1. Apay a nasken a suroten ti piloto ti maysa a listaan sakbay a patayabenna ti eroplano?

SAKBAY a patayaben dagiti piloto ti eroplano, surotenda ti maysa a listaan a buklen ti nasurok a 30 a banag a masapul a mainspeksion tapno masigurado a nasayaat ti kondision ti eroplano. No saanda a suroten dayta a listaan, dakdakkel ti posibilidad ti aksidente. Ammoyo kadi no ania a piloto ti nangnangruna a mapalagipan a mangrepaso iti dayta a listaan? Isu ti eksperiensiado a piloto! Mabalin ngamin nga agtalek unayen iti kabaelanna ket saannan a kitaen dagiti detalye a masapul a mainspeksion.

2. Ania ti nasken nga usigen dagiti Kristiano?

² Kas iti piloto a sipapanunot iti kinatalged, mabalinmo met ti agusar iti naespirituan a listaan tapno masiguradom a di kumapuy ti pammatim no maipasangoka iti pakasuotan. Kabbaroka man a nabautisaran wenno adun a tawen nga agserserbika iti Dios, nasken nga usigem a kanayon ti kauneg ti pammatim ken debosionmo ken ni Jehova a Dios. No saanmo a kanayon nga aramiden dayta, amangan no dimo mapupuotan a narukopen ti relasionmo ken Jehova. Impakdaar kadatayo ti Biblia: “Ti mangipagarup nga isu sitatakder agannad koma a saan a maikulbo.”—1 Cor. 10:12.

3. Ania ti masapul nga aramiden dagiti Kristiano a taga-Galacia?

³ Kasapulan idi dagiti Kristiano a taga-Galacia nga usigen ti kauneg ti pammatida ken tagipatgen ti naespirituan a wayawayada. Gapu iti subbot ni Jesus, dagidiay mamati kenkuana naikkanda iti gundaway a mangam-ammo iti Dios iti nagpaiduma a pamay-an—ti panagbalin nga annak ti Dios! (Gal. 4:9) Tapno makapagtalinaed dagiti taga-Galacia iti kasta a naparaburan a relasion, masapul a laksidenda ti sursuro dagidiay mangitantandudo iti Judaismo, a mangipappapilit a maannurot ti Mosaiko a Linteg. Saanen nga ipapaannurot ti Dios dayta a Linteg, ken saan a pulos a naipasidong iti dayta dagiti di nakugit a Gentil kadagiti kongregasion. Agpada ngarud a masapul a rumang-ay iti  naespirituan dagiti Judio ken Gentil. Masapul a bigbigenda a ti pannakaibilangda a nalinteg ket saan nga agpannuray iti panangsurotda iti Mosaiko a Linteg.

4, 5. Ania ti imbalakad ni Pablo kadagiti taga-Galacia, ken apay a napateg dayta kadatayo?

⁴ Naisurat ti balakad ni apostol Pablo kadagiti taga-Galacia tapno palagipanna dagiti pudno a Kristiano a dida iwaksi ti kinapudno ken saanda nga agsubli iti bambanag a tinallikudandan. Pinaltiingan ni Jehova ti apostol a paregtaenna nga agmatalek saan laeng a dagiti taga-Galacia no di pay ket ti amin nga agdaydayaw Kenkuana.

⁵ Napateg a laglagipentayo no kasano a nawayawayaantayo iti naespirituan a pannakaadipen ket nagbalintayo a Saksi ni Jehova. Usigem dagitoy dua a saludsod: Malagipmo kadi dagiti addang nga inaramidmo tapno makualipikarka nga agpabautisar? Malagipmo kadi no kasano a naam-ammom ti Dios ken no ania ti nariknam idi naam-ammonaka?

6. Ania a listaan ti nasken a repasuentayo?

⁶ Adda siam nga addang a sinurottayo. Dagitoy nga addang, nga arig listaan, ket adda iti kahon a  “Dagiti Addang a Nangiturong iti Bautismo ken Agtultuloy nga Irarang-ay.” No kanayon a laglagipentayo dagitoy, bumileg ti determinasiontayo a saanen nga agsubli iti bambanag iti lubong. No kasano a kanayon a repasuen ti maysa a piloto ti listaan sakbay a patayabenna ti eroplano, nasken met a kanayon a repasuentayo ti naespirituan a listaantayo.

7. Ania a padron ti masapul a surotentayo, ken apay?

⁷ Ipalagip ti listaan ti piloto nga adda rutina a siaannad a surotenna sakbay a patayabenna ti eroplano. Mabalin met a kanayon nga usigentayo ti bagbagitayo ken ti rutina a sursurotentayo sipud nabautisarantayo. Insurat ni Pablo ken Timoteo: “Itultuloymo a salimetmetan ti pagtuladan [wenno, padron] iti makapasalun-at a sasao a nangngegmo kaniak agraman ti pammati ken ayat a mainaig ken Kristo Jesus.” (2 Tim. 1:13) Dayta a “makapasalun-at a sasao” ket masarakan iti Sao ti Dios. (1 Tim. 6:3) No kasano a ti sketch ti maysa a pintor maipakitana no anianto ti langa ti maysa a ladawan, ti ‘padron ti kinapudno’ matulongannatayo a mangtarus ken mangsurot kadagiti kalikaguman ni Jehova kadatayo. Usigentayo ngarud ita dagiti addang a nangiturong iti panagbautisartayo ket kitaentayo no sursurotentay met laeng ti padron ti kinapudno.

8, 9. (a) Apay a masapul nga agtultuloytayo a dumakkel iti pannakaammo ken pammati? (b) Iladawam no apay a napateg ti agtultuloy nga irarang-ay kas Kristiano.

⁸ Ti umuna iti listaantayo isu ti pananggun-od iti pannakaammo. Gapu iti dayta, naaddaantayo iti pammati. Ngem nasken a rumang-ay ti pannakaammotayo ken dumakkel ti pammatitayo. (2 Tes. 1:3) Ramanen dayta nga idadakkel ti agtultuloy nga irarang-ay. Gapuna, kalpasan ti bautismotayo, masapul nga agtultuloy a rumang-aytayo iti naespirituan tapno saan a sumardeng ti idadakkeltayo.

⁹ Maikomparatayo ti naespirituan nga irarang-ay iti idadakkel ti maysa a kayo. Mabalin a nakadakdakkel ti pagbalinan ti maysa a kayo, nangruna no nauneg wenno nagsaknap dagiti ramutna. Kas pagarigan, ti sumagmamano a natatayag a sedro ti Libano ket umabot iti katayag ti 12-grado a patakder ken addaan iti natitibker ken nauuneg a ramut. Mabalin a dumanon iti 12 metro (40 pie) ti sirkumperensia ti puonna. (Kanta ni Sol. 5:15) Nakakadkadlaw ti damo nga idadakkel ti kasta a kayo, ngem inton agangay  saanen a madmadlaw ti agtultuloy nga idadakkelna. Iti tunggal tawen, umakaba ti puonna sa umuneg ken agsaknap dagiti ramutna, isu nga agbalin a natibtibker a kayo. Mayarig iti dayta ti naespirituan nga irarang-ay ti maysa a Kristiano. Idi inrugitayo ti makipagadal iti Biblia, mabalin nga alistotay a rimmang-ay iti naespirituan agingga a nagpabautisartayo. Naragsakan dagiti kakabsat a makakita iti irarang-aytayo. Nalabit nakualipikartayo pay ketdi nga agpayunir wenno umawat iti dadduma pay a pribilehio. Iti simmaganad a tawtawen, nalabit saan unayen a madmadlaw ti naespirituan nga irarang-aytayo. Nupay kasta, kasapulantayo latta ti rumang-ay iti pammati ken pannakaammo tapno agbalintayo a ‘nataengan a tao, iti rukod ti kinatayag ti kinanaan-anay ti Kristo.’ (Efe. 4:13) Dimmakkeltayo ngarud manipud iti bassit a rusing a nagbalin a natibker ken dakkel a kayo ket nagbalintayo a nataengan a Kristiano.

10. Apay a nasken ti irarang-ay uray kadagiti nataengan a Kristiano?

¹⁰ Ngem saan koma nga agpatingga dita ti irarang-aytayo. Nasken a rumang-ay ti pannakaammotayo ken umuneg ti pammatitayo tapno natibtibker ken naun-uneg ti pannakairamuttayo iti Sao ti Dios. (Prov. 12:3) Adun a kakabsat ti nakaaramid iti kasta nga irarang-ay. Kas pagarigan, nupay nasuroken a tallopulo a tawen nga agserserbi a panglakayen ti maysa a kabsat, imbagana a rumangrang-ay pay laeng iti naespirituan. Kinunana: “Dimmakkel unay ti panangipategko iti Biblia. Kanayon a bumirokak iti nadumaduma a pamay-an a mayaplikarko dagiti prinsipio ken linteg ti Biblia. Agtultuloy met a dumakdakkel ti panangipategko iti ministerio.”

11. Kasano nga ad-adda a maam-ammotayo ni Jehova?

¹¹ Karaman met iti naespirituan nga irarang-aytayo ti panagbalin a nasinged ken Jehova, kas Gayyem ken Amatayo. Kayatna a mariknatayo ti kinatalged ken pammateg, kas iti marikna ti maysa nga ubing nga ar-arakupen ti naayat a nagannakna wenno kas iti mariknatayo no kaduatayo ti pudno ken nasungdo a gayyemtayo. Siempre, saan a kaskarina ti maaddaan iti nasinged a relasion iti Dios. Kasapulan ti panawen tapno maam-ammo ken maipategtayo ni Jehova. Tapno ngarud ad-adda a maam-ammotayo ti Dios, mangiwayatayo iti tiempo a mangbasa iti Saona iti inaldaw. Basaentayo met ti tunggal ruar Ti Pagwanawanan ken Agriingkayo! kasta met ti dadduma pay a publikasion a naibatay iti Biblia.

12. Ania ti kasapulan nga aramidentayo tapno maam-ammonatayo ni Jehova?

 ¹² Rumang-ay met iti naespirituan dagiti gagayyem ni Jehova babaen ti napasnek a panagkararag ken pannakitimpuyog kadagiti nasayaat a kakadua. (Basaen ti Malakias 3:16.) “Dagiti lapayag [ni Jehova] situturong iti ararawda.” (1 Ped. 3:12) Kas iti naayat a nagannak, ni Jehova imdenganna dagiti ararawtayo. Nasken ngarud a “reggetanyo ti agkararag.” (Roma 12:12) Ditay makapagtalinaed kas nataengan a Kristiano no awan ti tulong ti Dios. Ditay kabaelan a sanguen a bukbukod dagiti pakarigatan iti daytoy a lubong. No isardengtayo ti agkararag, laklaksidentayo ti bileg a sidadaan nga ipaay ti Dios. Kontentoka kadi iti kalidad dagiti kararagmo, wenno kasapulan a parang-ayem?—Jer. 16:19.

13. Apay a napateg iti naespirituan nga irarang-aytayo ti pannakitimpuyog kadagiti pada a Kristiano?

¹³ Maragsakan ni Jehova kadagiti amin nga “agkamkamang kenkuana.” (Nah. 1:7) Isu nga uray no am-ammotayon ti Dios, masapul nga itultuloytayo ti makitimpuyog iti kongregasion a buklen dagiti dadduma pay a makaam-ammo kenkuana. Gapu ta agbibiagtayo iti lubong a napno iti pakaupayan, makatulong kadatayo ti pannakilangen kadagiti kakabsat. Ania ti pagimbaganna? Masarakam iti kongregasion dagiti tattao a mangparegta kenka iti “ayat ken nasayaat nga ar-aramid.” (Heb. 10:24, 25) Ditay masurot ti balakad ni Pablo a panangipakita iti ayat no saantayo a makilangen kadagiti kakabsat iti kongregasion. Iramanmo iti listaam ti regular nga itatabuno ken pannakipartisipar kadagiti gimong.

14. Apay a nasken latta a sidadaantayo nga agbabawi ken mangaramid kadagiti panagbalbaliw?

¹⁴ Sakbay a nagbalintayo a Kristiano, nagbabawi ken nagbaw-ingtayon manipud kadagiti basoltayo. Ngem nasken latta a sidadaantayo nga agbabawi ken mangaramid kadagiti panagbalbaliw. Yantangay imperpektotayo, nalakatayo nga agbasol. Ti basol ket mayarig iti uleg a nakasagana a tumukkaw. (Roma 3:9, 10; 6:12-14) Nasiputtay koma ken saantayo a tagtagilag-anen dagiti pagkapuyantayo. Imbag laengen ta an-anusannatayo ni Jehova bayat nga ikagkagumaantayo ti makidangadang kadagiti pagkapuyantayo ken mangaramid kadagiti panagbalbaliw. (Fil. 2:12; 2 Ped. 3:9) Makatulong unay kadatayo ti nainsiriban a panangusar iti tiempo ken pigsatayo tapno maliklikantayo dagiti managimbubukodan nga ar-aramid. Insurat ti maysa a kabsat a babai: “Napadakkelak iti kinapudno, ngem naiduma ti panangmatmatko ken Jehova. Maam-amakak unay kenkuana, ken impagarupko a diakto pulos maay-ayo.” Idi agangay, kimmapuy ti espiritualidadna ket nakaaramid kadagiti nakaro a kamali. “Saan a gapu ta diak ay-ayaten ni Jehova,” intuloyna, “no di ket talaga a diak am-ammo. Ngem kalpasan ti napinget a panagkarkararagko, inrugik ti agbalbaliw.” Innayonna: “Nariknak a kinibinnak ni Jehova kas iti maysa nga ubing, a siaanus a tinulongannak nga agballigi iti tunggal tubeng, ket insurona ti rumbeng nga aramidek.”

15. Ania ti napateg ken Jesus ken iti Amana?

¹⁵ “Itultuloyyo a sawen kadagiti tattao” ti maipapan iti naimbag a damag. Daytoy ti imbaga ti anghel ti Dios ken Pedro ken iti dadduma pay nga apostol kalpasan a simimilagro a linuk-atanna ida iti pagbaludan. (Ara. 5:19-21) Wen, karaman met iti listaantayo ti linawas a panangasaba. Napateg ken Jesus ken iti Amana ti pammati ken ti ministeriotayo. (Apoc. 2:19) Kas imbaga ti panglakayen a nadakamat itay: “Paset ti biagtayo ti ministeriotayo.”

16. Apay a napateg nga utobentayo ti dedikasiontayo ken Jehova?

¹⁶ Utobem ti dedikasionmo. Ti personal a relasiontayo ken Jehova ti kapatgan a sanikuatayo. Am-ammona dagidiay kukuana.  (Basaen ti Isaias 44:5.) Usigem ti relasionmo kenkuana ket ikararagmo nga agtalinaed a natibker dayta. Laglagipem met ti napateg a petsa ti bautismom. Dayta ti mangipalagip kenka iti kapatgan a desisionmo iti biag.

17. Apay a masapul nga agibturtayo tapno makapagtalinaedtayo a nasinged ken Jehova?

¹⁷ Idi nagsurat ni Pablo kadagiti taga-Galacia, impaganetgetna a masapul nga agibturda. (Gal. 6:9) Nasken met nga agibturtayo. No maipasangoka kadagiti parikut, manamnamam a tulongannaka ni Jehova. Itultuloymo nga ikararag ti nasantuan nga espiritu, ket makariknaka iti rag-o ken talna iti laksid dagiti parikut a mapaspasaram. (Mat. 7:7-11) Panunotem daytoy: No maseknan ni Jehova kadagiti tumatayab, saan kadi nga ad-adda a maseknan kenka a mangay-ayat ken nangidedikar iti bagim kenkuana? (Mat. 10:29-31) Aniaman a pakarigatan ti maipasango kenka, dika koma agsanud wenno sumuko. Adu a bendision ti sagrapen dagidiay am-ammo ni Jehova!

18. Ania ti rumbeng nga aramidem ‘ita ta am-ammomon ti Dios’?

¹⁸ No nabiit pay a naam-ammom ti Dios ken kabbaroka laeng a nabautisaran, ania ti sumaruno nga aramidem? Ikagumaam nga ammuen ti ad-adu pay maipapan ken Jehova ket itultuloymo ti agmataengan iti naespirituan. Ket no ngay nabayagen a nabautisaranka? Itultuloymo a paunegen ken palawaen ti pannakaammom ken Jehova. Ditay koma baybay-an ti relasiontayo kenkuana. Imbes ketdi, nasken a kanayon nga usigentayo ti naespirituan a listaantayo tapno masiguradotayo nga ad-adda a suminged ti relasiontayo iti naayat nga Ama, Gayyem, ken Diostayo—ni Jehova.—Basaen ti 2 Corinto 13:5, 6.