UBUMI BWABO

“Nalimwene, Lelo Nshailwike”

Abashimika ili lyashi ni ba Olivier Hamel

Mu 1975, ninshi ndi ne myaka ibili, e lyo bamayo bamwene ukuti nalikwete ubwafya. Bushiku bumo ninshi bamayo nabandela, abanabo baliponeshe icintu icafina icapangile sana icongo. Bamayo balimwene ukuti nshaumfwile nangu panono ukuti kwali icaponene icapangile icongo pantu nshasakenye no kusakanya. Nasukile na kumanya ne myaka itatu, ukwabula ukuti ntendeke ukulanda. Lyena bushiku bumo balupwa lwandi balibebele ilyashi ilya baponeshe pa musao. Badokota babele ukuti nali nkomamatwi!

Ilyo nali fye umwaice, batata na bamayo ifyupo fyalipwile kabili bamayo e batendeke ukulasunga ine na bakalamba bandi babili abaume e lyo na bankashi yandi bamo. Pali ilya nshita bankomamatwi abengi mu France tabalesambilila sana nga fintu caba pali ino nshita, kabili inshila balebasambilishishamo limo yalelenga balecula sana. Na lyo line, ukufuma fye na ku bwaice ine nalikwata ishuko ilyo bankomamatwi abengi bashakwata. Lekeni imishimikile ifyo cali.

Pa myaka iingi bakafundisha abengi baletontonkanya ukuti inshila ya kusambilishishamo bankomamatwi iingabomba bwino, kulabeba ukulolesha bakafundisha pa kanwa no kwesha ukwiluka ifyo balelanda. Na kuba, ku France uko nakuliile, balibindile ukubomfya ululimi lwa bankomamatwi mu masukulu. Bankomamatwi bamo balebakakila fye na maboko ku numa nga balesambilila.

Ilyo nali umwaice, kwali abaishibe sana ifya kusambilisha abashilanda abaleisa mu kunsambilisha pa ma-awala ayengi cila mulungu. Balenjikata umubango nelyo umutwe kabili balenjeba ukulanda imiku iingi ifyo nshaleumfwa. Nalefilwa ukulanda na baice banandi. Ala naliculile icibi!

Ilyo nali ne myaka 6, bantwele kwi sukulu lya bankomamatwi uko naile mu kusambilila. Uyu wali e muku wa kubalilapo ukuba na bakomamatwi banandi. Kuli ili sukulu na ko tabalesuminisha ukulanda ululimi lwa bankomamatwi. Nga twabomfya ululimi lwa bankomamatwi baletuuma ku minwe nelyo ukututinta imishishi. Nangu cali ifi, twalebomfya ulu lulimi ukwabula ukuti batumone, ukubomfya ifishibilo ifyo twaipangile fye fwe bene. Nasukile natendeka ukulanshanya na bankomamatwi banandi. Ici calengele ukuti pa myaka 4 iyakonkelepo imbe ne nsansa.

Lelo ilyo nali ne myaka 10, bantwele kwi sukulu ukwalesambilila abana abashali bankomamatwi. Ala calinkalipe! Nalemona fye kwati bankomamatwi bonse balifwile kabili nashele fye neka mu calo. Pa mulandu wa fyo badokota abaishibe sana ifya kusambilisha ukulanda baebele balupwa lwandi ukuti nga basambilila ululimi lwa bankomamatwi ninshi nshakeshibe ukulanda, calengele ukuti besambilila ulu ululimi kabili balenkanya ukwangala na bankomamatwi. Bushiku bumo ilyo naile mu kumona dokota uwaishibe sana ifya kusambilisha ukulanda, nasangile nabika icitabo ca kusambililamo ululimi lwa bankomamatwi pe tebulo lyakwe.  Ala nshakalabe ifyacitike! Ilyo namwene ifikope pa nkupo ya ici icitabo, nasontele apali icitabo no kumweba ukuti “tumoneni ici citabo!” Mukwangufyanya dokota alifishile cilya citabo. *

NATENDEKA UKUSAMBILILA BAIBOLO

Bamayo lyonse bale-esha ukutusambilisha ukukonka ifyaba mu Baibolo. Baletusenda ku kulongana kwa Nte sha kwa Yehova mu Cilonganino ca Mérignac mupepi na ku Bordeaux. Apo nali umwaice, nshaleumfwa ifingi ifyo twalesambilila mu kulongana. Nangu cibe ifyo, aba mu cilonganino abalekanalekana baletemwa ukwikala na ine mu kulongana kabili balenembela ne fyo tulesambilila pali ubo ubushiku. Nalitemenwe sana ifyo bantemenwe ne fyo balembikako amano. Bamayo balensambilisha Baibolo, lelo nshaleumfwikisha ifyo balensambilisha. Naleyumfwa nga filya kasesema Daniel ayumfwile ilyo malaika amwebele ubusesemo. Atile: “Nalyumfwile, lelo nshailwike.” (Daniele 12:8) Lelo ine kuti natila “Nalimwene, lelo nshailwike.”

Nangu cibe ifyo, mu kupita kwa nshita natendeke ukwishiba icine ca mu Baibolo. Nalitemenwe ifyo nalesambilila kabili natampile ukufibomfya. Nalesambililako na ku fyo bambi balecita. Ku ca kumwenako Baibolo itweba ukuti tufwile ukuba abatekanya. (Yakobo 5:7, 8) Nshaishibe ifya kuba uwatekanya. Lelo ilyo nalemona ifyo abo twalelongana na bo bali abatekanya, e lyo naumfwikishe ifyo umuntu uwatekanya aba. Ukwabula no kutwishika, aba mu cilonganino ca Bwina Kristu balingafwa sana.

NALYUMFWILE UBUBI LELO PA NUMA NALITEMENWE

Bushiku bumo ninshi ndi fye umusepela, nalimwene abaice bankomamatwi balelanda ukubomfya iminwe. Natendeke ukwangala na bo mu bumfinsolo kabili natampile ukusambilila ululimi lwa bankomamatwi ulwa ciFrench. Nalitwalilile ukulaya ku kulongana kwa Bwina Kristu kabili nalitemwanene na Stéphane, Nte wacaice. Ale-esha sana ukulanshanya na ine kabili nalimutemenwe sana. Nangu cibe fyo, kwali icacitike icanengele ukumfwa ububi. Stéphane balimukakile pa mulandu wa kukaana ukwingila ubushilika. Nalyumfwile ububi sana! Ilyo bamukakile, nalifuupwilwe icine icine ica kuti kwashele fye kwempe, nga nalilekele ukulongana.

Pa numa ya myeshi 11, Stéphane balimufumishe mu cifungo kabili alibwelele ku ng’anda. Ala nalipapile nga nshi ilyo namwene alelanda na ine mu lulimi lwa bankomamatwi! Nalipapile sana ukusanga ukuti alishibe ululimi lwa bankomamatwi ulwa ciFrench. Stéphane asambilile ulu ululimi ilyo ali mu cifungo. Ilyo namwene ifyo Stéphane alebomfya amaboko ne fyo alecita pa menso pa kulanda ulu ululimi, nalitemenwe sana pantu nalishibe ukuti nomba twakulalanshanya bwino.

NASUKA NAUMFWIKISHA ICINE ICABA MU BAIBOLO

Stéphane atampile ukunsambilisha Baibolo kabili natampile ukukutuluka ifyo nasambilile kale mu Baibolo. Ilyo nali umwaice, nalitemenwe sana ukutamba ifikope fyali mu mpapulo shesu, kabili nalefwaya ukwishiba ubupusano bwaleba pa baleba pa fikope kabili nalesambilila sana ishi impapulo pa kutila ilyashi lyonse lyaikala sana mu mutwe. Nalisambilile pali Abrahamu, “umwana” e lyo na pe “bumba likalamba,” lelo naishileishiba bwino ifyo ifi fyalepilibula ilyo nafisambilile mu lulimi lwa bankomamatwi. (Ukutendeka 22:15-18; Ukusokolola 7:9) Naishilemona ukuti ulu e lulimi mfwile fye ukulabomfya pantu ifyo balensambilisha nalefyumfwikisha sana.

Apo nomba naleumfwikisha ifyo twalesambilila mu kulongana, nalitemenwe nga nshi ica kuti nalefwaisha ukwishibilapo na fimbi. Ilyo natwalilile ukusambilila na Stéphane, naleya ndeishibilako ifya mu Baibolo kabili mu 1992 nali-ipeele kuli Yehova Lesa kabili nalibatishiwe. Nalisambilile ifingi muli Baibolo, lelo pa mulandu wa kuti ilyo nali umwaice nshalelanshanya sana na bambi, nshalelandalanda kabili nali uwa nsoni.

 IFYO NAPWISHISHE UMWENSO

Mu kuya kwa nshita, akalibumba nalimo aka bankomamatwi, kasankene na bankomamatwi ba mu cilonganino ca mwi tauni lya Pessac, ilyaba mu musumba wa Bordeaux. Aba muli ici cilonganino balingafwile ukulunduluka mu fya kwa Lesa. Nangu ca kuti ncili ndashupikwa pa kulanshanya na bantu, abanandi abashili bankomamatwi balengafwa sana ukumfwikisha fyonse ifyo twalesambilila. Ba Gilles na bena mwabo ba Elodie bale-esha sana ukuti tulelanshanya na bo. Ilingi line pa numa ya kulongana balitemenwe ukunsenda ku kulya ifya kulya nelyo ukunwa kofi, ne ci calengele ukuti tube ifibusa. Ala cilawama ukuba na bantu abakonka ifyo Lesa afwaya!

Muli ici cine icilonganino e mo naishibene na Vanessa, umukashana uwayemba. Nalitemenwe Vanessa pantu alebika sana amano ku bantu kabili taali na kapatulula. Taletontonkanya ukuti apo ndi nkomamatwi ninshi te kuti akwanishe ukulalanshanya na ine, lelo alemona ukuti e lyo e ngasambilila no kulanshanya na bankomamatwi. Nalimutemenwe icine cine kabili mu 2005 twalyupene. Nangu ca kuti ncili ndashupikwa ukulanshanya na bantu, Vanessa alingafwa ukupwisha umwenso e lyo no kwishiba ifya kulanshanya na bantu bwino. Ndatasha sana pa fyo antungilila ilyo ndesakamana ulupwa lwesu!

YEHOVA AMPEELA ISHUKO NA LIMBI

Mu 2005 ilyo twaupene, balinjitile ukuya mu kubombela ku maofeshi ya Nte sha kwa Yehova mu Louviers ku France. Naile mu kusambilila umulimo wa kupilibula pa mweshi umo. Ababombela pa maofeshi ya Nte sha kwa Yehova mu France balebombesha ukupilibwila impapulo shesu mu lulimi lwa bankomamatwi ulwa mu ciFrench no kushibika pa DVD. Lelo apo imilimo yali no kufulilako, bakapilibula na bambi balefwaikwa.

Ine na Vanessa twamwene ukuti lishuko kabili lipaalo ukuti ndebombela pa maofeshi ya Nte sha kwa Yehova, lelo ukulanda fye icishinka twalisakamikwe. Twaleti, ni bani bakalasakamana ibumba lyesu ilya bankomamatwi? Ni bani bakalatusungilako ing’anda? Bushe nga twakuuka, Vanessa akasanga incito? Lelo Yehova alitwafwile muli fyonse. Nalimwene ukuti cine cine Yehova alitutemwa kabili alitemwa na bankomamatwi.

BAMUNYINEFWE BALITWAFWILE

Apo nomba nine kapilibula, nalishiba ifyo ciba pa kupekanishisha bankomamatwi ifyaba mu Baibolo. Ala ndomfwa bwino ukumona uko bamunyinane abengi baibikilishako ukulanda na ine mu lulimi lwa bankomamatwi! Ndomfwa bwino ilyo balelanda na ine ifinono fye ifyo baishiba muli ulu ululimi. Nshitalalilwa. Ifyo bamunyinane bantemwa filanga fye ifyo abantu ba kwa Yehova bomfwana icine cine.—Amalumbo 133:1.

Ndatasha sana kuli Yehova pa fyo ampeela lyonse bamunyinane aba Bwina Kristu ukungafwa. Na kabili ndatasha pe shuko nakwata ilya kwafwa bankomamatwi banandi ukwishiba Kabumba uwakwata ukutemwa e lyo no kupalama kuli ena. Ndafwaisha ukwisabako ilyo kushakabe bunkomamatwi ubulenga abantu ukukanalanshanya bwino, iyi nshita bonse tukalalanda “ululimi lwine lwine,” e kutila icine icilanda pali Yehova Lesa e lyo no kufwaya kwakwe.—Sefania 3:9.

[Futunoti]