Pero e Scritura ta spierta nos: “For di curason ta sali pensamento malicioso, matamento, adulterio, fornicacion, ladronicia, testimonio falso y blasfemia.” (Mat. 15:19) Nos curason figurativo, esta, e persona cu nos ta di paden, por gaña nos y pone nos haci cosnan cu ta bay contra e boluntad di Dios. Y kisas ta te despues cu nos a comete un fayo, nos ta bin realisa cu nos curason a gaña nos. Pesey, pa evita cu nos ta dal un paso robes, nos mester sa kico tin den nos curason. Kico por yuda nos haya sa esey?

Lesa Bijbel tur dia y medita riba loke e ta bisa.

Apostel Pablo a skirbi: “E palabra di Dios ta bibo y poderoso, y e ta mas skerpi cu cualkier spada cu ta corta tur dos banda, y e ta penetra asina profundo cu e ta separa alma for di spirito.” Si, e mensahe di Dios cu nos ta haya den Bijbel “por saca pensamento y intencion di curason na cla.” (Heb. 4:12) Ora nos ta studia Bijbel, nos mester samina nos pensamento- y echonan pa wak si nan ta na harmonia cu loke Bijbel ta bisa. Di e manera ey, nos por saca afo kico realmente tin den nos curason. Pues, ta hopi importante pa lesa Bijbel tur dia y medita riba loke e ta bisa. Esaki lo yuda nos pensa manera Jehova y mira cos for di su punto di bista.

Ora nos ta acepta e consehonan di Bijbel y ta aplica su principionan, nos ta entrena nos consenshi. Nos consenshi ta manera un stem interno cu ta papia cu nos. E ta bisa nos ora cu un cos ta malo  y ta pone nos stop di bin cu excuus pa haci malo. (Rom. 9:1) Ademas, den Bijbel nos ta haya ehempelnan cu por sirbi como “spiertamento pa nos.” (1 Cor. 10:11) Si nos siña for di nan, nos por evita di tuma decisionnan robes. Kico mas por yuda nos?

Pidi Dios yuda bo saca afo kico ta e intencionnan di bo curason.

Jehova ta esun cu ta “scudriña curason.” (1 Cro. 29:17) E “ta mas grandi cu nos curason y sa tur cos.” (1 Juan 3:20) Nos no por gaña Dios. Si nos laga Dios sa honestamente con nos ta sinti y kico ta nos preocupacion- y deseonan, e por yuda nos saca afo kico realmente ta e intencionnan di nos curason. Nos por hasta pidie pa ‘crea un curason limpi den nos.’ (Sal. 51:10) Pues, si nos kier pa Jehova yuda nos haya sa kico tin den nos curason, nos mester haci oracion.

Presta bon atencion na reunion.

Ora nos ta presta bon atencion na nos reunionnan, esaki ta yuda nos ser franco cu nos mes y realisa ki tipo di hende nos ta di paden. Ta berdad cu kisas no ta tur biaha nos ta siña algo nobo na reunion. Pero como cu nos ta presente na tur reunion, nos lo haya un mihor comprondemento di principionan di Bijbel. Ademas, nos ta haya recordatorionan valioso cu ta yuda nos haya sa kico tin den nos curason pa nos por haci e cambionan necesario. Un otro yudansa valioso ta e comentarionan di nos rumannan. (Prov. 27:17) Pero si nos ta isola nos mes y no ta bin reunion regularmente pa disfruta di compañerismo cristian, nos por cuminsa ‘busca nos mes deseo’ y tuma decisionnan cu no ta sabi. (Prov. 18:1) Pesey, ta bon pa nos puntra nos mes: ‘Mi ta asisti na tur reunion y beneficia di nan?’—Heb. 10:24, 25.

Nos curason por gaña nos den varios manera. Laga nos wak kico lo por bira un trampa pa nos: e deseo pa cos material, consumo di alcohol, e amistadnan cu nos ta scoge y recreo.

E deseo pa cos material.

Ta normal cu hende kier satisface nan necesidadnan fisico. Pero nos no mester pone cos material na prome luga den nos bida. Hesus a spierta nos pa no haci esey. Den un di su ilustracionnan, e ta hala nos atencion na e caso di un homber rico cu tabatin mangasinanan yen di trigo. Como cu e homber no tabatin luga pa warda mas trigo di un otro bon cosecha, el a dicidi di basha su mangasinanan abou pa e traha mangasina mas grandi. El a rasona den su mes: “Den nan mi ta bay warda tur mi trigo y tur mi bienesnan, y lo mi bisa mi alma: ‘Alma, bo tin hopi cos bon warda pa hopi aña; bay trankil, come, bebe y gosa.’” Sinembargo, e homber rico aki no a tene cuenta cu un realidad di bida: E por a muri e mesun anochi ey.—Luc. 12:16-20.

Segun cu nos edad ta subi, nos por cuminsa preocupa tocante nos situacion financiero pa futuro. Kisas nos ta cuminsa traha overtime, falta reunion, predica menos y neglisha nos responsabilidadnan cristian simplemente pa yega na poco placa pa ora nos bira bieu. Un actitud asina ta peligroso. Of kisas bo ta den flor di bo hubentud y bo ta realisa cu no  tin un mihor carera cu sirbishi di tempo completo. Pero bo ta vacila pa dal e paso pa traha pionero pasobra bo ta pensa cu bo mester ta financieramente bon para prome. Wel, si ta asina bo ta pensa, corda riba esaki: Ta awor nos mester haci nos best pa sirbi Dios. Nos no sa si mañan nos ta na bida.

Consumo di alcohol.

Proverbionan 23:20 ta bisa: “No anda cu esnan cu ta gusta dal nan biña.” Ora un hende tin deseo fuerte pa alcohol, e ta cuminsa busca excuus pa e bebe. Kisas e ta bisa cu e ta bebe simplemente pa trankilisa su mes, no pa bira burachi. Wel, si nos tin mester di alcohol pa nos por sinti nos trankil, anto ta tempo pa nos analisa nos curason honestamente, y no lag’e gaña nos.

E amistadnan cu nos ta scoge.

Ta claro cu nos no por evita di tin contacto cu hende cu no ta Testigo di Jehova, sea na scol, na trabou of den sirbishi. Pero e asunto ta cambia henteramente na momento cu nos cuminsa anda cu nan mas di loke ta necesario y hasta cera amistad intimo cu nan. Acaso nos ta purba di hustifica esey, rasonando cu nan tin bon cualidadnan? Bijbel ta spierta nos: “No laga hende gaña boso. Mal compania ta daña bon custumber.” (1 Cor. 15:33) Corda cu un tiki veneno so por contamina awa limpi; di igual manera, si nos tin amistad cu hende cu no ta sirbi Jehova, nos por bay atras spiritualmente y cuminsa imita mundo su manera di pensa, bisti, papia y actua.

Recreo.

Tecnologia moderno a pone cu awendia nos tin tur sorto di entretenimento na nos alcance, di cua hopi ta cuestionabel y hasta malo pa un cristian. Pablo a bisa e prome cristiannan pa nan no papia mes di cosnan impuro. (Efe. 5:3) Pero kico si nos ta gusta scucha of wak cosnan impuro? Podise nos ta hustifica esey y bisa cu tur hende mester di un poco placer den nan bida y cu loke nos ta scoge pa entretene nos mes cu ne ta un asunto personal. Pero nos mester tuma e conseho di Pablo na serio y no wak ni scucha nada impuro.

Hasta si nos a bira victima di nos curason engañoso y a haya e custumber di haci malo y hustifica esey, nos por cambia. (Efe. 4:22-24) Laga nos wak dos ehempel di nos tempo.

Miguel * mester a cambia su actitud pa cu cos material. El a bisa: “Ami cu mi esposa y nos yiu homber ta bin di un pais caminda ta masha importante pa bo tin lo ultimo y lo mihor den tecnologia y cosnan di luho. Dado momento, mi tabata pensa cu mi por a dedica mi bida na obtene tur loke mundo ta ofrece, sin bira materialista.” No a dura hopi tempo cu Miguel a bin realisa cu coremento tras di cos material ta puro banidad. Pesey el a pidi Jehova yud’e cambia su manera di pensa. Miguel a sigui bisa: ‘Mi a laga Jehova sa cu tanto ami como mi famia kier sirbie di henter nos curason. Pesey nos a dicidi di simplifica nos bida y muda bay biba caminda tin mas necesidad di predicador di Reino. Poco despues, nos a cuminsa traha como pionero. Nos a bin realisa cu un hende no mester di hopi cos material pa e por ta satisfecho y feliz.’

Lee su experencia ta siña nos con un saminacion honesto di nos mes por yuda nos stop di anda cu mal amigo. Lee ta conta: “Debi na mi trabou, mi tabata sali regularmente cu cliente. Mi tabata sa cu na e reunionnan ey semper tin bebemento di mas, pero mi tabata gusta bay. Hopi biaha mi a hera bira burachi, y despues mi tabata sinti duele di loke mi a haci. Mi tabatin cu analisa mi curason honestamente y pensa kico mi kier haci. E conseho di e Palabra di Dios y e sugerencianan di e ancianonan a yuda mi realisa cu loke mi tabata busca realmente ta amistad cu hende cu no ta stima Jehova. Awor, mi ta atende mi asuntonan di negoshi mas tanto via telefon y mi ta percura pa masha poco biaha mi tin cu reuni cu e hendenan cu mi ta haci negoshi cu ne.”

Nos mester ta honesto cu nos mes y trata na saca afo kico realmente ta e intencionnan di nos curason. Con nos por haci esey? Nos por pidi Jehova yuda nos, pasobra “e conoce e secretonan di curason.” (Sal. 44:21) Jehova a provee tambe su Palabra, cu por fungi manera un spiel y yuda nos mira e clase di persona cu nos realmente ta. (Sant. 1:22-25) Ademas, Jehova ta conseha nos mediante nos publicacionnan y e reunionnan. Tur e provisionnan valioso aki ta pa yuda nos proteha nos curason y sigui haci loke ta corecto.