Nikali mwana, banja ya abereki wathu idamala ndipo amayi wangu adatitenga, inepano, mulongosi wangu na m’bale wangu mkazi nkumbatisamalira. Pa nthawe mweyo ku França njira zophatisira basa kupfunzisa wana wosabva zenze zosiyana na ntsiku zino ndipo zizinji zimbachitisa kuti wana mwawo ambashupike kubva. Kuyambira nili mwana nenze na mwayi kusiyana na wana anango womwe ambabvalini. Nibvumidzeni nikuwuzenkoni pang’ono ndawa chani nikunena teno.

Kwa magole yazinji, maticha yangakhulupirira kuti wana agonthi achadekana kupfunzisiwa pakuchita kuwachichimiza kuti ambayankhule komasoti ambadziwe vomwe aticha wawo ankulewa pakuwona milomo yawo. komasoti ku França komwe nidakulira kwenze lamulo yolambiza kuphatisira basa chiseweredwe chamanja m’mashikola. Wana anango ambawamanga manja kumbuyo pa nthawe yomwe ankupfunzira.

Nili mwana sondo iliyose ningamala maola yanganani ninkupfunzisiwa kuyankhula. Anganiphata ntsangwada panango msolo nkumbaniwuza kuti niyankhule olo kuti nilibe kubva vomwe ninkuyankhula komasoti anganibvumalini kuyankhula na anzangu pakuphatisira basa manja. Ningaona kuti magole mwaya enze yochupa maninge pamoyo wangu.

Panidakwanisa magole 6, adaniyendesa kushikola inango ya wana agonthi yochita kugonera muko. Kumuko ni komwe nidagumana koyamba na wana anzangu wosabva. Komasoti ku shikola mweyi angabvumizalini kuti timbayankhulane pakuphatisira basa chiseweredwe chamanja. Akatigumana tinkuyankhula chiseweredwe mwechi mu shikola angatithyola vala panango kutipfuwa tsitsi. Olo nteno tingachita kuyankhula mobisa pophatisa basa vizindikiro vomwe tidayambisa. Vimwevi vingathandiza kuti nimbayankhulane na anzangu. Kwamagole yanayi, nidakhalako okondwa.

Koma pomwe nidakwanisa magole 10 adaniyendesa ku shikola ya primaliya ya wana wakubva. Nidakwinyirira maninge mwakuti nimbandowona ninge wana wose agonthi wale adafa ndipo nasala nekha. Ndawa yotewedza malangizo yamafulumero, wanthu wa m’banja mwathu alibe kupfunzira chiseweredwe chamanja komasoti ambanibvumizalini kucheza na wana anango wosabva. Iwo angachita vimwevi ndawa mafulumero yadawauza kuti vimwevi vichitise kuti niyebwe vomwe nidapfunzira vonithandiza kuti niyambe kuyankhula. Nichakumbukira vomwe vidachitika ntsiku inango pomwe nidayenda kwa mfulumero munango. Iye adaikha bunkhu yachiseweredwe chamanja pa mesa yake. Panidaona foto pakhava pa bukhu mwiyo nidakumbira kuti anipase koma nthawe mwiyo mfulumero ule adaibisa. a

Amayi wangu angayesesa kutipfunzisa mpfundo za m’Baibolo. Iwo angayenda nase kumisonkhano ya Mboni za Yahova yomwe yangachitikira mudera yathu. Pakuti nenze mwana, ningabvalini vizinji pamisonkhano mwayo. Koma olo nteno wanthu osiyanasiyana angachinjana nkumbakhala nane pafupi ndipo anganinembera vomwe vinkukambiwa. Ningakhudziwa maninge na chikondi chawo komasoti momwe anganisamalirira. Kumuyi amayi angapfunzira nane Baibolo koma ningabvesalini bwino vomwe ningapfunzira ivo. Nthawe zinango nimbabva ninge mneneri Danieli, yemwe padatambira mawu ya ulosi kuchokera kwa mngelo adanena kuti: “Nidabva vomwe adalewa koma nilibe kudziwa tanthauzo yake.” (Danieli 12:8) Kwa inepano, “ningawona, koma ningadziwalini tanthauzo yake.”

Olo nteno pang’onopang’ono nidayamba kupfunzira mpfundo za m’Baibolo. Mpfundo iliyose yomwe naibvesa ningaiwona kuti niyodekena maninge ndipo ningayesesa kuitewedza pa moyo wangu. Komasoti nidapfunzira vizinji kuchokera ku makhalidwe ya wanthu anango. Mwakulinganiza, Baibolo ichanena kuti tichadekana kukhala woleza ntima. (Yakobo 5:7, 8) Koma mpfundo mweyi ningaibvesalini bwinobwino. Koma pomwe nidaona momwe Akhrisitu anzangu angaonesera khalidwe mweyi, nidabvesa bwinobwino tanthauzo ya kuleza ntima. Kulewa chaivo wanthu wa mumpingu wathu anithandiza maninge.

Nikanati nakwanisa magole 20, ntsiku inango nidaona alumbwana wosabva ankuyakhulana muchisewedwe chamanja. Nidayamba kucheza nawo mobisa mwakuti nidayamba kupfunzira chiseweredwe chamanja cha ku França. Komasoti nidapitiriza kusonkhana na wa Mboni za Yahova ndipo kumisonkhano ningacheza na mulumbwana munango dzina yake Stéphane, yemwe anganikonda maninge. Iye angayesesa kuyankhula nane ndipo ndawa ya vimwevi inembo nidayamba kumukonda maninge. Koma pakalibe papita nthawe, padachitika vinthu vomwe vidanikalipisa maninge. Stéphane adamangiwa padalamba kuyenda kunkhondo ndawa ya vomwe angakhulupirira. Kumangiwa kwake kudanikalipisa maninge mwakuti nidaleka kuyenda kumisonkhano.

Payadamala minyezi 11 Stéphane adabula kudjeri. Nidadabwa maninge kuwona akuyankhula nane chiseweredwe chamanja. Iye adapfunzira chiseweredwe mwechi kudjeri. Nikambawona Stéphane akuphatisa basa manja komasoti nkhope yake poyankhula nane, muntima mwangu nichakondwa maninge.

Stéphane adayamba kupfunzira nane Baibolo mu chiseweredwe chamanja. Pamwapa ndipo pomwe nidayamba kubveranisa mpfundo za m’Baibolo zosiyanasiyana zomwe nenze nidabva. Penenze mwana ningakonda kuwona mafoto yokhuza ya m’mabukhu yathu nkumbasiyanisa wanthu wotomolewa m’Baibolo. Mafoto mwayo yanganithandiza pomwe kuganizira makhalidwe ya wanthu mwawo ndipo vimwevi vinganichitisa kuti nidziwe bwino nkhani zolewa va iwo. Ningadziwa va Abulahamu, ‘mbewu’ yake komasoti ‘gulu ikulu.’ Koma pomwe Stéphane adanifotokozera mpfundo mwezi mu chiseweredwe chamanja, nidadzibvesa bwinobwino. (Genesis 22:15-18; Chivumbulutso 7:9) Venze vowonekeratu kuti chimwechi ndicho chiseweredwe changu chayicho.

Pakuti manje ningabvesa vomwe vinganenewa pamisonkhano, nidayamba kufuna kudziwa vizinji ndawa vinganifika pamoyo. Ndawa yothandiziwa na Stéphane, nidayamba kubvesa bwino vomwe Baibolo ichapfunzisa ndipo mu 1992 nidabatizika powonesa kudzipereka kwangu kwa Yahova Mulungu. Penenze mwana nenze nilibe mwayi woyankhula komasoti kucheza na wanthu, nenze wamanyazi komasoti nigachita mantha kuyankhula na wanthu.

uyenda kwa nthawe kagulu kathu ka wanthu wosabva kadaphatanidziwa na mpingo unango wa Mboni za Yahova womwe ungasonkhana mu thaundi ya Bordeaux. Mwevi vidanithandiza kuti nikule mwauzimu. Olo kuti ningashupika basi kubvana na wanthu, anzangu wakubva angawonesesa kuti ninkubvesa vinkunenewa. Gilles na nkazi wake Elodie, angayesesa kuyankhula nane. Nthawe zizinji misonkhano yakamala ambanichemerera kumuyi kwawo kuti tikadye chakudya panango kumwa thiyi. Vimwevi vidachitisa kuti timbabverane maninge. Ni vokomedza maninge kukhala pabodzi na wanthu womwe achawonesana chikondi pakutewedzera Mulungu.

Mu mpingu moyu nidagumana na ntsikana munango wokhuza maninge dzina yake Vanessa. Nidatengeka naye ndawa yakuti angayesesa kupewa kukhumudwisa anango komasoti ambachita vinthu mwachilungamo. Iye angawona kuti bvuto yangu yosayankhula ingamukangiselini kuyankhula nane koma ingamuthandize kumbayankhula na wanthu wosabva. Vimwevi vidachitisa kuti tiyambe chibwenzi ndipo tidalowolana mu gole ya 2005. Olo kuti nimbashupika basi kucheza na wanthu, Vanessa wanithandiza kumalisa bvuto yangu ya manyazi komasoti kuti nimbakwanise kufotokoza maganizo yangu momasuka. Iye anithandiza maninge kukwanirisa udindo wangu ku mpingu ndipo nichatembeja maninge thandizo yake.

Gole yomwe tidalowolana ofesi ya nthambi ya ku França idanichemera kuti nikapfunzire basa yotsumbudzulira mabukhu yathu. Pa magole yapita aya ofesi ya nthambi ya ku França yakhala inkuyesesa kubulisa ma DVD mu chiseweredwe chamanja. Koma ndawa yakuti panavinthu vizinji vofunika kutsumbudzuliliwa, iwo adawona kuti pakudekana pomwe otsumbudzulira azinji.

Inepano na Vanessa tidawona kuti kukatumikira ku maofesi ya Mboni za Yahova ni madaliso, koma olo nteno pakuyamba tingakhala na nkhawa kuti panango kuchita vimwevi kusokoneze vinthu vinango. Timbaganiza kuti nikachoka, ko ni mbani ambasamalire kagulu kathu ka chiseweredwe cha manja? Manje ni mbani wati ambakhale mnyumba yathu? Ko Vanessa agumane basa? Koma Yahova adathandiza pa mabvuto yose. Tidawona kuti Yahova achatikonda maninge komasoti achakonda wanthu wosabva.

Panidayamba kuphata basa yotsumbudzulira, nidawona kuti Mboni za Yahova zikuyesesa kuthandiza wanthu wosabva kupfunzira va Yahova. Komasoti nichakondwa maninge kuwona kuti wanthu azinji womwe ninkuphata nawo basa yotsumbudzulira achayesesa kuyankhula nane. Nimbakhudziwa ntima kuwona wanthu azinji ankuyesesa kuyankhula nane pophatisa basa vizindikiro vochepa vomwe apfunzira. Nichawona kuti achaniganizira. Vose mwevi ni umboni wakuti wanthu wa Yahova akondana komasoti achabverana.—Salimo 133:1.

Nichatembeja Yahova kuti pophatisira basa mpingu wachikhrisitu achaonesesa kuti nthawe zose pakhale munthu munango wakuti ambanithandize. Nitembeja soti mwayi wa ninawo wothandiza anzangu wosabva kudziwa Mulengi wathu wachikondi komasoti kukhala naye paushamwali. Nidzakondwe maninge ikadzafika nthawe yomwe wanthu adzakangirelini pomwe kuyankhulana ndawa yosiyana viyankhulo. Tose pabodzi ninge banja, timbadzayankhule ‘chiyankhulo chochena’ chomwe ni chonadi chonena va Yahova Mulungu na volinga vake.—Zefaniya 3:9.