Taim mi bebi yet, papamama bilong mi i divos, na Mama wanpela i mas mekim bikpela long mi na 2-pela brata na 1-pela susa bilong mi. Long dispela taim, ol yaupas pikinini long Frans i no kisim kain skul olsem ol i save kisim long nau, na sampela taim rot bilong skulim ol yaupas pikinini i givim planti pen na hevi long ol. Tasol kirap long taim mi liklik yet, mi bin i gat wanpela gutpela samting em planti yaupas i no gat. Mi laik stori long dispela.

Inap sampela yia, planti tisa i ting stretpela rot bilong skulim ol yaupas, em long rot bilong lainim ol long toktok na ol yaupas i mas lukim maus bilong man i toktok na lain long kliagut long tok. Mi kamap bikpela long Frans, na long dispela kantri ol i tambuim ol man long yusim tokples Sain long skul. Long taim bilong ol lesen, sampela taim ol i save pasim 2-pela han bilong yaupas pikinini long baksait bilong em.

Taim mi liklik, inap sampela aua long olgeta wik mi save go lukim dokta bilong helpim man long toktok. Em i holim wasket o het bilong mi, na mi mas kamapim gen na gen sampela nois em mi yet i no inap harim. Mi no inap toktok wantaim ol narapela pikinini. Mi karim bikpela pen na hevi long ol dispela yia.

Taim mi gat 6-pela krismas, mi go long wanpela boding skul bilong ol yaupas. Em fes taim bilong mi long bungim ol narapela yaupas pikinini. Long dispela skul tu i tambu long yusim tokples Sain. Sapos mipela i wokim ol sain insait long klas, tisa i save paitim strong han bilong mipela o pulim gras bilong het. Tasol mipela i wokim ol sain long pasin hait, mipela yet i kamapim ol sain na mining bilong ol. Nau mi inap toktok wantaim ol narapela pikinini. Dispela em i stat bilong 4-pela yia we mi stap amamas.

Tasol taim mi gat 10-pela krismas, ol i putim mi long komiuniti skul i gat ol pikinini i no yaupas. Mi bel hevi tru! Mi ting ol narapela yaupas pikinini i dai pinis na mi wanpela tasol i stap. Ol dokta i pret olsem helpim mi bin kisim long dokta bilong helpim man long toktok bai lus, olsem na ol i tokim famili bilong mi long ol i no ken lainim tokples Sain na mi no ken bung wantaim ol narapela yaupas pikinini. Mi tingim yet wanpela taim mi go lukim dokta bilong ol yaupas. Em i gat wanpela buk bilong tokples  Sain i stap long tebol bilong em. Taim mi lukim ol piksa long karamap bilong buk, mi poinim dispela buk na mi tok, “Mi laik kisim!” Hariap tasol dokta i haitim dispela buk. a

Mama i skulim mipela ol pikinini long ol stiatok Kristen. Em i kisim mipela i go long ol miting bilong Mérignac Kongrigesen bilong ol Witnes Bilong Jehova, klostu long Bordeaux. Taim mi liklik yet, mi no kliagut long planti tok i kamap long ol miting. Tasol ol narapela narapela Witnes i sindaun klostu long mi na raitim long pepa ol tok i kamap. Mi pilim tru pasin bilong ol long laikim na tingim mi. Long haus, Mama i stadi long Baibel wantaim mi, tasol mi no kliagut tumas long ol samting em i lainim mi long en. Mi pilim olsem profet Daniel, husat i kisim tok profet long ensel na i tok: “Mi harim dispela tok bilong em, tasol mi no klia gut.” (Daniel 12:8) Long mi em olsem “mi lukim, tasol mi no kliagut.”

Tasol isi isi mi wok long lainim ol tok i tru bilong Baibel. Mi amamas tru long ol tok mi kliagut long en na traim long bihainim long laip bilong mi. Mi lainim tu ol samting long rot bilong lukim pasin ol narapela i mekim. Olsem, Baibel i tok yumi no ken les kwik. (Jems 5:7, 8) Mi no kliagut tumas long dispela tok. Tasol taim mi lukim ol wanbilip i kamapim dispela pasin, mi kliagut long pasin bilong i no ken les kwik em i wanem samting. Tru tumas, kongrigesen Kristen i helpim mi tru.

Wanpela de, taim mi tineja, mi lukim sampela yangpela i stap long rot na i mekim tokples Sain. Mi kirap bung wantaim ol long pasin hait na kirap lainim tokples Sain Bilong Frans. Mi wok long go yet long ol miting Kristen, na wanpela yangpela man Witnes, Stéphane, i kamap gutpela pren bilong mi. Em i wok strong bambai em i ken toktok wantaim mi, na mi pas gut wantaim em. Tasol wanpela samting i kamap na i mekim mi bel hevi tru. Stéphane i kalabus bikos em i no insait long ami. Bel bilong mi i bagarap stret! Taim Stéphane i stap long kalabus, mi bel hevi tru na mi no go moa long ol miting.

Inap 11-pela mun bihain, Stéphane i lusim kalabus na kam bek. Tingim bikpela amamas bilong mi taim Stéphane i kirap toktok wantaim mi long tokples Sain. Mi hatwok long bilipim samting mi lukim! Olsem wanem dispela inap kamap? Taim Stéphane i stap long kalabus, em i bin lainim tokples Sain Bilong Frans. Mi lukim Stéphane i wokim han na pes, na mi amamas tru long tingim olsem dispela bai helpim mi tru.

Stéphane i kirap stadi wantaim mi long Baibel. Kirap long dispela taim na i kam, mi stat long kliagut long ol wan wan tok i tru mi bin lainim. Taim mi pikinini yet, mi amamas tru long lukim ol naispela piksa i stap long ol buk na nius bilong Baibel, na mi skelim ol man i stap long ol piksa na olgeta liklik samting mi lukim na traim long tingim ol dispela stori. Mi save long Abraham, long “pikinini” bilong em, na “bikpela lain manmeri,” tasol mi kliagut moa long ol dispela tok taim wanpela i eksplenim long mi long rot bilong tokples Sain. (Stat 22:15-18; Revelesen 7:9) I klia tru olsem mi painim pinis tokples tru bilong mi, em tokples mi pilim long bel.

Nau mi inap kliagut long ol tok i kamap long ol miting, olsem na mi pilim tru ol tok long bel na mi gat bikpela laik long kisim sampela save moa. Stéphane i helpim mi na mi wok long kliagut moa long ol tok bilong Baibel, na long 1992, mi dediketim laip bilong mi long God Jehova na kisim baptais. Mi wok long kamap strong, tasol mi man bilong sem na mi hatwok long bung wantaim ol narapela man, bikos taim mi liklik mi no bin lain long toktok wantaim ol narapela.

Bihain, liklik grup bilong ol yaupas mi save bung wantaim ol, i kamap hap bilong kongrigesen long Pessac, em wanpela hap bilong Bordeaux. Dispela i helpim mi tru, na mi wok yet long kamap strong long tok i tru. Maski mi hatwok yet long toktok wantaim ol narapela, ol pren bilong mi husat i no yaupas, ol i kamapim gut ol tok bambai mi kliagut long olgeta samting. Tupela marit, Gilles na Elodie, i wok strong tru bilong ol i ken toktok wantaim mi. Planti taim ol i singautim mi long kaikai wantaim ol o dring kofi bihain long miting, olsem na mipela i pas gut wantaim. Em i gutpela samting tru long stap namel long ol manmeri husat i bihainim ol gutpela pasin bilong God!

Long dispela kongrigesen mi bungim Vanessa. Mi laikim tru pasin bilong em long pilim hevi bilong ol narapela na laikim stretpela pasin. Maski mi yaupas, em i no ting dispela i pasim mipela long toktok wantaim, nogat, em i ting dispela i opim rot long em long lain long toktok wantaim ol yaupas. Mi gat laik long em na long 2005 mipela i marit. Maski mi hatwok long toktok wantaim ol narapela, Vanessa i bin helpim mi long daunim pasin bilong sem na i strongim mi long kamapim tingting bilong mi. Mi pilim tru gutpela sapot em i givim taim mi mekim ol wok bilong mi.

Long yia mitupela i marit, brens ofis bilong ol Witnes Bilong Jehova long Frans, i stap long Louviers, i singautim mi long kam na stap wanpela mun na lainim wok bilong tanim tok. Long nau, brens i bin wok strong tru long kamapim sampela buk na nius long tokples Sain Bilong Frans long DVD. Tasol planti wok i stap na trenslesen tim i nidim helpim.

Mitupela Vanessa i pilim olsem em i bikpela blesing tru na wanpela presen i kam long God Jehova long mi ken wok long brens, tasol tu, mipela i wari liklik. Wanem samting bai kamap long grup bilong ol yaupas? Olsem wanem long haus bilong mipela? Vanessa bai painim wok mani long dispela hap o nogat? Jehova i stretim olgeta dispela hevi bilong mipela. Mi pilim tru pasin bilong Jehova long laikim mitupela na ol yaupas.

Nau taim mi bin insait long trenslesen wok, mi kliagut moa long bikpela wok ol i mekim bilong helpim ol yaupas long save long God. Na mi amamas tru long lukim planti wanwok i traim long toktok wantaim mi! Mi pilim tru pasin bilong ol long lainim wan wan sain na traim long yusim. Mi no pilim olsem mi stap wanpis—no gat tru. Olgeta dispela gutpela pasin i kamapim klia pasin wanbel i stap namel long lain bilong Jehova.—Song 133:1.

Mi tenkyu tru long Jehova olsem oltaim i gat man i helpim mi insait long kongrigesen Kristen. Mi amamas tru long liklik wok mi bin mekim bilong helpim ol narapela yaupas long save long gutpela Krieta bilong yumi na long go klostu long em. Mi wetim taim we i no gat wanpela samting bai pasim ol man long toktok gut wantaim, na olgeta man bai mekim “gutpela tokples”—em stretpela save long God Jehova na ol samting em i tingting pinis long mekim—na stap olsem wanpela famili i stap wanbel wantaim.—Sefanaia 3:9, NW.