1, 2. Eaha te tamaˈi mau e fatata roa maira? Eaha ta tatou e rave i roto i tera tamaˈi?

 MARITE, 30 no Atopa 1938. E mirioni taata te faaroo ra i te radio o te haapuroro ra i te hoê hautiraa: te faaite nei te mau papai vea e ua tae mai te mau taata no Mars mai no te haamou i te Fenua. Noa ˈtu e ua parauhia e e hautiraa noa te reira, mea rahi te taata tei manaˈo e e tamaˈi mau te tupu ra e ua riaria aˈera. Ua imi atoa vetahi i te mau ravea no te paruru ia ratou i te mau taata no Mars mai.

² Te fatata roa maira te hoê tamaˈi mau: Aramagedo. O ta te Atua ïa tamaˈi i nia i teie nei ao ino. Aita râ te taata e tâuˈa ra. E ere te reira i te aai, ua tohuhia râ e te Parau faaurua a te Atua, te Bibilia. (Apo. 16:14-16) Eita tatou e aro i roto i tera tamaˈi. E faaohipa râ te Atua i to ˈna puai no te faaora ia tatou ma te faahiahia.

3. Eaha te parau tohu ta tatou e hiˈopoa mai? No te aha mea faufaa ˈi te reira no tatou?

³ Ua taai-roa-hia te hoê parau tohu i roto i te Zekaria pene 14 i te tamaˈi o Aramagedo. Mea faufaa roa te reira no tatou i teie mahana noa ˈtu e ua papaihia a fatata e 2 500 matahiti aˈenei. (Roma 15:4) Te faahiti-rahi-hia nei te tupuraa ta te nunaa o te Atua i ite mai te haamauraahia te Basileia Mesia i nia i te raˈi i 1914. Oia atoa i te mau tupuraa faahiahia o te fatata roa i te itehia. No nia teie parau tohu i te hoê “peho rahi roa” e i te “pape ora.” (Zek. 14:4, 8) E paruru teie peho i te feia haamori ia Iehova. A taa ˈi ia tatou te auraa o te pape ora no tatou, e ite tatou i  te faufaaraa ia inu i tera pape e e na reira atoa râ tatou no te mea ua hinaaro tatou. E haapao maite anaˈe i teie parau tohu. No to tatou hoi maitai.—Pet. 2, 1:19, 20.

4. (a) Afea “te mahana o Iehova” i te haamataraa? (b) Eaha ta te feia haamori ia Iehova i faaite e rave rahi matahiti hou 1914, e ua aha te mau tia faatere o te ao?

⁴ Te faahiti ra te omuaraa o te Zekaria pene 14 i “te mahana o Iehova.” (A taio i te Zekaria 14:1, 2.) Eaha tera mahana? O te “mahana o te Fatu,” o tei haamata i to “te basileia ra o teie nei ao” riroraa mai ei “basileia no to tatou Fatu e no ta ˈna ra Mesia.” (Apo. 1:10; 11:15) Ua haamata tera mahana i 1914, a haamauhia ˈi te Basileia Mesia i nia i te raˈi. E rave rahi matahiti na mua ˈtu, ua faaite te feia haamori ia Iehova i te mau nunaa e e hope “to te Etene anotau” i tera matahiti e e arepurepu roa ˈtoa te ao. (Luka 21:24) Ua haapao anei te mau nunaa? Aita. Ua faaooo e ua hamani ino te mau tia poritita e haapaoraa i tera feia poro faatavaihia itoito rahi. Ua faaooo ïa teie mau tia faatere o te ao i te Atua Mana hope. E tia hoi te mau Kerisetiano faatavaihia no te Ierusalema i te raˈi, oia hoi te Basileia Mesia.—Heb. 12:22, 28.

5, 6. (a) Ia au i te parau tohu, eaha ta te mau enemi o te nunaa o te Atua e rave? (b) O vai “te toea o te taata”?

⁵ Ua tohu Zekaria i ta te mau nunaa e rave: “E pau te oire [o Ierusalema].” E taipe tera “oire” o te Basileia Mesia o te Atua. E tufaa atoa ta te mau Kerisetiano faatavaihia i nia noâ i te fenua i roto. (Phil. 3:20) Ua “pau” te oire i te Tamaˈi Rahi matamua, a tapeahia ˈi te mau taeae e hopoia rahi ta ratou i roto i te faanahonahoraa a Iehova i te fare auri no Atlanta, i Géorgie, i Marite. Ua haa te mau enemi i nia i te mau Kerisetiano faatavaihia ma te ino e te tia ore, ua opani i ta ratou mau papai e ua tamata i te tapea i ta ratou ohipa pororaa. Mai te huru ra e ua ‘haru’ te mau enemi i te mau fare o te oire.

⁶ Mea rahi roa te enemi e faaino ra, e patoi ra e e hamani ino ra i te nunaa o te Atua. Noa ˈtu râ, eita te haamoriraa mau e faaorehia. Te vai ra “te toea o te taata,” oia hoi te toea o te feia faatavaihia, o te patoi ma te taiva ore ia ‘tâpû-ê-hia ratou i taua oire ra.’

7. Eaha te hiˈoraa ta te mau Kerisetiano faatavaihia i vaiiho mai no te feia haamori i te Atua mau?

⁷ Ua tupu roa anei teie parau tohu a hope ai te Tamaˈi Rahi matamua? Aita. Ua aro â te mau nunaa i te toea o tei faatavaihia e i to ratou mau hoa taiva ore e tiaturi ra e ora i nia i te fenua. (Apo. 12:17) Tei itehia ïa i te Piti o te Tamaˈi Rahi. Te turai nei te hapa ore o te mau Kerisetiano faatavaihia taiva ore i te mau tavini a te Atua ia faaoromai i te mau fifi atoa. Ei hiˈoraa, ia patoi mai te utuafare, te hoa ohipa aore ra ia faaooo mai te mau hoa haapiiraa ia tatou no to tatou faaroo. (Pet. 1, 1:6, 7) I te mau fenua atoa, ua faaoti papu roa ˈtu â te mau Kerisetiano mau i te vai taiva  ore e i te ore e mǎtaˈu i to ratou mau enemi. (Phil. 1:27, 28) Ihea ïa te nunaa o Iehova e imi ai i te parururaa i roto i te hoê ao e riri ra ia ratou?—Ioa. 15:17-19.

8. (a) I roto i te Bibilia, eaha ta te mau mouˈa e nehenehe e faahohoˈa? (b) Eaha ta “te mouˈa ra Oliveta” e faahohoˈa ra?

⁸ Ua haapii mai tatou e i roto i teie parau tohu, te faahohoˈa ra te “oire,” aore ra Ierusalema, i te Basileia o te Atua. Eaha ïa “te mouˈa ra Oliveta, i mua mai ia Ierusalema”? E nafea te reira e ‘amaha ˈi i ropu’ a riro atu ai e piti mouˈa? No te aha Iehova i faahiti ai i tera na mouˈa ei “na mouˈa no ˈu”? (A taio i te Zekaria 14:3-5.) I roto i te Bibilia, e faahohoˈa atoa te mau mouˈa i te mau basileia aore ra faatereraa. Oia atoa i te mau haamaitairaa e te parururaa no ǒ mai i te mouˈa o te Atua ra. (Sal. 72:3; Isa. 25:6, 7) Te faahohoˈa ra ïa te mouˈa ra Oliveta i te mana arii o Iehova i nia i ta ˈna poieteraa atoa.

9. Ua amaha “te mouˈa ra Oliveta” i roto i teihea auraa?

⁹ Ua amaha te mouˈa ra Oliveta. Eaha te auraa? Ua haamau Iehova i te tahi atu faatereraa no te hoê fa taa ê, o te Basileia Mesia ïa faaterehia e Iesu Mesia. No reira Iehova i faahiti ai i tera na mouˈa i fa mai a amaha ˈi “te mouˈa ra Oliveta” mai “na mouˈa no ˈu.” Na Iehova tera na faatereraa.

10. Eaha ta te “peho rahi roa” i ropu i na mouˈa e faahohoˈa ra?

¹⁰ A amaha ˈi te mouˈa taipe, te tahi pae mouˈa i te pae apatoerau e te tahi atu i te pae apatoa, ua vai noa na avae o Iehova i nia i tera na mouˈa. Fa mai nei te hoê “peho rahi roa” i raro aˈe i to ˈna na avae. Te faahohoˈa ra tera peho i te parururaa a te Atua. E ite te mau tavini a Iehova i te parururaa i raro aˈe i to ˈna mana arii e i te Basileia Mesia o ta ˈna Tamaiti. Eita roa ˈtu Iehova e vaiiho ia faaorehia te haamoriraa viivii ore. Afea te mouˈa ra Oliveta i te amaharaa? A haamauhia ˈi te Basileia Mesia i te hopea o to te Etene anotau i 1914. Afea te feia haamori i te Atua mau i te hororaa i roto i te peho taipe?

11, 12. (a) Afea te nunaa o te Atua i te hororaa i roto i te peho taipe? (b) Na te aha e faaite ra e te paruru ra Iehova i to ˈna nunaa?

¹¹ Ua faaara Iesu i ta ˈna mau pǐpǐ: “E ririhia outou e te mau fenua atoa i to ˈu nei iˈoa.” (Mat. 24:9) Ua uˈana roa ˈtu â tera riri mai 1914, a haamata ˈi te mau mahana hopea o teie nei ao. Ua aro-uˈana-hia te toea faatavaihia i te Tamaˈi Rahi matamua. Aita râ teie pǔpǔ taiva ore i faaorehia. I 1919, ua faaorahia mai ratou i te mana o Babulonia Rahi, te hau emepera o te ao atoa o te haapaoraa hape. (Apo. 11:11, 12) * I reira te mau tavini a te Atua i te hororaa i roto i te peho o na mouˈa o Iehova.

¹² Mai 1919, ua paruru noa Iehova i te feia e haamori ra ia ˈna i te mau fenua atoa. A mairi ai te tau,  mea rahi te faatereraa tei opani e tei taotia i te pororaa e te papai Bibilia a te mau Ite no Iehova. Mai tera noâ i te tahi mau fenua. Noa ˈtu eaha ta te mau nunaa e rave, eita roa ˈtu ratou e manuïa i te faaore i te haamoriraa mau! E paruru iho â Iehova i to ˈna nunaa.—Deut. 11:2.

13. E nafea ia faaea noa i roto i te peho paruruhia e Iehova, e no te aha mea faufaa roa ˈtu â ˈi i teie mahana ia na reira?

¹³ Ia vai taiva ore tatou ia Iehova, e faaea tatou i roto i te peho paruruhia e Iehova. Eita roa ˈtu o ˈna e ta ˈna Tamaiti e vaiiho i te tahi noa ˈˈe taata aore ra ohipa ia ‘haru ia tatou i roto i to ˈNa rima.’ (Ioa. 10:28, 29) E tauturu mai iho â Iehova ia vai taiva ore i ta ˈna faatereraa e a ta ˈna Tamaiti. E hinaaro roa ˈtu â tatou i ta ˈna tauturu i te ati rahi e piri oioi maira. Mea faufaa roa ˈtu â ïa i teie mahana ia faaea i roto i te peho paruruhia e Iehova.

14, 15. Eaha te tupu i nia i te taata i rapaeau mai i te peho i te mahana e aro ai te Atua i to ˈna mau enemi?

¹⁴ E aro uˈana roa ˈtu â Satani i te mau tavini a Iehova a piri mai ai te hopea o teie nei ao. I muri iho ïa e tupu ai te mahana e aro ai te Atua i to ˈna mau enemi. E haapapu Iehova e o te aroraa hopea tera a Satani. I tera mahana e faaite papu ai Iehova e e Aito hanahana mau o ˈna.—Zek. 14:3.

¹⁵ Eaha te tupu i nia i te taata i rapaeau mai i te “peho rahi” i te mahana e aro ai te Atua i to ˈna mau enemi? Aita to ratou e “maramarama,” oia hoi te farii maitai a te Atua. Te na ô ra te parau tohu e e “arehurehu,” aore ra paari roa mai, “te puaahorofenua, e te pheradi [aore ra niuru], e te kamela, e te asini, e te mau puaa atoa.” Te auraa ïa e e paari mai te mau mauhaa tamaˈi, oia hoi e riro tera mau mea ei mea faufaa ore. Te faaite ra Zekaria e e faautua Iehova i to ˈna mau enemi e te “ati,” aore ra maˈi. E “pau noa” to ratou mata e arero. Aita tatou i ite e e maˈi mau anei. Ua ite râ tatou e eita e tia ia ratou ia haamauiui mai aore ra ia faaino i te Atua. (Zek. 14:6, 7, 12, 15) E tia te taatoaraa o “te mau arii o te ao nei, e ta ratou mau nuu” i te paeau o Satani. Noa ˈtu teihea roa ratou i nia i te fenua, e haamouhia ratou. (Apo. 19:19-21) “Tei pohe ia Iehova ra ia tae i te reira ra anotau, e riro ïa mai te hopea mai o te fenua.”—Ier. 25:32, 33.

16. Ia uiui tatou i te aha a piri mai ai te mahana aroraa a te Atua? Ia aha tatou?

¹⁶ E pinepine te tamaˈi i te haamauiui, i te feia atoa i upootia. E iti mai paha te maa. E ere paha tatou i te rahiraa o ta tatou mau faufaa. E iti roa mai paha to tatou tiamâraa. Ia aha tatou ia tupu tera mau mea? E horo hanoa anei tatou? E haapae anei tatou i to tatou faaroo no te faateimaharaa? E paruparu roa anei tatou a ere atu ai i te tiaturiraa? A tupu ai te ati rahi, mea faufaa mau ia tiaturi e e faaora mai iho â Iehova e ia faaea noa i roto i te peho paruruhia e te Atua.—A taio i te Habakuka 3:17, 18.

17, 18. (a) Eaha te “pape ora”? (b) Eaha ta ‘te miti i te pae hitia o te râ e i te pae tooa o te râ’ e faahohoˈa ra? (c) Eaha ta oe e faaoti papu?

¹⁷ Ia oti Aramagedo, e tahe rahi mai “te pape ora” mai te Basileia o te Mesia mai. Teie “pape ora,” o ta Iehova ïa i faanaho ia ora te taata e a muri noa ˈtu. ‘Te miti i te pae hitia o te râ,’ o te miti Pohe ïa, o te faahohoˈa maitai ra i te feia e taoto ra i roto i te pohe. E te miti i ‘te pae tooa o te râ,’ o te miti Mediteranea ïa tei î i te ora, o te faahohoˈa maitai ra i te “feia rahi roa” e ora ˈtu i Aramagedo. (A taio i te Zekaria 14:8, 9; Apo. 7:9-15) E faatiamâhia na pǔpǔ e piti i te utua pohe a Adamu a inu ai ratou i te pape ora taipe, aore ra “te pape ora tahe.” Ei faahopearaa, e fanaˈo te taatoaraa o ratou i te huru taata tia e te ora mure ore.—Apo. 22:1, 2.

¹⁸ A haamou ai Iehova i teie ao ino, e paruru o ˈna ia tatou e tae roa ˈtu i roto i ta ˈna ao apî parau-tia. Noa ˈtu e e riri mai te mau nunaa atoa, e faaoti papu anaˈe e vai taiva ore i te Basileia o te Atua e e faaea noa i roto i te peho paruruhia e Iehova.