A Dios a diak el mera el ngar er ngii a bechil el mlo derrir a rengelekel. Ngii a Ulemeob a rokui el dingar. A rechad a ulebeob el sebechir el oukerebai a blekerdelel a Dios. Sei a uchul me a Adam el ngike el kot el chad el lulemeob er ngii, a okedongall el “ngelekel a Dios.” Me ngdi osisiu, a Jesus a dirrek el okedongall el “Ngelekel a Dios” e le ngulebeob el mo olab a blekerdelel a Demal.​—Monguiu er a Lukas 3:38; Johanes 1:14, 49.

A Jesus ngulebeob er oingerang?

A Dios a milebii a Jesus er a uchei er a lebebii a Adam. Ngmilebii a Jesus e sola e uluusbech er ngii el meruul a rokui el tekoi, el uldimukl er a rechanghel. Sei a uchul me a Biblia a omekedong er ngii el kmo ng “okiu uchei e ngarbab er a ikel rokui el mle duubech.”​—Monguiu er a Kolose 1:15, 16.

A Jesus er a uchei er a lemechell er a Bethlehem, e ngmle kiei er a eanged el uai a anghel. E a uriul, e a Dios a uliuelii a klengar er a Jesus el ngar er a eanged el mo er a omecherellel a Maria me bo el sebechel el mechell el ua chad.​—Monguiu er a Lukas 1:30-32; Johanes 6:38; 8:23.

Ngera uchul me a Dios a milecherei a Jesus me ngme mechell er tia chutem el ua chad? Ngera el ileakl el ngerachel a lekiltmeklii a Jesus? Ngsebechem el metik a nger er aika el ker el ngar er a Biblia, e aikang a mo menglou er a klemedengei me a omereng el saul er kau el kirel aike el bla leruul a Dios me a Jesus el kirem.