Baibel i givim bikpela tok lukaut olsem: “Ol samting i kam long tingting bilong bel em ol tingting nogut, pasin bilong kilim man i dai, pasin adaltri, pasin pamuk, stil, giaman, na tok nogut.” (Mat. 15:19) Bel bilong yumi, olsem ol tingting i stap long bel, inap giamanim yumi na kirapim yumi long mekim samting i no stret wantaim laik bilong God. Ating yumi no inap luksave long dispela i go inap long taim yumi mekim rong. Wanem samting inap helpim yumi long save long tingting i stap long bel paslain long yumi mekim rong?

Ritim Baibel long olgeta de na tingim tingim tok bilong en long bel.

Aposel Pol i tok: “Tok bilong God i gat laip na i wok strong i stap. Em i sap moa, winim bainat i gat tupela sap. Em i go insait tru long man na i kamapim ples klia insait bilong man na ausait bilong man.” Tok Bilong God “inap kamapim klia tingting na laik i stap long bel bilong man.” (Hib. 4:12) Taim yumi stadi long Baibel, yumi mas skelim gut tingting na pasin bilong yumi yet. Dispela bai helpim yumi long painimaut tingting tru i stap long bel. Olsem na em i bikpela samting tru long yumi mas ritim Baibel long olgeta de na tingim tingim tok bilong en long bel. Dispela bai helpim yumi long kisim tingting bilong Jehova.

Sapos yumi putim yau long tok bilong Baibel, dispela bai skulim gut maus bilong bel. Maus bilong bel i olsem wanpela nek i stap insait long yumi. Dispela nek inap tokim yumi olsem wanpela samting i no stret  na em inap pasim yumi long givim eskius bilong mekim rong. (Rom 9:1) Baibel i gat stori bilong planti manmeri na dispela i stap olsem “tok lukaut long yumi.” (1 Kor. 10:11) Sapos yumi kisim skul long ol dispela stori, yumi inap abrusim pasin bilong mekim ol disisen i no stret. Wanem samting moa inap helpim yumi?

Beten askim God long helpim yu long painimaut tingting i stap long bel.

Jehova i save “traim bel bilong olgeta man.” (1 Sto. 29:17) Em i “winim tru bel bilong yumi na em i save long olgeta samting.” (1 Jon 3:20) God i save long olgeta samting long yumi. Sapos yumi beten long Jehova na tokim em stret long ol samting yumi pilim, wari long en, na laikim, orait em inap helpim yumi long save long tingting i stap long bel. Yumi inap askim God long givim yumi “klinpela bel.” (Sng. 51:10) Olsem na beten em i nambawan rot bilong kisim helpim i kam long Jehova.

Putim gut yau long ol tok i kamap long ol miting.

Dispela inap helpim yumi long skelim gut tingting i stap long bel. Em tru olsem yumi no inap lainim ol nupela samting long olgeta miting. Tasol sapos yumi stap long olgeta miting, yumi inap kliagut moa long ol stiatok bilong Baibel. Yumi kisim ol tok kaunsel we inap helpim yumi long painimaut tingting i stap long bel, na yumi inap mekim ol senis. Ol bekim bilong ol bratasista inap helpim tru yumi. (Snd. 27:17) Tasol sapos yumi no bung oltaim wantaim ol bratasista long ol miting, yumi inap tingim yumi yet tasol na mekim ol disisen i no stret. (Snd. 18:1) Olsem na i gutpela long askim yu yet olsem, ‘Mi save go long olgeta miting na putim gut yau long ol tok i kamap?’—Hib. 10:24, 25.

Bel inap giamanim yumi long planti rot. Yumi ken stori long 4-pela rot: laik bilong kisim mani kago, pasin bilong dring alkohol, ol pren yumi makim, na ol samting bilong kisim amamas.

Laik bilong kisim mani kago.

Yumi olgeta i mas i gat kaikai, klos, na haus bilong i stap long en. I no gat rong long laikim ol dispela samting. Tasol Jisas i tok lukaut long yumi no ken putim mani kago i stap namba 1 long laip bilong yumi. Jisas i kamapim stori bilong wanpela maniman em bakstua bilong em i pulap long ol wit. Em i no gat spes bilong putim sampela moa wit, olsem na em i laik brukim ol bakstua na wokim ol bikpela bakstua. Em i tingting olsem: “Mi bai bungim ol wit na ol gutpela samting bilong mi long ol dispela bakstua. Na mi bai tok long mi yet olsem: ‘Mi bungim planti gutpela samting bilong lukautim mi inap planti yia, mi ken stap isi, kaikai, dring, na amamas.’” Tasol dispela maniman i lusim tingting long wanpela bikpela samting: Sapos em i dai long dispela nait, olgeta wok bilong em bai lus nating.—Luk 12:16-20.

Taim krismas bilong yumi i kamap bikpela, ating yumi bai tingting planti long bungim sampela mani bilong helpim yumi long taim yumi kamap lapun. Olsem na yumi inap givim ol eskius bilong mekim wok inap planti aua, lusim ol miting, mekim liklik wok tasol long autim tok, na i no inapim ol wok Kristen bilong yumi. O ating yumi stap yangpela yet na yumi save olsem fultaim sevis em nambawan gutpela rot. Tasol yumi inap kisim tingting olsem yumi mas mekim wok mani na bungim sampela mani paslain long yumi mekim wok painia. Sapos yu gat kain tingting olsem, yu mas tingim olsem nau em  i taim bilong givim bel olgeta long mekim wok bilong God. Yumi olgeta i no save sapos yumi bai stap laip tumora o nogat.

Pasin bilong dring alkohol.

Sindaun 23:20 i tok: “Yu no ken poroman wantaim ol man i save dring planti wain.” Sapos yu gat strongpela laik long dring alkohol, ating yu bai givim ol eskius bilong dring planti taim. Olsem, yu inap tok: ‘Mi no dring bilong spak. Mi dring bilong amamas tasol.’ Sapos kain samting olsem i painim yu, skelim gut tingting tru i stap long bel bilong yu, na no ken larim dispela i giamanim yu.

Ol pren yumi makim.

Olgeta de long skul, long ples wok, na long wok autim tok, yumi stap namel long ol manmeri husat i no lotuim Jehova. Tasol i no stret long lusim bikpela haptaim bilong stap wantaim ol o stap pren bilong ol. Ating yumi inap givim ol eskius na tok olsem ol dispela manmeri i gat planti gutpela pasin. Tasol Baibel i tok lukaut olsem: “Yupela i no ken larim ol arapela i giamanim yupela. Ol poroman nogut i save bagarapim ol gutpela pasin bilong man.” (1 Kor. 15:33) Liklik hap tasol bilong doti wara inap bagarapim klinpela wara. Olsem tasol, sapos yumi stap pren bilong ol manmeri husat i no laikim God, dispela inap bagarapim pasin bilong yumi long i stap pren bilong Jehova. Dispela inap kirapim yumi long bihainim pasin bilong ol manmeri bilong graun, na tingting, toktok, na pasin bilong bilas inap kamap wankain olsem bilong ol.

Ol samting bilong kisim amamas.

Save bilong teknoloji long nau i mekim na em isi long painim kain kain samting bilong kisim amamas long en. Tasol planti bilong ol dispela amamas i no gutpela long ol Kristen. Pol i tokim ol Kristen long ol i no ken stori tu long ol pasin i no klin. (Efe. 5:3) Olsem wanem sapos yumi gat strongpela laik long lukim o putim yau long wanpela samting i no klin? Yumi inap givim ol eskius na tok olsem yumi olgeta i nidim sampela samting bilong kisim amamas long en, na yumi yet i ken makim ol amamas yumi laik kisim. Tasol oltaim yumi mas bihainim tok bilong Pol na no ken lukim o putim yau long samting i no klin.

Maski sapos bel i bin giamanim yumi na yumi bin givim ol eskius bilong mekim rong, yumi gat taim i stap yet bilong senisim pasin bilong yumi. (Efe. 4:22-24) Yumi ken skelim stori bilong 2-pela man.

Miguel i mas senisim tingting bilong em long mani kago. a Em i tok: “Mi wantaim meri na pikinini man bilong mi i kam long kantri we ol man i ting em i bikpela samting long kisim olgeta nupela samting long sait bilong teknoloji na kisim gutpela sindaun. Mi bin lusim bikpela haptaim na strong long kisim olgeta samting mi inap kisim long dispela graun, na mi ting olsem mi no inap pundaun long pasin bilong bungim planti mani kago.” Tasol i no longtaim Miguel i luksave olsem tingting bilong em i no stret. Em i beten long Jehova i ken helpim em long senisim tingting bilong em. Miguel i tok moa olsem: “Mi tokim Jehova olsem mipela famili olgeta i laik givim bel tru long mekim wok bilong em. Mipela i mekim disisen long holim liklik samting tasol bilong skin na i go mekim wok long hap we ol i sot long ol man bilong autim tok. Bihain liklik mipela i mekim wok painia. Mipela i luksave olsem mipela i no nidim planti samting bilong helpim mipela long kisim gutpela sindaun na i stap amamas.”

Lee i bin lusim bikpela haptaim bilong stap wantaim ol poroman nogut. Ekspiriens bilong em i soim olsem em i bikpela samting long lusim sampela haptaim bilong skelim gut ol samting yumi laikim na ol samting yumi mekim. Oltaim Lee i save go dring alkohol wantaim ol lain em i mekim wok bisnis wantaim ol. Em i save olsem ol man bai spak long ol dispela bung, tasol em i save amamas yet long bung wantaim ol. Planti taim em i save dring na kamap long mak bilong spak, tasol bihain em i save pilim nogut long samting em i mekim. Em i luksave olsem em i mas senisim tingting bilong em. Em i tok: “Tok kaunsel i stap long Tok Bilong God na ol tok bilong ol elda i helpim mi long luksave olsem mi wok long poroman wantaim ol manmeri husat i no laikim Jehova.” Long nau, Lee i no save bung moa wantaim ol dispela lain, tasol em i save mekim wok bisnis wantaim ol long rot bilong telefon.

Yumi mas skelim gut tingting tru i stap long bel bilong yumi. Yumi ken mekim olsem long wanem rot? Yumi ken beten long Jehova, em man husat i “save long olgeta tingting i hait i stap long bel.” (Sng. 44:21) Na tu, yumi gat Tok Bilong God. Taim yumi ritim Tok Bilong God, em inap stap olsem mira we inap helpim yumi long luksave long pasin tru bilong yumi. (Jems 1:22-25) Na tu, yumi kisim tok kaunsel i kam long Jehova long rot bilong ol miting na ol buk na nius bilong yumi. Olgeta dispela samting inap helpim yumi long lukautim bel bilong yumi na wok yet long mekim pasin i stret.