Ol Juda i save hariap long planim ol man i dai pinis, planti taim long seim de yet. I gat 2-pela risen bilong dispela. Namba 1, bodi bilong ol daiman i save sting hariap long ples hat bilong Midel Is. Namba 2, long tingting bilong ol man long bipo, sapos sampela de i go pinis na ol i no planim man, dispela i soim olsem ol i no rispek long man i dai pinis na famili bilong em.

Ol Gutnius na long Buk Aposel i gat 4-pela stori we ol i planim man long de em i bin dai. (Matyu 27:57-60; Aposel 5:5-10; 7:60–8:2) Inap sampela handret yia paslain long dispela, Resel em gutpela meri bilong Jekop, i dai taim Jekop na famili bilong em i raun. Ol i no kisim bodi bilong Resel i go bek long ples matmat bilong famili, nogat, Jekop i planim em long wanpela matmat “long arere bilong rot i go long . . . Betlehem.”—Stat 35:19, 20, 27-29.

Ol stori bilong Baibel long ol fiuneral i soim olsem ol Juda i mekim planti samting bilong redim bodi bilong daiman bilong planim em. Famili na ol pren i wasim bodi bilong daiman, rapim sanda na oil i gat gutpela smel, na karamapim bodi long laplap. (Jon 19:39, 40; Aposel 9:36-41) Ol neiba na ol narapela man inap kam long haus bilong krai sori wantaim ol, na mekim gut bel bilong famili.—Mak 5:38, 39.

Planti Juda i save planim ol daiman insait long ol keiv na long ol ples matmat ol i bin katim insait long wanpela kain ston i no strong na i stap long planti hap long Israel. Taim ol i mekim olsem, ol i bihainim pasin bilong ol bilipman. Ol i bin planim Abraham, Sara, Aisak, Jekop, na ol narapela insait long keiv bilong Makpela i stap klostu long Hebron.—Stat 23:19; 25:8, 9; 49:29-31; 50:13.

Ol i bin planim Jisas long matmat ol i bin katim insait long traipela ston. (Mak 15:46) Kain matmat olsem i gat liklik dua bilong go insait. Insait long matmat, ol i bin katim ol self long ston we ol i putim bodi bilong ol daiman. Taim mit bilong bodi i sting pinis, ol i kisim ol bun i drai na putim insait long boks ol i wokim long ston na ol i save mekim olsem tu long taim bilong Jisas. Long dispela rot, i gat spes insait long matmat we bihain famili i ken planim narapela bodi bilong daiman.

Lo bilong Sabat em insait long Lo Bilong Moses i pasim ol Juda long planim daiman long de Sabat. Jisas i dai inap 3-pela aua paslain long de Sabat i kirap, olsem na Josep bilong Arimatea na sampela narapela i planim Jisas na ol i no mekim olgeta samting bilong redim bodi bilong planim. (Luk 23:50-56) Long dispela as, sampela pren bilong Jisas i go long matmat bilong em bihain long de Sabat, ol i laik pinisim wok bilong redim bodi bilong planim.—Mak 16:1; Luk 24:1.