1, 2. Ka lanarime wuribu gumese memeelibei, ani kaba madügün hamá lubúeingu Bungiu danme le lasuseredun?

LIDAN áriebu le lánina 30 lidan diisi-hati irumu 1938, saragu míñunu gürigia Meriga haganbahaña meha aban programa tidan radiu. Lidan programa aba hariñagun añaten lan lílana planeta Marte lun habuinchagun ubouagu ani hagünrinchaguali lan. Gíbetiña gürigia asaminarutiña luagu inarüniti lan ñunsu ligía ábati hanufudedun. Híbiri áluahatiña ida luba lan haramudagun hawéi lílana amu ubóu ha nege lúnbaña hayabin según hasaminan.

² Uguñe weyu, anihein aban wuribu lunti laduurun yarafa madise. Ani inarüniti. Híruti gibe hamá gürigia madügüntiña ni kata lun hesefurun. Aban wuribu le bürüwaalibei tidan Lererun Bungiu, mama tídangiñe radiu waganbei. Wayanuhaña luagu Arümahedón, wuribu le lunbei lageindaguni Bungiu kóntüra ubóu wuribati le (Aruf. 16:14-16). Danme le lasuseredun, mageindagunbaña lumutuniña Bungiu, gama lumoun, taweiriduba hanigi danme harihini sun le lunbei lasuseredun luma lanarime larufuduni Bungiu lubafu.

3. Ka profesía le lunbei wakutihani, ani ka uagu lunti lubéi súdini lan woun?

³ Profesía le tídanbei Bíbülia lidan Sakaríasi kapítulu 14 ayanuhati woun saragu luagu wuribu le gíribei Arümahedón. Íbini sügühali lan 2,500 irumu lúmagiñe labürüdǘn, súdiniti lidan wabagari uguñe weyu (Rom. 15:4). Aban óunwenbu fánreinti lídangiñe profesía le ayanuhati luagu sügǘ burí le hawinwandubei lumutuniña Bungiu lúmagiñe irumu 1914 —dan le lagumeserunbei Mesíasi arúeiha sielu— luma luagu lanarime burí katei le lunbei lasuseredun yarafa madise. Ayanuhati profesía le luagu biama katei súdiniti, luagu “aban óunwenbu fulasu wayati” luma luagu “léibaagun duna” le áfuridubei  Herusaléngiñe (Sak. 14:4, 8). Sun lubúeingu Bungiu megei wamuti fulasu wayati le lun waramudagun. Ani dan le wafurendeiruni le mini lubéi duna, gunfuranda wamuti súdini lan watun lídangiñe, ani busentiwa giñe wadügüni. Chóuruti wasagaruba lan saragu buiti ánhawa íchiga arigei lun profesía le (2 Fe. 1:19, 20).

4. a) Ídabuga lagumesera “luéyuri laguseragüdüniña Wabureme sun néchanigu”? b) Ka uganu hapurichihabei lubúeingu Heowá lubaragiñe irumu 1914, ani ka hadügübei hábutigu burí néchanigu?

⁴ Gumeseti Sakaríasi kapítulu 14 ayanuha luagu “luéyuri laguseragüdüniña Wabureme sun néchanigu” (aliihoualá Sakaríasi 14:1, 2). Ka san mini lubéi le? Lidan amu dimurei, layanuhaña luagu “luéyuri Aburemei” le agumeserubei dan le “lánihali [lubéi] Bungiu luma Kristu larúeihan ubóu” (Aruf. 1:10, TNM; 11:15). Gumeseti weyu ligía lidan irumu 1914, irumu le nasirua lubéi Larúeihan Mesíasi sielu. Saragu irumu lubaragiñe dan ligía, gumesetiña lubúeingu Heowá apurichiha luagu ‘lagumuchuba lan dan le ichugúbei houn ha mámabaña huríu’ lidan irumu 1914 ani lúmagiñe lanme dan ligía ñeinbei lan saragu turóbuli ubouagu kei masuseredunñahagili lan (Luk. 21:24). Ka hadügübei néchanigu? Lubaragiñe hamuga hadügün gasu lau lubuidun adundehani ligía, adügarügütiña lábutigu polítika luma relihión bula hau kristiánugu anúadiruaña ani éibaaha hamaña. Ani le linarün katei, lau Bungiu suntigabafu hadüga bula lugundun kristiánugu anúadiruaña hagía, le giñe unbei laguarúa “Herusalén le siélubei”, lídangiñetiña Larúeihan Mesíasi, ani óuseratiña keisi lílana (Ebü. 12:22, 28).

5, 6. a) Según lani Sakaríasi profesía, ka meha hadügübei néchanigu kóntüra “uburugu” hama lílana? b) Kátaña san “híbiri” ha ‘erederubaña fulasurugu’?

⁵ Ayanuhaali meha Sakaríasi lidan aban profesía luagu le hadügübei néchanigu. Abürühati: “Ábameti lárügüdüniwa uburugu Herusalén”. “Uburugu” le, lánina Larúeihan Bungiu lúhaburugu Kristu. Ani kristiánugu anúadiruaña ha añaheinguabaña ya ubouagu hagía lílanabaña (Fili. 3:20). Dan le lasuseredunbei Furumiñeti Wuribu Wéiriti, ragüwati “uburugu” dan le hadaürǘnbei fiú kristiánugu ha anügübalin ubaraü lidan fánreinti lánina lóundarun Heowá ya ubouagu, óunahouatiña íbirugu hagía furisunrugun Atlanta (Georgia, Meriga). ‘Asagarahouatu burí muna’ dan le ladügǘnbei sun luwuyerigu marichaü luma wuribani houn íbirigu anúadiruaña hagía luma houn amu íbirigu úaraguatiña. Ani aba giñe hamahadun áganiñu hagía lun tafanreinhóun burí agumeiraguagüdüni ani houcha hagía lun hararamuni lapurichihóun Larúeihan Bungiu, óuseratiña ítara kei híwerutiña.

⁶ Íbini murusunrügüñanu lan meha lubúeingu Bungiu ani eyeehóua ligía hawagu, ouserúa hagía wuriba, siñaguatiña áganiñu houngua lun hagumuchun lau relihión inarüniti, lugundun añahein kristiánugu anúadiruaña ha asigirubaña arufuda úaraguni. Hagía meha “híbiri” ha ‘erederubaña fulasurugu’.

7. Ka wabusenrubei wadügün dan le waliihan luagu úaraguni le harufudubei kristiánugu anúadiruaña?

⁷ Gúnfulihali san profesía le sunsuinagubei dan le lagumuchunbei Furumiñeti Wuribu Wéiriti? Uá. Lugundun hasigiruba buga néchanigu éibaahaña kristiánugu anúadiruaña hau sun hánigu paaná, ha lúnbaña hawinwandun lun súnwandan ya ubouagu (Aruf. 12:17). Kei hénpulu, haritagua wamá luagu éibaahoua hamá lumutuniña Bungiu lidan lidaani Libiaman Wuribu Wéiriti. Adügati úaraguni le harufudubei kristiánugu anúadiruaña lun giñe hawandun lubúeingu Heowá uguñe weyu furumiñeguarügü óuchawaguni, íbini dan le habuguniña  haduheñu ha mama gefentiña luagu Heowá, hamadagu o hánigu paaná lidan wadagimanu o leskuelarugu o dan le ladügǘn bula hau (1 Fe. 1:6, 7). Meberesenga halía lan haganawa, desidírühaña kristiánugu inarünitiña lun “deregüdagumeme [hamá] lidan ábanmeme sífiri [...] manufudedagunga [...] hawéi háganiñu” (Fili. 1:27, 28). Halíabati hadarira lumutuniña Bungiu aramudaguagülei lidan aban ubóu le ídanbei iyereegu hamá? (Huan 15:17-19.)

8. a) Ka gayarabei mini lani wübü tidan Bíbülia? b) Ka mini lubéi “wübü Oliwu”?

⁸ Kei le Larúeihan lubéi Bungiu mini lubéi “uburugu” Herusalén, mosu giñe aban lan sínbolu lani somu katei “wübü Oliwu le luéigiñebei oubaü le ñéingiñe lubéi laboucha weyu libiti Herusalén”. Ka san mini lubéi wübü ligía? Ka uagu mosu lubéi ‘lafanreinragun lidan biama’? Ani lidan binadu ebüréu, wati Heowá lun bián wübü le asaliragubei dan le lafanreinragunbei wübü, “niwübüri burí”, ka uagu? (Aliihoualá Sakaríasi 14:3-5.) Tidan Bíbülia, yúsuati wübü kei sínbolu lani arúeihani, o gumadi. Ani liwübüri Bungiu mini lan abinirúni luma óunigiruni (Sal. 72:3; Isa. 25:6, 7). Ligíati, “wübü Oliwu” le igibuagubei lararama Bungiu, mini lan liricha Heowá lun larúeihani sun ubóu.

9. Ida liña aba lan lafanreinragun “wübü Oliwu lidan biama”?

⁹ Ka san mini lubéi lafanreinragun “wübü Oliwu lidan biama”? Fánreinguati wübü le luéigiñebei oubaü le ñéingiñe lubéi laboucha weyu libiti Herusalén, mini lan le aba lan lafidirun Heowá aban iseri arúeihani: Larúeihan Mesíasi. Bungiu giñe laburemebei libiaman arúeihani le, rúrügü lumuti lúhaburugun Hesukrístu. Ligíati, dan le lafanreinragunbei “wübü Oliwu” lidan biama wübü, aba lagúarun Heowá lun “niwübüri burí”. Lani biángubei.

10. Ka mini lubéi “óunwenbu fulasu wayati” le erederubei labadinagua biama wübü?

¹⁰ Dan le lafanreinragunbei “wübü Oliwu” lidan biama, aba lerederun lamidan luagun nórute, lamidan luagun suru. Aba lerederun lugudi Heowá ligibuagu biángubei wübü, ábati lerederun “aban óunwenbu fulasu wayati” lábugiñe. Ka mini lubéi fulasu wayati ligía? Mini lan adouraguni le heresibirubei lubúeingu Bungiu lábugiñe larúeihan Heowá luma Larúeihan Lisaani. Ítara liña lachoururagüdüni Heowá úabei lan agumuchuti lau relihión inarüniti. Ídabugati lafanreinragua “wubü”? Lidan irumu 1914, irumu le lagumuchagunbei hadaani néchanigu ani aba lagumeseruni Bungiu Larúeihan Mesíasi sielu. Ídabugati hagumesera lubúeingu Bungiu ha inarünitiña anuraha lidoun “fulasu wayati”? Ariha waméi.

11, 12. a) Ídabuga lagumesera anurahani lidoun fulasu wayati le lani Heowá? b) Ka arufudubei lóunigiruñanu lan Heowá lumutuniña lau lanarime lubafu?

¹¹ Ariñagati Hesusu houn lani disipulugu: “Hiyereegudúba lun sun ubóu nuéigiñe” (Mat. 24:9). Wéiritimahali iyereehabuni le lúmagiñe irumu 1914, dan le lagumeserunbei lagumuhóun burí dan lidan ubóu wuribati le. Lidan lidaani Furumiñeti Wuribu Wéiriti, wéiriti meha héibaahaniña áganiñu kristiánugu anúadiruaña, ani kei buga warihini, adügatiña lun hadaürǘn fiú hádangiñe. Íbini ítara siñaguatiña áganiñu houngua lun hagumuchun lau relihión inarüniti. Lidan irumu 1919 aba háfuridun furisunrugugiñe, ani dan lárigiñe, aba halibürerúniwa kristiánugu tídangiñe Babilónia to Wéiriboun, lóundarun sun relihión mama inarüniti ubouagu (Aruf. 11:11, 12). * Ligíali meha  lagumeserun anurahani lidoun fulasu wayati le labadinaguabei luwübüri Heowá.

¹² Lúmagiñe irumu ligía, daruguati fulasu wayati le lani Heowá hau lubúeingu ha inarünitiña lidan sun ubóu. Inarüni máhawa lan lun tafanreinhóun agumeiraguagüdüni tídangiñetu Bíbülia to hani gefentiña luagu Heowá ani máhawa ligía hapurichihan lidan saragu ageiraü luagu saragu dan. Gama lumoun, ka lan yebe hadüga néchanigu, siñabei hagumuchun lau relihión inarüniti. Lóunigiruñanu Heowá lubúeingu lau lanarime lubafu (2 Lur. 11:2).

13. Ida liña wáluahan aramudaguagülei lidan fulasu wayati le lani Heowá, ani ka uagu súdinitima lubéi werederun lidan guentó?

¹³ Ánhawa eredera yarafa lun Heowá ani redei wagíame luéigiñe lóubadina inarüni, dandu ligía kei Hesukrístu, le Liráü, hóunigirubadiwa. Mígirunbei Heowá lun ñein lan ni kata adisedagüdütiwa luéi (Huan 10:28, 29). Busenti Heowá líderaguniwa lun úaragua wamá lun larúeihan luma lun Larúeihan Mesíasi. Ani kei yarafatimahadiwa lubéi lun óunwenbu asufuriruni, súdinitimati lun werederun lidan fulasu wayati le lani Heowá guentó sügǘ lau lidan amu dan.

14, 15. Kaba asusereda houn ha bóugudibaña luéi fulasu wayati le lani Heowá danme le lageindagun kóntüra láganiñu?

¹⁴ Darime lagumuchun ubóu le, lasigiruba Satanási abuleseiraña lumutuniña Bungiu, ani eibu dan héretimabei lagayuahan. Gama lumoun, lachülürüba luéyuri lagumuhóun lagayuahan, danme le lageindagun Heowá hama láganiñu lidan “luéyuri wuribu”. Furangutimahalime luagu aban lan awuribuhati gabafuti Heowá (Sak. 14:3).

¹⁵ Kábati asusereda houn ha úabaña lidan óunwenbu fulasu wayati le lani Heowá lidan dan ligía? Ariñagati Sakaríasi 14:6: “Lídanme weyu ligía lasusereduba úabei lan leiti buiti... deregu luba sun katei” (TNM). Ariñagatu Bíbülia úabei lan “leiti buiti” houn, lidan amu dimurei, meresibirun lubaña Bungiu. Ariñagati giñe profesía luagu ni lan “gabayu, mile, kameyu, burigü hama sun animaalugu ha hámatiña áganiñu tidan hakianpun-agei” —sun ha sínbolu tani hárumate néchanigu— meseriwinbaña lun hageindagun, kamá hamuga aba meseriwinhaña lan lun ni kata ladüga lidiliga. Ariñawagúati giñe lanügüba lan Heowá aban “abeichúni”, o sandi. Larihíba lan yebe lasuseredun katei le o marihínbei lan, lámanichagüdübei hasiadihan áganiñu. Lidan dan ligía “lañaladuba” hagu tuma hañeñe ha éibaahabadiwa. Ida? Ladüga siñá lanme hadügün dañu woun ni lun hayanuhan wuriba luagu Bungiu (Sak. 14:7, 12, 15). Inarüni añaheinbaña lan saragu lánigu Satanási ya ubouagu aranseñu lun hageindagun, gama lumoun ñein hamuti, lagumuchuba Heowá hau (Aruf. 19:19-21). Lasusereduba kei lariñaguni Heremíasi 25:32, 33: “Hame láfaragun Aburemei lidan weyu ligía, herederuba riwagu múarugu lúmagiñe lagumeseha ubóu lumoun lébeha”.

16. Kei le yarafaali lubéi luwuribun Heowá, ka álügüdahani lunbei wadügüni wóuniwagua, ani ka katei lunbei wadügüni?

¹⁶ Lidan wuribu sun gürigia súfuritiña, íbini ha agañeirubaña. Añahein gürigia féridi hamutu haban, hafulasun íbini haricha. Barüti gudemein houn sun gürigia, añahein madaritiña ni kaba lan heiga. Anhein asusereda le woun lidan lanarime asufuriruni, kaba wadüga? Wóunweguba san lau anufudei? Wadüraagubei san wafiñen anhein adügǘwa erei wawagu? Weferidirubei san wemenigin ani ábame tagahüdün wanigi? Lun masuseredun lan woun, súdiniti lun werederun lidan fulasu wayati le lani Heowá ani afiñe wagíame gayara lan lesefuruniwa (aliihoualá Abakuku 3:17, 18).

17, 18. a) Katei san “duna diliti [o wínwanti, TNM]”? b) Ka mini lubéi “barana Hilaali” luma “barana Mediteraniu”? c) Ka desidírü hubéi hadügün?

¹⁷ Lárigiñeme wuribu Arümahedón, ñeinbei “duna diliti [o wínwanti, TNM]” le lunbei láfuridun ñéingiñe lubéi Larúeiha Mesíasi. Ka mini lubéi duna ligía? Sun le líchugubei Heowá woun lun wawinwandun lun súnwandan. Ka mini lubéi kada aban lídangiñe barana le uágubei layanuha profesía? Mini lan ámuñegueinarügü hawuyeri gürigia. “Barana Hilaali”, mini lan gürigia ha lídanbaña umúahaü ani háguyuguba. Ánheinti “barana Mediteraniu” kei le buin liña lubéi lau ibagari, ligía aban sínbolu buiti houn “saragu gürigia” ha lúnbaña hásügürün lau ibagari lárigiñe Arümahedón (aliihoualá Sakaríasi 14:8, 9; Aruf. 7:9-15). Danme le guraaña lílana biángubei sétanu le lídangiñe “duna harumati [...] le íchugubei ibagari”, ábame halibürerúniwa lídangiñe óunweni le galagante habéi lúmagiñe Adán (Aruf. 22:1, 2).

¹⁸ Seremei lóunigiruniwa Heowá ligía wawinwanduba lubéi lárigiñe lagünrinchawagun ubóu wuribati le ani webeluruba lidoun iseri ubóu le lani Bungiu. Lígiati, íbini weyereegudun houn sun néchanigu, sigí wamá lau úaraguni luéigiñe lóubadina Larúeihan Bungiu, áluaha wamá waramudagun lidan fulasu wayati le lani Heowá ani redei wamá ñein.