Mangolo a re fa temoso ena: “Pelong ho tsoa menahano e khopo, lipolao, bofebe, bohlola, bosholu, bopaki ba bohata, linyefolo.” (Mat. 15:19) Lipelo tsa rōna tsa tšoantšetso li ka re thetsa eaba li etsa hore re ikemele ha re etsa lintho tse khahlanong le thato ea Molimo. Ho feta moo, re ka ’na ra se ke ra hlokomela letho ho fihlela ha re se re entse ntho e booatla. Ke’ng e ka re thusang hore re hlokomele hore na boikemisetso ba lipelo tsa rōna ke bofe pele re etsa ntho e fosahetseng?

Bala Bibele kamehla ʼme u thuise ka seo e se bolelang.

Moapostola Pauluse o ile a ngola a re: “Lentsoe la Molimo lea phela ’me le fana ka matla ’me le bohale ho feta sabole leha e le efe e sehang ka nģa tse peli ’me le phunyeletsa esita le ho ea fihla moo ho arohanang moea le boikutlo.” Molaetsa oa Molimo o ka Bibeleng o “khona ho lemoha menahano le boikemisetso ba pelo.” (Baheb. 4:12) Haeba re itlhahloba re sebelisa Mangolo, ka sebele seo se ka re thusa hore re bone hore na boikemisetso ba lipelo tsa rōna ke bofe. Ruri ke habohlokoa hore re bale Lentsoe la Molimo letsatsi le letsatsi re be re thuise ka seo le se bolelang, e le hore re ithute menahano ea Jehova le tsela eo a talimang lintho ka eona!

Ho amohela keletso ea Mangolo le ho sebelisa melao-motheo ea Bibele ho tla ama matsoalo a rōna—e leng matla a ka hare a ‘re pakelang.’ (Bar. 9:1) Matsoalo a rōna a ka re thibela ho ikemela ha re etsa  ntho e fosahetseng. Ho feta moo, Bibele e na le mehlala eo e ka bang “temoso ho rōna.” (1 Bakor. 10:11) Ha re ithuta eona, seo se ka re thibela ho etsa lintho tse fosahetseng. Ke sefe seo e mong le e mong oa rōna a lokelang ho se etsa?

Rapela Molimo hore a u thuse ho hlokomela boikemisetso ba pelo ea hao.

Jehova ‘o hlahloba lipelo.’ (1 Likron. 29:17) O “moholo ho lipelo tsa rōna ’me o tseba lintho tsohle.” (1 Joh. 3:20) Molimo a ke ke a thetsoa. Haeba re phuthollela Jehova sefuba sa rōna ha re rapela ’me re mo bolella lintho tseo re amehileng ka tsona, maikutlo a rōna le lintho tseo re li batlang, Jehova a ka re thusa hore re lemohe boikemisetso ba lipelo tsa rōna. Re ka ba ra kōpa Molimo hore a ‘bōpe ka ho rōna lipelo tse hloekileng.’ (Pes. 51:10) Kahoo, haeba re batla ho tseba hore na lipelo tsa rōna li sekametse hokae, ha rea lokela ho hlokomoloha thapelo.

Mamela ka hloko nakong ea liboka tsa Bokreste.

Haeba re mamela ka hloko ha re le libokeng tsa Bokreste, seo se ka re thusa hore re hlahlobe lipelo tsa rōna—e leng seo re hlileng re leng sona ka hare. Le hoja re ke ke ra fuoa boitsebiso bo bocha sebokeng se seng le se seng, ha re le teng re fumana kutloisiso e batsi ea melao-motheo ea Bibele hammoho le likhopotso tsa bohlokoa tse re thusang hore re hlahlobisise boikemisetso ba lipelo tsa rōna. Litlhaloso tseo bara le baralib’abo rōna ba fanang ka tsona, ke tsa bohlokoa ’me li re thusa hore re ntlafatse seo re leng sona ka hare. (Liprov. 27:17) Ho itšehla thajana ho e-na le hore kamehla re thabele setsoalle le Bakreste ba bang ha re le libokeng, ho ka re ntša kotsi. Ho ka etsa hore re ‘batle tabatabelo ea rōna ea boithati.’ (Liprov. 18:1) Kahoo, e ka ba hantle hore re ipotse, ‘Na ke tloaetse ho ba teng libokeng tsohle le ho rua molemo ho tsona?’—Baheb. 10:24, 25.

Lipelo tsa rōna tse bolotsana li ka re ntša tseleng likarolong tse ngata tsa bophelo. A re ke re hlahlobeng tse ʼnè: ho lelekisa lintho tse bonahalang, ho noa joala, metsoalle eo re e khethang le boikhathollo boo re bo khethang.

Ho lelekisa lintho tse bonahalang.

Re na le takatso ea tlhaho ea hore re ikhotsofatse ka lintho tseo re li hlokang nameng. Leha ho le joalo, Jesu o ile a fana ka temoso mabapi le ho nka lintho tse bonahalang e le tsa bohlokoa ho tlōla. Papisong e ʼngoe ea hae, Jesu o re re ke re nahane ka taba ea monna e mong oa morui eo matlo a hae a polokelo a neng a tletse. Ka lebaka leo, o ne a se na moo a tla boloka lijo tseo a li kotutseng teng. Monna eo o ile a rera ho qhaqha matlo a hae a polokelo ʼme a hahe a maholoanyane. O ile a re: “Ke tla bokellela lijo-thollo tsohle tsa ka le lintho tsohle tsa ka tse molemo moo; ’me ke tla re ho moea oa ka: ‘Moea, u na le lintho tse ngata tse molemo tse bolokiloeng ka lilemo tse ngata; khatholoha, u je, u noe, u ithabise.’” Leha ho le joalo, monna eo oa morui ha aa ka a hlokomela ntho eo a neng a ke ke a e qoba: O ne a ka ʼna a shoa hona bosiung boo.—Luka 12:16-20.

Ha re ntse re hōla, re ka ʼna ra tšoenyeha ka hore re roalle le sa sele ebe re qala ho ikemela ka taba ea ho sebetsa ka mor’a lihora tsa mosebetsi ka matsatsi a liboka tsa mantsiboea kapa ka tsela e itseng ra qala ho hlokomoloha boikarabelo ba rōna ba Bokreste. Na ha rea lokela ho loantša maikutlo ao? Kapa mohlomong re sa le bacha ʼme rea hlokomela hore mosebetsi o  molemo ka ho fetisisa ke ho ba tšebeletsong ea nako e tletseng. Leha ho le joalo, na re na le maikutlo a hore re lokela ho ikemela licheleteng pele re nka bopula-maliboho? Na ha rea lokela ho etsa sohle seo re ka se khonang hona joale e le hore re ruele ho Molimo? Ke mang ea tsebang hore na re tla be re phela hosane kapa che?

Ho noa joala.

Liproverbia 23:20 e re: “U se ke ua ba har’a ba noang veine haholo.” Haeba motho a rata joala haholo, a ka ʼna a ikemela ha a noa khafetsa. A ka ʼna a re o noella ho ikhatholla, eseng ho tahoa. Haeba re hloka joala hore re khatholohe, mohlomong ke nako ea hore ka botšepehi re hlahlobe hore na lipelo tsa rōna li sekametse hokae.

Metsoalle eo re e khethang.

Ke ʼnete hore re ke ke ra qoba ho kopana le batho bao e seng Bakreste, mohlomong ha re le sekolong, mosebetsing kapa tšebeletsong ea tšimo. Leha ho le joalo, e ke ke ea e-ba hantle ho qeta nako re e-na le bona le ho etsa setsoalle se haufi le bona. Na rea ikemela ka hore re etse setsoalle le batho ba joalo re bolela hore ba na le makhabane a mangata? Temoso ea Bibele e re: “Le se ke la thetsoa. Litloaelano tse mpe li senya mekhoa e metle.” (1 Bakor. 15:33) Feela joalokaha litšila tse nyenyane li ka silafatsa metsi a hloekileng, ho etsa setsoalle le batho ba sa tšabeng Molimo ho ka senya kamano ea rōna le Molimo ʼme ha etsa hore re amohele maikutlo a lefatše, moaparo oa lona, lipuo tsa lona le boitšoaro ba lona.

Boikhathollo boo re bo khethang.

Theknoloji ea kajeno e etsa hore boithabiso ba mefuta-futa bo fumanehe habonolo, ʼme boholo ba bona ha bo amohelehe kapa ha boa lokela Bakreste. Pauluse o ile a ngola a re: ‘Ho se hloeke ha mofuta o mong le o mong ho se ke ha boleloa har’a lōna.’ (Baef. 5:3) Re tla etsa’ng haeba lipelo tsa rōna li rata ho shebella kapa ho mamela ntho e itseng e sa hloekang? Re ka ʼna ra bolela hore motho e mong le e mong o hloka boikhathollo kapa boithabiso, le hore ho tsoa ho eena hore na o ikhatholla kapa o ithabisa joang. Empa e ka ba hantle hore re nahanisise ka keletso ea Pauluse ʼme re se ke ra shebella kapa ra mamela lintho tse sa hloekang.

Haeba ka lebaka la tšekamelo ea lipelo tsa rōna tse bolotsana re tloaetse ho ikemela ha re etsa lintho tse fosahetseng, re ka etsa liphetoho. (Baef. 4:22-24) Nahana ka mehlala e ʼmeli ea mehleng ena.

Miguel * o ile a tlameha ho fetola maikutlo a hae ka lintho tse bonahalang. O re: “ʼNa le mosali oa ka hammoho le mora oa rōna, re tsoa naheng eo ho eona batho ba nkang hore ho ba le lintho tsa theknoloji tsa morao-rao le ho phela hamonate ke tsona lintho tsa bohlokoa haholo. Ho na le nako eo ke ileng ka etsa sohle seo nka se khonang hore ke fumane lintho tsa lefatše, ke nahana hore nka etsa seo empa ke sa be le lerato la lintho tse bonahalang. Ho e-s’o ee kae ke ile ka hlokomela hore motho a ke ke a qeta ho lelekisa lintho tse bonahalang. Ke ile ka rapela Jehova mabapi le maikutlo ao ke neng ke e-na le ’ona le boikemisetso ba pelo ea ka. Ke ile ka mo tsebisa hore re le lelapa, re batla ho mo sebeletsa ka botlalo. Re ile ra etsa qeto ea ho phela bophelo bo sa rarahanang le ho fallela moo ho hlokahalang bahoeletsi ba bangata. Kapele feela re ile ra khona ho bula maliboho. Re hlokometse hore ha re hloke lintho tse ngata tse bonahalang e le hore re phele hantle re be re thabe.”

Phihlelo ea Lee e bontša kamoo ho itlhahloba ka botšepehi ho mo thusitseng kateng hore a tlohele metsoalle e mebe. Lee o re: “Ka lebaka la mosebetsi oa ka, hangata ke ne ke e-ba har’a barekisi ba tsoang linaheng tse ka ntle. Ke ne ke tseba hore libokeng tseo, batho ba tla noa ho tlōla, empa ke ne ke thabela ho ba ho tsona. Ka makhetlo a mangata ke ne ke e-ba makhatheng a ho tahoa, empa ka mor’a moo ke ne ke ikoahlaea. Ke ile ka tlameha ho hlahloba pelo ea ka ka botšepehi. Temoso ea Lentsoe la Molimo le keletso ea baholo li ile tsa nthusa hore ke hlokomele hore ha e le hantle ke ne ke batla ho ba motsoalle oa batho ba sa rateng Jehova. Hona joale, ha ho khoneha ke sebetsa khoebo ea ka ka thelefono ʼme ha ke sa kopana khafetsa le barekisi.”

Re lokela ho itlhahloba ka botšepehi ’me re hlokomele hore na boikemisetso ba lipelo tsa rōna ke bofe. Ha re ntse re etsa joalo, re lokela ho rapela ’me re kōpe hore Jehova a re thuse, re hopola hore “o hlokomela liphiri tsa pelo.” (Pes. 44:21) Molimo o boetse o re file Lentsoe la hae leo re ka le sebelisang e le seipone. (Jak. 1:22-25) Likhopotso le likeletso tseo re li fumanang ka har’a lingoliloeng tsa Bokreste le libokeng, le tsona ke tsa bohlokoa! Litokisetso tsena li ka re thusa hore re lebele lipelo tsa rōna ʼme re tsoele pele re tsamaea litseleng tsa ho loka.