Bajuda ba be ba boloka bahu ba bona kapejana ka morago ga lehu, gantši ka lona letšatši leo. Go be go na le mabaka a mabedi a go dira seo. La pele, ditopo di bola ka pela boemong bja leratadima bjoo bo fišago bja Bohlabela bja Magareng. La bobedi, batho ba mehleng yeo ba be ba nagana gore go tlogela setopo ka matšatši a itšego se sa bolokwe e be e le go se hlomphe mohu le ba lapa labo.

Diebangedi le puku ya Ditiro di bega bonyenyane dipoloko tše nne tšeo di ilego tša dirwa letšatšing la lehu. (Mateo 27:57-60; Ditiro 5:5-10; 7:60–8:2) Nywagakgolo pejana, mosadi yo a rategago wa Jakobo e lego Ragele o ile a hwa ge Jakobo le lapa la gagwe ba le leetong. Go e na le gore a mmušetše morago lefelong leo go bolokwago ba lapa labo, Jakobo o ile a mmoloka lebitleng “tseleng ya go ya . . . Betlelehema.”—Genesi 35:19, 20, 27-29.

Dipego tša Beibele tša mabapi le ditokišetšo tša poloko di bontšha gore Bajuda ba be ba lokišeletša setopo gabotse bakeng sa poloko. Ba lapa le bagwera ba be ba hlapiša setopo, ba se tlotša ka dinoko le makhura ao a bitšago gomme ba se tatetša ka mašela. (Johane 19:39, 40; Ditiro 9:36-41) Baagišani le ba bangwe ba be ba etla gore ba bontšhe go nyama ga bona le go homotša ba lapa.—Mareka 5:38, 39.

Malapa a mantši a Bajuda a be a boloka bahu ba ona ka maweng le ka mabitleng ao a epilwego letlapeng le boleta leo le tlwaelegilego dikarolong tše dintši tša Isiraele. Ka go dira bjalo, a be a latela mohlala woo o beilwego ke bapatriareka. Aborahama, Sara, Isaka, Jakobo, le ba bangwe ba ile ba bolokwa ka leweng la Makapela kgauswi le Heburone.—Genesi 23:19; 25:8, 9; 49:29-31; 50:13.

Jesu o ile a bolokwa ka lebitleng leo le bego le epilwe letlapeng. (Mareka 15:46) Lebitla le bjalo gantši le be le eba le molomo o monyenyane. Ka gare, go be go epša dikhutlwana tše mmalwa, goba dikgoba tšeo o ka rego ke diraka, tšeo go tšona go bego go tsenywa ditopo tša ditho tša lapa. Ka morago ga ge nama e bodile, marapo ao a omilego a be a kgoboketšwa a tsenywa lepokising la leswika leo le bitšwago assuary, bjalo ka ge e be e le motlwae wa mehleng ya Jesu. Ka tsela ye, ba lapa ba be ba dira sekgoba ka lebitleng bakeng sa go boloka bahu nakong e tlago.

Go khutša ka Sabatha moo go bego go laetšwe ke Molao wa Moshe go be go thibela Bajuda go dira dithulaganyo tša poloko ka letšatši leo. Ka ge Jesu a hlokofetše mo e ka bago diiri tše tharo pele ga ge Sabatha e ka thoma, Josefa wa Arimathea le ba bangwe ba ile ba mmoloka pele ba fetša go lokišeletša setopo sa gagwe bakeng sa go bolokwa. (Luka 23:50-56) Ka lebaka leo, ba bangwe ba bagwera ba Jesu ba ile ba ya lebitleng la gagwe ka morago ga Sabatha, ba holofetše go feleletša modiro woo.—Mareka 16:1; Luka 24:1.