1. Mukonda diahi kima kiambote o muendexi ua kiphululu, ku tanga o itendelesu ande dia kuendesa o kiphululu?

O ENDEXI, endesa o iphululu ia beta-kota ku mundu, ala ni mukanda muala 30 a itendelesu ia lungu ni ku tonginina kiambote o ima ande dia kuendesa o kiphululu. Se ene a kamba ku kaiela o itendelesu íii mu ithangana ioso ande dia kuendesa o kiphululu, ene a tena ku di ta mu iluezu. Muendexi uebhi ua tokala ku tonginina o itendelesu iala mu mukanda iú, ande dia ku bhanga njila? O muendexi uala dingi ni uhete! O muendexi u bhita ithangana iavulu sé kuendesa kiphululu, ki ki mu bhonzo ku jimba o itendelesu ia lungu ni kikalakalu kiki.

2. Ihi ia tendelesa o Jikidistá phala ku i kaiela?

² Kála o muendexi ua kiphululu, eie ua tokala ku tonginina kiambote kiebhi kiala o kixikanu kiê, phala kioso ki ku moneka ibhidi, ki ki zoze. Ki kale se a ku batizala kindala, mba ua mu sidivila kiá Nzambi mu mivu iavulu, ku tonginina mu ithangana ioso o kixikanu ni ubhezelu uê kua Jihova Nzambi, kima kia tokala. Ku kamba ku bhanga kiki, ki tena ku bhangesa o muthu ku dibhala mu nzumbi. O Bibidia i tu dimuna: “Uoso ua di fika kuila uemana, a di lange phala ka di bhale.”—1 Kol. 10:12.

3. Ihi ia tokalele ku bhanga o Jikidistá ja akua Ngalásia?

³ O Jikidistá mu Ngalásia, a tokalele ku tonginina o kixikanu kiâ ni ku bhana valolo mu ufolo uâ mu nzumbi. Mu kaxi ka kukula kuê, Jezú ua jikula o njila phala oso a londekesa o kixikanu kua muéne, a tena kuijiia kiambote Nzambi—ene eji kituka an’â Nzambi! (Nga. 4:9) Phala ku kala mu ukamba iú uambote, o akua Ngalásia a tokalele ku dituna o ulongelu ua Jijudé, akexile mu jijila ku kaiela o Kitumu kia Mozé. Mukonda, o Akua Ifuxi iéngi mu kilunga, kexile mu kaiela o Kitumu kiki! Ki kale o akua Jijudé ni Akua Ifuxi iéngi, a tokalele ku kula mu nzumbi.  Kiki kilondekesa kuila, se ene a mesenene ku kala athu a iuka ku pholo ia Nzambi, ka tokalele ku bhanga o ima kála ki zuela o Kitumu kia Mozé.

4, 5. Kitendelesu kiahi kia bhana Phaulu ku akua Ngalásia ni kiebhi kiki kima kiambote phala etu?

⁴ O itendelesu ia bhana poxolo Phaulu ku akua Ngalásia, io bhane mu kithangana kia tokala: phala ku langidila o Jikidistá ja kidi, ku bhana valolo ku ima ia nzumbi, ni ku lenga o ima ia xala kiá ku dima. Jihova ua suínisa bhu kaxi ka poxolo, kana ngó o kilunga kia Ngalásia, maji o abhezi oso ku kolokota.

⁵ Etu enioso tua tokala ku di lembalala kiebhi kia tu bhulula ku ubhika mu nzumbi, ni ku kituka tu Jimbangi ja Jihova. Phala ku bhanga kiki, tu xinganeke mu ibhuidisu íii iiadi: O kuila u di lembalala o ima i ua bhange mu ku di bhakula ni ku ku batizala? O kuila u di lembalala kiebhi ki uejiia Nzambi ni kiebhi Nzambi kia kuijiia, mu ku katula mbote mu ufolo ua nzumbi?

6. Itendelesu iebhi mu nzumbi, i tua-nda di longa?

⁶ Sé phata, etu enioso tua kaiela divua dia jindunge. O jindunge jiji, ja lungu ni kiebhi ki tua tokala ku di tonginina mu nzumbi, tu ji sanga mu kaxa iambe,  “Jindunge Ji ambata mu Batizu ni Kuenda ni ku Kula.” Ku lembalala mu ithangana ioso o jindunge jiji, kua-nda tu kuatekesa ku lenga o ima i tua xisa kiá ku dima. Kála o muendexi mukua uhete uendesa o kiphululu, u sota ku tanga hanji o itendelesu ande dia kuendesa o kiphululu, eie a-nda ku kuatekesa ué ku kolokota mu sidivisu iê ia fiiele, mu ku tonginina o itendelesu mu nzumbi.

7. Phangu iahi ia kidi, i tua tokala ku kaiela?

⁷ Mu mukanda muala o itendelesu, mu lembalesa o muendexi ua kiphululu kuila, ande dia muéne kuendesa o kiphululu ua tokala ku kaiela o itendelesu. Etu ué tua bhingi ku di tonginina mu ithangana ioso, ni ihi i tua mu bhanga tundé kia tu batizala. Phaulu ua soneka kua Timote: “Jijila o phangu ia maka madisanze mu uévua jinga kokuami. Naminina mu kuxikana ni mu henda iene mu ukamba ni Kristu Jezú.” (2 Tim. 1:13) O “maka madisanze,” tu a sanga mu Mak’â Nzambi. (1 Tim. 6:3) Kála o itendelesu ia lungu ni ngijiie, i tu kuatekesa ku tendela kiambote o ima ia lungu ni muéne, ‘o phangu ia kidi,’ i tu bhana itendelesu ia mesena Jihova kuila tua tokala ku i kaiela. Mu kiki-phe, tu di longe o jindunge ji ambata ku batizu ni tu mone se tua mu belesela o phangu íii ia kidi.

8, 9. (a) Mukonda diahi tua tokala ku kolokota mu ku kula mu kuijiia ni mu kixikanu? (b) Bhana kifika kia lungu ni ku kula mu nzumbi ni mukonda diahi kima kiaia ni ku ki bhanga?

⁸ O kima kia dianga ki tua tokala ku bandekesa ku mukanda uetu, o kuijiia. Mu ku suluka, tu tena ku kolesa o kixikanu. Maji tua bhingi ku kula mu maukexilu oso. (2 Tes. 1:3) O ku kula, kua lungu ni ku lungulula ima iavulu ku muenhu. “Ku kula,” kulombolola ku di bandekesa ni ku di sanzumuna. Mu kiki, kioso ki tu batizala, tua tokala ku kula mu nzumbi, phala ki tu vutuke ku dima.

⁹ Tu tena ku sokesa o ku kula kuetu mu nzumbi ni ku kula kua muxi. O muxi u tena ku kula kiavulu, bhenge-bhenge se o jindanji jê jiia katé koxi dia mavu mba ji di sanzumuna. Mu kifika, saí mixi ia ji sédulu mu muxitu ua Libanu, i tena ku bhixila katé mu inzo ia ditala iala ni 12 ia matala, ni ku kala ni jindanji ja kolo jiia muene koxi dia mavu, o ku koma kuê, ku bhixila katé muene mu 12 ia jimetulu. (Miku. 5:15) Kioso o muxi u mateka ni ku kula, athu a mona kuila uene ua mu kula, né muene se ua kulu kiá, saí kithangana ki tu mono dingi se uene ua mu kula, maji ua mu kula muene. Kioso o mivu iia ni ku bhita, o muxi u koma dingi, o jindanji jiia dingi koxi dia mavu ni ku di sanzumuna, anga o muxi u kola dingi.  Kiene ki bhita ué ni ukudilu ua Kidistá mu nzumbi. Kioso ki tu mateka ku di longa o Bibidia tu kula ni lusolo anga a tu batizala. O jiphange ni ku sanguluka kuoso, a mona o ku kula kuetu mu nzumbi. Tu tena katé muene ku kituka tu aboki a thembu ioso ni ku tambula maujitu a mukua mu kilunga. Mu ku bhita mivu, o ku kula kuetu mu nzumbi, nange ka ku mono dingi kala ku dimatekenu. Né muene kiki, etu tua bhingi hanji ku kula dingi mu kixikanu ni mu kuijiia, ‘anga tu kala ku adiakimi, hé tuia ni ku kula katé mu kitala kia tenena kia Kristu’ (Efe. 4:13) Mu kiki, tua mateka kála tu ana ndenge mu nzumbi, maji mu ku bhita kithangana tua kituka tu Jikidistá tua kulu dingi mu nzumbi, kála o muxi ua kolo dingi.

10. Mukonda diahi katé muene ni Jikidistá a kulu kiá mu nzumbi a tokala hanji ku kula?

¹⁰ O ku kula kuetu, ki ku tokala ku palala. O kuijiia kuetu kua bhingi tu ku bandekesa, o kixikanu kietu ué kia bhingi ku ki kolesa. Mu kiki, tu kolokota dingi mu Mak’â Nzambi (Jisa. 12:3) Mu kilunga, saí phange javulu ja mala ni ja ahatu a bhange kiki. Mu kifika, saí phange ua mu sidivila kiá kala kafunga mu makuinhi atatu a mivu ndenge, ua mono kuila muéne ua mu kula hanji mu nzumbi. Muéne uambe: “Nga bhana dingi valolo mu Bibidia. Ngi mona ithangana iavulu ia ku belesela itumu ni ijila ia Bibidia mu maukexilu avulu. O ku bhana valolo mu ukunji, kua di bandekesa dingi ku mbandu iami.”

11. Kiebhi ki tu tena kuijiia kiambote Jihova, kioso kiia ni ku bhita o kithangana?

¹¹ O ku kula kuetu kua lungu ué ni ku zukama kua Jihova, o Kamba dietu ni Tat’etu. Muéne ua mesena kuila etu tu divua kuma ua tu xikina kala tu abhezi iê. Muéne ua mesena ué kuila tuijiia kuma muéne ua tu zolo ni kuila u tu langidila. Kála ki divua o mona ndenge a mu zolo ku jitata jâ, a mu kondeleka, mba ki tu kala bhu kaxi ka kamba dietu dia fiiele. Mu kidi, o ukamba iú ni Jihova, ki u moneka ngó, ku bhinga ku bhanga kima. Ku bhinga kithangana phala tu mu ijiie ni ku mu zola. Mu kiki-phe, phala tu mu ijiie kiambote, katula kithangana phala ku tanga o Mak’ê izuua ioso. Ni ku tanga ué o Mulangidi ni Despertai! ni madivulu a mukua a Bibidia.

12. Ihi i tua tokala o ku bhanga phala Jihova n’a tuijiie?

¹² O makamba a Nzambi, a kula mu nzumbi bhu kaxi ka misambu ia kidi, ni ukamba uambote. (Tanga Malakiia 3:16.)  Jihova ‘u bhana mátui ku misambu iâ.’ (1 Phe. 3:12) Kála o tata ia henda, Jihova uivua kiambote o misambu ietu, mu ku bhinga kikuatekesu. Mukonda dia kiki, tua bhingi tu ‘kolokota mu ku samba.’ (Lom. 12:12) Ki tu tena ku kala tu Jikidistá ja kulu mu nzumbi, sé o kikuatekesu kia Nzambi. O ibhidi ia mundu iú mu tuala iavulu, ki tu tena ku ditunda kiambote se muéne ka tu kuatekesa. Se ki tu kolokota mu ku samba, ki tua-nda tena ku tambula o nguzu ia mesena ku tu bhana Nzambi. U sanguluka mukonda dia misambu i uene mu bhanga, inga u mona kuila kua kambe ku lungulula kima mu misambu iê?—Jel. 16:19.

13. Mukonda diahi o ku diongeka ni Jiphange jetu, kima kiambote phala ku kula mu nzumbi?

¹³ Jihova u sanguluka ni athu oso “a mu dielela muene;” né muene kiki sumbala tuejiia kiá Nzambi, tua tokala ku kolokota mu ku diongeka ni kilunga ni jiphange ja mukuá a mu ijiia ué. (Nah. 1:7) Ku mundu iú mu ezala ima iavulu i luualesa, unjimu, ku diongeka kumoxi ni jiphange jetu ja mala ni ja ahatu a tena ku tu kolokotesa. Mbote jebhi ji tu katula? Mu kilunga, ua-nda sanga phange ja-nda ku suínisa “ku dizola, ni kubhanga o mbote.” (Jihe. 10:24, 25) O ku dizola kua soneka Phaulu ku akua Jihebeleu, ku suínisa o jiphange ni kilunga. Phala kulondekesa o henda íii, ku bhinga ku dibhana kiambote ni Jikidistá ja mukua. Sota kuia mu iônge ithangana ioso.

14. Kiebhi o ku diela ni ku xisa ku dima o ima i tua kexile mu bhanga, kima kiaia ni ku ki bhanga?

¹⁴ O ku kituka Jikidistá, kua lungu ni ku diela o ituxi ni ku xisa o ima i tua kexile mu bhanga m’ukulu. O ku diela, kima kiaia ni ku ki bhanga. Kuma tu akua ituxi hanji, tu bhanga hanji o ima ia iibha, kála o nhoka ia mesena ku numata. (Lom. 3:9, 10; 6:12-14) Tu dilange, mu ku tonginina kiambote o itondalu ietu. Ku sanguluka kua dikota kuijiia kuila Jihova ulondekesa muanhu ko-kuetu, kioso ki tuia ni ku di suínisa ni ku lungulula o ima i tua bhingi. (Fil. 2:12; 2 Phe. 3:9) Kia beta, o ku langa o kithangana kietu, phala ki tu ki zange mu ku sota ima sé valolo. Saí phange ia muhatu ua soneka: “Sumbala a ngi sase mu kidi kia Nzambi, maji nga kulu ni kibanzelu kiéngi kia lungu ni Jihova. Muéne muthu a tokalele ku mu kala ni uôma uavulu, nga mono kuila nuka ngeji tena ku mu sangulukisa.” Mu ku bhita kithangana o phange ia muhatu ua dibhale, mukonda dia ima iavulu ia mu luualesa. Muéne uambe dingi: “Kiki, ki ki bhiti mukonda eme ki ngi zolele Jihova, maji mukonda dia kuila, ki ngi mu ijidile kiambote. Mu kiki, kioso ki nga bhange misambu iavulu, nga mateka ku lungulula. Nga mono kuila Jihova ua kexile mu dibhana n’eme kála kia bhanga ni mona ndenge, mu ku ngi kuatekesa ni henda ku dibhana ni ibhidi, mu ku ngi londekesa ihi i nga tokalele o ku bhanga.”

15. Ihi i tonginina Jezú ni Tat’ê?

¹⁵ ‘Kolokotenu ku tangela athu,’ o maka alungu ni njimbu iambote. O anju ia Nzambi, ia zuela o izuelu íii kua Phetele ni jipoxolo ja mukua, kioso ene kia zubha ku mona o kisuma kia ku a katula mu’aleia. (Ika. 5:19-21) O kima kia mukua kiala mu mukanda uetu, o kikalakalu kia ku boka. Jezú ni Tat’ê, a tonginina kiambote kiebhi kiala o kixikanu kietu ni ukunji uetu. (Dij. 2:19) Kála kiambe o kafunga, tua mu tumbula kiá ku dima: “O kikalakalu kietu, o ku boka.”

16. Mukonda diahi kima kiambote ku xinganeka mu kikutu ki tua bhange kua Jihova?

¹⁶ Xinganeka mu ku di bhakula kuê ku ua bhange. O kima kia beta dingi kota, o ukamba uetu ni Jihova. Muéne uejiia ió a mu tokala. (Tanga Izaia 44:5.)  Bhu kaxi ka musambu, tonginina kiebhi kiala o ukamba uê ni muéne. O kia mukua, lembalala o kizuua kia ku batizala. O ima íii iiadi, ia-nda ku kuatekesa ku lembalala kuila o batizu, kiene o kima kia beta dingi kota ki ua bhange ku muenhu.

17. Mukonda diahi o ku kolokota kima kia tokala phala tu zukame kua Jihova?

¹⁷ Mu ku sonekena ku akua Ngalásia, Phaulu ua suínisa o kibhindamu kia ku kolokota. (Nga. 6:9) Kiki, kima kia tokala ué phala o Jikidistá lelu. Eie ua-nda dibhana ni ibhidi, maji Jihova ua-nda ku kuatekesa. Kolokota mu ku samba mu ku bhinga o nzumbi ikola. Eie ua-nda divua kiambote, kioso muéne kia-nda bhinganesa o ku sanguluka bhu kididi kia ibhidi, ni paze bhu kididi kia divuua. (Mat. 7:7-11) Xinganeka mu íii: Se Jihova u bhana valolo ku jinjila, ihi i tuamba ia lungu n’eie ua mu zolo ni ku di bhakula kua muéne? (Mat. 10:29-31) Kana ku vutuka ku dima; ni ku lembua, né muene ni ibhidi i u dibhana na-iu. Tuala ni maujitu avulu, mukonda dia ku tuijiia kua Jihova!

18. ‘Eie uejiia kiá Nzambi,’ ihi i ua tokala o kubhanga?

¹⁸ Mu kiki, eie uejiia kiá Nzambi ia a ku batizala kiá, ihi i ua tokala o kubhanga? Kolokota kuijiia kiambote Jihova, mu ku kula dingi mu nzumbi. Se a ku batizala kiá ukulu, ihi i ua tokala o kubhanga? Eie ué, kolokota mu ku bandekesa o kuijiia kuê kua lungu ni Jihova. Ki tu tokala kuehela o ukamba uetu ni muéne ku zoza. Mu veji dia kiki, mu ithangana ioso tua tokala ku tonginina o mukanda uetu muala o itendelesu mu nzumbi, phala kuijiia kuila tua mu kula muene mu ukamba ni Tat’etu, kamba dietu Jihova—Nzambi ietu.—Tanga 2 Kolindu 13:5, 6.