Aciari akwa maatiganĩte ndĩ gakenge, na nĩ ũndũ ũcio mami aatũrerire arĩ wiki tũrĩ na ariũ a maitũ erĩ na mwarĩ wa maitũ ũmwe. Hĩndĩ ĩyo thĩinĩ wa Faranja ciana iria bubu itiathomithagio ta ũrĩa ithomithagio ũmũthĩ, na njĩra iria rĩmwe na rĩmwe ciahũthagĩrũo gũthomithania nĩ ciatũmaga mũndũ anyamarĩke mũno. O na kũrĩ ũguo kuuma ndĩ o mũnyinyi nĩ ndaarĩ na ũndũ wa mwanya ũrĩa bubu aingĩ matakoragwo naguo. Na nĩ ngũũtaarĩria.

Kwa ihinda rĩna-rĩ, arutani aingĩ meetĩkĩtie atĩ ciana iria bubu ciaagĩrĩirũo nĩ gũthomithio na njĩra ya gũciruta kũrora mĩromo ya mũrutani. Thĩinĩ wa Faranja kũrĩa ndaarereirũo, kwaria na rũthiomi rwa ciĩko thĩinĩ wa cukuru warĩ ũndũ wakananĩtio biũ. Ciana imwe o na nĩ cioohagwo moko na thutha rĩrĩa irĩ kĩrathi.

Mĩaka ĩigana ũna ndĩ mũnyinyi, nĩ ndaarutagwo mathaa maigana ũna o kiumia nĩ mũrigitani wa mĩgambo. Ndanyitagwo rũthĩa kana kĩongo na ngahatĩkwo mũno ndute mĩgambo ĩrĩa itaahotaga nginya kũmĩigua. Ndingĩahotire kwaranĩria na ciana iria ingĩ. Harĩ niĩ, ĩyo yarĩ mĩaka ya kũnyamarĩka.

Thutha ũcio ndĩ wa mĩaka ĩtandatũ, nĩ ndaatwarirũo cukuru ya gũkoma ya bubu. Kũu nĩ kuo ndacemanirie na ciana ingĩ bubu rĩa mbere. O nakuo kũu gũtietĩkĩrĩtio kwaria na rũthiomi rwa ciĩko. Tũngĩaririe na rũthiomi rwa ciĩko, tweingĩragia ũgwati-inĩ wa kuohwo ciara cia moko kana kũguucio njuĩrĩ. O na kũrĩ ũguo no twaragia na hitho tũkĩhũthĩra ciĩko citũ cia gwĩtungĩra. Macũngĩrĩro-inĩ ngĩhota kwaranĩria na ciana iria ingĩ. Ũcio warĩ mwambĩrĩrio wa mĩaka 4 ya gĩkeno.

Ĩndĩ ndĩ na mĩaka ikũmi, nĩ ndathamĩirio cukuru yarĩ na ciana ciarĩ na ũhoti wa kũigua. Ũndũ ũcio nĩ wanjũragire ngoro mũno! Ndonire ciana iria ingĩ bubu ciothe ta ciakua ngĩtigwo nyiki thĩinĩ wa thĩ. Nĩ ũndũ wa kũrũmĩrĩra ũtaaro wa arigitani arĩa meciragia atĩ nĩ ngũũrũo nĩ ũguni ũrĩa umanaga na kũrutwo nĩ arigitani a mĩgambo-rĩ, andũ thĩinĩ wa famĩlĩ itũ matigana kwĩruta rũthiomi rwa ciĩko na ndietĩkagĩrio gũtwarana na ciana ingĩ iria ciarĩ bubu. Nĩ ndirikanaga mũthenya ũmwe thiĩte kũrĩ mũrigitani ũmwe wa matũ, na metha-inĩ yake haarĩ na ibuku rĩa rũthiomi rwa ciĩko. Rĩrĩa ndonire mbica iria ciarĩ ngothi-inĩ yarĩo, ngĩrĩorota ngiuga, “Nĩ ngwenda rĩrĩa!” Mũrigitani ũcio akĩrĩhitha narua mũno. *

Mami nĩ aageririe biũ gũtũrera akĩhũthĩra motaaro ma Gĩkristiano. Nĩ aatũtwaraga mĩcemanio thĩinĩ wa Kĩũngano kĩa Aira a Jehova kĩa Mérignac gũkuhĩ na Bordeaux. Ndĩ mwana, ndaataũkagĩrũo nĩ maũndũ manyinyi mũno mĩcemanio-inĩ. O na kũrĩ ũguo, andũ ngũrani ngũrani nĩ maacenjanagia gũikarania na niĩ nĩguo manyandĩkagĩre ũhoro ũrĩa warutanagwo. Nĩ ndaahutagio mũno nĩ wendo wao na kũnjaĩra. Tũrĩ mũciĩ mami nĩ aandutaga Bibilia ĩndĩ ndigana gũtaũkĩrũo biũ nĩ kĩrĩa aandutaga. Ndaiguaga ta mũnabii Danieli, ũrĩa thutha wa kũheo ũrathi nĩ mũraika, oigire ũũ: “Ngĩkĩigua maũndũ macio, no ndigana kũmenya gĩtũmi kĩamo.” (Danieli 12:8) Harĩ niĩ, “nĩ ndonaga no ndiataũkagĩrũo.”

O na gũtariĩ ũguo, kahora kahora morutani ma mũthingi ma Bibilia nĩ mekĩrire mĩri ngoro-inĩ yakwa. Nĩ ndonaga kĩrĩa ndataũkĩrũo kĩrĩ kĩa bata mũno na ngageria gũkĩhũthĩra ũtũũro-inĩ. Ningĩ nĩ ndeerutaga na njĩra ya kũrora ciĩko cia andũ arĩa angĩ. Kwa ngerekano-rĩ, Bibilia nĩ ĩtwĩraga tũkoragwo tũrĩ akirĩrĩria. (Jakubu 5:7, 8) Ndiataũkagĩrũo ũkirĩrĩria nĩ kĩĩ. Ĩndĩ, na njĩra ya kũrora ũkirĩrĩria wa Akristiano arĩa angĩ, nĩ ndaataũkĩirũo nĩguo. Hatarĩ nganja, kĩũngano gĩa Gĩkristiano gĩkoretwo kĩrĩ ũguni mũnene mũno harĩ niĩ.

Ndĩ tinĩnja, harĩ mũthenya ndonire andũ ethĩ bubu makĩaranĩria na rũthiomi rwa ciĩko barabara-inĩ. Ngĩambĩrĩria gũceeraga nao na hitho na ngĩambĩrĩria kwĩruta Rũthiomi rwa Kwaria na Ciĩko rwa Kĩfaranja. Ngĩthiĩ na mbere gũthiĩ mĩcemanio ya Gĩkristiano, kũrĩa mwanake ũmwe Mũira wa Jehova wĩtagwo Stéphane aanũmbũyagia mũno. Nĩ eerutanagĩria mũno kwaranĩria na niĩ, na ũndũ ũcio ũgĩtũma ndĩmwende mũno. O na kũrĩ ũguo, nĩ harĩ ũndũ wa kũnjũraga ngoro warĩ hakuhĩ kũhaanĩka. Stéphane nĩ aaikirio njera nĩ ũndũ wa kũrega kũingĩra thĩinĩ wa mbirarũ. Nĩ ndaakuire ngoro mũno! Thutha wa Stéphane kuohwo, ndahinyĩrĩrĩkire mũno nginya ngĩtiga gũthiĩ mĩcemanio ĩmwe.

Thutha wa mĩeri ikũmi na ũmwe, Stéphane nĩ ohorirũo na agĩcoka mũciĩ. Ta hũra mbica ũrĩa ndaaiguire rĩrĩa Stéphane aanjarĩirie na rũthiomi rwa ciĩko rĩa mbere. Ndietĩkagia! Gwathiĩte atĩa akamenya rũthiomi rũu? Eerutĩte Rũthiomi rwa Kwaria na Ciĩko rwa Kĩfaranja arĩ njera. Ndarora Stéphane akĩhũthĩra moko na ũthiũ wake, ngĩigua njanjamũkĩte mũno ndeciria ũrĩa ũndũ ũcio ũngĩakorirũo na ũguni mũnene harĩ niĩ.

Stéphane nĩ aambĩrĩirie kũnduta Bibilia. Hĩndĩ ĩyo nĩrĩo ndambĩrĩirie gũtaũkĩrũo nĩ ma cia Bibilia iria nderutĩte hau kabere. Ndĩ mũnini nĩ ndendete kwĩrorera mbica thaka mabuku-inĩ maitũ marĩa makoragwo na ũhoro umĩte Bibilia-inĩ, ngaciringithania na maũndũ marĩa marĩ ho nĩguo ũndũ ũcio ũingĩre biũ meciria-inĩ makwa. Nĩ ndamenyete ũhoro wa Iburahimu, “mbeũ” yake, na “kĩrĩndĩ kĩingĩ,” no ndaataũkĩirũo nĩ maũndũ macio wega biũ o rĩrĩa ndonire magĩtaarĩrio na rũthiomi rwa ciĩko. (Kĩambĩrĩria 22:15-18; Kũguũrĩrio 7:9) Hatarĩ nganja rũu nĩruo rũthiomi rũrĩa ndaabataraga, rũrĩa ndaataũkagĩrũo kũna.

Rĩu tondũ nĩ ingĩahotire gũtaũkĩrũo nĩ maũndũ marĩa maarutanagwo mĩcemanio-inĩ, ngoro yakwa nĩ yahutagio mũno na merirĩria ma kũgĩa na ũmenyo makĩongerereka. Kũgerera ũteithio wa Stéphane, ũtaũku wakwa wa Bibilia nĩ wathire na mbere kuongerereka, na mwaka wa 1992 nĩ ndeyamũrĩire Jehova Ngai na ngĩbatithio. Gũkinyĩria hĩndĩ ĩyo no ndaarĩ na guoya wa gũtukana na andũ tondũ ndiagĩire na mweke ũcio ndĩ mũnini.

Thutha ũcio, gĩkundi kĩnyinyi kĩa bubu kĩrĩa twakoragwo nakĩo nĩ gĩatukanirio na kĩũngano gĩa Pessac kĩrĩa gĩkoragwo taũni-inĩ ya Bordeaux. Ũcio warĩ ũteithio mũnene, na nĩ ndaathire na mbere kĩĩroho. O na gũtuĩka no ndakoragwo na thĩna harĩ kwaranĩria, arata akwa arĩa maarĩ na ũhoti wa kũigua maatigagĩrĩra atĩ nĩ ndanyita maũndũ mothe. Mũthuri ũmwe na mũtumia wake, nĩo Gilles na Elodie, nĩ meekagĩra kĩyo mũno kwaranĩria na niĩ. Kaingĩ nĩ maanyitaga ũgeni tũkarĩanĩra nao kana tũkanyuanĩra kahũa thutha wa mĩcemanio, na nĩ ũndũ ũcio tũgĩkũria ũrata mũnene. Na githĩ ti gĩkeno kĩnene mũno gũkorũo thĩinĩ wa arĩa marũmagĩrĩra njĩra cia Ngai cia wendo!

Kĩũngano-inĩ kĩu nĩkuo ndacemanirie na mũirĩtu mũthaka wĩtagwo Vanessa. Ndaagucĩrĩirio nĩ ũcayanĩri na wendi wake wa kĩhooto. Onaga gũkorũo ndĩ bubu arĩ njĩra ya kwĩruta kwaranĩria handũ ha kuona ũrĩ mũhĩnga. Nĩ ndamwendire, na tũkĩhikania mwaka-inĩ wa 2005. O na gũtuĩka ndikoragwo na ũhoti mwega wa kwaranĩria-rĩ, Vanessa nĩ andeithĩtie gũtooria guoya na kũhota kwĩyaria wega makĩria. Nĩ ngenagĩra mũno ũrĩa anyitaga mbaru kũhingia maũndũ marĩa ndĩhokeirũo.

Mwaka ũrĩa twahikanirie, nĩ ndetirũo nĩ wabici ya rũhonge ya Louviers ya Aira a Jehova ya Faranja ngamenyerio mweri ũmwe wĩra wa gũtaũra. Mĩaka-inĩ ya ica ikuhĩ wabici ĩyo nĩ ĩkoretwo ĩkĩĩrutanĩria kwandĩka mabuku thĩinĩ wa DVD na Rũthiomi rwa Kwaria na Ciĩko rwa Kĩfaranja. No nĩ ũndũ wa wĩra mũingĩ ũrĩa ũrĩ mbere, ataũri nĩ maabataraga ũteithio makĩria.

Tũrĩ na Vanessa nĩ tuonire ũrĩ mweke wa mwanya mũno na kĩheo kuuma kũrĩ Jehova Ngai, ĩndĩ kwaria ma twarĩ na guoya. Kũngĩathire atĩa ũhoro-inĩ wa gĩkundi gitũ kĩa rũthiomi rwa kwaria na ciĩko? Ĩ nayo nyũmba itũ? Hihi Vanessa nĩ angĩkona wĩra wa kĩĩmwĩrĩ gĩcigo-inĩ kĩu? Jehova nĩ aatũheire kĩhonia kĩa mĩtangĩko ĩyo yothe na njĩra ya magegania. Ngĩyonera wendo wa Jehova gũtwerekera na kwerekera andũ arĩa bubu.

Tondũ wa gũkorũo wĩra-inĩ wa gũtaũra, nĩ menyete wega wĩra mũingĩ ũrĩa ũrutagwo nĩguo andũ arĩa bubu mamenye Ngai. Na nĩ ngenaga mũno nĩ kuona andũ aingĩ arĩa tũrutithanagia wĩra nao makĩgeria kwaranĩria na niĩ. Ciugo nyinyi cia rũthiomi rwa ciĩko iria merutaga na makageria kũhũthĩra nĩ ciihutagia ngoro. Ndiiguaga ndĩ mũtiganĩrie o na hanini. Ciĩko icio ciothe cia wendo nĩ kĩonania kĩa ũrũmwe wa magegania ũrĩa ũkoragwo thĩinĩ wa andũ a Jehova.—Thaburi 133:1.

Nĩ njokagĩria Jehova ngatho tondũ kũgerera kĩũngano gĩa Gĩkristiano, hingo ciothe aatigagĩrĩra atĩ haarĩ na mũndũ wa kũndeithia. Ningĩ nĩ ngenagĩra itemi o rĩnini rĩrĩa ngoretwo narĩo harĩ gũteithia bubu arĩa angĩ mamenye na makuhĩrĩrie Mũũmbi witũ ũrĩ wendo. Nĩ itanya rĩakwa gũkoona mũthenya ũrĩa gũtagakorũo na mĩhĩnga ya kwaranĩria, na andũ othe makaahota kwaria ‘mwarĩrie ũrĩa mwega’ wa ma ĩkoniĩ Jehova Ngai na mĩoroto yake—tũrĩ gĩcunjĩ kĩa famĩlĩ ya andũ marĩ na ũrũmwe.—Zefania 3:9.