ពេត្រុស និងអាណានាស បាននិយាយកុហក តើយើងអាចទាញមេរៀនអ្វី?
ចូរបង្រៀនកូនរបស់អ្នក
ពេត្រុស និងអាណានាស បាននិយាយកុហក តើយើងអាចទាញមេរៀនអ្វី?
ដូចអ្នកដឹងស្រាប់ហើយ ពាក្យកុហកគឺជាអ្វីដែលអ្នកនិយាយហើយដឹងថាមិនពិត។ តើអ្នកធ្លាប់និយាយកុហកទេ?— * សូម្បីតែមនុស្សធំខ្លះដែលស្រឡាញ់ព្រះក៏ធ្លាប់និយាយកុហកដែរ។ អ្នកប្រហែលជាស្គាល់បុគ្គលម្នាក់ក្នុងគម្ពីរដែលបាននិយាយកុហក។ នោះគឺពេត្រុស ជាសាវ័កម្នាក់របស់លោកយេស៊ូក្នុងចំណោមសាវ័កទាំង១២នាក់។ សូមយើងពិនិត្យមើលនូវមូលហេតុខ្លះដែលគាត់បាននិយាយកុហក។
បន្ទាប់ពីគេបានចាប់ខ្លួនលោកយេស៊ូ គេនាំលោកទៅផ្ទះសម្ដេចសង្ឃ។ ពេលនោះរំលងអធ្រាត្រហើយ។ ពេត្រុសចូលទៅទីធ្លាផ្ទះសម្ដេចសង្ឃដោយមិនឲ្យគេស្គាល់។ ក្រោមពន្លឺភ្លើង ស្ត្រីបម្រើម្នាក់របស់សម្ដេចសង្ឃមើលស្គាល់ពេត្រុសដោយនិយាយថា៖ ‹អ្នកក៏បាននៅជាមួយនឹងយេស៊ូដែរ!›។ ដោយភ័យខ្លាច ពេត្រុសបដិសេធថា គាត់មិនស្គាល់លោកយេស៊ូទេ។
គម្ពីរចែងថា បន្ទាប់មក«ស្ត្រីម្នាក់ទៀតបានឃើញគាត់» នាងនិយាយថា៖ «បុរសនេះធ្លាប់នៅជាមួយនឹងយេស៊ូ»។ ពេត្រុសបានបដិសេធម្ដងទៀត។ មិនយូរក្រោយមក មនុស្សឯទៀតបានចូលមកជិតពេត្រុសហើយនិយាយថា៖ «អ្នកច្បាស់ជាពួកនោះដែរ»។
ពេត្រុសបានភ័យខ្លាចយ៉ាងខ្លាំង។ ដូច្នេះនៅលើកទី៣ គាត់បាននិយាយកុហកថា៖ «ខ្ញុំមិនស្គាល់បុរសនោះទេ!»។ មាន់ក៏រងាវឡើង ហើយលោកយេស៊ូបានមើលទៅពេត្រុស។ រួចពេត្រុសនឹកឃើញពាក្យដែលលោកយេស៊ូមានប្រសាសន៍ប្រាប់គាត់ពីរបីម៉ោងមុននោះថា៖ «មុនមាន់រងាវ អ្នកនឹងបដិសេធ មិនទទួលស្គាល់ខ្ញុំបីដង»។ ពេត្រុសយំដោយនឹកស្ដាយជាខ្លាំង!
តើរឿងដូចនេះអាចកើតឡើងចំពោះអ្នកទេ?— ប្រហែលជាអ្នកនៅសាលារៀន ហើយឮសិស្សកំពុងនិយាយអំពីសាក្សីព្រះយេហូវ៉ា។ សិស្សម្នាក់និយាយថា៖ «ពួកគេមិនគោរពទង់ជាតិទេ»។ ម្នាក់ទៀតបន្ថែមថា៖ «ពួកគេមិនធ្វើសង្គ្រាមដើម្បីការពារប្រទេសខ្លួនទេ»។ ម្នាក់ទៀតនិយាយថែមទៀតថា៖ «ពួកគេមិនមែនជាអ្នកកាន់សាសនាគ្រិស្តទេ ពីព្រោះពួកគេមិនធ្វើបុណ្យណូអែល»។ ក្រោយមកម្នាក់ទៀតបែរមកអ្នករួចសួរថា៖ «អ្នកជាសាក្សីព្រះយេហូវ៉ា មែនទេ?»។ តើអ្នកនឹងឆ្លើយយ៉ាងណា?—
មុនដែលមានរឿងបែបនេះកើតឡើង អ្នកត្រូវត្រៀមខ្លួនដើម្បីឆ្លើយឲ្យបានល្អ។ ពេត្រុសមិនបានត្រៀមខ្លួនទេ។ ដូច្នេះ ពេលដែលមានការបង្ខិតបង្ខំ គាត់បាននិយាយកុហក! ក៏ប៉ុន្តែ គាត់សោកស្ដាយយ៉ាងខ្លាំងនូវអ្វីដែលគាត់បានធ្វើ។ ហេតុនេះហើយ ព្រះបានអភ័យទោសឲ្យគាត់។
អ្នកកាន់តាមលោកយេស៊ូម្នាក់ទៀតនៅសម័យមុនឈ្មោះអាណានាសក៏បាននិយាយកុហកដែរ។ ប៉ុន្តែ ព្រះមិនអភ័យទោសឲ្យគាត់ និងសាភីរ៉ាដែលជាប្រពន្ធរបស់គាត់ទេ។ នាងបានរួមគំនិតជាមួយប្ដីក្នុងការនិយាយកុហកដែរ។ សូមយើងពិនិត្យមើលមូលហេតុដែលព្រះមិនអភ័យទោសឲ្យអាណានាសនិងសាភីរ៉ា។
ដប់ថ្ងៃក្រោយលោកយេស៊ូបានចេញពីពួកសាវ័ក ហើយត្រឡប់ទៅឯព្រះនៅស្ថានសួគ៌វិញ មានមនុស្សចំនួន៣.០០០នាក់បានទទួលការជ្រមុជទឹកនៅក្រុងយេរូសាឡិម។ មនុស្សជាច្រើនបានមកពីស្រុកឆ្ងាយៗដើម្បីចូលរួមបុណ្យថ្ងៃទី៥០។ ក្រោយពីពួកគេក្លាយទៅជាអ្នកកាន់តាមលោកយេស៊ូហើយ ពួកគេចង់ស្នាក់នៅទីនោះយូរជាងដើម្បីរៀនថែមទៀតអំពីជំនឿថ្មីរបស់ខ្លួន។ ដូច្នេះ អ្នកកាន់តាមលោកយេស៊ូខ្លះបានប្រើលុយរបស់ខ្លួនដើម្បីជួយផ្គត់ផ្គង់ពួកគេ។
អាណានាសនិងប្រពន្ធរបស់គាត់បានលក់ដីមួយចំណែករបស់ពួកគាត់ដើម្បីបានប្រាក់ជួយដល់អ្នកដែលទើបតែបានទទួលការជ្រមុជទឹក។ ពេលអាណានាសយកប្រាក់ទៅឲ្យពួកសាវ័ក គាត់និយាយថា នោះជាប្រាក់ទាំងអស់ដែលមកពីការលក់ដីរបស់គាត់។ តែនោះមិនមែនប្រាក់ទាំងអស់ទេ! គាត់បានទុកប្រាក់ខ្លះសម្រាប់ខ្លួនឯង! ព្រះបានឲ្យពេត្រុសដឹងអំពីរឿងនេះ ដូច្នេះពេត្រុសនិយាយទៅអាណានាសថា៖ «អ្នកមិនបានកុហកមនុស្សទេ តែបានកុហកព្រះវិញ»។ នៅពេលនោះអាណានាសបានដួលស្លាប់នៅនឹងកន្លែង! ប្រហែលបីម៉ោងក្រោយមកប្រពន្ធរបស់អាណានាសក៏ចូលមក។ នាងមិនដឹងថាមានអ្វីកើតឡើងដល់ប្ដីនាងទេ តែនាងក៏បាននិយាយកុហកដែរ រួចមកនាងដួលស្លាប់នៅនឹងកន្លែងទៅ។
មេរៀននេះប្រាកដជាធ្វើឲ្យយើងចាំមិនភ្លេចថា យើងត្រូវតែនិយាយពាក្យពិត។ មែនហើយ យើងទាំងអស់គ្នាត្រូវរៀនមេរៀននេះ! ប៉ុន្តែ យើងទាំងអស់គ្នាចេះធ្វើខុស ជាពិសេសពេលយើងនៅក្មេង។ តើកូនសប្បាយចិត្តទេដែលព្រះយេហូវ៉ាស្រឡាញ់កូន ហើយលោកនឹងអភ័យទោសឲ្យកូនដូចលោកអភ័យទោសឲ្យពេត្រុសនោះ?— តែកូនត្រូវចាំថា យើងមិនត្រូវនិយាយកុហកទាល់តែសោះ។ ការនិយាយកុហកជាកំហុសធ្ងន់ ហើយបើយើងភ្លាត់និយាយកុហក នោះយើងត្រូវអង្វរព្រះសុំលោកអភ័យទោសឲ្យយើង។ នោះជាអ្វីដែលពេត្រុសច្បាស់ជាបានធ្វើ ហើយគាត់បានទទួលការអភ័យទោសពីព្រះ។ បើយើងខំព្យាយាមមិននិយាយកុហកតទៅទៀត នោះព្រះនឹងអភ័យទោសឲ្យយើងដែរ!
សូមអានពីគម្ពីររបស់អ្នក
ម៉ាថាយ ២៦:៦៩-៧៥ សកម្មភាព ២:៣៨-៤២; ៤:៣២-៣៧; ៥:១-១១
[កំណត់សម្គាល់]
^ វគ្គ 3 បើអ្នកអានជាមួយកូនតូច ហើយឃើញថាមានអូសបន្ទាត់ នេះជួយរំលឹកអ្នកឲ្យផ្អាក និងលើកទឹកចិត្តកូនឲ្យឆ្លើយ។
[រូបភាពនៅទំព័រ១៤]
[រូបភាពនៅទំព័រ១៤]
[រូបភាពនៅទំព័រ១៥]
លោកអ្នកក៏ប្រហែលជាចូលចិត្តដែរ
ទស្សនាវដ្ដី
លោកយេស៊ូគ្រិស្ដ តើលោកកំពុងធ្វើអ្វីនៅឥឡូវនេះ?
ទស្សនាវដ្ដី
ព្រះចេះឈឺចិត្ដ តើយើងអាចធ្វើឲ្យព្រះរីករាយយ៉ាងដូចម្ដេច?
ទស្សនាវដ្ដី
ចិត្ដលោភលន់ធ្វើឲ្យកេហាស៊ីលែងទទួលការពេញចិត្ដពីព្រះ
ទស្សនាវដ្ដី
