atan sira-neʼe la fiar katak matebian sira sei moris hela iha fatin seluk, tanba se sira moris hela karik, sira la bele moris hiʼas fali. Maromak nia espíritu santu ajuda Job no Abraão atu tau fiar ba moris-hiʼas. Lia-loos sira-neʼe mós parte husi ita-nia liman-rohan.
JESUS NIA MORIS NUʼUDAR SAKRIFÍSIU
15, 16. Oinsá mak ita hetan salvasaun husi sala no mate?
15 Ita agradese mós ba Maromak tanba nia fó-hatene ita lia-loos kona-ba oinsá mak nia salva ita husi sala no mate. (Rom 5:12) Ita hatene katak Jesus mai “atu serbí ema, no atu saran nia moris atu soi ema hotu”. (Mc 10:45) Ita kontente tanba ita hatene kona-ba “maksoin iha Kristu Jesus”!—Rom 3:22-24.
16 Iha apóstolu sira-nia tempu, ema judeu no jentiu sira presiza arrepende an husi sira-nia sala no tau fiar ba Jesus nia moris nuʼudar sakrifísiu atu hetan perdua. Nuneʼe mós ho ita ohin loron. (Joao 3:16, 36) Se ema ida kaer metin ba hanorin falsu sira, hanesan doutrina Trindade ka hanorin kona-ba ema nia klamar neʼebé sei moris hela, ema neʼe la bele hetan bensaun husi Jesus nia sakrifísiu. Maibé ita bele hetan bensaun tanba ita hatene lia-loos katak ‘iha Oan doben mak ita hetan maksoin no perdua ba ita-nia sala’.—Kol 1:13, 14.
KONTINUA SERBÍ JEOVÁ!
17, 18. Oinsá mak ita bele aprende istória kona-ba Testemuña ba Jeová? Tanbasá mak diʼak atu aprende kona-ba neʼe?
17 Ita-nia liman-rohan espesiál inklui mós buat seluseluk neʼebé Maromak hanorin ita no dalan oioin neʼebé nia ajuda no fó bensaun ba ita. Ita-nia Buku Tahunan fó sai informasaun kona-ba atividade neʼebé Jeová nia povu halaʼo iha mundu tomak. Ita mós bele hatene istória kona-ba Testemuña ba Jeová iha DVD Beraksi dengan Iman, Bagian 1, 2 no mós iha livru oioin hanesan Saksi-Saksi Yehuwa—Pemberita Kerajaan Allah. Liután neʼe, Livru Haklaken no Matan-moris bá! mós fó sai ita-nia irmaun-irmán sira-nia esperiénsia.
18 Tan neʼe, diʼak atu ita aprende istória kona-ba Jeová nia organizasaun, hanesan ema Israel iha tempu uluk aprende kona-ba oinsá mak Maromak salva sira husi ema Egiptu. (Êx 12:26, 27) Kuandu Moisés sai katuas ona, nia hatete ba ema Israel: “Hanoin-hetan tempu uluk, hanoin didiʼak kona-ba tinan neʼebé liu ona husi jerasaun ba jerasaun; husu ó-nia aman, no nia sei fó-hatene ba ó; husu ó-nia katuas sira, no sira sei hatete ida-neʼe ba ó.” (Deut 32:7) Ita hotu haksolok hodi hahiʼi Maromak Jeová no fó-hatene ema seluk kona-ba buat neʼebé nia halo ona. (Sal 79:13) Loos duni, buat neʼebé ita aprende husi ita-nia istória sei ajuda ita atu nafatin kontinua serbí Jeová.
19. Tanba ita hatene lia-loos, ita presiza halo saida?
19 Ita agradese ba Maromak Jeová tanba maski ita hela iha mundu aat neʼebé iha nakukun laran, maibé liuhusi lia-loos nia fó naroman mai ita. (Prov 4:18, 19) Tan neʼe, mai ita nafatin estuda Maromak nia Liafuan no badinas atu haklaken lia-loos ba ema seluk. Ita sente hanesan ho ema neʼebé hakerek salmu ida hodi kanta: “Haʼu sei koʼalia kona-ba Ita-nia justisa, Ita-nian deʼit. Oh, Maromak, Ita mak hanorin haʼu husi haʼu-nia tempu joven, no toʼo agora haʼu nafatin fó-hatene kona-ba buat furak oioin neʼebé Ita halo. Toʼo haʼu katuas no fuuk mutin, oh, Maromak, labele husik haʼu, toʼo haʼu fó-hatene kona-ba buat neʼebé Ita-nia liman halo ba jerasaun neʼe, ba sira hotu neʼebé atu mai, kona-ba Ita-nia kbiit.”—Sal 71:16-18.
20. Hodi laran-metin ba Jeová, ita hatudu saida? Ita sente oinsá kona-ba Jeová nia direitu atu ukun no kona-ba ita-nia adorasaun?
20 Hodi laran-metin ba Jeová, ita hatudu katak Jeová mak iha direitu atu ukun no katak nia merese atu simu ita-nia adorasaun. (Apok 4:11) Jeová fó ninia espíritu santu atu ajuda ita haklaken lia-foun diʼak ba ema seluk hodi fó kmaan no esperansa ba sira. (Isa 61:1, 2) Maski Satanás hakaʼas an atu domina Maromak nia povu no ema hotu, neʼe saugati deʼit. Sin, ita-nia liman-rohan espirituál ajuda duni ita atu serbí nafatin Maromak Jeová ho laran-metin ohin loron no ba nafatin.—Lee Salmo 26:11; c 86:12. d
a Salmo 137:1, 2, 6: “1 Iha Babilónia nia mota sorin, iha neʼebá mak ami tuur. Ami mós tanis bainhira ami hanoin fali Sião. 2 Iha ai-hun sira iha rai neʼe ami tara ami-nia arpa.” “6 Husik haʼu-nia nanál belit metin ba haʼu-nia ibun leten, se haʼu la hanoin-hetan ó, se haʼu la halo Jerusalém sai aas liu buat neʼebé fó ksolok boot mai haʼu.”
b Deuteronômio 18:10-12: “10 Iha imi-nia leet, labele iha ema ruma neʼebé halo nia oan mane ka feto liu husi ahi, ema neʼebé uza sasiʼik, ema neʼebé uza masonik, ka ema ruma neʼebé buka sinál, ka matan-dook, 11 ka ema neʼebé fekit ema seluk, ka ema ruma neʼebé bá hasoru matan-dook, ka siʼikdór kona-ba akontesimentu sira, ka ema ruma neʼebé husu ba ema mate. 12 Tanba Jeová hakribi ema hotu neʼebé halo buat hirak-neʼe, no tanba buat foʼer hirak-neʼe mak Jeová, ita-nia Maromak, hadook sira husi imi-nia leet.”
c Salmo 26:11: “Kona-ba haʼu, ho haʼu-nia laran-metin mak haʼu sei laʼo. Oh, salva haʼu no hatudu laran-diʼak mai haʼu.”
d Salmo 86:12: “Haʼu hahiʼi Ita ho haʼu-nia laran tomak, oh, Jeová, haʼu-nia Maromak, no haʼu sei fó glória ba Ita-nia naran toʼo tempu neʼebé la bele sura.”
Karik Ita sei gosta
LIVRU HAKLAKEN—ESTUDU NIAN
Hatudu fiar neʼebé metin ba Maromak nia Ukun
Jeová uza aliansa neen atu fó garantia katak ninia Ukun sei kumpre ninia promesa sira. Oinsá mak aliansa sira-neʼe bele ajuda ita atu hametin ita-nia fiar?
DOKUMENTÁRIU
Testemuña ba Jeová—Hatudu fiar liuhusi hahalok, Parte 1: Sai husi nakukun laran
Neʼe mak istória kona-ba povu neʼebé hakarak tebes atu fó sai naroman lia-loos nian maski ema kontra sira. Sira-nia ezemplu sei anima ita atu kontinua serbí Maromak ho laran-metin.
