ERODOTUS mukua musoso mukua Ngeleku, ua kexile ku muenhu 2.500 ja mivu ku dima, ua tange musoso ua lungu ni akua Ijitu mu izuua iê. Muéne ua soneka: “Mu fesa ia jimvuama, kioso kia zubha o ku jandala, saí diiala uambata kiteka kia dibaia kia muthu uafú mu kaxa kio pindale ia a ki fuamesa kiambote, kia kexile ni 50 mba 100 a ji centimetro. Muéne ua kilondekesa ku athu oso akexile kuenhoko, ni kuzuela, ‘nuenu, kazale-nu, mukonda kioso ki mua-nda fuá, mua-nda kala sé muenhu kála o kiteka kiki.’”

O ukexilu iú ua lungu ni muenhu ni kufuá, ki uexile ngó kifua kia akua Ijitu. Lelu, o kizuelu, “kudia, kúnua, ni u kazale,” ene mu ki tumbula kiavulu. Se o muenhu u bhua kioso o muthu kiafuá, mukonda diahi ki tu bhange ioso i tua mesena? Mukonda diahi tu mesena ku bhanga o ima ia tokala? Se o kufuá o disukilu dia ima ioso, o ku bhanga o ima i tua mesena kindala, kima kia tokala muene. O poxolo Phaulu ua zuela o ukexilu ua athu ka xikina mu difukunukinu, kioso kiambe: ‘Se ni kidi kiene o madifundu ka-nda ku a fukununa, tu bhangienu kala kiambe o sabhu, kuila: Tu dietu, tu nuetu, o mungu tu fuetu.’—1 Kolindu 15:32.

Mu kidi, Phaulu ka xikinine kuila o afú keji ku a fukununa. Muéne ua kijidile kuila o afú, a-nda vutuka dingi ku muenhu sé kufuá dingi. O kidielelu kiki kia lungile ni kizulukutu kia dikota, o athu keji tena ku dituna—o difukunukinu * dia Jezú Kristu. O difukunukinu dia Jezú, o kizulukutu kia dikota kia suínisine o kixikanu kia maxibulu mê a dianga.

Ihi-phe ilombolola o difukunukinu dia Jezú phala etu? Kiebhi ki tuejiia kuila diene dia bhitile muene? Tua-nda di longa ihi iambe Phaulu kioso kia sonekena o Jikidistá ku mbanza ia Kolindo.

Saí Jikidistá ku mbanza ia Kolindo, akexile ni phata ia lungu ni maka enhá, a mukuá ka kexile mu xikinina mu difukunukinu. Mu mukanda uê ua dianga ku sonekena o Jikidistá ku mbanza ienioió, Phaulu ua zuela o maka eji moneka se o difukunukinu ki diexile kidi. Muéne ua soneka: ‘Se mu kidi se-ku difukunukinu dia athu afú, ni Kristu ué ka mu fukununa. Se Kristu ka mu fukununa, etu o ku boka kuetu kima kia ki ngó, ni enu o kixikanu kienu kima kia ki ngó. Kua di te dingi kuila katé ni etu kifua tuala tu jimbangi ja makutu bhu pholo ia Nzambi, . . . o kixikanu kienu kia ki ngó, hanji-phe mua texika mu ituxi ienu. . . . Ni ene oso kiá afú jinga mu kuxikina Kristu, a texika.’—1 Kolindu 15:13-18.

“U tukulukila hama jitanu ja axikani bhua-moxi . . . ua tukulukila Tiiaku, o tanu, ua tukulukila Jipoxolo joso. Kiabhu ene oso, nga sukidila-ku eme.”—1 Kolindu 15:6-8

Phaulu ua mateka ni kuzuela: Se o madifundu ka-nda ku a fukununa, mu kiki-phe o Kristu ua fuile, ka mu fukunuine ué. Se tuila kuila Kristu ka mu fukunuine, ihi ieji bhita? O kikalakalu kia ku boka o njimbu iambote, ki kieji kala ni valolo, kieji kala makutu. Sé phata o difukunukinu dia Jezú, diene dia suínisine dingi o kixikanu kia Jikidistá. Se o difukunukinu ki diexile kidi, etu-phe ki tueji tena ku tendela kiambote o milongi ia mukuá ia Bibidia, kála o ungana uê, o dijina, o utuminu uê ni ubhulukilu uetu. Se o difukunukinu ki dia bhitile, o njimbu ia kexile mu tula Phaulu ni jipoxolo ja mukuá, ki ieji kala ni valolo.

Kueji moneka maka a mukuá. Se Kristu ka mu fukunuine muene, o kixikanu kia Jikidistá ki kieji kala ni valolo. Phaulu ni jipoxolo ja mukuá, eji tanga ué makutu, kana ngó o difukunukinu dia Jezú, maji ia lungu ué ni ió ua mu fukunuine—Jihova Nzambi. O maka a kuila Jezú ‘ua fuile ku ituxi ietu’ kueji kala ué makutu—se o Mubhuludi ka mu bhuluile, muéne keji tena ku bhulula akuâ. (1 Kolindu 15:3) Kieji lombolola kuila o Jikidistá ja fuile mukonda dia kixikanu kiâ, a fuile sé kidielelu kia kidi kia ku a fukununa.

Phaulu ua suku mu kuzuela: ‘Se tu dielela Kristu mu ku mu kingila ku muenhu uetu tua di boto!’ (1 Kolindu 15:19) Kala o Jikidistá ja mukuá, Phaulu, ua talele hadi, a mu zukutisile, ua kolokotele mu ibhidi, ka kexile ni uôma ua kufuá mukonda ua dielele mu difukunukinu. Se o difukunukinu ki diexile kidi, Phaulu keji xikina ku bhita mu ibhidi ioso ioio!

Phaulu ka banzele kuila o ia xikinine o jikidistá ja mukuá, iexile makutu. Muéne ua kijidile kuila Jezú a mu fukunuine muene mu’alunga, iu ua zuelela akuâ Kolindo, ‘Kuila Kristu ua fuile mukonda dia ituxi ietu kala kia ki soneka mu Mikanda Ikôla. Kuma Muène a mu fundile, mu kizuua kia katatu anga u fukunuka kala kia ki soneka mu Mikanda; anga u dianga kutukulukila Phetele, hé u tukulukila kiua o kuinhi ni kiiadi.’ * Phaulu ua suluka: “Lua katatu u tukulukila hama jitanu ja axikani bhua-moxi. Ku en’ió, ala-ku kota, ala hanji ni muenhu, suke amoxi-ku-phe afu ue kiá. Uana, ua tukulukila Tiiaku, o tanu, u tukulukila jipoxolo joso. Kiabhu ene oso, nga sukidila-ku eme.”—1 Kolindu 15:3-8.

 Phaulu ua mateka ni kuzuela kuila, Kristu ua fuile ku ituxi ietu, a mu fundile ia a mu fukununa. Ihi ia mu bhangesa ku kala ni kidielelu kiki? Kima kia dianga, o jimbangi a mono Jezú. Jezú kioso kia mu fukununa, ua monekena ku athu, (katé muene kua Phaulu) ku ibuka iofele ni ku 500 a athu, akexile ué ni phata ia difukunukinu dia Jezú! (Luka 24:1-11) O jimbangi ja muene Jezú, akexile hanji ku muenhu mu izuua ia Phaulu, ene eji tena kuzuela o kidi kia lungu ni difukunukinu dia Jezú. (1 Kolindu 15:6) Nange mbangi imoxi mba jiiadi keji ku a bhana mátui, maji o umbangi ua 500 ja athu, keji tena ku dituna kuila kidi.

Talesa ué kuila, Phaulu ua tumbula mu veji jiiadi o kufuá, o ku funda ni difukunukinu dia Jezú, “kala kia ki soneka mu Mikanda Ikôla.” O izulukutu íii ilondekesa kuila o ikanenu ia kexile mu Kikutu Kiokulu kia lungu ni Mexiia, kia kexile muene kia kidi, ni kulondekesa ué kuila, Jezú uexile muene o Mexiia a mu kanene.

Né muene ni umbangi ua athu ni ua Mikanda Ikola, kua kexile hanji athu akexile ni phata ia difukunukinu dia Jezú kála kiene mu bhita ué lelu. Saí athu amba kuila o maxibulu a Jezú a nhanene o kimbi kiê, ia akexile mu zuela kuila jimbangi ja difukunukinu diê. Maji o maxibulu ka kexile ni kutena kua ku lundumuna o alangidi akexile mu langidila o mbila. A mukuá amba kuila o difukunukinu, diexile ngó phala ku nganala o athu. Maji Jezú ua monekena ku athu avulu mu ithangana ni ithangana. Se Kristu ka mu fukunuine, o kuila ueji tena ku lamba ni ku sidivila mbiji ku mbanza ia Ngalileia? (Nzuá 21:9-14) O kuila o kimbi ki tena kuixana o athu phala ku mu babata o mukutu?—Luka 24:36-39.

 Saí hanji iá, amba kuila o maxibulu ene a tele o sabhu ia difukunukinu dia Jezú phala ku nganala ngó o athu. Maji mbote iahi ieji katula-ko mu ku bhanga kiki? O ku kala mbangi ia difukunukinu dia Jezú kuexile mu bhekela ibhidi iavulu ku maxibulu a Jezú kála, o ku a sebhulula, ku a zukutisa ni ku a jibha. Mukonda diahi ene eji ta o mienhu iâ mu iluezu, se diexile makutu? Ene a dianga ku bhana umbangi mu Jeluzaleme ni ku a mona ku jinguma jâ, a mesenene ku a kuata ni ku a balakala.

O difukunukinu diene dia kexile dingi mu suínisa o maxibulu ku bhana umbangi ua lungu ni Ngana iâ, sumbala ni izukutisu ni kua beta. O difukunukinu diene di suínisa o kixikanu kia Jikidistá. O Jikidistá ja dianga keji ta o mienhu iâ mu ibhidi mu ku bhana umbangi ua lungu ni mesene a mu jibhile. Ene a te o mienhu iâ mu iluezu phala ku ijidisa o difukunukinu dia Jezú, mukonda diene dia londekesa kuila Jezú muéne Kristu, o Mon’a Nzambi, uala ni ku tena, muthu ua a kuatekesele ni ku a endesa. O difukunukinu diê, dia lombolola kuila, ene eji ku a fukununa ué mu’alunga. Se Jezú ka mu fukunuine, ki kueji kala Jikidistá. Se Jezú ka mu fukunuine, ki tueji kuívua maka alungu ni muéne.

Ihi-phe ilombolola o difukunukinu dia Jezú phala etu?