1. ¿Kasapülajatü saapünüin wanee karaloukta nümüin chi anaʼlüinjachikai wanee katünasü süpülapünaa suwatüin?

SÜPÜLAPÜNAA suwatüin wanee katünasü, niʼrajaʼawalin shia chi suchupeetsekai kasale mojuin sünain. Süpüla nnojoluin kasain nülatirüin, aapünüsü nümüin wanee karaloukta sünüliamaaka tü kasa nünaʼlüinjatkat. Jülüjüsü maʼin naaʼin tü kasa nünaʼlüinjatkat sünain tü katünasükat. Niʼrayaale wayumüin sümüin tia, eesü süpüla nnojoluin niʼrüin wanee kasa mojuka sünain tü katünasükat; tü eekat süpüla sujutuuin atuma. Jaʼitaichi kakaliaichin wanee wayuu sünain suchupeetsee katünasü, aapünüsü nümüin tü karaloukta sümaajatkat tü kasa nünaʼlüinjatkat sünain wanee katünasü.

2. ¿Kasa nünaʼlawalinjatka wanee anoujüshi?

² Eesü süpüla püshatüin nukuwaʼipa chi suchupeetsekai katünasü. Pünaʼlüinjatü ichere punoula suulia sümalajaain sülatapa pümüin kasa mojusü. Müsü pümaʼanainjatkai saaʼin wanee karaloukta sünüliamaaka tü kasa pünaʼlüinjatkat sünain punoula. Wanaʼlawalinjatü ichere tü wanoulakat otta aire maʼin wapüla Maleiwa jaʼitainna jekenain jee kamaʼainnain woutiisain waya. Nnojorüle waainjüin tia, ojutuujeena waya. Müsü wamüin tü Wiwüliakat: «Nnojo juʼwaataain suluʼu jukuaippa sünain nnojoleenain jaaʼinrüin kasa mojusü jaajüin» (1 Cor. 10:12).

3. ¿Kasa naainjüinjatka na anoujüshii chajanakana Galacia?

³ Nanaʼlüinjatü na anoujüshii chajanaka Galacia ichere tü nanoulakat otta kojutüle namüin taashin naya suulia tü alawaakat. Sükajee naapajiraain nikii Jesuu, eeshi süpüla niʼraajünüin Maleiwa natuma na wayuu anoujakana sünain tü naainjakat Jesuu. Otta eeshii süpüla nüchoin naya Maleiwa (Gal. 4:8, 9). Süpüla ayatüin aleewain naya nümaa Maleiwa, nayouktüinjatü achiki tü nekirajakalü anain  na judíokana. Naashin na judíokana ayatüinjatü oonoonüin amaa tü Pütchi Aapünakat nümüin Moisés. Otta na gentiile eiwaʼaliikana anoujüin, nnojotsü neʼraajüin tü Pütchi Aapünakat nümüin Moisés. Choʼujaasü nanoukteʼerüin na judíokana namaa na gentiilekana tü nanoulakat. Nayaawatüinjatü aaʼu nnojoluin shiain neʼe talatüin atuma naaʼin Maleiwa chi wayuu oonookai sümaa tü Pütchi Aapünakat nümüin Moisés.

4, 5. ¿Kasa nüchiaaka oulia Pablo na chajanakana Galacia? ¿Jamüsü wanainpünaaka shia?

⁴ Tü nümakat chi aluwataaushikai Pablo namüin na anoujüshii chajanakana Galacia, ashajünüsü suluʼu tü Wiwüliakat süpüla nachiaanüin napüshuaʼa na anoujüshiikana suulia nooʼulaain tü anoujaakat süpüleerua tü naainjapuʼukat. Nüshajüin Pablo tia pütchikat nutuma Jeʼwaa süpüla ayatüinjanainya sünain anoujaa napüshuaʼa na anoujüshiikana. Nnojotsü namüinjatüin neʼe na chajanakana Galacia.

⁵ Anasü sotule waaʼin jamakuwaʼipaliin taashin waya suulia tü alawaakat süpüla waküjüliinjanain pütchi nüchiki Jeʼwaa. Süpüla tia, soto paaʼin tü piamasükat pütchi: ¿Sotusü paaʼin tü paainjakat süpüla woutiisain pia? ¿Sotusü paaʼin tü paainjakat süpüla piʼraajüin Maleiwa jee süpüla naʼaleewain pia?

6. ¿Kasa wekirajaainjatka anain?

⁶ Mekietsat tü kasa waainjakat süpüla woutiisain waya otta ashajünüsü shia suluʼu süpana 21 süpüla wanaʼlüinjatüin anale tü wanoulakat. Sotowaire waaʼin tia mekietsatkat kasa, sükaaliinjeena waya suulia wooʼulaain suulia anoujaa. Nnojotsü shapaain naaʼin wanee suchupeetse katünasü niʼrajaale palajana tü katünasükat; meeria wakuwaʼipa sünain anoujaa weʼrajaale jamüin sukuwaʼipa tü wanoulakat.

7. ¿Kasa pansaainjatka amaa wakuwaʼipa? ¿Jamüsü waainjüinjatka tia?

⁷ Sutuma saapünüin wanee karaloukta nümüin chi suchupeetsekai katünasü, nütüjaa aaʼu kasain nünaʼlüinjatüin süpüla suwatüin tü katünasükat. Müshiʼiya wayakana, eesü süpüla wanaʼlüin jamüin sukuwaʼipa tü wanoulakat otta kasain waainjüin soʼujee tü kaʼi woutiisakalü oʼu waya. Müshi Pablo nümüin Timoteo: «Pütüjaaitpa aaʼu sukuaippa [...] tü pütchi shiimüin tekirajakat anain tayakai. Je pütüjaaichipa aaʼu taya sünain taikkaleʼerüin taaʼin sünain anoujaa je sünain alin tapüla tawalayuu sükajee saʼaniraaitpain takuaippa nümaa Jesucristo» (2 Tim. 1:13). Süpüshuaʼa tü kasa shikirajakalü anain tü Nünüikikat Maleiwa, shia sukuwaʼipa tü pütchi shiimüin naashajaakalü achiki Pablo (1 Tim. 6:3). Sutuma tü sukuwaʼipakat tü shiimainkat, watüjaa aaʼu kasain nuchuntüin wamüin Maleiwa. Makalaka wekirajaainjanain sünain tü waainjakat süpüla woutiisainjanain waya otta watüjaajeerü saaʼu pansaale wakuwaʼipa sümaa sukuwaʼipa tü shiimainkat.

8, 9. (1) ¿Jamüsü kooʼomüinjatka watuma tü watüjaakalü aaʼu sümaa tü wanoulakat? (2) Püküja kasain müin aka sukuwaʼipa nunoula wanee wayuu otta jamüsü ayatüinjatka kooʼomüin shia.

⁸ Tü palajatkat kasa waainjaka shia wekirajaain nüchiki Jeʼwaa süpüla kanoulainjanain waya. Aʼyataainjana waya süchiirua kooʼomüin watuma tü watüjaakalü aaʼu sümaa tü wanoulakat (2 Tes. 1:3). Weeʼiyatüin tia sükajee wanoukteʼerüin tü wakuwaʼipakat. Süchikijee woutiisain waya, ayatüinjatia kooʼomüin watuma tü wanoulakat.

⁹ Tü sukuwaʼipakat wanoula müsü aka saaʼin sukuwaʼipa wanee wunuʼu. Miyoʼushaata wanee wunuʼulia müleka oʼutüle tü suurulakat. Jamüsüjaʼa tü wunuʼu  kanüliakat cedro del Líbano eesü maʼaka 37 meeturo sajaʼapüin, laütasü sümaa oʼutüin tü suurulakat otta eesü maʼaka 12 meetüro tü süʼlaütainkat (Cant. de Cant. 5:15). Miyoʼumaatsü wanee wunuʼu, laütasü sümaa sajaʼapülaain sutuma oʼutüin tü suurulakat. Müsia neʼe sukuwaʼipa nunoula wanee anoujüshi. Kooʼomüinmaatsü tü nunoulakat nuʼttaiwaʼaya sünain ekirajawaa sünain tü Wiwüliakat süpüla woutiisain nia. Otta eeshi keraale nia süpüla waneeirua aʼyatawaa maʼaka saaʼin pürekutsoolin nia. Neʼrüin na wawalayuukana kooʼomüin tü nunoulakat. Süchikijee tia, eesü nnojorüle jaʼyain maʼin waaʼu kooʼomüin wanoula. Akatsaʼa ayatüinjatüin kooʼomüin watuma tü watüjaakalü aaʼu sümaa tü wanoulakat «süpüla müin aka waya naaʼin Cristo sünain laülaain waaʼin sünain anoujaa» (Éf. 4:13). Nnojoluitpa müin wakuwaʼipa maʼaka saaʼin wanee wunuʼu joʼuuiwaʼaya shia; müitpa maʼaka saaʼin tü wunuʼuliakat miyoʼuyuupa shia.

10. ¿Jamüsü choʼujaaka ayatüin kooʼomüin nanoula na wawalayuu kakaliainnakana anoujüin?

¹⁰ Ayatüinjatia kooʼomüin tü watüjaakalü aaʼu otta tü wanoulakat süpüla nnojoliinjanain wakayalaain suulia tü Nünüikikat Maleiwa (Prov. 12:3). Wainma na wawalayuu aainjakana tia. Eeshi wanee wawala kakaliaichikai laülaashin suluʼu tü outkajaaleekat maʼaka 30 juya. Müshi nia: «Ayatsia kojutüin tamüin tü Wiwüliakat. Tantawai anainrü suluʼu tü Wiwüliakat waneeirua pütchi sünainpünaaka tü takuwaʼipakat. Ayatsia kojutüin tamüin tü aküjaakat pütchi».

11. ¿Kasa waaʼinrajatka süpüla weʼraajüin maʼin Jeʼwaa?

¹¹ Süpüla kooʼomüin wanoula choʼujaasü warütkaain nünainmüin Jeʼwaa chi Waʼaleewainkai sümaa Washin nia. Tü keeʼireekat naaʼin Maleiwa shia jülüjüin waaʼin anain waya nümaa, alin waya nüpüla otta naaʼinmajüin waya. Shia keeʼireeka naaʼin müin wakuwaʼipa nümaa maʼaka saaʼin nukuwaʼipa wanee jintüi nümaa nüshi otta wanee wayuu nümaa wanee naʼaleewain. Nnojotsü akumajaain süpaʼa mmaka tü aleewaakat nümaa Jeʼwaa. Kakalia süpüla weʼraajüin nia otta alin nia wapüla. Makalaka waashajeʼerüinjatüin weinshi tü Wiwüliakat. Waashajeʼera tü rewiisütakat Aapiria Wayuu otta ¡Despertad!, otta waneeirua karaloukta ojuʼitaka.

12. ¿Kasa waaʼinrajatka süpüla ayatüin aleewain waya nümaa Jeʼwaa?

¹² Kooʼomüinsü nanoula na naʼaleewainkana  Maleiwa sutuma noʼuraajüin otta sutuma aleewain naya namaa na wayuu anakana akuwaʼipa (paashajeʼera Malaquías 3:16). «Naapüin [Jeʼwaa] nünüiki wanaa sümaa nüchuntüin nümüin.» (1 Ped. 3:12.) Nnojoishi macheʼeyaain Jeʼwaa woulia makalaka wachuntüinjanain waneepia nümüin (Roma 12:12). Iseerü wachiki kooʼomüin tü wanoulakat niyüülajüle waya Maleiwa. Wainma maʼin tü kasa mojusü alatakat maaʼulu makalaka iseerüin wachiki eejirawaa sümaa tia nnojoliire wachuntüin kaaliinwaa nümüin Maleiwa. Eesü süpüla katchin waaʼin nutuma Jeʼwaa otta keeʼireesü naaʼin tia, akatsaʼa nnojoleerüin naapüin wamüin tia nnojoliire woʼuraajüin nümüin. ¿Talatsüche naaʼin Maleiwa sümaa tü pünüikikat puʼuraajapa? ¿Choʼujaataapa punoukteʼerüin sukuwaʼipa? (Jer. 16:19.)

13. ¿Jamüshii kottiraainjanaka waya namaa na wawalayuukana süpüla kooʼomüin wanoula?

¹³ Talatsü naaʼin Jeʼwaa namaa napüshuaʼa na achuntakana kaaliinwaa nümüin. Müshiijeseʼe ayatüinjanain waya outkajaain namaa na eʼraajakana Maleiwa; jaʼitainna kakaliainnain waya sünain eʼraajaa Maleiwa (Nah. 1:7). Mojusü maʼin saaʼin wayuu maaʼulu sutuma tü kasa alatakat, makalaka anain woutkajaale namaa na wawalayuukana. ¿Kaseerü weʼraka sünainjee tia? Wantiraajeena amaa wawalayuu akaaliinjeenaka waya süpüla aipüraliin waya otta süpüla wakaaliinjüin na wayuukana (Heb. 10:24, 25). Süpüla aijiraainjanain waya maʼaka nüküjüin Pablo namüin na hebreokana, choʼujaasü pawalaawain waya sümaa kottiraain waya. Pünaʼlaa sümüin choʼujaale puʼunüin sünain tü outkajawaakat otta piyalerüin pajapü sünain.

14. ¿Jamüshii ayatüinjanaka waya ayaawajaain otta ounyantaain suulia waainjala?

¹⁴ Süpüla woutiisain waya ayaawajaashii otta ouyantaashii waya suulia waainjala. Akatsaʼa ayatüinjatüin waainjüin tia süka jooin waya süpüla tü kaainjalaakat. Müshii saʼatapakai waya maʼaka saaʼin wanee wüi aʼatapaka sületse (Roma 3:9, 10; 6:12-14). Nnojo macheʼeyaain waya suulia tü kasa jookalü apüla waya. Nnojoishi aʼürülajaain Jeʼwaa wooʼomüin, eeshi nia wamaa sünain akaaliinjaa waya süpüla wanoukteʼerüin wakuwaʼipa (Filip. 2:12; 2 Ped. 3:9). Eejüinjatü waaʼin sünain tü waainjakat otta tü kasa wamaʼanakat; nnojotsü woʼunüinjatüin achiirua tü keeʼireekat waaʼin. Müsü wanee wawala: «Joʼuusü taya sünain tü anoujaakat, akatsaʼa naatain nukuwaʼipa Jeʼwaa tamüin. Mmotsü taya neema; nnojoishi süpüla talatüin nia tamaa taaʼinruʼu». Amojujaapünaasü sunoula tia wawalakat sutuma tü kasa mojusü alatakat sümüin. Müsü sünüiki: «Aishiyaajeʼe tapüla Jeʼwaa shiajaʼa nnojolin teʼraajüin nia. Toʼuraajaka maʼin kojuyatua makalaka sunouktaain tü suluʼukat taaʼin. Müsü nümaakai taaʼin Jeʼwaa süpüla eejiraain taya sümaa tü kasa mojusü alatakat tamüin. Eeshi nia tamaa waneepia, aisü taya nüpüla sümaa niiʼiyatüin tamüin tü taainjüinjatkat».

15. ¿Kasa nütüjaaka aaʼu Jesuu nümaa Maleiwa?

¹⁵ «Jüküja [...] sümüin tü wayuukalüirua süchikü» tü pütchi anasükat. Shia nünüikika tia wanee aapiee nümüin Pedro otta namüin na aluwataaushiikana süchikijee nojuʼittinnüin suluʼujee tü kaatsetkat (Aluw. 5:19-21). Wanaʼlüinjatü wojuʼitüle semaanawai sünain aküjaa pütchi. Nütüjaa aaʼu Jesuu nümaa Maleiwa jamüin tü wanoulakat otta wojuʼitüle sünain aküjaa pütchi (Alat. Map. 2:19). Müsü nünüiki chi wawala laülaashi waashajaayüikai achiki: «Shiasü wakuwaʼipaka tü aküjaakat pütchi».

16. ¿Jamüsü jülüjüinjatka waaʼin waapüin waaʼin nümüin Jeʼwaa?

¹⁶ Jülüja paaʼin paapüin paaʼin nümüin  Maleiwa. Tü waʼanasiainkat shia aleewain waya nümaa Jeʼwaa. Niʼraajüin Maleiwa na wayuu nümaakana (paashajeʼera Isaías 44:5). Puʼraaja süpüla pütüjaain saaʼu jamüin pukuwaʼipa nümaa Maleiwa. Soto paaʼin kasoʼulajachin woutiisain pia süpüla jülüjüin paaʼin waneepia anain maʼin tü kasa püneekakat.

17. ¿Jamüsü wachecherüinjatka waaʼin süpüla pejein waya nünain Jeʼwaa?

¹⁷ Choʼujaasü nachecherüin naaʼin na anoujüshii chajanakana Galacia naashin Pablo (Gal. 6:9). Choʼujaasü maʼin nachecherüin naaʼin na anoujüshiikana maaʼutpünaa. Mayaapejeʼe sülateerüin pümüin kasa mojusü, nükaaliinjeechi pia Jeʼwaa. Puchunta chi naaʼinkai Maleiwa; piʼreetka talatüin paaʼin otta jimatüin paaʼin suʼunnaa tü müliaa piʼrakat (Mat. 7:7-11). Naaʼinmajüin Jeʼwaa tü wüchiikalüirua, ¿piakaʼa maʼin niyüülajüinjachin sünain piain wanee wayuu aikai apüla nia otta aʼyataakai nümüin? (Mat. 10:29-31.) Nnojo piyüülajaain suulia tü anoujaakat; jaʼitaichi maʼin müliain pia. ¡Anataʼaleesüjaʼa maʼin wakuwaʼipa sutuma naʼaleewain waya Jeʼwaa!

18. ¿Kasa paaʼinrajatka sutuma piʼraajüichipain Jeʼwaa?

¹⁸ ¿Kasa paaʼinrajatka eiwaʼaire piʼraajüin Jeʼwaa sümaa woutiisain pia? Nnojo puuʼulaain suulia eʼraajaa Jeʼwaa otta kooʼomüin putuma punoula. ¿Jama kamaʼaichire pia woutiisain? Nnojo pukulajaain aaʼin suulia eʼraajaa Jeʼwaa. Nnojotsü shaittaain tü aleewaakat nümaa Jeʼwaa. Pünaʼla weinshi jamüin pukuwaʼipa nümaa chi Washikai otta chi Wamaleiwasekai Jeʼwaa (paashajeʼera 2 Corinto 13:5, 6).