Maṅwalo a ri sevha u ri: “Mbiluni ndi hone hune ha bva mihumbulo mivhi, u vhulaha, vhuṱonḓolo, vhupombwe, vhuvhava, vhuṱanzi ha mazwifhi na maṱamba.” (Mat. 15:19) Mbilu dzashu dza pfanyisedzo dzi nga ri fhura, dza ita uri ri dzhie vhukando vhune ha lwisana na zwine Mudzimu a zwi funa. Zwi nga itea uri ri si vhuye ra ṱhogomela zwe zwa itea u swikela nga murahu ha musi ro no dzhia vhukando ha vhutsilu. Ndi mini zwine zwa nga ri thusa uri musi ri sa athu u dzhia phetho yo khakheaho, ri ṱhogomele zwine mbilu dzashu dza elekanya zwone?

Vhalani Bivhili ḓuvha ḽiṅwe na ḽiṅwe, nahone ni elekanye nga ha zwine ya amba zwone.

Muapostola Paulo o ṅwala uri: “Ngauri ipfi ḽa Mudzimu ḽi a tshila nahone ḽi na maanḓa, ḽi na vhuhali u fhira banga ḽa mutshea-hoṱhe, ḽi phuletshedza u swika nga ngomu-ngomu ha muthu lune ḽa dzumbulula zwine muthu a vha zwone nga ngomu na nga nnḓa.” Mulaedza wa Mudzimu une wa wanala Bivhilini u “a kona u khethekanya mihumbulo na zwe muthu a ḓiimisela u zwi ita.” (Vha-Heb. 4:12) U ḓiṱolisisa u tendelana na zwine maṅwalo a amba zwone zwi nga ri thusa vhukuma u ṱhogomela zwi re mbiluni dzashu. Ndi zwa ndeme lungafhani u vhala Ipfi ḽa Mudzimu ḓuvha ḽiṅwe na ḽiṅwe na u elekanya nga zwine ḽa amba zwone. Musi ri tshi ita nga u ralo, ri ḓo kona u pfesesa mihumbulo ya Yehova na mavhonele awe!

U ṱanganedza nyeletshedzo i bvaho Maṅwaloni na u shumisa maitele a Bivhili zwi ḓo kwama mvalo dzashu —zwine ra vha zwone nga ngomu zwine zwa ri “ṱanziela.” (Vha-Roma 9:1) Mvalo dzashu dzi ḓo ri thivhela u vhuyafhedza buḓo ḽo khakheaho. Zwiṅwe hafhu, Bivhili i na tsumbo dzine dza nga shuma sa ‘tsevho kha riṋe vhane.’ (1 Vha-Kor. 10:11) U guda kha dzenedzi tsumbo zwi ḓo ri thusa uri ri sa dzhie buḓo ḽo khakheaho. Muṅwe na muṅwe washu u fanela u ita mini?

Rabelani Yehova uri a ni thuse u ṱhogomela zwine mbilu yaṋu ya elekanya zwone.

Yehova u “sedza mbilu.” (1 Koron. 29:17) Ndi “muhulwane u fhira mbilu dzashu nahone u ḓivha zwithu zwoṱhe.” (1 Yoh. 3:20) A hu na ane a nga fhura Mudzimu. Arali ra mu vhudza maḓipfele ashu, na zwine ra zwi tama musi ri tshi rabela, Yehova u ḓo kona u ri thusa uri ri kone u ṱhogomela zwine mbilu dzashu dza elekanya zwone. Ri nga dovha ra humbela Mudzimu uri a ri ‘sikele mbilu yo ṱambaho.’ (Ps. 51:10) U itela uri ri kone u ṱolisisa zwine mbilu dzashu dza elekanya zwone, ri fanela u rabela tshifhinga tshoṱhe.

Thetshelesani nga vhuronwane miṱanganoni ya Vhukriste.

U thetshelesa zwine zwa khou haseledzwa miṱanganoni ya Vhukriste zwi nga ri thusa uri ri ṱolisise zwine ra vha zwone zwa vhukuma—mbiluni dzashu. Naho hu sa haseledzwi mafhungo maswa kha muṱangano muṅwe na muṅwe, u vha hone zwi ri thusa u pfesesa khwine maitele a Bivhili na khumbudzo dzine ra ṋewa dzone dzine dza ri thusa u pfesesa zwine mbilu dzashu dza elekanya zwone. Phindulo dza vhahashu vha tshinnani na vha tshisadzini dza ndeme, dzi nga ri thusa u ṱolisisa zwine ra vha zwone zwa vhukuma. (Mir. 27:17) U ḓifhambanya na vhaṅwe vhathu, nṱhani ha u ḓiphina nga u vha hone tshifhinga tshoṱhe miṱanganoni zwi nga vha khombo kha riṋe. U ḓifhambanya zwi nga ita uri ri ‘tevhele mbilu dzashu.’ (Mir. 18:1) Nga zwenezwo, zwi ḓo vha vhuṱali u ḓivhudzisa uri, ‘Naa ndi nḓowelo yanga u vha hone miṱanganoni yoṱhe na u vhuyelwa ngayo?’—Vha-Heb. 10:24, 25.

Mbilu dzashu dzi re na tshimbevha dzi nga ri fhura kha masia manzhi a vhutshilo. Kha ri haseledze masia maṋa vhutshiloni: u tovhola zwithu zwi vhonalaho, u shumisa zwikambi, khonani dzine ra dzi khetha, na zwine ra zwi ita musi ri tshi ḓimvumvusa.

U tovhola zwithu zwi vhonalaho.

Ndi zwa nzulele u ṱoḓa u fusha lutamo lwashu lwa ṱhoḓea dza lwa ṋama. Naho zwo ralo, Yesu o ṋea tsevho malugana na u dzhia zwithu zwi vhonalaho zwi zwa ndeme nga ho kalulaho. Kha tshiṅwe tsha zwifanyiso zwawe, Yesu o ri ramba uri ri ṱhogomele zwe zwa itea kha muṅwe munna wa mupfumi we a vha e na maḓulu o ḓalaho. Nga zwenezwo, o vha a si tsheena hune a nga vhea hone iṅwe khaṋo yawe. Onoyo munna o vha o dzudzanya u thutha maḓulu awe a fhaṱa mahulwane. O humbula uri: “Henefho ndi ḓo kuvhanganya goroi yanga na zwithu zwanga zwoṱhe zwavhuḓi, ndi hone ndi tshi ḓo ri: “Ndi na zwithu zwinzhi zwavhuḓi zwe nda zwi vhulungela miṅwaha minzhi i ḓaho; kha ndi awele, ndi ḽe, ndi nwe, ndi ḓiphiṋe.” Naho zwo ralo, onoyo munna wa mupfumi ho ngo ṱhogomela mbuno ya ndeme: O vha a tshi ḓo fa vhusikuni honoho.—Luka 12:16-20.

Musi ri tshi khou ḓi aluwa, ri nga vhilaela nga maanḓa nga ha u ṱoḓa u tsireledzea siani ḽa zwithu zwi vhonalaho musi ro no vha vhalala, zwa ita uri ri thome u vhuyafhedza u shuma tshifhinga tsho engedzeaho nga madekwana a miṱangano, kana ra thoma u sa ita mishumo yashu ya Vhukriste nga nḓila yo teaho. Naa a ro ngo fanela u ṱhogomela uri ri si ite zwithu zwo raloho? Kana  khamusi ri nga vha ri tshee vhaswa, vhane vha zwi ṱhogomela uri u vha muvulanḓila ndi wone mushumo wa khwine u fhira yoṱhe. Naho zwo ralo, naa ri a litsha u dzhenela tshumelo ya vhuvulanḓila nga nṱhani ha uri ri khou ṱoḓa u thoma ra tsireledzea siani ḽa zwa dzitshelede? Naa a ro ngo fanela u ita zwoṱhe zwine ra nga kona zwino u itela u pfuma Mudzimuni? Ri zwi ḓivha hani uri ri ḓo vha ri tshi kha ḓi tshila matshelo?

U shumisa zwikambi.

Mirero 23: 20 i ri: “U songo dzula na vhadzia-u-nwa.” Arali muthu a tshi funesa nga maanḓa zwikambi, a nga kha ḓi vhuyafhedza zwine zwa ita uri a nwe tshifhinga tshoṱhe. A nga kha ḓi amba uri u nwa u itela u awela, hu si u kambiwa. Arali ri tshi ṱoḓa halwa u itela u kona u awela, zwino hu nga vha hu tshifhinga tsho teaho tsha u ḓiṱolisisa nga u fulufhedzea u itela u pfesesa zwine mbilu dzashu dza elekanya zwone.

Khonani dzine ra dzi khetha.

Ndi ngoho uri ri nga si kone u iledza tshoṱhe u vha fhethu huthihi na vhathu vha si vhatendi, samusi ri tshi ṱangana navho tshikoloni, mushumoni, na musi ri vhuḓinḓani. Naho zwo ralo, zwenezwo zwo fhambana vhukuma na u ṱwa navho, u katela na u ṱahulela vhukonani ha tsini navho. Naa ri a vha ambelela ra ri vha na pfaneleo nnzhi dzavhuḓi? Bivhili i a ri sevha musi i tshi ri: “Ni songo fhurwa. Vhukonani vhu si havhuḓi vhu tshinya vhuḓifari havhuḓi.” (1 Vha-Kor. 15:33) Tshika ṱhukhu-ṱhukhu i nga ita uri maḓi a si tsha vha o kunaho, ngauralo, u vhumba vhukonani na vhathu vha sa ofhi Mudzimu zwi nga ri tshikafhadza nga lwa muya zwa ita uri ri ṱanganedze mavhonele a shango a kuambarele, kuambele na vhuḓifari.

Zwine ra ḓimvumvusa ngazwo.

Thekinolodzhi ya musalauno i ita uri zwi leluwe vhukuma u wana zwine ra nga ḓimvumvusa ngazwo, nahone zwinzhi zwazwo a zwo ngo tea Mukriste. Paulo o ṅwala uri: ‘Vhuyaḓa ha mifuda yoṱhe vhu songo vhuya ha bulwa vhukati haṋu.’ (Vha-Ef. 5:3) Ri fanela u ita mini arali mbilu dzashu dzi tshi takadzwa nga u ṱalela kana u thetshelesa zwithu zwi songo kunaho? Ri nga kha ḓi amba uri vhathu vhoṱhe vha fanela u vha na tshifhinga tsha u awela kana u ḓimvumvusa, na uri zwine ra ḓimvumvusa ngazwo ndi mafhungo a muthu nga eṱhe. Fhedzi kha ri thetshelese nyeletshedzo ya Paulo nahone ri songo tendela u sedza kana u thetshelesa vhuyaḓa ha mifuda yoṱhe.

Arali ro vhuya ra tevhela mbilu yashu i re na tshimbevha, ra ita na u vha na nḓowelo ya u vhuyafhedza vhuḓifari ho khakheaho, ri nga ita tshanduko. (Vha-Ef. 4:22-24) Ṱhogomelani tsumbo mbili dza musalauno.

Miguel * o vha o tea u shandula mavhonele awe nga ha zwithu zwi vhonalaho. O ri: “Nṋe na mufumakadzi wanga na murwa wanga, ri bva kha shango ḽine khaḽo u vha na zwithu zwa thekinolodzhi zwa musalauno na zwa khwine-khwine, zwa dzhiiwa zwi zwa ndeme nga maanḓa. Nga tshiṅwe tshifhinga, ndo vha ndo ḓikumedza kha u wana zwoṱhe zwine ḽino shango ḽa nga nṋea zwone, ndi tshi humbula uri ndi nga kona u ita zwenezwo, fhedzi ndi sa funesi zwithu zwi vhonalaho. Nga u ṱavhanya ndo zwi ṱhogomela uri u tovhola zwithu zwi vhonalaho a zwi na hune zwa guma hone. Ndo rabela Yehova nga ha mavhonele anga na zwine mbilu yanga ya elekanya zwone. Ndo ita uri a zwi ḓivhe uri sa muṱa, ri ṱoḓa u mu shumela nga vhuḓalo. Ro kona u dzhia phetho ya u leludza vhutshilo hashu, ra pfulutshela fhethu hu re na ṱhoḓea khulwane. Hu sa athu fhela tshifhinga tshilapfu, ro mbo ḓi thoma u vula nḓila. Ro zwi ṱhogomela uri a hu ṱoḓei zwithu zwinzhi zwi vhonalaho u itela uri muthu a ḓiphine nga vhutshilo na uri a takale.”

Tshenzhelo ya Lee i sumbedza uri u ḓiṱolisisa nga u fulufhedzea zwo mu thusa uri a ṱutshele khonani dzawe mmbi. Lee o ri: “Nga nṱhani ha mushumo wanga, ndo vha ndi tshi anzela u vha na miṱangano na vhane nda shumisana navho kha zwa mabindu. Ndo vha ndi tshi zwi ḓivha uri kha yeneyo miṱangano hu nwiwa nga ho kalulaho, fhedzi ndo vha ndi tshi takalela u ya khayo. Zwifhinga zwinzhi ndo ṱoḓou kambiwa, fhedzi nda ḓisola nga murahu. Ndo vha ndo fanela u ṱolisisa nga u fulufhedzea zwine mbilu yanga ya elekanya zwone. Nyeletshedzo i bvaho Bivhilini na ya vhahulwane zwo nthusa uri ndi ṱhogomele uri ndo vha ndi tshi khou ṱwa na vhathu vha sa funi Yehova. Zwino ndi davhidzana navho kha zwa mabindu nga luṱingo nga hune zwa konadzea ngaho, nahone ndi ita vhungoho ha uri ndi sa ṱangane navho arali zwi sa ṱoḓei.”

Ri fanela u fulufhedzea kha riṋe vhaṋe u itela u pfesesa zwine mbilu dzashu dza elekanya zwone. Musi ri tshi ita nga u ralo, ri fanela u humbela thuso ya Yehova nga thabelo, ri tshi humbula uri “u vhona na zwiphiri zwa ngomu mbiluni.” (Ps. 44:21) Mudzimu o dovha a ri ṋea Ipfi ḽawe ḽine ra nga ḽi shumisa sa tshivhoni. (Yak. 1:22-25) Ri dovha ra wana khumbudzo na nyeletshedzo dza ndeme kha khandiso dzashu dza Vhukriste na miṱanganoni! Dzenedzo ndugiselelo dzi nga tsireledza mbilu dzashu dza ita uri ri dzule gondoni ḽa vhavhuya.