Di mi ben pikin ete, dan mi papa nanga mama broko trow èn mi mama ben musu kweki mi, tu brada, nanga wán sisa en wawan. Na a ten dati, dofu pikin na ini Fransikondre ben e kisi leri na wan heri tra fasi, èn son leisi dati ben e meki den pikin pina. Ma sensi di mi pikin mi ben abi wan sani di furu dofu pikin no abi. Meki mi fruteri yu san na dati.

Wan pisi ten, furu leriman ben e bribi taki sma ben musu taki nanga dofu pikin èn taki den pikin disi ben musu leri fu luku fa sma mofo e buweigi fu man frustan san den e taki. Fu taki en leti, na ini Fransikondre pe mi kweki, dofu pikin na skoro no ben mag meki sani nanga den anu fu taki nanga makandra, sobun den no ben mag taki Dofusma-tongo. A ben e pasa srefi taki sma ben e tai den anu fu son dofu pikin na den baka te den ben e kisi leri.

Na ini den fosi yari fu mi libi, mi ben e kisi leri wan tu yuru ibri wiki fu wan sma di ben e leri mi fa fu taki. A sma disi ben e hori mi kakumbe noso mi ede èn ibri leisi baka mi ben musu taki san a ben e taigi mi aladi mi no ben man yere noti. Mi no ben man taki nanga tra pikin. Den yari dati ben hebi srefisrefi gi mi.

Di mi ben abi siksi yari, dan den seni mi go na wan skoro di ben de spesrutu gi dofu pikin. Fu a fosi leisi mi miti nanga tra dofu pikin. Dyaso wi no ben mag taki Dofusma-tongo tu. Te wi ben e du dati, dan den ben kan naki wi na tapu den koko fu wi finga, noso den ben kan hari wi na wi ede-wiwiri. Ma kibrikibri wi ben taki nanga makandra èn wi ben e meki sani nanga wi anu di wi wawan ben man frustan. Te fu kaba, mi ben man taki nanga tra pikin. Dati ben de a bigin fu fo koloku yari.

Ma di mi ben abi tin yari, mi ben musu go na wan lagiskoro pe den pikin ben man yere. A sani disi broko mi! Mi ben denki taki ala den tra dofu pikin ben dede èn taki mi wawan ben tan abra. Mi famiri no ben leri taki Dofusma-tongo èn den no ben meki mi bumui nanga dofu pikin, fu di datra ben frede taki mi no ben o man leri taki. Mi e memre ete san ben pasa di mi ben go na wan datra di ben e yepi sma di no ben man yere bun. A ben abi wan Dofusma-tongo buku na tapu en tafra.  Di mi si den fowtow na tapu a kafti fu a buku, dan mi sori na en tapu èn mi taki: „Mi wani dati!” A datra kibri a buku esi-esi. *

Mi mama pruberi fu kweki den pikin fu en fu libi leki Kresten. A ben e tyari wi go na den konmakandra fu Gemeente Mérignac fu Yehovah Kotoigi, krosibei fu a foto Bordeaux. Di mi ben pikin, mi no ben e frustan furu fu den sani di sma ben e taki na den konmakandra. Ma difrenti sma fu a gemeente ben e kon sidon na mi sei fu skrifi gi mi san sma ben e taki. A ben naki mi ati fu si fa den ben sori lobi gi mi èn fa den ben e broko den ede nanga mi. Na oso, mi mama ben e studeri Bijbel nanga mi, ma noiti mi ben frustan krin san a ben e leri mi. Mi ben e firi pikinso leki a profeiti Danièl di ben kisi wan profeititori fu wan engel, èn di ben taki baka dati: „Mi yere san a man taki, toku mi no ben e frustan” (Danièl 12:8). Ma nanga mi a ben de so: „Mi ben e si, ma mi no ben man frustan.”

Ma toku den prenspari tru tori fu Bijbel bigin teki rutu na ini mi ati safrisafri. Te mi ben e frustan wan sani krin, dan mi ben e hori a sani dati na ede èn mi ben e pruberi fu fiti en na ini mi libi. Mi ben e luku fa trawan ben e tyari densrefi èn mi ben e teki leri fu dati. Fu eksempre, Bijbel e leri wi taki wi musu abi pasensi (Yakobus 5:7, 8). Mi no ben e frustan san dati wani taki. Ma fu di mi ben e luku fa tra brada nanga sisa ben abi pasensi, dan mi kon frustan san dati wani taki. Iya, mi leri furu sani na ini a Kresten gemeente.

Di mi ben de wan tini, dan wan dei mi si wan tu dofu yonguwan na ini a strati e taki Dofusma-tongo nanga makandra. Kibrikibri mi bigin moksi nanga den èn na so mi bigin leri Dofusma-tongo fu Fransikondre. Mi tan go na den Kresten konmakandra èn drape Stéphane, wan yongu Kotoigi brada, du furu muiti fu yepi mi. A du tranga muiti fu taki nanga mi, èn mi nanga en tron bunbun mati. Ne wan sari sani miti mi. Den poti Stéphane na strafu-oso fu di a weigri fu go na ini a legre. A sani dati broko mi saka! Na a ten di Stéphane ben de na strafu-oso, mi lasi-ati so te taki te fu kaba mi no ben e go na den konmakandra moro.

Erfu mun baka dati, Stéphane komoto na strafu-oso èn a kon baka na oso. Yu kan frustan fa mi skreki di Stéphane bigin taki Dofusma-tongo nanga mi. Mi no ben man bribi! San ben pasa? Stéphane ben leri Dofusma-tongo na strafu-oso. Mi ben e luku den sani di Stéphane ben e meki nanga en anu èn nanga en fesi, èn mi ben e breiti. Mi ben man si kaba sortu wini dati ben o tyari kon gi mi.

Stéphane bigin studeri Bijbel nanga mi. Sensi a ten dati mi bigin frustan san ala den sani di mi ben leri fu Bijbel ben abi fu du nanga makandra. Di mi ben pikin, mi ben lobi fu luku den moi prenki na ini den buku fu wi di e taki fu Bijbel tori. Mi ben e luku den sma na ini den prenki bun èn mi ben e poti prakseri na ibri pikinpikin sani na ini a prenki, so taki mi no ben o frigiti a tori. Mi ben sabi fu Abraham, fu en „bakapikin”, èn fu a „bigi ipi”. Ma na di sma fruklari den sani disi gi mi na ini Dofusma-tongo, dan fosi mi ben man frustan den (Genesis 22:15-18; Openbaring 7:9). A ben de krin taki mi ben feni a tongo fu mi ati.

Now di mi ben man frustan san sma ben e taki na den konmakandra, dan mi ben de fayafaya fu leri moro. Fu di Stéphane yepi mi, meki safrisafri mi kon frustan Bijbel moro bun, èn na ini 1992, mi gi misrefi abra na Yehovah Gado èn mi teki dopu. Ma aladi mi ben e go na fesi, toku mi ben e syensyen ete èn a ben muilek gi mi fu moksi nanga tra sma. Dati ben kon fu di mi no ben leri fu taki nanga trawan di mi ben pikin.

Te fu kaba a pikin grupu dofu sma, bigin kon makandra nanga wan gemeente na ini Pessac, wan birti na ini Bordeaux. A sani dati ben de wan bigi yepi gi mi èn mi tan go na fesi na ini a tru anbegi. Aladi mi no ben man taki bun ete nanga sma, toku den mati fu mi di ben man yere, ben e sorgu taki mi ben e frustan ala sani. Wan trowpaar, Gilles nanga Elodie, du furu muiti fu taki nanga mi. Den ben gwenti kari mi fu kon nyan na den oso, noso fu kon dringi kofi nanga den baka konmakandra. Na so mi nanga den tron bun mati. Mi ben breiti taki mi ben de na mindri sma di ben e sori lobi neleki fa Gado wani!

Na ini a gemeente disi mi miti Vanessa. Mi ben lobi fa a de fu di a ben e firi gi trawan èn fu di a ben lobi retidu. Noiti a ben e si en leki wan problema taki mi dofu, ma a ben e si dati leki wan okasi fu leri taki nanga dofu sma. Mi kon lobi en èn wi trow na ini 2005. Mi feni en muilek ete fu taki nanga sma, ma Vanessa yepi mi fu no syensyen tumusi èn fu taki moro krin fa mi e firi. Mi e warderi en trutru taki a e yepi mi aladi mi e tyari den frantwortu fu mi.

A yari di wi trow, a bijkantoro fu Fransikondre na ini Louviers kari mi fu kon wroko drape wán mun fu leri du vertaalwroko. Na ini den yari di pasa, a bijkantoro wroko bun tranga fu meki difrenti DVD na ini Dofusma-tongo fu Fransikondre. Ma fu di moro wroko ben de fu du, meki den ben abi moro wrokoman fanowdu.

Mi nanga Vanessa ben e si en leki wan bigi grani èn wan blesi fu Yehovah Gado taki mi ben man wroko na a bijkantoro. Ma fu taki en leti wi ben e frede pikinso. San ben o pasa nanga a Dofusma-tongo grupu fu wi? San wi ben o du nanga wi oso? Vanessa ben o feni wroko na ini a kontren fu a bijkantoro? Na wan heri moi fasi Yehovah lusu ibriwan fu den problema dati. Mi ben kan firi taki Yehovah lobi wi èn taki a lobi dofu sma.

Fu di mi e yepi du vertaalwroko, meki mi man frustan moro bun omeni muiti na organisâsi e du fu yepi dofu sma fu kon sabi Gado. A e gi mi prisiri tu fu si fa furu sma na a bijkantoro e pruberi fu taki nanga mi. A e naki mi ati te mi e si taki den meki muiti fu leri awansi pikinso Dofusma-tongo. Mi no e firi leki mi a no wan fu den. Kwetikweti. Ala den sani disi di den e du fu sori mi taki den lobi mi, na wan buweisi taki a pipel fu Yehovah de na ini wánfasi.—Psalm 133:1.

Mi de nanga tangi taki ala ten Yehovah sorgu taki wan sma na ini a Kresten gemeente ben de drape fu yepi mi. Mi breiti taki mi man du pikinso fu yepi dofu sma fu kon sabi wi lobi-ati Mekiman, so taki den kan kon moro krosibei na en. Mi e angri fu a dei te ala sma o man frustan makandra èn o libi leki wán famiri. Na a ten dati, den alamala o taki a „soifri tongo” noso den tru tori fu Yehovah Gado nanga den sani di a abi na prakseri fu du.—Sefanya 3:9.