Apo nkhaŵa mucoko, ŵapapi ŵane ŵakalekana ndipo tikalereka na amama. Tikaŵapo ŵanayi, ŵanyamata ŵatatu na msungwana yumoza. Pa nyengo iyo ku France ŵanthu ŵakumangwa ŵakaŵa ŵakusambira nga umo viliri sono yayi, nakuti nthowa izo ŵakagwiliskiranga nchito pakusambizga nyengo zinyake tikasuzgikirangapo. Ndipouli, kufuma waka pa wanici nkhaŵa na mwaŵi ukuru uwo ŵakumangwa ŵanandi ŵakaŵavya. Lekani nilongosore.

Kwa nyengo yitaliko, ŵasambizgi ŵanandi ŵakaghanaghananga kuti ŵakumangwa ŵakeneranga kusambizgika kuzunura mazgu na kuwoneseska umo munthu wakuyowoyera. Nakuti ku France uko nkhakulira, ku sukulu ŵakazomerezganga yayi ciyowoyero camawoko. Ŵana ŵanyake ŵakaŵakakiliranga mawoko kumasinda pa nyengo yakusambira.

Vyaka vyakwambilira vyaumoyo wane, sabata yiliyose nkhamaliranga maora ghanandi na munthu uyo wakanisambizganga kuyowoya. Msambizgi wakanikoranga kukalezulezu panji kumutu ndipo wakanicicizganga kuti nifumiskenge mazgu agho namwene nkhaghapulikanga cara. Nkhatondekanga kuyowoyeskana na ŵana ŵanyane. Iyi yikaŵa nyengo yakusuzga kwa ine.

Apo nkhaŵa na vyaka vinkhondi na cimoza, ŵakanitumizga ku sukulu ya ŵana ŵakumangwa. Iyi yikaŵa nyengo yakwamba kusangana na ŵakumangwa ŵanyane. Ku sukulu iyi nako ŵakakanizganga ciyowoyero ca mawoko. Para tayowoya waka na mawoko mu kilasi, ndikuti tajiziya kuti ŵatikhowore mu minwe panji kutiguza sisi. Ndipouli, kumphepete tikayowoyanga na mawoko, tikaŵa na nthowa zithu zakayowoyero. Paumaliro nkhamba kuyowoyeskana na ŵana ŵanyane. Ntheura, kwa vyaka vinayi ivyo nkhaŵira pa sukulu iyi nkhaŵa wakukondwa.

Kweni apo nkhaŵa na vyaka 10 ŵakanitumizga ku pulayimare uko kukaŵa ŵana awo ŵakaŵavye suzgo lakupulika. Nkhatimbanizgika comene. Ndipo nkhawonanga nga kuti ŵakumangwa ŵanyane wose ŵali kufwa ndipo nakhala nekha. Ŵapapi ŵane ŵakasambira yayi ciyowoyero camawoko, cifukwa ŵakalondezganga ulongozgi wa ŵadokotala awo ŵakawopanga kuti ningalekerathu kuyowoya. Ntheura ŵakanikanizganga kucezga na ŵakumangwa ŵanyane. Nkhukumbuka kuti zuŵa linyake apo nkhaluta kwa dokotala wa ŵakumangwa, nkhawona buku la ciyowoyero camawoko pa thebulu lake. Nkhati nawona vithuzithuzi pa cikopi nkhayowoya na mawoko kuti,  “nkhukhumba buku ilo!” Nyengo yeneyiyo dokotala wakalibisa. *

Ŵamama ŵakafwilirapo kuti taŵana tilondezgenge fundo Zacikhristu. Ŵakalutanga nase ku mpingo wa Ŵakaboni ŵa Yehova uwo ukaŵa kufupi na Bordeaux. Pakuti nkhaŵa mwana, nkhapulikanga vinandi yayi pa maungano. Ndipouli, ŵanthu ŵanandi ŵakakhalanga nane pafupi ndipo ŵakapokerananga kunilembera fundo pa ivyo vikayowoyekanga. Nkhacontheka comene cifukwa ca kunitemwa na kunighanaghanira. Ku nyumba amama ŵakasambiranga nane Baibolo kweni nkhapulikiskanga viŵi yayi. Nkhajipulika nga ni nchimi Daniyeli, iyo mungelo wati wayiphalira ucimi, yikati: “Nkhapulika, kweni kuti nkhamanyiska cara.” (Daniel 12:8) Kwa ine nkhani yikaŵa yakuti “Nkhawona kweni nkhapulikiska cara.”

Ndipouli, mwapacokopacoko unenesko wa mu Baibolo ukamba kuninjira. Nkhazirwiskanga ivyo nkhapulikiskanga makora ndipo nkhayezgayezganga kuvilondezga. Kweniso nkhasambiranga pakuwona umo ŵanji ŵakacitiranga vinthu. Mwaciyelezgero, Baibolo likuti tikwenera kuŵa ŵakuzika mtima. (Yakobe 5:7, 8) Kweni nkhapulikiskanga yayi ico kuzika mtima kukung’anamura. Ndipouli, nati nawona umo Ŵakhristu ŵanyane ŵakacitiranga, nkhapulikiska. Kuyowoya unenesko, mpingo Wacikhristu wanovwira comene.

Nyengo yinyake apo nkhaŵa na vyaka vya m’ma 13 na 19, nkhawona ŵakumangwa ŵaŵiri ŵakudumbiskana pa msewu. Nkhamba kucezga nawo mwakubisilizga ndipo nkhamba kusambira ciyowoyero ca mawoko ca ku France. Nkhalutilira kuwungana na Ŵakaboni ŵa Yehova. Ku malo agha nkhasangana na Stéphane, uyo wakanweka nane comene. Wakafwilirangapo comene kuyowoyeskana nane, ndipo nane nkhamutemwa comene. Ndipouli, cinthu cinyake cakukhuŵazga cikaŵa pafupi kucitika. Stéphane wakajalirika mu jele cifukwa ca kukana kunjira usilikari. Nkhahangayika comene. Stéphane wati wajalirika mu jele, nkhalopwa comene ndipo nkhawungananga viŵi yayi.

Pati pajumpha myezi 11, Stéphane ŵakamufumiska mu jele. Nkhazizwa comene kuwona kuti wamba kuyowoya ciyowoyero camawoko. Nkhagomezga yayi. Ndipo nkhajifumba kuti, Kasi cacitika nchivici? Ku jele Stéphane wakasambira ciyowoyero camawoko ca ku France. Nkhakondwa comene kuwona umo wakayowoyeranga na mawoko kweniso umo cisko cake cikawonekeranga pakuyowoya ndipo nkhaghanaghaniranga umo ivi vinovwilirenge.

Stéphane wakamba kusambira nane Baibolo. Kufuma pa nyengo iyi, nkhamba kukakilira pamoza fundo zose izo nkhasambira mu Baibolo. Apo nkhaŵa mwana nkhatemwanga kuwona vithuzi vyakutowa mu mabuku ghithu ghakulongosora Baibolo, na kuyaniska ŵanthu ŵa pa vithuzi na kusanda kalikose mwakuti nkhani iyo yikhazikike mu maghanoghano. Nkhamanyanga vya Abrahamu, ‘mphapu yake’ kweniso “mzinda ukuru.” Kweni nkhapulikiska visambizgo ivi ŵati ŵavilongosora mu ciyowoyero camawoko. (Genesis 22:15-18; Uvumbuzi 7:9) Uwu ukaŵa ukaboni wakuti nasanga ciyowoyero cane capamtima.

Pakuti nkhamba kupulikiska nkhani izo zikayowokekanga pa maungano, nkhacontheka comene ndipo nkhakhumbanga kumanya vinandi. Pakuti Stéphane wakanovwiranga, nkhalutilira kumanya vinandi mu Baibolo, ndipo mu 1992 nkhajipatulira kwa Yehova na kubapatizika. Nangauli nkhamanya vinandi, kweni nkhaŵa kuti nicali na soni cifukwa nkhacezganga na ŵanji yayi apo nkhaŵa mwanici.

Pamasinda gulu lithu licoko la ŵakumangwa likamba kuwungana na mpingo wa Pessac mu tawuni ya  ku Bordeaux. Ici cikanovwira comene, ndipo nkhalutilira kukura mwauzimu. Nangauli, nkhaŵa kuti nicali kusuzgikira kupulikiska, kweni ŵabwezi ŵane ŵakawoneseskanga kuti napulikiska vyose. Gilles na Elodie awo mbakutorana ŵakafwilirapo comene kuti ŵacezgenge nane. Kanandi para maungano ghamara, ŵakanicemeranga ku nyumba kwawo kuti nkharye nawo cakurya, ntheura tikamba kutemwana comene. Nchakukondweska comene kuŵa pamoza na ŵanthu awo ŵakulondezga nthowa zacitemwa za Ciuta.

Ku mpingo uwu nkhasangana na Vanessa. Nkhakopeka comene na umo wakaŵiranga maso na vinthu kweniso kucita vinthu mwaurunji. Wakawona kuti kuleka kuyowoya nchakujandizga yayi, kweni wakawonanga kuti ni nthowa yakusambilira ciyowoyero camawoko. Wakanikondweska comene ndipo mu 2005 tikatorana. Nangauli pasono nicali kusuzgika kuyowoya, kweni Vanessa wanovwira comene kuti nimazge soni na kuyowoya mwakufwatuka. Nkhumuwonga comene cifukwa ca kunovwira apo nkhucita milimo yane.

Mu cilimika ico tikatolerana, ofesi ya munthavi ya Ŵakaboni ŵa Yehova iyo yili ku Louviers yikanicema kwa mwezi umoza kuti nkhasambire mulimo wakung’anamura. Mu vilimika vyasonosono apa, ofesi ya munthavi yikafwilirapo comene kufumiska mabuku ghanandi pa DVD mu ciyowoyero camawoko ca ku France. Kweni cifukwa ca mulimo unandi munthazi, gulu lakung’anamura likakhumbikwiranga kuŵa lakukhora.

Tose, ine na Vanessa tikawona kuti ni mwaŵi ukuru comene kweniso cawanangwa cakufuma kwa Yehova kukateŵetera pa ofesi ya munthavi, kweni tikaŵa na wofi. Tikajifumbanga kuti, Kasi gulu lithu la ciyowoyero camawoko lendenge wuli? Kasi nyumba yithu ticitenge nayo wuli? Kasi Vanessa wamuyisanga nchito ku caru ici? Munthowa yapadera, Yehova wakatovwira pa ivyo tikafipiranga mtima. Nkhujipulika kuti Yehova wakutitemwa comene kweniso ŵakumangwa wose.

Pakuti nacitapo mulimo wakung’anamura mabuku, nkhumanya makora ivyo vikucitika kuti ŵanthu ŵambura kuyowoya ŵamanye Ciuta. Kweniso nkhukondwa comene kuwona kuti ŵanyane awo nkhugwira nawo nchito ŵakuyowoya nane. Nkhucontheka comene para ŵakuyowoya nane ciyowoyero camawoko nangauli ŵangaŵa kuti ŵasambira vicoko waka. Nkhujipulika kuti ŵanijowora yayi. Citemwa ico ŵakunilongora cikulongora kukolerana kwapadera uko kuli pakati pa ŵanthu ŵa Yehova.—Salmo 133:1.

Nkhuwonga comene Yehova uyo wanovwira kwizira mu mpingo ndipo wawoneseska kuti nyengo zose pali munthu wakunovwira. Kweniso nkhuwonga kuti nane nacitako kacigaŵa kacoko pakovwira ŵanyane awo mbakumangwa kuti ŵamanye Mlengi withu wacitemwa na kusendelera kwa iyo. Nkhulindizga mwakunweka apo masuzgo ghose agho ghakutitondeska kuyowoyeskana ghazamumalira. Ndipo tose tizamuyowoya “kayowoyero katuŵa,” ako mbunenesko wakukhwaskana na Yehova Ciuta na khumbo lake na kuŵa mu mbumba ya ŵanthu ŵakukolerana.—Zefaniya 3:9.