1, 2. Eaa te tamaki tika tikai ka tupu mai, e eaa ta te au tavini o te Atua kare e anoanoia kia rave i roto i teia tamaki?

I TE ra 30 o Okotopa, mataiti 1938, kua akarongo te au mirioni tangata i Marike i tetai porokaramu i runga i te ratio. I roto i te porokaramu, te rave ra te au tangata nuku i te tuanga a te aronga akakitekite nuti, te akakite anga e te aere maira te au tangata kino no runga mai i te paraneta Mars i te takore i te Enua. Noatu e kua akakiteia mai e e akatutuanga nuku ua te porokaramu i runga i te ratio, kua manako te au tangata e e tamaki anga tika tikai te reira e kua mataku ratou. Kua rave tetai pae i tetai au ravenga ei paruru ia ratou mei teia au tangata kino tamanako ua.

² I teia tuatau e tamaki anga tika tikai tetai ka tupu mai. Inara, kare te au tangata e irinaki ana e ka tupu mai te reira. Kua totouia mai teia tamaki, kare no roto mai i tetai tua maani ua, mari ra no roto mai i te Tuatua akauruia a te Atua, te Pipiria. Ko te tamaki te reira o Aramakito​—te tamaki anga a te Atua i teia akatereanga o te au mea nei. (Apo. 16:14-16) Kare tatou e tamaki i roto i teia tamaki anga. Mari ra, ka taangaanga a Iehova i tona mana kia akaora mai ia tatou na roto i te tu umere tikai.

3. Eaa te totou ta tatou ka uriuri, e eaa ra te reira i puapinga ai no tatou?

³ Te akakite maira tetai totou Pipiria i roto i te pene 14 o Zekaria i tetai au mea no runga i te tamaki o Aramakito. Noatu e kua rekotiia te reira mei tetai 2,500 mataiti i topa, te akakeu nei rai teia totou i to tatou oraanga i teia tuatau. (Roma 15:4) Te tuatua ra te reira no runga i te au mea tei tupu ki te iti tangata o te Atua, mei to Karaiti tutaraanga i runga i te rangi i te mataiti 1914. Te akakite katoa maira te reira e kare e roa atu ana ka tupu mai tetai au mea meitaki tikai. Te tuatua ra teia  totou no runga i tetai ‘o maata rava atu’ e “te vai ora” e tae ra. (Zeka. 14:4, 8) E tuanga puapinga ta teia o e rave nei no te paruru anga i te aronga akamori o Iehova. E me marama tatou eaa ta teia vai ora ka akatupu kia tatou, ka kite tatou e te anoanoia ra tatou kia inu e kia inangaro i te inu i te reira. E mea puapinga i reira no tatou kia akarongo meitaki ki teia totou.​—2 Pete. 1:19, 20.

4. (a) Inaea i akamata ai “te rā o Iehova”? (e) No tetai rau ngauru mataiti i mua ake i te mataiti 1914, eaa ta te au aronga akamori o Iehova e akakitekite ra, e akapeea te au arataki o teianei ao te ariu mai anga?

⁴ Te akamata ra te pene 14 o Zekaria ma te tuatua e, “te rā o Iehova.” (E tatau ia Zekaria 14:1, 2.) Eaa ra te reira ra? Ko ‘te rā teia o te Atu,’ tei akamata mai te riro anga “te au basileia o teianei ao” ei “au basileia no to tatou Atu e no tana Mesia.” (Apo. 1:10; 11:15) Akamata mai te reira ra i te mataiti 1914 te tutara anga te Patireia o te Mesia i runga i te rangi. No tetai rau ngauru mataiti i mua ake i te mataiti 1914, kua akakite te aronga akamori o Iehova ki te au pa enua e ka ope ‘te tuatau o te etene’ i taua mataiti ra e ka o atu teianei ao ki roto i tetai au tuatau manamanata. (Luka 21:24) Akapeea te au pa enua te ariu mai anga ki te reira? Kare ratou i akarongo ana ki taua akamatakiteanga ra, mari ra kua aviri te au arataki poritiki e te au arataki akonoanga i te aronga tutu evangeria maroiroi tei akatainuia e kua takinokino ia ratou. Na te rave anga i te reira, te aviri ra teia au arataki o teianei ao i te Atua Mana Katoatoa, no te mea e au komono te aronga akatainuia no te ‘Ierusalema i te rangi’​—te Patireia o te Mesia.​—Ebe. 12:22, 28.

5, 6. (a) Eaa ta te au enemi o te iti tangata o te Atua i rave? (e) Koai ma “te toenga o te tangata ra”?

⁵ Kua totou mai a Zekaria eaa ta te au pa enua ka rave, te tuatua anga e: ‘Ka rauka me kore ka opu ïa te oire o Ierusalema.’ Te akatutu maira “te oire” i te Patireia Mesia o te Atua. Te komonoia ra te reira e te toenga o te au Kerititiano akatainuia i te enua nei. (Phili. 3:20) I te tuatau o te Tamaki I o te Ao, kua ‘opu ïa’ me kore kua tapekaia te au mema maata o te akaaerenga o Iehova i runga i te enua e kua tukuia atu ratou ki roto i te are auri i Atlanta, Georgia, i Marike. Kua akono tau kore te au enemi i te au Kerititiano akatainuia, e kua arai i ta ratou au puka e kua tauta i te akamutu i ta ratou angaanga tutu anga. Mei te mea rai e kua “āruia” me kore kua keiaia te au are o te oire.

⁶ Noatu e kua takinokinoia te iti tangata o te Atua e te au enemi ririnui tei akakitekite aere i te au mea pikikaa no runga ia ratou, kare ra i rauka ia ratou i te takore atu i te akamorianga mou. Te vai ra “te toenga o te tangata ra,” koia oki, te toenga o te aronga akatainuia tei vai akarongo mou e tei tauta kia kore e ‘tipu keia mei taua oire ra.’

7. Eaa te akaraanga ta te au Kerititiano akatainuia i akanoo mai no tatou i teia tuatau?

⁷ Kua akamutu ainei te au enemi i te takinokino i te iti tangata o te Atua i te openga o te Tamaki I o te Ao? Kare. Te vai ra rai tetai atu au tamaki anga a te pa enua ki runga i te toenga o te aronga akatainuia e to ratou au oa tiratiratu e manakonakoanga to ratou no te enua. (Apo. 12:17) Te akapapu maira te Tamaki II o te Ao i teia. Te akamaroiroi maira te tu tiratiratu o te au Kerititiano akatainuia i te au tavini o te Atua i teia tuatau kia akakoromaki i tetai ua atu turanga ngata ta ratou ka aro atu, kapiti mai te au patoianga a te kopu tangata, te au oa angaanga, me kore te au oa i te apii te aviri ra ia ratou no to ratou akarongo. (1 Pete. 1:6, 7) Noatu eaa te ngai e noo ra ratou, te tauta pakari ra te aronga akamori  mou i ‘te tāpu meitaki ma te vaerua okotai,’ e kia kore ratou e mataku ‘i to ratou au enemi.’ (Phili. 1:27, 28) Inara, teiea te ngai ka akaruru ei te iti tangata o Iehova i roto i teia ao te makitakita ra ia ratou?​—Ioa. 15:17-19.

8. (a) Eaa ta te au maunga e akatutu maira i roto i te Pipiria? (e) Eaa te akatutuia maira e “te maunga ra i Oliveta”?

⁸ I te mea e te akatutu maira “te oire” ko Ierusalema i te Ierusalema i runga i te rangi, e akatutuanga katoa ‘te maunga i Oliveta, i mua ia Ierusalema.’ Eaa ta te reira maunga e akatutu maira? Akapeea te reira e ‘ngaa ai ki rotopu,’ e te riro anga e rua maunga? Eaa ra a Iehova i taiku ei i te reira e ko te “nga maunga noku ra”? (E tatau ia Zekaria 14:3-5.) I roto i te Pipiria, te akatutu maira te au maunga i te au patireia, me kore i te au kavamani. Te tuatua katoa ra te Pipiria e no ko mai te au akameitakianga e te paruru anga i te maunga o te Atua. (Sala. 72:3; Isa. 25:6  7) No reira, ko te maunga i Oliveta i te tua itinga o te oire o Ierusalema i te enua nei ta te Atua e tu ra i runga, te akatutu maira te reira i to Iehova turanga ngateitei i te ao katoa e pini ua ake, koia oki tana tutaraanga teitei rava atu.

9. Eaa te aiteanga o te ngaa anga o te ‘maunga i Oliveta’?

⁹ Eaa te aiteanga o te ngaa anga o te maunga i Oliveta? Kua ngaa te maunga i te tua itinga o Ierusalema na roto i te tu e kua akanoo a Iehova i tetai tutaraanga akaou no tetai akakoroanga puapinga. Ko teia tutaraanga, ko te Patireia o te Mesia i raro ake i te akaaere anga a Iesu Karaiti. No reira rai a Iehova i tuatua ai no runga i te ngaa anga o te ‘maunga i Oliveta’ e ko te “nga maunga noku ra.” (Zeka. 14:4) No te Atua te reira nga maunga.

10. Eaa te akatutuia maira e te ‘o maata rava atu’ i rotopu i te nga maunga?

¹⁰ Me ngaa te maunga akatutu ua i rotopu, e tai apa ki te tua apa tokerau e tetai apa ki te tua apa tonga, te tu ra rai to Iehova nga vaevae ki runga i taua nga maunga ra. Kua tupu mai tetai ‘o maata rava atu’ mei raro mai i te nga vaevae o Iehova. Te akatutu maira teia o i te paruru anga a te Atua, te ngai e akaruru ra te au tavini o Iehova i raro ake i tana tutaraanga ngateitei i te ao katoa e te Patireia o tana Tamaiti, ko te Mesia. Ka akapapu mai a Iehova e kare rava te akamorianga ma e takoreia. Inaea i tupu ei te ngaa anga o te maunga i Oliveta? Kua tupu te reira te akanooia anga te Patireia o te Mesia i te openga o te Tuatau Etene i te mataiti 1914. Inaea te aronga akamori mou i akamata ai i te oro ki roto i te o akatutu ua?

11, 12. (a) Inaea te aronga akamori mou i akamata ai i te oro ki roto i te o akatutu ua? (e) Eaa te akapapu anga e ka akaora mai te rima maroiroi o Iehova i tona iti tangata?

¹¹ Kua akamatakite a Iesu i tana au pipi e: “E makitakitaia mai kotou e te pa enua ravarai i toku nei ingoa.” (Mata. 24:9) I te au ra openga o teia akatereanga, mei te mataiti 1914 mai, kua maata atu taua tu makitakita ra. Noatu te au takinokino anga a te au enemi ki runga i te toenga o te aronga akatainuia i te tuatau o te Tamaki I o te Ao, kare i takore takiriia ana teia pupu tiratiratu. I te mataiti 1919 kua akamataraia mai ratou mei roto mai ia Babulonia Maata​—te patireia o te au akonoanga pikikaa i teianei ao. (Apo. 11:11, 12) * Ko te taime te reira i akamata ai te aronga akamori mou i te oro ki roto i te o o Iehova.

¹² Mei te mataiti 1919 mai, kua paruru  ua mai rai to te Atua o i te aronga akamori mou i te ao katoa. Tere atu i te rau ngauru mataiti, kua tauta te au kavamani i te arai i te angaanga orometua e te au puka Pipiria a te Au Kite o Iehova. Te tupu nei rai taua au arairaianga i roto i tetai au enua. Inara, noatu te au tautaanga a te au enua, kare rava e rauka ia ratou i te takore takiri i te akamorianga mou! Ka akaora mai te rima maroiroi o Iehova i tona iti tangata.​—Deu. 11:2.

13. Akapeea tatou me noo ua ki roto i to Iehova o no te paruru anga, e eaa ra i puapinga rava ai i teianei kia rave tatou i te reira?

¹³ Me noo vaitata ua rai tatou kia Iehova e me vai tinamou tatou ki roto i te tuatua mou, kare te Atua e tana Tamaiti ko Iesu Karaiti e akatika i tetai ua atu tangata me kore i tetai ua atu apinga kia ‘āru ia tatou mei roto mai i Tona rima.’ (Ioa. 10:28, 29) Te papa ua ra a Iehova i te oronga i tetai ua atu tauturu te anoanoia ra kia akarongo tatou ki Tei Ngateitei i te Ao Katoa e Pini ua Ake e kia vai tiratiratu ki te Patireia o te Mesia. E mea puapinga tikai kia noo ua rai te aronga akamori mou ki roto i te o no te paruru anga, no te mea te aere viviki maira te mate maata.

14, 15. Me tae mai “te rā tamaki” a te Atua ki runga i tona au enemi, eaa te ka tupu ki te aronga i vao ake i te o?

¹⁴ I te openga o teia akatereanga e vaitata maira, ka akamaata atu a Satani i tana tamaki anga ki runga i te au tavini o Iehova. E oti, ka tae mai “te rā tamaki” a te Atua ki runga i tona au enemi. Ka akapapu mai a Iehova e ko ta Satani tamaki anga openga te reira. Ka riro mai Tei Ngateitei i te ao katoa e pini ua ake ei Tumutoa te ka maata atu tona kaka a te reira ra i to tetai ua atu ‘rā tamaki anga.’​—Zeka. 14:3.

¹⁵ I te ra o te tamaki anga a te Atua, eaa te ka tupu ki te aronga i vao ake i te paruru anga o te ‘o maata rava atu’? Kare e rauka ia ratou te “mārama,” koia oki, te akaperepereanga a te Atua. I te ra o te tamaki anga e aere maira, ka “aveave” me kore ka puapinga kore “te au oroenua, te au mule, te au kamela, e te au asini, e te au puaka katoa.” Te aiteanga, kare te au apinga tamaki e te au matini tamaki e angaanga akaou e ka puapinga kore te reira. Ka taangaanga katoa a Iehova i te au maki mate e “te mate.” Me e mate tika tikai te reira me kare, ka takore atu te reira i te au tamatakutaku anga kino a te au enemi. A te reira ra, ka “pou ua oki to ratou mata . . . e pou ua oki to ratou arero” na roto i te tu e kare e rauka ia ratou i te tamaki atu e kare ratou e tuatua akakino akaou i te Atua. (Zeka. 14:6, 7, 12, 15) Ka piri atu “te au ariki o te ao nei, e to ratou au nuku” kia Satani. Inara, noatu e teiea ratou i runga i te enua, ka takoreia ratou. (Apo. 19:19-21) “Ko tei mate ia Iehova ra, kia tae ki te reira rā, e riro ïa mei tetai openga mai o te enua, e tae ua atu ki tetai openga o te enua ra.”​—Iere. 25:32, 33.

16. Eaa te au uianga ka ui tatou kia tatou uaorai no runga i te ra tamaki anga a te Atua e aere mai nei, e eaa ta tatou ka rave?

¹⁶ E akatupu ua ana te tamaki i te mamae ki te katoatoa, pera katoa ki te aronga e autu ana. Penei kare e rava te kai. Ka ngere tatou i te au apinga. Kare te au turanga o te oraanga e meitaki akaou. Ka kotingaia to tatou au tikaanga. Me na roto tatou i taua au turanga ngata ra, ka akapeea tatou? Ka mataku ainei tatou? Ka akamutu ainei tatou i te tavini ia Iehova i raro ake i te au taomianga? Ka ngaro ainei to tatou manakonakoanga e ka manako puapinga kore tatou? E puapinga tikai kia irinaki tatou ki roto i to Iehova mana akaora e kia noo ua rai ki roto i to Iehova o no te paruru anga i te tuatau o te mate maata!​—E tatau ia Habakuka 3:17, 18.

17, 18. (a) Eaa ra te “vai ora”? (e) Eaa te akatutuia maira e te “tai itinga” e te “tai opunga”? (ng) Ia koe e akara ra ki te tuatau ki mua, eaa taau ka tauta i te rave?

¹⁷ I muri ake ia Aramakito, ka tae ua mai rai te “vai ora” mei te Patireia o te Mesia. Te akatutu maira teia “vai ora” i te au mea ravarai ta Iehova i oronga mai ki te au tangata kia rauka ia ratou te oraanga mutu kore. Te aiteanga o te “tai itinga,” ko te Tai Mate, e ko te aiteanga o te “tai opunga,” ko te Tai Metitarenia. Te akatutu maira te reira i te au tangata. Te akatutu maira te Tai Mate i te au tangata i roto i te vaarua tanuanga mate. I te mea e kua ki te Tai Metitarenia i te au mea ora, te akatutu maira te reira i te “aronga maata rava” te ka ora mai i Aramakito. (E tatau ia Zekaria 14:8, 9; Apo. 7:9-15) No reira, ka puapingaia teia nga pupu me akaoraia mai ratou mei te mate ta Adamu i tuku mai ki runga ia ratou me inu ratou i te vai ora akatutu ua, me kore te ‘vai ora e taʼe ra.’​—Apo. 22:1, 2.

¹⁸ I raro ake i ta Iehova paruru anga ka ora mai tatou i te openga o teia akatereanga kino o te au mea nei e ka tomo atu tatou ki roto i to te Atua ao ou tuatua tika. Noatu e te makitakita maira te au pa enua ia tatou, kia tauta ua rai tatou kia vai tiratiratu ki te Patireia o te Atua e kia noo ua ki roto i to Iehova o no te paruru anga.