Reste dan vale proteksyon Zeova
Reste dan vale proteksyon Zeova
“Zeova pou . . . fer lager avek sa bann nasyon parey dan letan ki i ti fer lager, zour batay.”—ZEKA. 14:3.
ESKI OU KAPAB EKSPLIKE?
Lefet ki “montanny pye zoliv” i diviz an de, ki sa i vedir?
Ki sa “tre gran vale” i reprezante e ki mannyer nou kapab reste laba?
Ki sa “delo lavi” e lekel ki pou benefisye pour bwar sa delo?
1, 2. Ki lager reel ki lo lorizon, e ki bann serviter Bondye pa pou bezwen fer dan sa lager?
LE 30 Oktob 1938, plizyer milyon dimoun Leta-z-ini ti pe ekout en pyes teat dan enn bann progranm radyo ki popiler. Sa zour swar, en pyes lasyans fiksyon ki ti pe zwe e i ti baze lo liv The War of the Worlds. Bann akter ki ti pe zwe rol bann prezantater nouvel ti dir ki bann kreatir sorti lo plannet Mars ti pe vin anvair e detrir plannet Later. Menm si i ti’n ganny anonse ki sa progranm lo radyo ti zis en pyes teat, en kantite oditer ti krwar ki sa latak ti reel e zot ti per. Serten ti menm pran aksyon pour ki zot kapab protez zot lekor avek bann swadizan ekstrateres.
2 Dan nou letan, i annan en lager reel ki pe aprose lo lorizon. Me, bann dimoun pa pe pran o serye sa lavertisman. Sa lager pa’n ganny predir dan en liv lasyans fiksyon, me dan Labib, Parol enspire Bondye. I apel lager Armagedon, sa lager kot Bondye pou detri sa move lemonn. (Rev. 16:14-16) Dan sa batay, bann serviter Bondye lo later pa pou bezwen defann zot lekor avek bann ekstrateres sorti lo en lot plannet. Kantmenm sa, zot pou emerveye par bann levennman enpresyonan ki pou arive e par sa fason efreyan ki Bondye pou servi son pwisans.
3. Ki profesi nou pou egzaminen e akoz i devret enteres nou?
3 En profesi Labib dan Zekarya sapit 14 i dir nou bokou lo sa lager Armagedon. Menm si i ti ganny ekrir 2,500-z-an pase, sa profesi i annan lefe lo nou lavi. (Rom. 15:4) En kantite dan sa ki’n ganny dir dan sa profesi i relye avek bann levennman ki pe afekte pep Bondye depi ki Rwayonm Bondye dan lesyel in ganny etablir an 1914 ek bann levennman eksitan ki pou arive tre byento. Bann laspe enportan sa profesi i enplik formasyon “en tre gran vale” ek “delo lavi” ki pou koule. (Zeka. 14:4, 8) Sa vale i zwe en gran rol pour protez bann adorater Zeova. Kan nou konpran ki sa delo lavi i vedir pour nou, nou pa pou zis konpran akoz nou devret bwar li me nou pou osi anvi bwar li. Alor, i pou bon si nou egzamin byen sa profesi.—2 Pyer 1:19, 20.
‘EN ZOUR KI POUR ZEOVA’ I KONMANSE
4. (a) Kan ki sa ‘zour ki pour Zeova’ ti konmanse? (b) Detrwa dizenn lannen avan 1914, ki bann adorater Zeova ti pe anonse e ki mannyer bann dirizan lemonn ti reazir?
4 Premye verse dan Zekarya sapit 14 i refer avek ‘en zour ki pour Zeova.’ (Lir Zekarya 14:1, 2. *) Ki sa zour? I “Zour Senyer,” ki ti konmanse ler “rwayonm lemonn” ti vin “rwayonm nou Senyer, e son Kris.” (Rev. 1:10; 11:15) Sa zour ti konmans an 1914 ler Rwayonm Bondye dan lesyel kot Kris i dirize konman lerwa ti vin an egzistans. Detrwa dizenn lannen pli boner, bann adorater Zeova ti anons avek bann nasyon ki lafen “letan bann nasyon etranze” ti pou vin sa lannen e ki lemonn ti pou dan en moman boulverse. (Lik 21:24) Ki mannyer bann nasyon ti reazir? Olye ekout sa lavertisman, bann dirizan politik e relizye ti mepriz e persekit sa bann Kretyen swazir ki ti bann evanzelizater devoue. Par fer sa, sa bann dirizan lemonn ti monk Bondye Tou Pwisan li menm, akoz bann anbasader swazir par lespri sen i reprezant “Zerizalenm ki dan lesyel,” setadir Rwayonm Bondye kot Kris i dirize e ki zot zot form parti ladan.—Ebr. 12:22, 28.
5, 6. (a) Ki aksyon ki ti ganny predir an konneksyon avek “sa lavil” ek son “sitwayen”? (b) Lekel “sa bann ki ti reste parmi lepep”?
5 Zekarya ti predir sa ki bann nasyon ti pou fer an dizan: “Sa lavil [Zerizalenm] pou vreman ganny kaptire.” Dan en sans senbolik, “sa lavil” i reprezant Rwayonm Bondye kot Kris i dirize konman lerwa. Lo later, sa lavil i ganny reprezante par son bann “sitwayen,” setadir bann Kretyen swazir ki ankor lo later. (Fili. 3:20) Diran Premye Lager Mondyal, bann reprezantan prensipal lorganizasyon Zeova lo later ti ganny “kaptire” oubyen arete e ganny anvoye dan prizon Atlanta, Lazorzi, Leta-z-ini. ‘Bann lakaz ti ganny depouye’ dan sa sans ki sa bann serviter ensi ki lezot serviter ki ti pe gard zot lentegrite ti sibir bann lenzistis ek vyolans. Bann opozan ti esey depouy larises bann Kretyen swazir lo later dan sa sans ki zot ti bàn zot bann piblikasyon e met restriksyon lo zot aktivite konman predikater Rwayonm Bondye.
6 Menm si pep Bondye ti ptigin, mal ganny reprezante, opoze e persekite dan lanmen zot bann opozan, bann vre adorater pa ti ganny eliminen. I ti annan “sa bann ki ti reste parmi lepep,” setadir, bann Kretyen swazir ki ankor lo later ki ti fidelman refize ganny “retire dan sa lavil.”
7. Ki legzanp bann Temwen swazir Zeova in kite pour bann vre adorater ozordi?
7 Eski sa profesi ti konpletman ganny akonplir a lafen Premye Lager Mondyal? Non. Bann nasyon ti pou atak ankor bann Kretyen swazir lo later ek zot bann konpanyon fidel ki annan lespwar pour viv lo later. (Rev. 12:17) Dezyenm Lager Mondyal i en laprev. Lentegrite bann Kretyen swazir fidel i ankouraz bann serviter Bondye ozordi pour fer fas avek nenport ki leprev ki zot kapab rankontre, enkli lopozisyon avek zot fanmir ki pa temwen, koleg travay ouswa kanmarad lekol ki sikann zot akoz zot lafwa. (1 Pyer 1:6, 7) Nenport kote zot reste, bann vre adorater i pli determinen ki oparavan pour ‘konbat ansanm avek en menm lespri’ e ‘pa per zot bann lennmi.’ (Fili. 1:27, 28) Me kote pep Zeova i trouv sa sekirite dan en lemonn ki ay zot?—Zan 15:17-19.
ZEOVA I FORM “EN TRE GRAN VALE”
8. (a) Ki montanny i reprezante dan Labib? (b) Ki “montanny pye zoliv” i reprezante?
8 Vi ki “sa lavil” Zerizalenm i reprezant Zerizalenm dan lesyel, i bezwen ki “montanny pye zoliv, ki par devan Zerizalenm,” li osi i reprezant en keksoz senbolik. Ki sa montanny i reprezante? Ki mannyer i pou ganny “separe dan milye” e vin de montanny? Akoz Zeova i refer avek zot konman “mon bann montanny”? (Lir Zekarya 14:3-5. *) Dan Labib, bann montanny i kapab reprezant bann rwayonm ouswa gouvernman. Deplis, benediksyon ek proteksyon i ganny asosye avek montanny Bondye. (Ps. 72:3; Iza. 25:6, 7) Alor, sa montanny bann pye zoliv kot Zeova i debout dan kote les Zerizalenm lo later i reprezant souvrennte iniversel Zeova, andotmo son dominasyon siprenm.
9. Dan ki sans “Montanny Zoliv” i separ an de?
9 Separasyon sa montanny pye zoliv i endik kwa? Sa montanny ki lo kote les Zerizalenm i separ an de dan son milye dan sa sans ki Zeova i etablir en lot dominasyon. Sa dezyenm dominasyon se Rwayonm Bondye kot Zezi Kri i dirize konman lerwa. Sanmenm sa Zeova i koz lo de montanny apre ki “Montanny Zoliv” i separ an de konman “mon bann montanny.” (Zeka. 14:4, not) Tou le de i pour li.
10. Ki sa “tre gran vale” ant sa de montanny i reprezante?
10 Ler sa montanny senbolik i divize, lanmwatye dan nor e lanmwatye dan sid, lipye Zeova i reste lo tou le de montanny. “En tre gran vale” i vin an egzistans anba lipye Zeova. Sa vale senbolik i reprezant proteksyon Bondye. Gras a sa proteksyon, bann serviter Zeova i an sekirite anba son souvrennte iniversel ek Rwayonm son Garson. Zeova pou fer sir ki vre ladorasyon pa pou zanmen disparet. Kan ki divizyon sa montanny pye zoliv ti arive? I ti arive kan Rwayonm Bondye kot Kris i dirize konman lerwa ti ganny etablir a lafen letan bann nasyon an 1914. Kan ki bann vre adorater ti konmans al kot sa vale senbolik?
PEP BONDYE PE KONMANS SOVE POUR AL KOT SA VALE
11, 12. (a) Kan ki pep Bondye ti konmans sove pour al kot vale proteksyon Bondye? (b) Kwa ki prouve ki lanmen for Zeova i avek son pep?
11 Zezi ti averti son bann disip: “Tou dimoun pou ay zot akoz mwan.” (Mat. 24:9) Diran bann dernyen zour sa lemonn, depi 1914, sa laenn in ogmant en kantite. Malgre bann gran latak ki bann lennmi in fer lo bann Kretyen swazir ki ankor lo later pandan Premye Lager Mondyal, sa group fidel pa ti ganny touye net. An 1919, zot ti ganny libere dan grif Gran Babilonn, lanpir iniversel fo larelizyon. (Rev. 11:11, 12) * Lanmenm ler ki pep Bondye ti konmans sove pour al kot vale bann montanny Zeova.
12 Depi 1919, sa vale proteksyon Bondye pe kontinyen protez bann vre adorater dan lemonn antye. Pour plizyer dizenn lannen, dan diferan parti lemonn, i’n annan bann bàn ek restriksyon lo predikasyon ek bann piblikasyon Temwen Zeova baze lo Labib. Dan serten pei, sa restriksyon i ankor efektif. Me, menm si sa bann nasyon pe esey tou, zot pa pou zanmen kapab elimin vre ladorasyon. Lanmen pwisan Zeova pou vreman avek son pep.—Det. 11:2.
13. Dan ki fason nou reste dan vale proteksyon Zeova e akoz i pli enportan la konmela pour fer li?
13 Si nou reste lo kote Zeova e reste ferm dan laverite, zot de son Garson Zezi Kri, zot pou fer zot par e Bondye pa pou les personn ouswa okenn keksoz ‘aras nou dan Son lanmen.’ (Zan 10:28, 29) Zeova i pare pour ed nou nenport ki fason posib pour ki nou siport son Souvrennte iniversel e reste bann sitwayen fidel Rwayonm Bondye. I vreman esansyel ki nou reste dan vale proteksyon akoz sa vale pou annan en pli gran sinifikasyon pour bann vre adorater pandan sa gran ladetres ki pou arive byento.
‘ZOUR LAGER’ I ARIVE
14, 15. Zour ‘lager Bondye’ kont son lennmi, ki pou sityasyon sa bann ki pou an deor sa vale?
14 Anmezir lafen sa move lemonn i aprose, Satan pou entansifye son latak lo bann serviter Zeova. Apre sa, “zour lager” Bondye kont son lennmi pou konmanse. Zeova pou fer sir ki sa enn latak Satan pou son dernyen. Sa zour, Souvren liniver pou prouve ki zis li tousel ki en Gerye dan en fason pli ekstraordiner ki dan lezot “zour batay” oparavan.—Zeka. 14:3.
15 Zour ki Bondye pou lager, ki pou sityasyon sa bann ki an deor sa “gran vale” proteksyon? Zot pou napa “okenn lalimyer presye” lo zot, andotmo, Bondye pa pou ekler lo zot avek laprouvasyon. Dan sa zour batay ki pe vini, “seval, mile, samo ek bann mal bourik e tou sort zannimo domestik” ki reprezant bann lekipman militer ki bann nasyon pou servi pour defann zot lekor, pou ganny afekte. Sa bann lekipman pou vin “red,” zot pou nepli fonksyonnen, i pou konmsi zot pou’n red avek lafreser. Zeova pou osi servi maladi ek “fleo.” Ki swa i literal ouswa non, sa fleo pou anpes zot akonpli zot bann menas efreyan. Sa zour, zot “prop lizye . . . ek lalang pou pouri” dan sa sans ki bann opozan pou aveg ler zot pou lager e ki zot pou nepli kapab koze pour menas pep Bondye. (Zeka. 14:6, 7, 12, 15) Napa en bout later ki pa pou ganny afekte avek sa destriksyon. I pou annan en kantite ki pou lo kote Satan dan sa batay. (Rev. 19:19-21) “Sa bann ki Zeova i touye pou depi en bout later ziska en lot bout later.”—Zer. 25:32, 33.
16. Lefet ki zour batay Zeova pe aprose, ki kestyon nou devret reflesir lo la e ki nou pou bezwen fer?
16 I touzour annan soufrans kan i annan lager, menm pour bann ki ranport laviktwar. Manze i kapab napa. Serten i kapab perdi zot propriyete. Standar lavi i kapab abese. Bann dimoun i kapab nepli lib. Si nou eksperyans sa bann difikilte, ki mannyer nou pou reazir? Eski nou pou panik? Eski nou pou renye nou lafwa anba sa bann presyon? Eski nou pou perdi lespwar e tonm dan dezespwar? Pa i pou vreman enportan pour gard nou lafwa dan pouvwar ki Zeova i annan pour delivre nou pandan gran ladetres e reste dan vale proteksyon Zeova!—Lir Abakouk 3:17, 18. *
“DELO LAVI”
17, 18. (a) Kwa sa “delo lavi”? (b) Ki “lanmer les” ek “lanmer was” i reprezante? (c) Anmezir ou get lavenir, ki ou determinen pour fer?
17 Apre Armagedon, “delo lavi” pou kontinyen koule sorti kot tronn Rwayonm Bondye. Sa “delo lavi” i bann provizyon Zeova pour nou ganny lavi. “Lanmer les” i refer avek Lanmer Mor e “lanmer was” i refer avek Lanmer Lamediterane. Tou le de i ganny servi pour refer avek dimoun. Lanmer Mor ti pou byen reprezant bann dimoun ki’n mor. Vi ki Lanmer Lamediterane i ranpli avek dimoun, savedir i ti kapab byen refer avek sa “gran lafoul” ki pou sirviv Armagedon. (Lir Zekarya 14:8, 9; * Rev. 7:9-15) Alor, tou le de group pou ganny libere avek lanmor ki zot in erite avek Adan anmezir zot kontinyen satisfer zot laswaf avek sa delo lavi senbolik ouswa “larivyer delo lavi.”—Rev. 22:1, 2.
18 Anba proteksyon Zeova, nou pou sirviv lafen sa move lemonn e antre dan nouvo lemonn drwat Bondye. Menm si bann nasyon i ay nou, annou reste determinen pour gard nou fidelite konman sitwayen Rwayonm Bondye e kontinyen reste dan vale proteksyon Zeova.
[Not anba lo paz]
^ par. 4 Zekarya 14:1, 2: “1 Gete! Sa zour ki pour Zeova pe vini, e tou ou posesyon pou sirman ganny partaze o milye ou. 2 E mon pou sirman rasanble tou bann nasyon pour fer lager kont Zerizalenm; e sa lavil pou vreman ganny kaptire e son lakaz pou ganny depouye, e bann madanm zot pou ganny vyole. Lanmwatye sa lavil i devret ganny anmennen an egzil; tandis ki bann ki pou reste parmi lepep, zot pa pou ganny retire dan sa lavil.”
^ par. 8 Zekarya 14:3-5: “3 E Zeova pou sirman ale e fer lager avek sa bann nasyon parey dan letan ki i ti fer lager, zour batay. 4 E sa zour, i pou vreman debout avek son de lipye lo montanny pye zoliv, ki par devan Zerizalenm, lo kote les; e montanny pye zoliv i devret ganny separ an de dan son milye, depi kot soley i leve e ziska dan was. I pou annan en tre gran vale; e lanmwatye sa montanny pou sirman ganny bouze dan nor e lot lanmwatye dan sid. 5 E zot lepep, zot pou sirman tay kot vale mon bann montanny; akoz vale sa bann montanny pour al ziska Atsel. E zot pou bezwen sove, zis parey zot ti sove zour tranblemandter dan letan Ouziya lerwa Zida. E Zeova mon Bondye pou sirman vini, tou bann sen pou avek li.”
^ par. 11 Vwar Revelation—Its Grand Climax at Hand! lo paz 169-170.
^ par. 16 Abakouk 3:17, 18: “17 Menm si pye fig pa fleri e napa rekolt dan pye rezen; wi, menm si pye zoliv pa raport fri; e later pa prodwi manze; bann mouton i ganny tire dan berkay e napa bef dan park. 18 Me tandis ki mwan, mon pou dan en gran lakontantman akoz Zeova; mon pou zwaye akoz Bondye ki pou sov mwan.”
^ par. 17 Zekarya 14:8, 9: “8 Sa zour delo lavi pou koule sorti Zerizalenm, lanmwatye pour al dan lanmer les e lanmwatye dan lanmer was. Sa pou arive dan lete e dan liver. 9 Zeova pou vin lerwa lo later antye. Sa zour, Zeova pou vin enn, e son non enn.”
[Kestyon]
[Portre lo paz 17]
[Portre lo paz 21]
Reste determinen pour reste dan vale proteksyon Zeova
