1, 2. Kifer certain dimoune envie konn plus lor bann figue?

 ESKI ou content mange figue, soit bann figue ki’nn fek cassé soit seki sec? Beaucoup dimoune content mange figue, alors dan beaucoup pays, bann dimoune plante pié figue. Dan le passé, pou bann Juif, bann figue ti ena beaucoup valeur. (Nah. 3:12; Luc 13:6-9) Dan bann figue ena fibre, ek bann lezot kitsoz ki certain dimoune dire bon pou leker.

² Enn fois, Jéhovah ti compare leker bann dimoune ar bann figue. Jéhovah pa ti pé dire ki quantité bann figue bon pou la santé. Li ti pé koz dan enn fason symbolik. Seki Li ti dire a travers prophete Jérémie concerne ou leker ek leker bann dimoune ki ou content. A mesure ki nou examine seki Li ti dire, anou reflechi seki nou kapav aprann en tant ki Chretien.

3. Ki bann figue ki mentionné dan Jérémie chapitre 24 representé?

³ Premierement anou examine seki Jéhovah ti dire dan lepok Jérémie lor bann figue. En 617 avant nou lepok, nation Juda ti pé faire bann mauvais kitsoz devant lizié Jéhovah. Bondié ti donne Jérémie enn vision concernant seki ti pou arrivé dan l’avenir ek Li ti prend l’exemple deux qualité figue​—bann figue “ki ti bien bon” ek bann figue “ki pa ti bon ditou.” (Lire Jérémie 24:1-3.) Bann figue ki pa ti bon ditou ti represente le Roi Tsidqiya ek bann lezot dimoune ki le Roi Neboukadnetsar ek so l’armée ti attaké. Mais ki Ézékiel, Daniel, ek so trois camarade ki ti deja dan Babylone, ek certain Juif ki ti pou al couma bann prisonnier dan sa pays-la, ti representé? Zot ti couma bann bon figue. Plitar, certain parmi zot ti pou retourne dan zot pays ek ti pou reconstruire Jérusalem ek so temple. Avek le temps, c’est seki ti arrivé.​—Jér. 24:8-10; 25:11, 12; 29:10.

4. Ki l’encouragement nou kapav gagné ar seki Bondié ti dire lor bann bon figue?

⁴ Concernant bann dimoune ki ti couma bann bon figue, Jéhovah ti dire: “Mo pou donne zot enn leker pou konn moi, pou koné ki mo Jéhovah; ek zot pou vinn mo peuple.” (Jér. 24:7) C’est verset-clé nou lartik ek c’est enn verset bien encourageant. Bondié disposé pou donne bann dimoune  “enn leker pou konn” Li. “Leker” ici ena enn rapport avek tendance enn dimoune. Surement ou ti pou content ena enn leker pou konn Jéhovah ek forme partie dan so peuple. Pou ou kapav faire sa, ou bizin suive sa bann l’etape-la: etudié ek mette en pratik so Parole, repenti ek retourné, setadir arrete ena enn mauvais conduite, voué ou la vie ar Bondié ek prend bapteme au nom du Père, du Fils ek l’esprit saint. (Mat. 28:19, 20; Actes 3:19) Kitfois ou’nn fini faire sa bann l’etape-la, ou-soit ou pé frequente bann Témoins de Jéhovah regulierement ek ou pé commence faire sa bann l’etape-la.

5. Lor kisannla Jérémie surtout ti ecrire?

⁵ Mem si nou finn faire tou sa bann l’etape-la, nou bizin contigne veille lor nou l’attitude ek nou conduite. Nou pou trouvé pou ki raison kan nou examine seki Jérémie ti ecrire lor leker. Certain chapitre dan so livre ti concerne bann nation ki ti tout autour. Mais la plupart ti concerne nation Juda pendant regne cinq parmi so bann le roi. (Jér. 1:15, 16) Oui Jérémie ti pé surtout ecrire concernant bann zom, bann femme ek bann zenfant ki ti dan enn nation ki ti voué ar Jéhovah. Zot bann ancetre ti accepté pou vinn peuple Jéhovah. (Ex. 19:3-8) Ek dan lepok Jérémie, le peuple ti confirmé ki zot ti voué ar Bondié. Zot ti dire: “Nou finn vinn vers toi, parski toi O Jéhovah, to nou Bondié.” (Jér. 3:22) Mais ki qualité leker zot ti ena?

6. Kifer nou bizin interessé ar seki Bondié dire lor leker?

⁶ Dan nou lepok, bann docteur kapav servi bann technik bien moderne pou trouvé dan ki l’etat nou leker été ek si li pé fonctionne bien. Mais Jéhovah kapav faire plus ki sa, pareil couma Li ti faire dan lepok Jérémie. Bondié bien qualifié pou faire sa pareil couma sa bann parole-la montré nou: “Leker pli traitre ki n’importe ki lezot kitsoz ek li bien mauvais. Kisannla kapav konn li? Moi Jéhovah, mo fouille dan leker, . . .  pou mo rann sakenn dapré seki ki li’nn faire, dapré consequence so conduite.” (Jér. 17:9, 10) Leker enn dimoune ki ena 70 ou-soit 80 an batte preské trois milliard fois. Mais Jéhovah pa bizin faire bann test medical ar nou pou Li kapav “fouille dan [nou] leker.” Kifer? Parski Jéhovah ti pé koz lor nou leker symbolik. “Leker” ici represente seki enn dimoune été au fond li-mem. Li implik so bann desir, so bann pensée, so bann tendance, so bann l’attitude, ek so bann l’objectif. Ou aussi ou ena enn leker coumsa. Bondié examine ou leker ek ziska enn certain point, ou kapav faire sa ou aussi.

7. Dapré Jérémie, couma leker la plupart Juif dan so lepok ti été?

⁷ Pou nou examine nou leker symbolik, nou kapav demann-nou-mem: ‘Ki Jéhovah ti pensé lor leker symbolik la plupart Juif dan lepok Jérémie?’ Pou reponn sa question-la, guette seki Jérémie ti dire: “Zot tou dan lakaz Israël zot leker pa circonci.” Li pa ti pé faire reference ar circoncision ki bann zom Juif ti faire en general, parski li ti dire: “‘Guetté! Bann jour pé vini,’ c’est seki Jéhovah dire, ‘ek mo pou faire tou bann ki circonci, mais ki finn reste couma bann ki pa circonci, rann bann compte.’” Sa vedir ki mem bann Juif ki ti circonci ti ena enn ‘leker ki pa ti circonci.’ (Jér. 9:25, 26) Mais ki l’expression “leker pa circonci” vedir?

8, 9. Concernant zot leker, ki la plupart Juif ti bizin faire?

⁸ Nou comprend sa l’expression-la par seki Bondié ti encourage bann Juif pou faire. Li ti dire zot: “Circonci zot leker, zot bann zom dan Juda ek bann habitant Jérusalem; pangar mo colere sorti . . . a cause zot bann mauvais action.” Mais ki ti pousse zot pou agir dan enn mauvais fason? Seki ti ena dan zot leker. (Lire Marc 7:20-23.) Oui, a travers prophete Jérémie, Bondié ti faire koné ki leker  bann Israélite ti rebelle ek ki zot pa ti envie changé. Zot mobile ek zot pensée pa ti faire Jéhovah plaisir. (Lire Jérémie 5:23, 24; 7:24-26.) Bondié ti dire zot: “Circonci-zot-mem pou Jéhovah ek circonci zot leker.”​—Jér. 4:4; 18:11, 12.

⁹ Sa vedir ki bann Juif dan lepok Jérémie ti bizin opere zot leker symbolik​—“circonci zot leker”—​pareil couma bann Juif dan lepok Moïse ti faire. (Deut. 10:16; 30:6) Pou “circonci zot leker,” zot ti bizin tire tou seki ti faire zot leker desobeir Bondié​—zot pensée, zot sentiment, ou-soit zot mobile ki pa ti en accord avek bann commandement Jéhovah.​—Actes 7:51.

10. Pareil couma David, ki nou bizin faire?

¹⁰ Nou bizin reconnaissant ki Bondié aide nou pou comprend ki sa vedir enn leker symbolik. Kitfois certain kapav demandé: ‘Mais couma sa concerne bann Témoins de Jéhovah zordi?’ Sa pa vedir ki beaucoup Chretien dan congregation pé faire seki mauvais ou-soit zot pé vinn “bann figue ki pa ti bon ditou,” pareil couma beaucoup Juif dan le passé. Au contraire, bann serviteur Bondié zordi, zot fidele ek zot ena enn conduite pur. Mais rappel seki David ti dire Jéhovah: “Ah Bondié, examine moi bien, ek konn mo leker. Examine moi, ek konn bann pensée ki pé fatigue moi, ek guetté si dan moi pena okenn desir pou suive enn mauvais chemin.”​—Ps. 17:3; 139:23, 24.

11, 12. (a) Kifer sakenn parmi nou bizin examine so prop leker? (b) Ki Bondié pa pou faire?

¹¹ Jéhovah envie ki sakenn parmi nou konn Li ek contigne ena so faveur. Concernant enn dimoune droite, Jérémie ti dire: “Toi, O Jéhovah bann l’armée, to examine enn dimoune droite; to trouve bann lé-rein ek leker.” (Jér. 20:12) Si Bondié Tout-Puissant pé examine leker mem enn dimoune droite, eski nou pa bizin nou aussi examine nou leker dan enn fason honnete? (Lire Psaume 11:5.) A mesure ki nou faire sa, kitfois nou pou trouve enn l’attitude, enn l’objectif, ou-soit enn mauvais sentiment au fond nou leker ki nou bizin prend compte. Li possible ki nou trouve enn kitsoz ki faire nou leker insensible, bann mauvais kitsoz ki ena dan nou leker, ki nou reconette nou bizin tiré. C’est coumadir nou pé ‘circonci nou leker,’ nou pé faire enn l’operation symbolik nou leker. Si ou trouvé ki ou bizin examine ou leker, ki kitsoz ou bizin rodé? Ek couma ou kapav faire bann changement necessaire?​—Jér. 4:4.

¹² Nou kapav sur ki Jéhovah pa pou force nou pou changé. Concernant “bann bon figue,” Li ti dire ki Li ti pou “donne zot enn leker pou konn” Li. Jéhovah pa ti pou force zot pou change zot leker. Zot ti bizin envie konn Bondié. Eski nou aussi nou pa bizin faire pareil?

13, 14. Dan ki sens seki ena dan leker enn Chretien kapav faire li-mem di-tort?

¹³ Jésus ti dire: “C’est dan leker ki bann mauvais raisonnement, crime, adultere, fornication, vol, fausse temoignage, blaspheme, sorti.” (Mat. 15:19) Pena doute ki si leker enn frere vinn insensible ek sa pousse li pou commette l’adultere ou-soit fornication  ek li pa repenti, li pou perdi faveur Bondié pou touletan. Pourtant, mem si enn dimoune pa commette enn peché grave coumsa, li kapav arrivé ki li pé laisse enn mauvais desir grandi dan so leker. (Lire Matthieu 5:27, 28.) C’est dan sa moment-la ki li bizin examine so leker personnellement. Si ou examine ou leker en profondeur, eski ou pou trouve enn mauvais desir pou enn dimoune enn lot sexe? Eski en secret ou ena bann pensée immoral ki Bondié condamné ek ki ou bizin tiré?

¹⁴ Li possible ki enn frere pa pou faire enn “crime,” mais li laisse la rancune developpé dan so leker ziska ki sa faire li ena la haine pou enn lot Chretien. (Lév. 19:17) Eski li pou faire zeffort pou tire sa bann sentiment ki kapav faire so leker vinn insensible-la?​—Mat. 5:21, 22.

15, 16. (a) Donne enn l’exemple ki montré couma enn Chretien kapav ena “enn leker ki pa circonci.” (b) Kifer ou pensé ki sa pa faire plaisir Jéhovah si enn Chretien ena “enn leker ki pa circonci”?

¹⁵ Heureusement, la plupart Chretien pena sa qualité ‘probleme leker-la.’ Pourtant, Jésus koz aussi lor “bann mauvais raisonnement.” C’est bann fason pensé ou-soit bann l’attitude ki kapav affecté beaucoup domaine nou la vie. Par exemple, kitfois enn dimoune ena enn fason pensé exageré en rapport avek fidelité ki li bizin ena envers bann membre so famille. Bien sur, bann Chretien bizin ena ‘l’affection naturel’ pou zot famille. Fodé pa ki zot ressemblé beaucoup dimoune dan “bann dernier jour” ki pena sa l’affection-la. (2 Tim. 3:1, 3) Mais, li kapav arrivé ki nou montré sa l’affection-la dan enn fason exageré. Beaucoup dimoune dire concernant enn membre zot famille, “mo di-sang-sa.” Alors, kitfois zot defann ou-soit zot prend part zot famille dan n’importe ki situation, ek si enn membre zot famille inn offensé, coumadir zot-mem ki’nn offensé. Reflechi seki bann frere Dina ti faire parski zot ti ena bann sentiment bien fort coumsa. (Gen. 34:13, 25-30) Reflechi aussi seki ti ena dan leker Absalom ki ti pousse li pou touye Amnôn, so demi-frere. (2 Sam. 13:1-30) Eski c’est pa “bann mauvais raisonnement” ki ti derriere action sa bann dimoune-la?

¹⁶ Li vrai ki bann vrai Chretien pa pou al faire enn crime. Selman, eski li possible ki zot ena bann sentiment bien negatif envers enn frere ou-soit enn soeur ki finn blesse enn membre zot famille? Ou-soit eski zot ena sa bann sentiment-la parski zot, zot pensé ki enn kikenn inn offense enn membre zot famille? Li possible ki zot refuse l’invitation sa dimoune-la ou-soit kitfois jamais zot pa invite li kot zot. (Héb. 13:1, 2) Si enn Chretien ena sa qualité sentiment negatif-la ek li pa montré l’hospitalité, sa montré ki li pena l’amour, c’est enn kitsoz bien grave. Oui, Jéhovah, ki examine leker, kitfois pou trouvé ki sa Chretien-la ena “enn leker ki pa circonci.” (Jér. 9: 25, 26) Mais Jéhovah dire: “Circonci zot leker.”​—Jér. 4:4.

17. Couma la crainte pou Jéhovah aide nou pou ena enn leker pli sensible?

¹⁷ Ki ou pou faire si, apré ki ou finn examine ou leker symbolik, ou trouvé ki li pa sensible ar bann conseil Jéhovah ek ki li “pa circonci” couma li ti bizin été? Kitfois ou remarké ki ou peur bann dimoune, ou envie gagne enn grand position, bann kitsoz luxe, ou ena tendance pou montré-ou teti ou-soit ou ena enn l’esprit l’independance. Ou pa tousel, ena lezot Chretien aussi ki pé lutté kont sa bann tendance-la. (Jér. 7:24; 11:8) Jérémie ti ecrire ki bann Juif infidele dan so lepok ti ena “enn leker teti ek rebelle.” Li ti ajouté: “Zot pa’nn dire dan zot leker: ‘Alors, anou ena la crainte pou Jéhovah nou Bondié ki’nn donne nou bann gros la pluie ek bann la pluie l’automne.’” (Jér. 5:23, 24) Eski sa pa montré ki, pou nou ‘circonci nou leker’ nou bizin developpe enn pli grand la crainte ek reconnaissance pou Jéhovah? Si nou ena sa la crainte-la, sa pou aide nou ena enn leker pli sensible pou vinn couma Jéhovah envie nou été.

18. Ki promesse Jéhovah ti faire ar bann ki dan nouveau l’alliance?

¹⁸ Nou pou kapav travail avek Jéhovah a mesure ki Li donne nou “enn leker pou konn” Li. En realité, c’est seki Li ti promette pou faire pou bann Chretien oint ki dan nouveau l’alliance: “Mo pou mette mo la loi dan zot, ek mo pou ecrire li dan zot leker. Oui, mo pou vinn zot Bondié, ek zot, zot pou vinn mo peuple.” Ki sa vedir vrai-mem konn Li? Li ti ajouté: “Zot pou nepli enseigne sakenn so camarade ek sakenn so frere ek dire: ‘Konn Jéhovah!’ parski zot tou zot pou konn moi, depuis pli tipti parmi zot ziska pli grand parmi zot . . . Parski mo pou pardonne zot erreur ek mo pou nepli rappel zot peché.”​—Jér. 31:31-34. a

19. Ki l’esperance extraordinaire bann vrai Chretien ena?

¹⁹ Ki ou ena l’esperance pou gagne bann bienfait eternel ar sa nouveau l’alliance-la dan le ciel ou-soit lor la terre, ou bizin ena enn grand desir pou contigne ena bann bon relation avek Jéhovah ek pou forme partie dan so peuple. Pou nou kapav profite sa bann bienfait-la, li important ki nou gagne pardon nou bann peché lor base sacrifice Jésus Christ. Parski Bondié pardonne nou bann peché, sa bizin pousse nou pou pardonne lezot, mem si nou ena bann sentiment bien negatif envers certain. Si ou disposé pou tire la haine ek colere ki kapav ena dan ou leker, sa pou faire ou leker di-bien. Lerla, ou pa pou zis montré ki ou envie servi Jéhovah mais ou pou montré aussi ki ou pé konn Li pli bien. Ou pou ressemblé bann dimoune ar ki Jéhovah ti dire par Jérémie: “Zot pou rod moi ek zot pou trouve moi, parski zot pou rod moi avek tou zot leker. Oui, mo pou laisse zot trouve moi.”​—Jér. 29:13, 14.