1, 2. ¿Imanirtaq wakinkuna hïgosta precisaqpaq churayan?

¿HIGOS fruta gustashunkiku? Tsëllaraq pallashqa kar o tsaki karpis hïgosqa atskaqtam gustan, tsëmi tsë plantataqa atska nacionkunachö miratsiyan. Unë judïokunatapis alläpam gustaq (Nah. 3:12; Luc. 13:6-9). Kë frütaqa alli saludyoq kanapaqmi yanapakun, tsëmi wakinkunaqa shonqupaq jampi kanqanta niyan.

² Juk kutim, Jehoväqa hïgosta shonqutawanmi igualatsirqan. Diosqa manam hïgoskuna salud asuntochö imanö yanapakuyänampaqtsu parlëkarqan, sinöqa shonquntsikpaq o imanö nuna kanqantsikpaqmi. Tsëmi Jehová ninqanqa yanapamantsik shonquntsik y familiantsikkunapa shonqunkuna imanö këkanqanta rikänapaq. Ninqankunata kanan yachakurnin pensashun, imanö nuna kanantsikta munanqanta.

3. Jeremïaspa 24 kaq capïtulon parlanqan hïgosqa, ¿imatataq rikätsikun?

³ Jeremïasta Dios ninqanta puntata rikärishun. Jesus manaraq shamushqan 617 wata witsanmi karqan, y Juda nacionqa manam Diospa rikënimpaq allitsu këkarqan. Diosmi Jeremïasta willarqan shamoq tiempochö pasakunampaq kaqta, mana alli hïgosta y alli hïgosta rikätsirnin (Jer. 24:1-2; lei Jeremías 24:3 *). Mana alli kaq hïgosqa rikätsikurqan, rey Nabucodonosorpa y tröpankunapa makinchö sufreqpaq kaq rey Sedequïasta y pënölla wakin kaq nunakunatam. ¿Pero ima nishwantaq Babiloniachöna këkaq Ezequielpita, Danielpita y kiman yanaqinkunapitaqa? Y ¿imaraq pasanman karqan ichikllachöna tsëman ëwaqpaq kaq wakin judïokunataqa? Pëkunaqa alli kaq hïgosmi kayarqan. Tiempowanqa wakin kaqkunam Jerusalenta y templonta yapë sharkatsiyänampaq kutiyänan karqan. Y tsënömi pasakurqan (Jer. 24:8-10; 25:11, 12; 29:10).

4. ¿Imanötaq Diospa Palabran animamantsik alli kaq hïgoskunapaq parlarnin?

 ⁴ Alli kaq hïgoskunapaqmi Jehová kënö nirqan: “Noqa Jehová kanqäta reqiyämänampaqmi juk shonquta qoshaq; y markä këmanmi chäyanqa” (Jer. 24:7). Këmi kë yachatsikïchö yachakïkanqantsik yanapakoq texto. Diosqa reqinantsikta munarmi, ¡juk shonquta qomënintsikta munan! Këchö shonqupaq parlarqa, munënintsikkunapaqmi parlëkan. Awmi, munënintsikqa kanman Diosta reqi y sirweqnin këmi. Tsë munënintsikta logranapaqqa, Bibliatam alleq estudianantsik y ninqankunatam wiyakunantsik, arrepentikunantsik y punta mana alli rurënintsikkunata jaqinantsik, llapan kawënintsiktam Diosta entreganantsik y Teytapa, Tsuripa y santo espïritupa jutinchö bautizakunantsik (Mat. 28:19, 20; Hech. 3:19). Wakinkunaqa këkunata rurayashqanam, wakinkunanam rurëkäyan y reunionkunaman ëwëkäyan.

5. ¿Pipa shonqunkunapaqtaq masqa Jeremías qellqarqan?

⁵ Diosman witinapaq tukïkunatana rurashqa karpis, llapantsikmi imanö kënintsikta y portakïnintsikta alleq rikëta necesitantsik. ¿Imanir? Tsëtaqa musyashun shonqupaq parlarnin Jeremías qellqanqanchömi. Tsë libropa wakin kaq capïtulonkuna vecïnon nacionkunapaq parlaptimpis, masqa parlan pitsqa reykuna mandakuyanqan witsanchö Juda nacionpaqmi (Jer. 1:15, 16). Profëtaqa qellqarqan Jehoväman entregakushqa ollqukunapaq, warmikunapaq y wamrakunapaqmi. Unë awilunkunaqa kikinkunapa munëninkunapitam Jehoväpa markan kayänampaq awnikuyashqa kayarqan (Éx. 19:3-8). Jina Jeremías kawanqan witsanchö israelïtakunapis, Diosman entregakushqa kayanqanta rikätsikurmi kënö niyarqan: “¡Këchömi këkäyä! Qammanmi shayämurqö, porque qammi, oh Jehová, Diosnïkuna kanki” (Jer. 3:22). Pero tsënö nikäyaptimpis, ¿imaraq shonqunkunachöqa karqan?

6. ¿Imanirtaq shonqupaq Dios parlanqanta alläpa precisaqpaq churashwan?

⁶ Kanan witsanqa, mëdicokunaqa tukï mäquinakunatam utilizäyan shonqu imanö këkanqanta rikäyänampaq. Pero Jehoväqa pëkunapita masmi rurëta puëdin, Jeremïaspa tiemponchö ruranqannömi. Tsëmi kënö nin: “Shonquqa imëkapitapis más traicionërom, y imatapis rasllam munan. ¿Pitaq reqinman? Noqa Jehovämi, shonqu imanö këkanqanta rikëkä, [...] cada ünota kawëninkuna imanö kanqanmannö y rurëninkuna imanö kanqanmannö qonäpaq” (Jer. 17:9, 10). Shonqu imanö këkanqanta rikëpaq parlarqa, manam mëdicokuna rikäyanqan shonqu imanö këkanqanta rikëpaqtsu Jehová parlëkarqan; sinöqa, imanö nuna kënintsikpaqmi: pensënintsikpaq, imatapis más munanqantsikpaq, imatapis imanö rikanqantsikpaq y imata logrëta munanqantsikpaq. Tsë “shonquqa” llapantsikpam kapamantsik. Diosqa rikëta puëdinmi; y noqantsikpis mana llapanta karpis, rikëta puëdintsik.

7. ¿Ima nirqantaq Jeremías tsë witsanchö judïokunapa shonqunkunapaq?

⁷ Shonquntsik imanö këkanqanta rikänapaqqa, kënömi tapukunantsik: “¿Imanötaq këkarqan Jeremías kawanqan witsanchö mëtsikaq judïokunapa shonqunkuna?”. Tsëta musyanapaqqa rikärishun Jeremías ninqanta, kënömi nirqan: “Llapan Israelchö täraqkunam shonqunkunapa mana alli kaq qaranta jitariyashqatsu”. Tsëta nirqa, manam ollqu kaq judïokuna penqakïninkunachö señalakuyanqampaqtsu parlëkarqan, porque këtam nirqan: “¡Rikë! Junaqkunam shamun —Jehovämi nin—, y rasumpëpam cuentata mañashaq penqakïninkunachö señalakushqakunata, pero tsënö këkarpis, penqakïninkunachö mana señalakushqanöllaraq këkaqkunata”. Tsëmi rikätsikun penqakïninkunachö señalakushqa këkarpis, judïokunaqa “shonqunkunapa mana alli kaq qaranta” mana jitariyashqa kayanqanta o mana señalakushqa kayanqanta (Jer. 9:25, 26). ¿Imapaqtaq parlëkarqan?

8, 9. Shonqunkuna mana alli kaptin, ¿ima rurëtataq necesitäyarqan mëtsikaq judïokuna?

⁸ “Shonqunkunapa mana alli kaq qaranta jitariyashqatsu” ninan ima kanqantaqa musyarintsik, markan imata ruranampaq Diosnintsik  animanqanchömi, këtam nirqan: “Shonqïkikunapa mana alli kaq qaranta jitariyë, Judächö täraq ollqukuna y Jerusalenchö täraqkuna; piñakïnï mana shamunampaq [...] mana alli rurënikikunarëkur”. ¿Mëchötaq yureq tsë mana alli rurëninkunaqa? Shonqunkunachömi (lei Marcos 7:20-23). Jeremïaswanmi Jehoväqa judïokunata willatsirqan mana alli rurëninkunaqa shonqunkunachö yurinqanta. Mana wiyakoqmi tikrayarqan y imatapis rurayanqankuna y pensayankunaqa Jehovätam piñatseq (lei Jeremías 5:23 * y 7:24 *). Tsëmi Dios kënö nirqan: “Penqakïnikikunachö señalakuyë Jehoväpaq, y shonqïkikunapa mana alli kaq qaranta jitariyë” (Jer. 4:4; 18:11, 12).

⁹ Moises kawanqan witsan kastankuna rurayanqannöllam, judïokunaqa, shonqunkunata operakoq cuenta mana alli rurëninkunata cambiayänan karqan (Deut. 10:16; 30:6). “Shonqïkikunapa mana alli kaq qaranta jitariyë” nirqa mandëkarqan, shonqunkunata mana alliman chätseq rurëkunapita librakäyänampaqmi: Dios mandakunqampa contranchö këkaq mana alli pensëkunapita y mana alli munëkunapita (Hech. 7:51).

10. David ruranqanta qatirnin, ¿imatataq rurashwan?

¹⁰ Shonquntsikta o imanö nuna kanqantsikta imapis pasanampaq kaqta entiendinapaq Diosnintsik yanapamanqantsikpitaqa alläpam agradecikushwan. Pero, ¿imanirtaq Jehoväpa testïgonkuna këta precisaqpaq churayan? Manam unë witsan judïokunanötsu mana allita rurëkäyan o “mana alli hïgoskuna” tikrëkäyan. Tsëpa rantinqa, kanan witsan Diospa sirweqninkunaqa alläpa limpio y Diosta mana jaqita sirweq markam kayan. Tsënö kaptimpis, alleq pensarishun alli ruraq nuna David Jehoväman mañakunqanta, kënömi nirqan: “Diosllä, paqwëpa rikëkallämë, y shonqöta reqï. Alli rikëkallämë, y yarpachakatsimaq pensënïta reqï, y rikëkullë mä noqachö kankush mana alli rurëkuna” (Sal. 17:3; 139:23, 24).

11, 12. a) ¿Imanirtaq shonquntsik imanö këkanqanta cada unö rikäkunantsik? b) ¿Imatataq Dios ruranqatsu?

¹¹ Jehoväqa munam pëpa nöpanchö llapantsik alli këta tarinatam. Jeremïasmi nirqan: “Tröpakunapa mandaqnin oh Jehová, qammi alli ruraq nuna imanö kanqanta rikëkanki; rikëkanki riñonkunata y shonqutam” (Jer. 20:12). Llapanta Puëdeq Jehoväpis alli ruraq nunakunapa shonqunta rikëkaptinqa, ¿manatsuraq noqantsikpis shonquntsik imanö kanqanta rikäkushwan? (Lei Salmo 11:5. *) Quizaschi, imanö kënintsik, imata rurëta munanqantsik o sentimientontsik mana alli këkaqta taririshwan. O quizás taririshwan shonquntsikta imapis chukrïkätsinqanta, tsëtaqa roqurirmi jitarishwan. Tsënöpam imanö nuna kanqantsikta o shonquntsikta operëkashwan. Tsënö exämenta rurakurqa, ¿imatataq tarita tïrashwan? Y precisaptinqa, ¿imanöraq cambiokunata rurashwan? (Jer. 4:4.)

¹² Pero ama qonqashuntsu, ¡Jehoväqa manam  cambianapaq obligamäshuntsu! ‘Alli kaq hïgoskunapaqmi’ kënö nirqan: “Reqiyämänampaqmi juk shonquta qoshaq”. Manam shonqunkuna cambiayänampaqtsu obliguëkarqan. Tsëpa rantinqa, kikinkunam alli shonquyoq këta ashiyänan karqan. ¿Manaku noqantsikpis alli shonquyoq këtaqa munashwan?

13, 14. ¿Imanötaq juk cristiänota shonqun mana alliman chäratsinman?

¹³ Jesusmi nirqan: “Mana allicunata shonquncunacho yarpar[mi] quecunata rurayan: nunacuna wanutsinacuyan, majayoq quecarmi jucwan jucwan yachacuyan, mana majäcushpam jucwan jucwan puricuyan, suwacuyan, ulicuyan y ashanacuyan” (Mat. 15:19). Rasunmi, juk cristiano rumi shonqu karqa, quizás jukpa majanwan o piwampis punukïkunman, tsëta ruranqampita mana arrepentikurqa Diospa favornintam oqrarinman. Pero tsë jutsakunata mana ruraq cristiänopis, quizás mana allikuna rurëta shonqunchö yarparäkïkanman (lei Mateo 5:27, 28). Tsë hörakunachömi shonquntsik imanö këkanqanta rikänantsik alläpa precisanman. Y tsëta rurarqa, quizás cuentata qokurishwan Diosnintsik chikinqankunata yarparëkanqantsikta; itsa majayoq këkar jukta jukta munapar o jukpa majanta munapar këkashwan, y ¿imataraq rurashwan tsënö pasamashqaqa?

¹⁴ Wakinqa quizás nuna mayinta wanutsïmanqa chäyashqatsu, pero cristiano mayinkunata pasëpa chikiyan (Lev. 19:17). ¿Sinchikunqatsuraq tsë chikikïninta shonqumpita jorqanampaq? (Mat. 5:21, 22.)

15, 16. a) ¿Imanötaq juk cristiano ‘shonqumpa mana alli kaq qaranta’ jitaritsishqatsu kanman? b) ¿Imanirtaq creinki mana alli kaq qarayoq shonquta Jehová chikinqanta?

¹⁵ Pero kushikïpaqqa, casi llapan cristiänokuna “tsënö mana alli shonquyoq” mana kayanqanmi. Jina Jesusqa parlarqanmi ‘mana allicunata [...] yarpëpaqpis’, juk parlakïchöqa, pensënintsik o munënintsik kawënintsikta dominanqampaq. Këllaman pensarishun, quizás wakinkunaqa familia kuyëtaqa jukläyapa rikäyan. Rasunmi, cristiänokunaqa familiankunata kuyayanman, manam kë ushanan witsanchö “mana ancupäcoq” nunakunanötsu kayanman (2 Tim. 3:1, 3). Tsënö kaptimpis, wakinkunaqa familiankunata defendiyänanrëkurqa, imëkatam rurariyan. Familianta pipis ofenderiptinqa, pëkunapis alläpam piñakuyan. Dïnata alläpa kuyarnin turinkuna rurayanqanman pensari (Gén. 34:13, 25-30). O pensari, Absalón wawqin Amonta alläpa chikirnin wanuratsinqanman (2 Sam. 13:1-30). ¿Manaku tsëkunataqa rurayarqan “mana allicunata shonquncunacho yarpar”?

¹⁶ Rasun kaqchöqa cristiänokunaqa manam  pitapis wanutsiyanmantsu, pero tsënö kaptimpis, familianta mana allipa tratashqa kanqanta pensar, rasumpa kaptin o mana rasumpa kaptimpis, itsa cristiano mayinta chikinman. Tsënö karqa, quizás imata invitaptin o qaraptimpis chaskinmantsu (Heb. 13:1, 2). Tsënö tratëqa pasëpa kuyakïninnaq këtam rikätsikun. Y Jehoväqa itsa rikärinman tsë cristiänoqa ‘shonqumpa mana alli kaq qaranta’ mana jitarishqa kanqanta (Jer. 9:25, 26). Yarpë, judïokunataqa Jehová kënömi nirqan: “Shonqïkikunapa mana alli kaq qaranta jitariyë” (Jer. 4:4).

17. ¿Imanötaq Jehoväta mantsakunqantsik yanapamantsik wiyakoq shonquta katsinapaq?

¹⁷ Quizás shonqïkita o imanö nuna kanqëkita rikarqa, musyarinki Jehová munanqannö mana këkanqanta. Tsënö karqa, quizás nunakunata mantsan, reqishqa këta o kapoqyoq këta munan, o hasta quizás mana cäsokoq y munanqannölla imëkatapis rurëta munan. Shonqïki tsënö kaptinqa, manam qamllatatsu pasashunki (Jer. 7:24; 11:8). Jeremïasmi qellqarqan, judïokunaqa ‘mana wiyakoq y munëninkunallata rurakïta munaq shonquyoq’ kayanqanta, jina këtapis nirqanmi: “Pero shonqunkunachö manam kënö niyashqatsu: ‘Kanan mantsakushun Jehová Diosnintsikta, alläpa Tamyatsimoqta y otoño witsan Tamyatsimoqta’” (Jer. 5:23, 24). ¿Manaku tsëqa rikätsikun shonquntsikpa mana alli kaq qaranta jitarinapaqqa, Jehoväta mantsanantsik y agradecikunantsik precisanqanta? Jehoväta tsënö mantsakunqantsikmi yanapamäshun shonquntsik wiyakoq kanampaq y Pë munanqannö kanapaq.

18. ¿Imatataq Jehová awnirqan mushoq conträtochö këkaqkunata?

¹⁸ Pëta reqi munaq shonquta Jehová qomashqaqa, noqantsikpis sinchikunantsikmi. Tsëtam Jehová awnirqan, mushoq conträtochö këkaq ciëlopaq akrashqakunata, kënömi nirqan: “Leynïtam kikinkunaman churashaq, shonqunkunamanmi qellqashaq. Y noqam Diosninkuna kashaq, y pëkunanam markä kayanqa”. Y pëta reqiyänampaq parlarnam kënö nirqan: “Y mananam cada uno yanaqinta, y cada uno wawqinta o paninta kënö nir yachatsiyanqanatsu: ‘¡Jehoväta reqiyë!’, porque llapankunam reqiyämanqa ichik kaqkunapita patsë hasta mayor kaqkunayaq [...]. Pantayanqankunatam perdonashaq y mananam imëpis jutsankunata yarpäshaqnatsu” (Jer. 31:31-34). *

19. ¿Pitataq reqiyanqa rasumpëpa cristiänokuna?

¹⁹ Tsë mushoq conträtorëkur ciëlochö o Patsachö kawanëki kaptimpis, Jehovätam reqinëki y markanchö këtam alläpa munanëki. Tsë bendicionkunata chaskinëkipaqqa, Jehová Diosran perdonashunëki Jesucristu wanunqampa chaninwan. Y Jehová perdonashunqëkiman yarparmi, qampis wakinkunata perdonanëki. Mana alli sentimientokunapita librakanqëkim shonqïkita allita ruranqa. Y tsënö karqa, manam Jehoväta sirwita munanqëkillatatsu rikätsikunki, sinöqa más reqikanqëkitawanmi. Jehová parlanqan judío nunakunanömi kanki, pëkunatam Jehová kënö nirqan: “Y qamkunam rasumpëpa ashiyämanki y tariyämankim, shonqupita patsëmi ashiyämanki. Y noqaqa tariyämänëkitam jaqikushaq” (Jer. 29:13, 14).