Malondololo Ku Bipangujo Bimanine Pa Bible

Mwanda waka Yesu witwanga bu Mwanā Leza?

Leza kadipo na mukaji wasongele mwine waābutwile nandi bana. I Umpangi wa bintu byonso byūmi. Bantu bāpangilwe na bukomo bwa kwiula ngikadilo ya Leza. O mwanda mwine Adama muntu mubajinji wāpangilwe na Leza, wāityilwe bu ‘mwanā Leza.’ Mu muswelo umo onka, Yesu nandi witwanga bu ‘mwanā Leza’ mwanda wāpangilwe na ngikadilo pamo na yoya idi na Shandi.—Tanga Luka 3:38; Yoano 1:14, 49.

Le Yesu wāpangilwe kitatyi’ka?

Leza wāpangile Yesu kumeso kwa kupanga Adama. Na bubine, Leza wāpangile Yesu ne kumwingidija pa kupanga bintu bikwabo byonso, kubadila’mo ne bamwikeulu. O mwanda Bible utela Yesu bu “umbedi wa byonso byakupangibwa” na Leza.—Tanga Kolose 1:15, 16.

Kumeso kwa kubutulwa mu Betelema, Yesu wādi kipangwa kya ku mushipiditu momwa mulu. Kitatyi pa kubwana, Leza watundulwila bumi bwa Yesu mu difu dya Madia amba abutulwe bu muntu.—Tanga Luka 1:30-32; Yoano 6:38; 8:23.

Mwanda waka Leza wāsakile Yesu abutulwe pano panshi bu muntu? Le i mwingilo’ka wa pa bula wāingile Yesu? Ubwanya kutana malondololo a bino bipangujo mu Bible, kadi akatamija kwivwanija kobe ne kusangela kosangedile bintu bikulongele Leza ne Yesu.

Shi usaka kuyukila’ko bivule, tala shapita 4 wa dino dibuku: Lelo I Bika Bine Bifundija Bible?, dilupwilwe na Batumoni ba Yehova

[Kifwatulo pa paje 16]

Yesu wādi kipangwa kya ku mushipiditu kumeso kwa kubulwa mu Betelema