Kala ki uejiia kiá, o makutu kima ki u zuela, ki uejiia kuila ki kia kidi. O kuila saí kizuua ua tangele kiá makutu?— * Né muene adiakimi a zolo Nzambi, a tele kiá makutu. Nange u di lembalala o muthu mu Bibidia ua tange makutu. O dijina diê, Phetele, ua bhangele mbandu ku 12 dia jipoxolo ja Jezú. Tua-nda di longa o musoso uê phala kuijiia se mukonda diahi muéne ua tangele makutu.

Kioso Jezú kia mu koko, a mu ambata ku dibhata dia mukunji ua dikota. Bhu kaxaxi ka usuku, Phetele u bokona mu kithádi kia mukunji ni ku zomba, sé athu ku mu mona kuila dixibulu dia Jezú. Kioso kia mu kuota, kilumba, selevende ia mukunji ua dikota, ua bokuesa Phetele, u mona kuila dixibulu dia Jezú. anga u dikola: “Eie ue ua kexile ni Jezú.” Ni uôma, Phetele u dituna, u zuela kuila ka kexile ni Jezú.

O Bibidia i zuela kuila mu ku bhita kithangana, “kilumba kia mukuá u mu tongolola.” Muéne uambe: ‘Diiala didi dia kexile ué ni Jezú.’ Phetele anga u dituna dingi. Ku bhanga kithangana, athu emana bhenhobho, eza kua Phetele, exi: ‘Kidi kiene, eie ua tokala-nê.’

Phetele anga u kala ni uôma. Kienhiki, mu lutatu muéne u tanga dingi makutu, uixi: “Ki ngi jiia o diiala didi!” O dikolombolo anga di kokola. Jezú u tala kua Phetele, Phetele anga u tukumuka o maka a tangele Jezú, kuila “Kioso o dikolombolo kiluua di kokola eie ua-nda ku ngi dituna lutatu.” Anga u dila!

O kuila kiki ki tena ué ku bhita n’eie?— Eie nange u kala mu xikola, anga uivua o jikoleka jê kuzuela ia lungu ni Jimbangi ja Jihova. Koleka imoxi u zuela: “Ene ka fukamena o dibandela,” o ua mukuá u bandekesa, “ene ka zokela o ixi.” Mukuá u zuela ué: “Ene ki Jikidistá, mukonda ka bhange o fesa ia natale.” Kienhiki, mukuá u ku tala anga u ku ibhula: “Eie ku Mbangi ia Jihova?” Kiebhi ki ua-nda tambuijila?—

 Ua tokala u kala polondo phala ku tena ku tambuijila kiambote ande dia ku bhita mu maka enhá. Phetele ka kexile polondo. Kioso kia mu ibhuidisa, muéne ua tange makutu! Maji muéne ua diela o kima kia bhangele, Nzambi anga u mu loloka.

O dixibulu dia mukuá dia Jezú, ua tangele ué makutu, Ananiia. Maji Nzambi ka mu loloka, ka loloka ué o muhatu’ê, Safídia. Muéne ni muadi uê a bakanene ku tanga makutu. Tu di longe se mukonda diahi Nzambi ka loloka Ananiia ni Safídia.

Mu ku bhita dikuinhi dia izuua, kioso Jezú kia xisa o jipoxolo jê iu ua vutuka ku diulu kua Nzambi, 3.000 ja athu a a batizala mu Jeluzaleme. Athu avulu a tundile mu jixi ja makanga phala ku bhanga o Fesa ia Pendekoxi, kioso kia kituka dixibulu dia Jezú, athu enhá a mesenene ku kala dingi kuenhoko, phala ku di longa dingi ia lungu ni kixikanu kiâ kia ubhe. Mukonda dia kiki, saí maxibulu a Jezú, a katula kitadi mu jibela jâ phala ku a kuatekesa.

Ananiia ni muhatu’ê, a sumbisa o kibhela kiâ phala ku kuatekesa o jiphange jiji ja ubhe a a batizala. Kioso Ananiia kia bheka o kitadi ku jipoxolo, muéne ua zuela kuila, kiene ngó kia tundu mu ku sumbisa o kibhela kiâ. Maji kiki kiexile makutu! Muéne ua bhake-ku mbandu ia kitadi phala muéne! Nzambi anga u ki tangela Phetele, kienhiki, Phetele uambela Ananiia: “Eie o makutu iâ, ku a tela athu, kana! Ua a tela Nzambi!” Ananiia kiévu o maka enhá, u dibhala bhoxi anga ufuá! Mu ku bhita ola jitatu, o muhatu’ê u bokona. Sé kuijiia ihi ia bhitile ni muadi uê, muéne u tanga ué makutu, mu kithangana kieniókio, u dibhala ué bhoxi anga ufuá.

Didi disá dia dikota phala etu: O kuzuela o kidi kima kia tokala! Etu oso tua tokala ku katula-ku phangu! Maji etu oso tuene mu lueza, bhenge-bhenge mu unzangala. Ku zediua mu kuijiia kuila Jihova ua ku zolo, iu ua-nda ku loloka kala kia loloka Phetele?—Maji ua tokala uijiia kuila, tua tokala ku tanga o kidi. Se tu tanga makutu, tua tokala ku diondela Nzambi phala ku tu loloka. Kiki kiene kia bhangele Phetele, Nzambi iu ua mu loloka. Se tu bhanga ioso phala ki tu tange dingi makutu, Nzambi ua-nda tu loloka ué!