Eski ou annan “en leker pour konn” Zeova?
Eski ou annan “en leker pour konn” Zeova?
“Mon pou donn zot en leker pour konn mwan, ki mwan mon Zeova, e zot devret vin mon pep.”—ZER. 24:7.
KI OU POU REPONN?
Dan ki fason plizyer Zwif dan letan Zeremi ti annan ‘en leker ki pa ti sirkonsi’?
Akoz nou tou nou devret egzamin nou leker senbolik?
Dan ki fason nou kapab annan “en leker pour konn” Zeova?
1, 2. Akoz serten i kontan fig?
ESKI ou kontan manz fig, ki swa mir oubyen sek? En kantite dimoun i kontan, sanmenm sa, fig i ganny kiltive dan bokou pei. Fri pye fig ti annan gran valer pour bann Zwif dan letan lontan. (Nao. 3:12; Lik 13:6-9) Dan fig i annan filas, antioksidan ek mineral, sanmenm serten i dir ki fig i bon pour leker.
2 En fwa, Zeova ti asosye fig avek leker. Bondye pa ti pe dekrir valer nitrisyonnel ki nou gannyen ler nou manz fig. I ti pe koz dan en sans senbolik. Sa ki i ti dir atraver profet Zeremi i relye avek ou leker ek leker bann ki ou kontan. Anmezir nou egzamin sa ki i ti dir, mazin sa ki sa i vedir pour bann Kretyen.
3. Ki sa bann fig ki Zeremi sapit 24 i koz lo la i reprezante?
3 Premyerman, annou get sa ki Bondye ti dir konsernan fig dan letan Zeremi. An 617 A.N.L., pep Zida ti dan en move leta spirityel. Bondye ti donn en vizyon konsernan sa ki ti pou arive dan lavenir, i ti servi legzanp de kalite fig, bann ki “vreman bon” ek bann ki “vreman pa bon.” (Lir Zeremi 24:1-3. *) Bann fig ki pa bon ti pe reprezant Lerwa Tsidkya ek lezot parey li ki ti sibir labi avek Lerwa Neboukadnetsar ek son latroup. Me ki ti arive avek Ezekyel, Danyel ek son trwa konpanyon ki ti deza Babilonn ek serten Zwif ki ti pe al ganny anmennen laba? Zot ti parey sa bon fig. Bann ki ti reste parmi zot ti pou retournen pour rebatir Zerizalenm ek son tanp e sa ti vreman arive avek letan.—Zer. 24:8-10; 25:11, 12; 29:10.
4. Ki lankourazman nou gannyen avek sa ki Bondye ti dir konsernan bann bon fig?
4 Zeova ti dir sa lo bann ki ti reprezant sa bann bon fig: “Mon pou donn zot en leker pour konn mwan, ki mwan mon Zeova; e zot devret vin mon pep.” (Zer. 24:7) Se sanmenm verse tenm pour sa lartik. Pa i vreman ankourazan sa parol! Bondye i pare pour donn bann endividi “en leker pour konn” li. Dan sa ka, “leker” pe refer avek sa ki en dimoun i ete. Sirman, ou anvi annan sa kalite leker e anvi form parti pep Bondye. Pour arive fer li fodre ou etidye e aplik Parol Bondye, Labib, repantir e sanz ou lavi, dedye ou lavi avek Bondye e ganny batize o non di-Per, di-Fis e di-Sent-Espri. (Mat. 28:19, 20; Akt 3:19) Petet ou’n fini fer tou sa la, ouswa ou pe asosye regilyerman avek Temwen Zeova e pe esey fer li.
5. Ler Zeremi ti ekrir lo leker, lekel ki i ti pe koz avek?
5 Ki swa nou’n fer serten sa bann pa ouswa zot tou, nou bezwen kontinyelman vey nou latitid ek kondwit. Ou kapab konpran akoz atraver lezot keksoz ki Zeremi ti ekrir lo leker. Serten sapit dan liv Zeremi i adres bann nasyon dan zalantour, me i ti pe premyerman adres pep Zida pandan renny senk son bann lerwa. (Zer. 1:15, 16) Wi, Zeremi ti premyerman ekrir sa bann parol pour bann zonm, fanm ek zanfan ki ti deza dan sa nasyon ki ti’n dedye zot lekor avek Zeova. Zot zanset ti’n volonterman dedye zot lekor avek Zeova konman en nasyon. (Egz. 19:3-8) Dan letan Zeremi, bann dimoun ti konfirmen ki zot ti en pep ki ti’n dedye avek Bondye. Zot ti dir: “Nou’n vin kot ou, akoz ou, O Zeova, ou nou Bondye.” (Zer. 3:22) Me, ki kalite kondisyon leker ou krwar zot ti annan?
LOPERASYON LEKER SENBOLIK
6. Akoz nou devret vreman enterese avek sa ki Bondye ti dir lo leker?
6 Bann dokter dan nou letan i kapab servi teknolozi avanse pour vwar kondisyon leker en dimoun e ki mannyer i pe fonksyonnen. Me, Zeova i kapab fer plis ki sa, zis parey i ti fer dan letan Zeremi. Bondye i sirman kalifye akoz parey nou vwar dan sa parol: “Leker i pli tret ki okenn keksoz e i tre move. Lekel ki kapab konn li? Mwan, Zeova, mon pe egzamin leker, . . . pour donn sakenn dapre sa ki i’n fer, dapre konsekans son aksyon.” (Zer. 17:9, 10) “Egzamin leker” pa enplik okenn tes medikal lo en leker fizik, ki dan 70 ouswa 80 lannen in bat plis ki trwa bilyon fwa. Plito, Zeova ti pe koz lo leker senbolik. “Leker” i refer avek sa dimoun ki nou ete anndan, i anglob nou dezir, panse, dispozisyon, latitid ek lobzektif. Ou osi ou annan sa leker. Bondye i kapab egzamin li e ziska en degre ou osi ou kapab fer li.
7. Ki mannyer Zeremi ti dekrir leker laplipar Zwif dan son letan?
7 Pour prepar nou pour sa egzaminasyon, petet nou kapab demande, ‘Ki ti kondisyon leker senbolik laplipar Zwif dan letan Zeremi?’ Pour reponn, get sa fraz en pe drol ki Zeremi ti servi: “Tou Izraelit, zot leker pa’n sirkonsi.” I pa ti pe refer avek sirkonsizyon ki ti normalman ganny fer avek bann zonm Zwif akoz i ti dir: “‘Gete! Letan pou arive’ se sa ki Zeova in dir, ‘e mon pou fer tou bann ki’n sirkonsi me ki kantmenm sa pa ankor sirkonsi rann kont.’” Savedir, bann zonm Zwif sirkonsi pa ti’n ‘sirkonsi zot leker.’ (Zer. 9:25, 26) Me, ki sa i vedir?
8, 9. Ki laplipar Zwif ti bezwen fer avek zot leker?
8 Nou ganny en lide sinifikasyon sa lekspresyon “leker pa’n sirkonsi” dan sa ki Bondye ti demann bann Zwif pour fer: “Sirkonsi zot leker, zot bann zonm Zida ek bann zabitan Zerizalenm; pour ki mon pa tir mon lakoler . . . akoz tou sa move keksoz ki zot pe fer.” Me kote sa bann move keksoz ki zot ti pe fer ti sorti? Dan zot menm, dan zot leker. (Lir Mark 7:20-23.) Wi, atraver Zeremi, Bondye ti pe dir kote egzakteman move kondwit bann Zwif ti sorti. Zot ti annan en leker rebel. Zot motivasyon ek fason panse pa ti fer li plezir. (Lir Zeremi 5:23, 24; 7:24-26. *) Bondye ti dir zot: “Sirkonsi zot pour Zeova e sirkonsi zot leker.”—Zer. 4:4; 18:11, 12.
9 Alor, bann Zwif dan letan Zeremi ti bezwen oper zot leker senbolik, setadir, “sirkonsi zot leker” zis parey bann Zwif dan letan Moiz ti bezwen fer. (Det. 10:16; 30:6) “Sirkonsi zot leker” ti vedir ki zot ti merit retir tou sa ki ti pe anpes zot leker reazir, setadir zot ti devret koriz zot fason panse, santiman ouswa motivasyon ki pa ti an armoni avek sa ki pour Bondye.—Akt 7:51.
“EN LEKER POUR KONN” LI OZORDI
10. Parey legzanp David i montre, ki nou devret anvi fer?
10 Pa nou vreman rekonesan ki Zeova i ed nou konpran nou leker senbolik! Petet serten i mazinen, ‘Me akoz sa i enteres nou, Temwen Zeova, ozordi?’ I pa akoz bokou dan kongregasyon pe fer sa ki mal ouswa zot pe vin bann “fig pa bon,” parey serten Zwif ti ete sa lepok. Plito, bann serviter Bondye ozordi i en pep pir ki’n dedye zot lekor avek Bondye. Kantmenm sa, reflesir lo siplikasyon ki David ti fer avek Zeova: “O Bondye, fouy dan mwan e konn mon leker. Egzamin mwan, e dekouver bann panse ki pe fatig mwan. Gete si ou vwar okenn keksoz ki anmenn douler dan mwan.”—Ps. 17:3; 139:23, 24.
11, 12. (a) Akoz nou tou nou devret egzamin nou leker? (b) Ki Bondye pa pou fer?
11 Zeova i oule ki sakenn antre nou i annan e reste dan en kondisyon ki akseptab devan li. Konsernan en dimoun drwat, Zeremi ti dir: “Ou, O Zeova bann larme, ou pe egzamin sa enn drwat; ou pe vwar ronnyon ek leker.” (Zer. 20:12) Si Bondye Tou Pwisan pe egzamin leker sa enn ki drwat, eski pa nou osi nou devret egzamin nou leker senserman? (Lir Psonm 11:5. *) Anmezir nou fer li, nou kapab remark en latitid, lobzektif ouswa santiman profon ki merit ganny aziste. Nou osi kapab remark en keksoz ki petet pe fer li difisil pour nou aksepte serten koreksyon, dan en sans i kapab konmsi nou bezwen ‘sirkonsi nou leker.’ Sanmenm sa, en loperasyon leker senbolik. Si ou dakor ki i pou bon pour egzamin ou leker senbolik, ki ou pou rode? Ki mannyer ou kapab fer bann azisteman neseser?—Zer. 4:4.
12 Nou kapab asire lo en keksoz: Nou pa ekspekte Zeova fors nou pour sanze. I ti dir ki i pou donn sa bann “bon fig” “en leker pour konn” li. I pa ti dir ki i ti pou fors zot pour sanz zot leker. Zot ti bezwen annan sa dezir pour ganny en leker pli sansib ki ti pou montre ki zot konn Bondye. Eski pa nou osi nou bezwen sa?
13, 14. Dan ki sans leker en Kretyen i kapab en danze pour li?
13 Zezi ti dir: “Dan leker i sorti move panse ki fer dimoun touye, fer adilter, e fer bann move laksyon, vole, kalonmni, e malparl dimoun.” (Mat. 15:19) I kler ki si leker en frer i pous li pour fer adilter ouswa fornikasyon e i pa repantir, i kapab perdi laprouvasyon Bondye dan en fason permanan. Menm en dimoun ki pa’n fer sa bann pese grav i kapab les en kek move dezir devlope dan son leker. (Lir Matye 5:27, 28.) Se lanmenm la kot en analiz personnel lo nou leker pou ed nou. Si ou fouy dan ou leker, eski ou pou trouv en santiman ki pa apropriye anver en dimoun lot sèks, bann dezir sekre ki ou konnen Bondye i kondannen e ki bezwen ganny retire?
14 Ouswa en frer ki pa’n “touy” personn me ki’n devlop en move santiman dan son leker ki a lafen di zour i ay son frer. (Lev. 19:17) Eski i pou fer bokou zefor pour retir sa bann santiman ki kapab fer li annan en leker ensansib?—Mat. 5:21, 22.
15, 16. (a) Donn legzanp pour montre ki mannyer en Kretyen i kapab annan ‘en leker ki pa’n sirkonsi.’ (b) Akoz ou krwar en ‘leker ki pa’n sirkonsi’ pa pou fer plezir Zeova?
15 Erezman, laplipar Kretyen napa sa kalite ‘problenm leker.’ Me, Zezi ti koz lo bann “move panse” oubyen rezonnman. Sa bann pwennvi ouswa latitid i kapab sali plizyer laspe nou lavi. Par egzanp, en dimoun i kapab anvi fidel anver son fanmir. Byensir, bann Kretyen i annan lafeksyon pour zot fanmir, pa parey bann ki mank sa lafeksyon dan sa “bann dernyen zour.” (2 Tim. 3:1, 3) Me, i posib pour al an tro pour demontre sa lafeksyon. Bokou i krwar ki “disan i pli epe ki delo.” Alor, zot kapab esey fer tou pour defann ouswa pran kote avek sa manm fanmir. Zot kapab pran li personnel si enn zot fanmir in ganny ofanse. Reflesir lo sa kalite santiman vreman for ki ti pous bann frer Dina pour fer en keksoz vreman mal. (Zen. 34:13, 25-30) Mazin lo sa ki ti dan leker Absalonm ki ti pous li pour touy son frer Amnonn. (2 Sam. 13:1-30) Eski pa i ti akoz zot ti annan bann move rezonnman?
16 I vre, bann vre Kretyen ozordi pa pou touy kanmarad. Me, eski zot annan bann santiman negatif anver en frer ouswa ser ki’n ofans enn zot fanmir ouswa zot krwar sa dimoun in ofans zot fanmir? Petet zot pa aksepte lospitalite sa Kretyen ki zot krwar in mal azir avek zot fanmir ouswa zot pa zanmen demontre lospitalite anver li. (Ebr. 13:1, 2) Sa bann santiman negatif parey ouswa sa mank lospitalite pa devret ganny tolere akoz i demontre en mank lanmour. Wi, sa Enn ki egzamin leker pou dir ki ‘leker sa dimoun pa’n ganny sirkonsi.’ (Zer. 9:25, 26) Rapel sa bann avek ki Zeova ti dir: “Sirkonsi zot leker.”—Zer. 4:4.
ANNAN E GARD “EN LEKER POUR KONN” BONDYE
17. Ki mannyer lakrent pour Zeova i kapab ed nou annan en leker sansib?
17 Meton ou egzamin ou leker senbolik e vwar ki i pa fasilman aksepte konsey Zeova parey i devret e ki ziska en serten degre i “pa’n sirkonsi”? Petet ou annan lafreyer pour zonm, en gran dezir pour vin popiler ouswa ris, ouswa ou antete oubyen endepandan. Ou pa premye pour annan sa santiman. (Zer. 7:24; 11:8) Zeremi ti ekrir ki bann Zwif enfidel dan son letan ti annan “en leker antete e rebel.” I ti azoute: “Zot pa’n dir dan zot leker: ‘Aprezan, annou annan lakrent pour Zeova nou Bondye, sa Enn ki donn gro lapli ek lapli lotonn.’” (Zer. 5:23, 24) Pa ou pou dakor ki devlop lakrent pour Zeova ek lapresyasyon pour li i en fason pour montre ki ou pe ‘sirkonsi ou leker’? Sa kalite lakrent i kapab ed sakenn ant nou pour annan en leker ki pli pare pour fer sa ki Zeova i ekspekte avek nou.
18. Ki promes Zeova ti fer avek sa bann ki dan nouvo lalyans?
18 Nou kapab korpere avek Zeova anmezir i donn nou “en leker pour konn” li. Anfet, sanmenm ki i ti promet i pou fer pour bann Kretyen swazir ki dan nouvo lalyans: “Mon pou met mon lalwa dan zot, e mon pou ekrir li dan zot leker. Mon pou vin zot Bondye, e zot zot pou vin mon pep.” Me ki savedir vreman konn li? I ti azoute: “Napa personn ki pou ansenny son konpanyon, ni son frer, an dizan, ‘Fodre konn Zeova!’ Akoz zot tou zot pou konn mwan, depi sa ki pli pti parmi zot ziska sa ki pli gran parmi zot . . . Parski mon pou pardonn zot fot, e mon pa pou mazin zot pese ankor.”—Zer. 31:31-34. *
19. Ki lespwar merveye bann vre Kretyen i annan?
19 Ki swa ou pe esper avek enpasyans pour benefisye pour touzour avek sa nouvo lalyans dan lesyel ouswa lo later, ou devret anvi konn Zeova e form parti son pep. Me pour ou ganny sa byenfe, i neseser ki ou pese i ganny pardonnen lo baz sakrifis Zezi. Zis pour konnen ki ou kapab ganny pardonnen, sa i devret motiv ou pour pardonn lezot, menm sa bann ki’n bles ou en kantite. Si ou pare pour tir okenn move santiman dan ou leker, sa pou ed ou annan en leker an bonn sante. Dan sa fason, ou pou montre ki ou pa zis oule servi Zeova, me osi ki ou pe konn li pli byen. Ou pou parey sa bann ki Zeova ti dir atraver Zeremi ki zot “pou rod mwan e trouv mwan, akoz zot pou rod mwan avek tou zot leker. E mon pou les zot trouv mwan.”—Zer. 29:13, 14.
[Not anba lo paz]
^ par. 3 Zeremi 24:1-3: “1 E Zeova ti montre mwan, e gete! De pannyen fig ki ti’n ganny plase devan tanp Zeova, apre ki Neboukadnetsar lerwa Babilonn ti anmenn an egzil, Yekonya, garson Yeoyakim, lerwa Zida, ek bann prens Zida ek bann artizan ek bann konstrikter miray, sorti Zerizalenm pour ki i kapab anmenn zot Babilonn. 2 Dan enn sa pannyen, i ti annan bann fig ki ti vreman bon, parey bann premye fig; e tandis ki dan lot pannyen, bann fig ti vreman pa bon, e zot pa ti kapab ganny manze akoz zot pa ti bon. 3 E Zeova ti kontinyen e dir mwan: ‘Ki ou pe vwar Zeremi?’ Alor, mon ti dir: ‘Bann fig, bann bon fig ki vreman bon, e bann fig pa bon ki vreman pa bon, ki pa kapab ganny manze akoz zot pa bon.’”
^ par. 8 Zeremi 5:23, 24: “23 Me sa pep in arive annan en leker antete e rebel; zot in vire e kontinyen fer sa ki zot ti pe fer. 24 Me, zot pa’n dir dan zot leker: ‘Aprezan, annou annan lakrent pour Zeova nou Bondye, sa Enn ki donn gro lapli ek lapli lotonn ek lapli prentan dan son sezon, sa Enn ki vey bann semenn rekolt pour nou.’” 7:24-26: “24 Me zot pa ti ekout mwan, zot pa ti ni menm ouver zot zorey, me zot ti mars dapre zot desizyon ek lantetman zot move leker, ki ti fer zot al an aryer e pa annavan, 25 depi zour ki zot zanset ti sorti Lezip ziska ozordi; e mon ti kontinyen anvoy tou mon bann serviter bann profet kot zot, mon ti lev granmaten sak zour e anvoy zot. 26 Me zot pa ti ekout mwan, zot pa ti ouver zot zorey, me zot ti kontinyen fer zot likou red. Zot ti azir pli pir ki zot zanset.”
^ par. 11 Psonm 11:5: “Zeova li menm i egzamin sa dimoun drwat konman sa dimoun mesan. I vreman ay nenport ki ki kontan vyolans.”
^ par. 18 Sapit 14 dan liv God’s Word for Us Through Jeremiah i koz lo sa nouvo lalyans.
[Kestyon]
[Portre lo paz 8]
[Portre lo paz 10]
[Portre lo paz 11]
Nou pou ganny beni si nou egzamin nou leker e retir bann move dezir
[Portre lo paz 12]
