Ikala Nyeke mu Musanza wa Bulami wa Yehova

“Yehova ukatamba kulwa na yoya mizo’ya, pamo’nka na walwa mu difuku dya bulwi.”—ZEK. 14:3.

LE UKOKEJA KUSHINTULULA?

Le kuladika kwa “kalūlu ka impafu” kwelekeja bika?

Le “musanza mukatakata, nakampata” welekeja bika, ne i muswelo’ka otubwanya kushala’mo?

Le ‘mema a būmi’ i bika ne i bāni bakamwena mu kutoma’o?

1, 2. Le i divita’ka dya binebine dyafwena, ne bengidi ba Leza kebakasakilwapo kulonga bika mu dino divita?

 MU MAFUKU 30 Kweji 10, 1938, midiyo ne midiyo ya bantu ba mu États-Unis balondele mpangiko ya makayo a ku ladiyo. Mu kino kyolwa bakayi bādi bakwatañanya makayo na myanda idi mu julunale wa sianse witwa bu Divita dya Matanda (Angele). Bakayi bādi bengelekeja myanda mipya yobādi bemwekeja bu bipangwa byatambile mu umbuo wa Mars byādi bya kulengeja bonakani bwa pano pa ntanda. Nansha byāelelwe musapu amba mpangiko yālondelwe ku ladiyo ādi makayo, ino bemvwaniki bavule bālangile amba buno bulwi i bwa bine, bakwatwa moyo. Bamo bākimbile’nka ne muswelo wa kutompa kwikinga ku beni ba kufwatakanya.

² Dyalelo, kudi divita dya binebine dyafwena. Inoko, bantu kebayukilepo amba dibafwena. Dino divita kedilailwepo mu julunale ya sianse, ino i mu Bible Kinenwa kya Leza kyāsonekelwe ku bukomo bwa mushipiditu. I divita dya Hamakedona—divita dya Leza dyasa kulwa na ino ngikadilo imbi ya bintu. (Kus. 16:14-16) Mu dino divita, bengidi ba Leza ba pano pa ntanda kebakasakilwapo kulwa abo bene na bantu ba umbuo mukwabo. Ino, bakatulumuka kimpengele kikatampe kikalonga Leza ne bukomo bwandi bulenga nzuba.

3. Le i bupolofeto’ka botusa kubandaula, ne mwanda waka budi na kamweno kotudi?

³ Bupolofeto bwa mu Bible budi mu Zekadia shapita 14 bwisambila pa bute pa bute pa divita dya Hamakedona. Nansha byobwāsonekelwe pano kepadi kintu kya myaka 2500, buno bupolofeto butala būmi bwetu bonso. (Loma 15:4) Myanda mivule idi’mo itala pa ngikadilo idi na lupusa pa bantu ba Leza tamba kushimikwa kwa Bulopwe bwa Meshiasa momwa mūlu mu 1914, ne pa binkumenkume  bisangaja bisa kulongeka panopano ponka. Buno bupolofeto bwisambila pa kubundwa kwa “musanza mukatakata, nakampata” ne ‘mema a būmi.’ (Zek. 14:4, 8) Uno musanza udi na mwingilo wa mvubu mikatampe wa kukinga batōtyi ba Yehova. Shi twivwanije mushintulwila mema a būmi kotudi, ketukayukapo’nka kamweno kadi mu kwiatoma ino kadi tukasaka kwiatoma. Nanshi tufwaninwe kuta mutyima ku buno bupolofeto mwanda wa kamweno ketu.—2 Pet. 1:19, 20.

‘DIFUKU DYA YEHOVA’ DIBASHILULA

4. (a) Le i kitatyi’ka kyāshilwile ‘difuku dya Yehova’? (b) Lelo batōtyi ba Yehova basapwile bika mu makumi na makumi a myaka kumeso kwa 1914, ne bendeji ba ntanda bālongele’po namani?

⁴ Shapita wa 14 wa Zekadia wisambila pa ‘difuku dya Yehova.’ (Tanga Zekadia 14:1, 2.) Le dino difuku i difuku’ka? I “difuku dya Mfumwetu,” dine dyāshilwile kitatyi kyāikele “bulopwe bwa panopantanda” ke “bwa Mfumwetu, ne bwa Kidishitu wandi.” (Kus. 1:10; 11:15) Dino difuku dyāshilwile mu mwaka wa 1914 na kubutulwa kwa Bulopwe bwa Meshiasa momwa mūlu. Makumi na makumi a myaka kumeso kwa 1914, batōtyi ba Yehova bāsapwidile mizo amba mfulo ya ‘myaka ya mizo’ yādi ya kufula mu uno mwaka ne amba, ntanda yādi ya kwikala mu kitatyi kya tuvutakanya ketwamwekele kashā. (Luka 21:24) Le mizo yālongele’po namani? Pa kyaba kya kuta mutyima ku kidyumu kyāletelwe pa kitatyi, bendeji ba kipolitike ne ba bipwilo bāfutulwile ne kupangapanga bano basapudi bashingwe māni bapyasakane. Pa kulonga namino, bano bendeji ba ntanda bāfutulwile Leza Mwine Bukomo Bonso, mwanda bamikendi ba Bulopwe bashingwe māni belekeja “Yelusalema wa mūlu”—Bulopwe bwa Meshiasa—mwine mobabadilwa.—Bah. 12:22, 28.

5, 6. (a) Le i bintu’ka byālailwe byādi bya kulongwa “kibundi” ne ‘bene kibundi’ na mizo? (b) Le “boba basheleshele ba bantu” i bāni?

⁵ Zekadia wālaile bintu byādi byākulonga mizo na kunena amba: “Kibundi [Yelusalema] kikayatwa.” “Kibundi” kyelekeja Bulopwe bwa Leza bwa Kimeshiasa. Buno Bulopwe bwelekejibwe pano panshi na ‘bene kibundi’ babo, ke basheleshele’ko bene Kidishitu bashingwe māni kadi. (Fid. 3:20) Mu Divita I dya Ntanda, bantu bādi batangidile kipindi ya pano panshi kya bulongolodi bwa Yehova ‘bākwetwe,’ bakutwa ne kwelwa mu kifungo kya mu Atlanta, Géorgie, États-Unis. ‘Mobo ātutyilwe’ mu buno bukondame ne kimpuma kyālongelwe bano bantu ne bantu bakwabo bampikwa mambo bādi balamine bululame. Bano bantambañani bāibile bupeta bwa lupusa lwādi na basheleshele’ko na kukankaja mabuku abo ne mingilo yabo ya kusapula Bulopwe.

⁶ Nansha bantu ba Leza byobātyepele, kunenenwa bibi, kulwibwa ne kupangwapangwa na bantambañani, butōtyi bwa bine kebwādipo bwa kujimankana. Kwādi “boba basheleshele ba bantu,” ko kunena’mba, basheleshele’ko bashingwe māni bāpelele na kikōkeji ‘kutyibibwa ku kibundi.’

7. Le kulama kulamine Batumoni ba Yehova bashingwe māni bululame i kupe batōtyi ba bine ba dyalelo kimfwa’ka?

⁷ Le buno bupolofeto bonso bwāfikidile dya ku mfulo kwa Divita I dya Ntanda? Mhm. Basheleshele’ko bashingwe māni ne bapwani nabo ba kikōkeji badi na lukulupilo lwa kwikala pano panshi bādi ba kutambwa bulwi buvule na Mizo. (Kus. 12:17) Divita II dya Ntanda dilombola bukamoni bwa uno mwanda. Kulama kulamine Batumoni ba Leza bashingwe māni ba kikōkeji bululame, kukankamikanga bengidi ba dyalelo bōminine matompo o-onso ebatana, kimfwa kupangwapangwa na babutule babo ba  kubulwa kwitabija, bengidi-nabo nansha bakwabo ba ku masomo bebafutulula pa mwanda wa lwitabijo lwabo. (1 Pet. 1:6, 7) Nansha bekale kwepi, batōtyi ba bine i basumininwe nakampata “kwimanija monka mu mushipiditu umo,” ne ‘kukwatwa moyo mpika wa bakwibashikwa.’ (Fid. 1:27, 28) Le ino bantu ba Yehova bakatana mutyima-ntenke mu ino ntanda ibashikilwe kwepi?—Yoa. 15:17-19.

YEHOVA ULOÑANGA “MUSANZA MUKATAKATA, NAKAMPATA”

8. (a) Le mu Bible ngulu ibwanya kufunkila pa bika? (b) Le “kalūlu ka impafu” kelekeja bika?

⁸ Yelusalema—“kibundi”—byokyelekeja Yelusalema wa mūlu, “kalūlu ka impafu, kadi kampalampala na Yelusalema,” nako kafwaninwe kumonwa bu kakyelekejo. Le kano kalūlu kelekeja bika? Le “kakaladika umbukata” ne kwikala ke ngulu ibidi namani? Mwanda waka Leza wiitela amba i “ngulu yami”? (Tanga Zekadia 14:3-5.) Mu Bible, ngulu ibwanya kufunkila pa malopwe, nansha maludiki. Madyese ne bulami nabyo i bikwatañanibwe na lūlu lwa Leza. (Mit. 72:3; Is. 25:6, 7) Mu uno muswelo, kalūlu ka impafu pene pemene Leza kutunduka kwa Yelusalema wa pano panshi, kelekeja bubikadi bwa Yehova bwa diulu ne ntanda, ke buludiki bwandi bupityile onso kadi.

9. Lelo “kalūlu ka impafu” i kaladike mu buluji’ka?

⁹ Le kuladika kwa kalūlu ka impafu kushintulula bika? Kalūlu, kene kadi kutunduka kwa Yelusalema i kaladike mu buluji bwa amba Yehova i mwimike buludiki bukwabo bwa bubidi. Buno buludiki bwa bubidi i Bulopwe bwa Meshiasa budi mu makasa a Yesu Kidishitu. O mwanda Yehova wita ngulu ibidi ilupukile ku kuladika kwa “kalūlu ka impafu” amba i “ngulu yami.” (Zek. 14:4) Yonso ibidi i yandi.

10. Le “musanza mukatakata, nakampata” udi pa bukata bwa ngulu ibidi welekeja bika?

¹⁰ Kalūlu ka kyelekejo pa kuladika, kipindi kimo kyaenda kungala, kikwabo nakyo kunshi, ino maulu a Yehova ashala emene bukila na bukila. “Musanza mukatakata, nakampata” waikala’ko pa bukata bwa maulu a Yehova. Uno musanza wa kyelekejo, welekeja bulami bwa Leza bwine bupa bengidi ba Yehova mutyima-ntenke munshi mwa bubikadi bwandi bwa diulu ne ntanda ne mu Bulopwe bwa wandi Mwana bwa Kimeshiasa. Yehova ukakulupila amba mutōtelo wandi utōka keukonakanibwapo. Le kalūlu ka impafu kēabenye kitatyi’ka? Kēabenye kitatyi kyāshimikilwe Bulopwe bwa Meshiasa ku mfulo kwa Bitatyi bya Bajentaila mu 1914. Le i kitatyi’ka kyāshilwile batōtyi ba bine kunyemena ku musanza wa kyelekejo?

KUNYEMENA KU MUSANZA KUBASHILULA!

11, 12. (a) Le i kitatyi’ka kyāshilwile kunyemenwa ku musanza wa kyelekejo? (b) Le i kika kilombola’mba kuboko kukomo kwa Yehova kudi na bantu bandi?

¹¹ Yesu wādyumwine balondi bandi amba: “Mukashikibwa na mizo yonso pa mwanda wa dijina dyami.” (Mat. 24:9) Uno mushikwa wavudile’ko nakampata mu mafuku a mfulo a ino ngikadilo ya bintu, tamba mu 1914. Nansha byokwādi bulwi bunane bwa kutambwa kwa basheleshele’ko bashingwe māni na balwana nabo mu Divita I dya Ntanda, inoko bantu ba kikōkeji ba mu kino kisumpi kebāipailwepo bonso. Mu 1919, bākutulwilwe mu nkano ya Babiloni Mukatakata—umbikalo wa ntanda wa mutōtelo wa bubela. (Kus. 11:11, 12) * Kino kyo kitatyi kyāshilwile kunyemenwa ku musanza wa ngulu ya Yehova.

 ¹² Tamba mu 1919, musanza wa bulami wa Leza wendelelanga kukinga batōtyi ba bine ba ntanda yonso. Mu makumi na makumi a myaka, mu bipindi bivule bya ntanda mwadi kukankajibwa kwa mwingilo wa busapudi ne mabuku a Batumoni ba Yehova esambila pa Bible. Kuno kukankajibwa kukidi’ko ne pano mu matanda amo amo. Nansha shi mizo ilonge namani, keikabwanyapo kujimankanya mutōtelo wa bine! Kuboko kukomo kwa Yehova kudi na bantu bandi.—Kup. 11:2.

13. Le i muswelo’ka otukashala mu musanza wa bulami wa Yehova, ne mwanda waka pano po pene potusakilwa kushala’mo?

¹³ Shi tulamete kudi Yehova ne kwimanija mu bubinebine, aye ne wandi Mwana Yesu Kidishitu nabo bakavuija kyabo kipindi, kadi Leza kakalekapo muntu ye-yense nansha kintu kyo-kyonso ‘kitusompole mu kuboko Kwandi.’ (Yoa. 10:28, 29) Yehova i mwiteakenye kwitupa bukwashi bo-bonso botusakilwa mwanda wa tumukōkele bu Mubikadi wa Diulu ne Ntanda ne kwikala babikalwa ba kikōkeji ba Bulopwe bwa Kimeshiasa. I kipite buya tushale nyeke mu musanza wa bulami, mwanda uno musanza ukakwasha batōtyi ba bine pa kyamalwa kibuke kyafwena bininge.

‘DIFUKU DYA BULWI’ DIBAFIKA

14, 15. Le i bika bikafikila boba badi panja pa musanza mu “difuku dya bulwi [bwa Leza]” bwa kulwa na balwana nandi?

¹⁴ Pano pafwena mfulo ya ino ngikadilo ya bintu, Satana ukaningisha bininge bulwi bwa kutamba bengidi ba Yehova. Ebiya “difuku dya bulwi bwa [Leza]” dikafika pa balwana nandi. Yehova ukayuka amba buno bo bulwi bwa mfulo bwa Satana. Mu dino difuku, Mubikadi wa diulu ne ntanda ukeyukanya bu Kalala ka Mavita ka ntumbo kutabuka pāeyukenye mu “difuku dya bulwi” bo-bonso bubajinji.—Zek. 14:3.

¹⁵ Pa difuku dya divita dya Leza, le bantu badi panja pa “musanza mukatakata, nakampata” bakafikilwa na bika? “Mwinya” wa buntu bwa Leza keukebamunikilapo. Mu dino difuku dya bulwi dīya’ko, “kinzengele kya kabalwe, ne kya kabalwe kaumba-kimbulu, ne kya ngamedia, ne kya kimbulu, ne kya banyema bonsololo”—byelekejo bya byabulwi bidi na bibumbo bya mizo—bikonakanibwa. Bino byabulwi ‘bikekwata,’ ko kunena amba bikelamata na mashika mwanda wa kubulwa kwingidija’byo. Ne kadi Yehova ukengidija kipupo ne “kinzengele.” Kikale kimweka na meso nansha kumweka mpika, kinzengele kikafundula’ko byaka bilenga moyo. Mu dino difuku, “meso . . . ne ludimi lwabo lukasunguluka,” mu buluji bwa amba bantambañani bakabwanya kongola’nka bampofu ne kutalajibwa ku binenwa byabo bya kibengo. (Zek. 14:6, 7, 12, 15) Kekudipo kipindi nansha kimo kya ntanda kikapanda ku bonakani. Bibumbo bidi ku mutamba wa Satana bikonakanibwa mu divita. (Kus. 19:19-21) “Bepaibwe na Yehova bakekala pa dyodya difuku’dya kushilwila ku mfulo imo ya panshi kutūla ne ku mfulo mikwabo.”—Yel. 25:32, 33.

16. Pano pafwena difuku dya bulwi bwa Leza, le i bipangujo’ka byotufwaninwe kwiipangula ne i bika byotufwaninwe kulonga?

¹⁶ Divita dipapamwinanga nyeke bantu makambakano, nansha ke bashindañani bene. Bidibwa byasakana. Bituntwa byajimina. Mushikatyilo nao wakoma. Bwanapabo bwa bantu bwatyepa. Shi bino bintu bibetufikila, le tukalonga namani? Le tukazakala? Le tukatuna lwitabijo lwetu mwanda wa masusu? Le tukajimija lwitabijo lwetu ne kunyoñama pa mutyima? Bine, pa kushala mu musanza wandi wa bulami wa Yehova pa kyamalwa kibuke i biyampe tulame lwitabijo lwetu mu bukomo bwa Yehova bwa kupandija!—Tanga Habakuka 3:17, 18.

 ‘MEMA A BŪMI AKAKUKA’

17, 18. (a) Le ‘mema a būmi’ i bika? (b) Le “kalunga ka kutunduka” ne “kalunga ka kushika” kelekeja bika? (c) Pano potengele būmi bwa kumeso, le ubasumininwa kulonga bika?

¹⁷ Pa kupwa’tu kwa Hamakedona, ‘mema a būmi’ akatamba nyeke mu kīkalo kya Bulopwe bwa Meshiasa. Ano ‘mema a būmi’ i mpangiko ya Yehova ipāna būmi. “Kalunga ka kutunduka” kafunkila pa Kalunga Kafwe ne “kalunga ka kushika” nako pa Kalunga ka Meditelanea. Tonso tubidi i twingidijibwe mwanda wa kufunkila pa bantu. Kalunga Kafwe kelekeja boba badi mu kibundu kijikwanga’mo bantu bonso. Kalunga ka Meditelanea byokayudile bantu, kabwanya kufunkila pa “kibumbo kikatampe” kikapanda ku Hamakedona. (Tanga Zekadia 14:8, 9; Kus. 7:9-15) Nanshi bisumpi byonso bibidi bikanyongololwa ku lufu lupyenwe kudi Adama enka na abo bapwibwa kyumwa kyabo na kutoma mema a būmi a kyelekejo nansha a “munonga wa mema wa būmi.”—Kus. 22:1, 2.

¹⁸ Mu bulami bwa Yehova, tukapanda ku mfulo kwa ino ngikadilo imbi ya bintu ne kutwela mu ntanda impya ya Leza ya boloke. Nansha mizo yonso byoitushikilwe, tusumininwei kwikala nyeke babikalwa ba Bulopwe bwa Leza ba kikōkeji, ne kushala nyeke mu musanza wa bulami wa Yehova.

[Kunshi kwa dyani]

[Bipangujo bya Kifundwa]

[Kifwatulo pa paje 17]

[Kifwatulo pa paje 21]

Sumininwa kushala nyeke mu musanza wa bulami wa Yehova