Mu Swanela Ku Ezañi “Ha Se Mu Zibile Mulimu”?
Mu Swanela Ku Ezañi “Ha Se Mu Zibile Mulimu”?
“Se mu zibile Mulimu.”—MAGAL. 4:9.
MU KONA KU ALABA CWAÑI?
Ki kabakalañi ha lu swanela ku kuta-kutelanga ku lundulula mihato ye ne lu ngile ha ne lu itukiseza ku kolobezwa?
Ki kabakalañi ha lu swanela ku zwelapili ku tiya kwa moya, nihaikaba kuli se lu bile mwa niti ka lilimo ze ñata?
Ki kabakalañi ha lu swanela ku hupulanga tumelo ye lu na ni yona ni buineelo bo ne lu ezize ku Jehova?
1. Ki kabakalañi mufufisi wa fulai ha itusisanga mukoloko wa lika ze ama fulai kuli a tatube fulai?
MUFUFISI wa fulai a si ka nanuha kale, u bonanga teñi kuli wa tatuba fulai ya hae ka tokomelo. U tatubanga fulai ka ku itusisa mukoloko wa lika za ñozi ili ze ama fulai yeo. Haiba a sa tatubi fulai pili a si ka funduka kale, ha na ku ziba butata bo bu kona ku tisa kozi fulai ha inze i fufa. Nihaiba bafufisi ba lifulai be se ba fufisize lifulai ka lilimo ze ñata ni bona ba tokwa ku tatubanga lifulai za bona pili ba si ka nanuha kale.
2. Lu tokwa ku tatuba nto mañi?
2 Ka ku swana ni mukoloko wa itusisanga mufufisi wa fulai, ni mina ku na ni mukoloko wa lika ze mu tokwa ku tatuba ilikuli tumelo ya mina i zwelepili ku tiya niha mu li mwa miinelo ye taata. Ibe kuli kona lu sa zo kolobezwa kamba se lu bile mwa niti ka lilimo ze ñata, lu swanela ku zwelapili ku tatubanga tumelo ya luna. Haiba lu nahana kuli tumelo ya luna i tiile hahulu, lwa kona ku kena mwa muliko o ka tahisa kuli lu latehelwe ki silikani sa luna ni Jehova. Bibele i lu lemusa kuli: “Yena ya nahana kuli u yemi a tokomele kuli a si ke a wa.”—1 Makor. 10:12.
3. Bakreste ba kwa Galatia ne ba tokwa ku ezañi?
3 Sitabelo sa Jesu si konisize Bakreste ku ziba Mulimu ka nzila ye nca. Batu se ba kona ku ketiwa sina bana ba Mulimu! Bakreste ba mwa Galatia ne ba tokwa ku tatuba tumelo ya bona. (Magal. 4:9) Mwa puteho ya mwa Galatia, ku na ni batu ba bañwi be ne ba bulezi kuli Bakreste ne ba kona feela ku ba ba ba lukile haiba ne ba ka latelela Mulao wa Mushe. Kono Mulimu naa tuhezi ku itusisa Mulao wo, mi Balicaba ne ba sa amiwi ki Mulao wo. Majuda ni Balicaba be ne ba li mwa puteho ne ba tokwa ku zwelapili mwa niti. Ne ba tokwa ku utwisisa kuli ka nako yeo, Mulimu naa sa tokwi kuli batu ba latelele Mulao.
MIHATO YE NE LU NGILE KULI LU ZIBE MULIMU
4, 5. Paulusi naa file kelezo mañi kwa Bakreste ba Magalata, mi liñolo la naa ñozi ki la butokwa cwañi ku luna?
4 Liñolo la naa ñozi muapositola Paulusi kwa Bakreste ba Magalata ha mano susumezwa ki Jehova, li hupulisa Bakreste kaufela kuli ba si ke ba siya niti ya mwa Bibele ye ba itutile. Ha lu swaneli ku kutela kwa lika ze lu siile kwamulaho. Liñolo leo la kona ku lu tusa kaufelaa luna ku zwelapili ku sepahala.
5 Kaufelaa luna lu swanela ku hupula katulo ye ne lu ezize ya ku sebeleza Jehova. Mu nyakisise lipuzo ze peli ze latelela: Kana mwa hupula mihato ye ne mu ngile ye ne mi tusize kuli mu itukiseze ku kolobezwa? Kana mwa hupula ha ne mu zibile Mulimu ni mo ne mu ikutwezi ha ne mu zibilwe ki yena?
6. Ki mukoloko mañi o lu ka nyakisisa mwa taba ye?
6 Ne lu ngile mihato ye 9 ha ne lu itutile niti. (Mu bone mbokisi ye li, “Mihato ye ne lu Ngile Kuli lu Zibe Mulimu ya Kona ku lu Tusa ku Zwelapili Kwa Moya.”) Lwa kona ku itusisa mihato yeo sina mukoloko wa lika ze lu swanela ku tatuba ilikuli lu tiise tumelo ya luna ni ku zwelapili ku ambuka lika ze lu siile mwa lifasi. Sina feela mufufisi wa fulai ha tatubanga mukoloko wa hae pili a si ka nanuha kale, ni luna lu swanela ku zwelapili ku tatubanga mukoloko wa luna.
BA BA ZIBWA KI MULIMU BA ZWELAPILI KU TIYA MWA NITI
7. Ki litaelo mañi ze lu tokwa ku latelela, mi ki kabakalañi ha lu swanela ku tatubanga ka tokomelo mukoloko wa luna?
7 Sina feela mufufisi wa fulai ha tatubanga mukoloko wa hae ka nako ni nako, ni luna lwa kona ku eza zwelopili mwa niti. Paulusi naa ñolezi Timotea kuli: “U zwelepili ku swala mutala wa manzwi a mande a ne u utwile ku na, u nze u bonisa tumelo ni lilato le li zwa mwa ku swalisana ni Kreste Jesu.” (2 Tim. 1:13) “Litaelo za niti” za naa bulela Paulusi li fumaneha mwa Linzwi la Mulimu. (1 Tim. 6:3) Haiba mu talima fa siswaniso se siñwi, mwa kona ku ziba kuli siswaniso seo ki sa nto mañi. Ka nzila ye swana, “litaelo za niti” li lu tusa ku utwisisa hande za tokwa Jehova ku luna. Lu ka nyakisisa mihato ye ne lu ezize pili lu si ka kolobezwa kale mi lu ka tatuba kuli lu bone haiba lwa latelela niti ye ne lu itutile.
8, 9. (a) Ki kabakalañi ha lu swanela ku zwelapili ku ba ni zibo ni tumelo? (b) Ka ku ba Bakreste, ki kabakalañi ha lu swanela ku eza zwelopili ya kwa moya, mi zwelopili yeo i swana cwañi ni ku hula kwa kota?
8 Muhato wa pili o ne lu ngile nee li wa ku ba ni zibo, ili ye ne lu tusize ku ba ni tumelo. Kono lu tokwa ku zwelapili ku ba ni zibo ni ku tiisa tumelo ya luna. (2 Mates. 1:3) Hamulaho wa kolobezo ya luna, lu swanela ku zwelapili ku hulisa bulikani bwa luna ni Mulimu ni ku bu tiisa.
9 Bulikani bwa luna ni Mulimu bu swana ni mo i hulelanga kota. Kwa komokisa ku bona mo i kona ku hulela kota sihulu haiba mibisi ya kota yeo i tiile. Ka mutala, likota ze ñwi za lisidare za kwa Lebanoni za kona ku eza limita ze 37 mwa butelele. Likota zeo fokuñwi za kona ku ba ze tuna luli kuli mane mu ka tokwa muhala o eza limita ze 12 kuli mu potolose kota iliñwi feela. (Pina 5:15) Kwa makalelo, kota i hulanga ka bubebe. Mibisi ha inze i hula ni ku yanduluka, kota i zwelangapili ku hula mwa butuna ni mwa butelele. Hamulaho, ku banga taata ku lemuha mo i hulela kota. Ki nto ye swana ni zwelopili ye lu eza ka ku ba Bakreste. Mwendi ne lu ezize licinceho ze ñata ha ne lu kalile ku ituta Bibele. Mi hamulaho se lu kolobezwa. Ba bañwi mwa puteho ne ba lemuhile zwelopili ye ne lu eza kwa moya. Mwendi ne lu kalile ku eza bupaina kamba ku peta buikalabelo bo buñwi mwa puteho. Nako ha ne inze i ya, mwendi ba bañwi ne ba sa koni ku lemuha zwelopili ye ne lu eza kwa moya. Kono kaufelaa luna lu tokwa ku zwelapili ku ekeza zibo ya luna ni ku tiisa tumelo ya luna ku fita ha lu ka ba sina “muuna ya kolile,” ili ku talusa ku eza lika ka nzila ye bonisa kuli lu Bakreste ba ba hulile kwa moya. (Maef. 4:13) Kamukwaocwalo, ha lu eza zwelopili sina Mukreste, lu swana sina kakota ka kanyinyani ka ka hula ku ba kota ye tiile.
10. Ki kabakalañi Bakreste ba ba tiile kwa moya ha ba swanela ku zwelapili kwa moya?
10 Ha lu swaneli ku tuhela ku eza zwelopili ya kwa moya. Zibo ya luna ya Linzwi la Mulimu ni tumelo ya luna li swana sina mibisi ye lu tiisa kuli lu si ke lwa zikinyeha. Mibisi yeo i swanela ku zwelapili ku tiya. (Liprov. 12:3) Ku na ni mizwale ni likaizeli ba bañata ba ba zwelapili ku eza zwelopili ya kwa moya. Muzwale yo muñwi ya saa bile muuna-muhulu ka lilimo ze fitelela 30 u bulela kuli u sa eza zwelopili nihaiba ka nako ye. Muzwale yo u ekeza kuli u itebuha hahulu Bibele sihulu ka nako ya cwale. Hape u zwelapili ku ituta linzila ze nca ze bonisa mo Bibele i kona ku tuseza mutu ku eza likatulo, mi hape muzwale yo u ikolanga ku kutaza ka nako kaufela.
MU TIISE BULIKANI BWA MINA NI MULIMU
11. Ki nto mañi ye kona ku lu tusa ku zwelapili ku tiisa bulikani bwa luna ni Jehova?
11 Haiba lu bata ku eza zwelopili ka ku ba Bakreste, lu swanela ku zwelapili ku ba bukaufi ni Jehova. Mulimu u bata kuli lu ikutwe ku silelezwa ni ku latiwa sina feela mwa ikutwelanga mwana ya inzi ni mushemi ya lilato kamba mo lu ikutwelanga ha lu li ni mulikanaa luna yo mutuna. Mu bone teñi kuli zazi ni zazi mwa fumana nako ya ku bala Bibele. Mi mu balange lihatiso za lu fa Jehova ze cwale ka limagazini, libuka, ni libroshuwa. Ku eza cwalo ku ka mi tusa kuli mu zibe hande Jehova mi ku ka mi tusa ku tiisa bulikani bwa mina ni yena.
12. Lu tokwa ku ezañi haiba lu bata ku tiisa silikani sa luna ni Mulimu?
12 Litapelo za luna ni swalisano ye nde ye lu ikola ni ba bañwi li lu tusa ku tiisa bulikani bwa luna ni Mulimu. (Mu bale Malaki 3:16.) Balikani ba Mulimu ha ba lapela ku yena, wa utwa “likupo za bona”. (1 Pit. 3:12) Jehova wa lu utwanga ha lu itilelela ku yena mwa tapelo, kamukwaocwalo, lu swanela ku lapelanga kamita. (Maro. 12:12) Mulimu u ka lu tusa haiba lu zwelapili ku ba balikani ba hae. Ha lu tuhela ku lapela ku Mulimu, ha lu koni ku tiisa silikani sa luna ni yena. Mi mane lwa kona ku zwafiswa ki lika za mwa lifasi le li maswe le kamba lwa kona ku kena mwa muliko o ka lu tahiseza kuli lu eze nto ye maswe. Mulimu wa lata ku lu fa tuso ye lu tokwa kaufela haiba lu mu kupa. Kana mwa lapelanga ku Jehova sina mo mu kona ku ambolela ni mulikanaa mina ye mu sepile? Kana ku na ni ze mu kona ku eza kuli litapelo za mina li be ze nde hahulu?—Jer. 16:19.
13. Haiba lu bata ku tiisa bulikani bwa luna ni Mulimu, ki kabakalañi ha lu tokwa ku fumanehanga kwa mikopano kamita?
13 Lu swanela ku zwelapili ku ba bukaufi ni puteho ilikuli lu swalisane ni batu ba ba li balikani ba Jehova. Jehova wa lata balikani ba hae bakeñisa kuli ba zwelapili ku ‘mu sepa.’ (Nah. 1:7) Bakeñisa kuli miinelo ya mwa lifasi le se li ye maswe hahulu, lu swanela ku tandanga nako ye ñata ni mizwale ni likaizeli ba luna. Lwa kona ku tusana ilikuli lu zwelepili ku tiya kwa moya. Mizwale ni likaizeli bao ba ka lu susueza kuli lu bonise lilato kwa batu ba bañwi ni kuli lu eze “misebezi ye minde.” (Maheb. 10:24, 25) Haiba lu sa tandi nako ni mizwale ni likaizeli ba luna ba mwa puteho, ku ka lu bela taata ku latelela kelezo ya naa lu file Paulusi. Kamukwaocwalo, mu fumanehange kwa mikopano kamita. Mi mu fange likalabo ha mu li kwa mikopano yeo.
14. Ki kabakalañi ha lu swanela ku itukisezanga ku baka ni ku eza licinceho mwa bupilo bwa luna ka nako kaufela?
14 Pili lu si ka ba kale Bakreste, ne lu bakile ni ku tuhela mupilelo wa luna wa buezalibi. Kono lu swanela ku itukisezanga ku baka ka nako kaufela ni ku eza licinceho mwa bupilo bwa luna. Bakeñisa kuli ha lu si ka petahala mi lwa fokola, ku bunolo ku luna ku eza sibi. Sibi si swana sina noha ye itukiselize ku lu luma fo i fumanela kolo kaufela. (Maro. 3:9, 10; 6:12-14) Kamukwaocwalo, ha lu koni ku bulela kuli ha lu na bufokoli. Jehova u lu bonisa pilu-telele ha lu nze lu lwanisa bufokoli bwa luna. (Mafil. 2:12; 2 Pit. 3:9) Mu itusise nako ni maata a mina kwa ku sebeleza Jehova ku fita ku itusisa zona kwa ku ipumanela lika ze mu tokwa. Kaizeli yo muñwi ya naa huliselizwe mwa lubasi lwa Lipaki naa nga kuli naa tokwa ku saba hahulu Jehova mi hape naa nahana kuli naa si ke a kona ku mu tabisa. Naa sa ikutwangi ku ba bukaufi ni Jehova mi naa ezanga mafosisa mwa bupilo bwa hae. Kaizeli yo naa ize: “Haki kuli ne ni sa lati Jehova, kono ki bakeñisa kuli ne ni sa mu zibi hande.” Kaizeli yo a kupa Mulimu kuli a mu tuse mi a kalisa ku eza licinceho. Kaizeli yo u ekeza kuli: “Ne ni lemuhile kuli Jehova naa zamaya ni na sina mushemi ya zamaya ni mwanana hae, mi naa ni tusize ku tiyela miliko ye ne ni kopananga ni yona kaufela ni ku ni tusa kuli ni bone ze ne ni swanela ku eza.”
15. Jehova ni Jesu ba bonañi ku luna mi ki lika mañi ze ba itebuha?
15 Lingeloi la Mulimu ne li bulelezi Pitrosi ni baapositola ba bañwi kuli ba ‘zwelepili ku bulela’ za taba ye nde. (Lik. 5:19-21) Kuli lu zwelepili ku tiisa tumelo ya luna, lu swanela ku bona teñi kuli lwa kutaza ka nako kaufela. Jehova ni Jesu Kreste ba bona tumelo ye lu na ni yona mi ba itebuha ze lu peta mwa bukombwa. (Sin. 2:19) Ku kutaza ku swanela ku ba nto ya butokwa hahulu mwa bupilo bwa luna.
16. Ki kabakalañi ha lu swanela ku hupulanga za buineelo bwa luna?
16 Mu hupulange kuli ne mu ineezi ku Jehova. Bulikani bwa luna ni Jehova ki bwa butokwa hahulu ku luna. Jehova wa ziba batu ba hae kaufela. (Mu bale Isaya 44:5.) Mu bone teñi kuli bulikani bwa mina ni Jehova bu tiile, mi mu kupe Mulimu kuli a mi tiise. Hape mu hupulange za kolobezo ya mina mi mu si ke mwa libala lizazi le ne mu kolobelizwe. Ha ne mu kolobelizwe, batu ne ba boni kuli ne mu ineezi ku Jehova. Yeo ki yona keto ya butokwa hahulu ye mu kile mwa eza.
LU TOKWA KU ITIISA KULI LU ZWELEPILI KU BA BUKAUFI NI JEHOVA
17. Ki kabakalañi ha lu swanela ku zwelapili ku itiisa haiba lu bata ku zwelapili ku ba bukaufi ni Jehova?
17 Paulusi naa bulelezi Bakreste ba Magalata kuli ba si ke ba zwafa. (Magal. 6:9) Ni luna lu tokwa ku itiisa kakuli lu ka kopana ni miinelo ye taata. Kono Jehova u ka lu tusa. Mu zwelepili ku kupa moya o kenile wa Mulimu, mi Mulimu u ka mi tusa ku ba ni tabo ni kozo, nihaikaba kuli butata bo mu kopana ni bona ha bu feli. (Mat. 7:7-11) Mu nahanisise taba ye: Jehova u babalela linyunywani. Jehova u mi lata hahulu ku fita mwa latela linyunywani. U bata ku mi babalela kakuli mwa mu lata mi ne mu ineezi ku yena. (Mat. 10:29-31) Niha mu ka ba mwa miinelo ye taata, mu si ke mwa zwafa. Mu si ke mwa tuhela ku lapela ka mulelo wa kuli mu kutele lika ze ne mu siile mwa lifasi. Bakeñisa kuli Jehova wa lu ziba, lu na ni limbuyoti ze ñata!
18. Batu kaufela ba ba ziba Mulimu ba swanela ku ezañi cwale?
18 Ibe kuli kona mu sa zo kolobezwa kamba se mu bile mwa niti ka lilimo ze ñata, mu swanela ku ezañi cwale? Mu zwelepili ku ziba hande Jehova, mi mu zwelepili ku tiya kwa moya. Mu si ke mwa nahana kuli mu ziba hande Mulimu kuli mane mu nahane kuli ha mu tokwi ku tiisa bulikani bwa mina ni yena. Mu kuta-kutelange ku lundulula lika ze lu buisani mwa taba ye ilikuli mu zwelepili ku ba bukaufi ni Jehova, Ndataa luna ya lilato, Mulikanaa luna, ni Mulimu wa luna.—Mu bale 2 Makorinte 13:5, 6.
[Lipuzo za Tuto]
[Siswaniso se si fa likepe 15]
Kota i zwelangapili ku hula, ni Bakreste ba swanela ku zwelapili ku hula kwa moya
[Mbokisi fa likepe 17]
MIHATO YE NE LU NGILE KULI LU ZIBE MULIMU YA KONA KU LU TUSA KU ZWELAPILI KWA MOYA
1 Ne lu kalile “ku ziba” Jehova ni Mwanaa hae, Jesu Kreste.—Joa. 17:3
2 Tumelo ya luna ne i zwezipili ku tiya ha ne lu itutile za Mulimu.—Joa. 3:16
3 Ne lu lapelanga ku Jehova kamita.—Lik. 2:21
4 Ne lu kalile ku swalisana ni puteho.—Maheb. 10:24, 25
5 Ne lu bakezi libi za luna.—Lik. 17:30
6 Ne lu tuhezi mupilelo wa luna wa buezalibi ni mikwa ye maswe ye ne lu na ni yona.—Lik. 3:19
7 Tumelo ya luna ne i lu susuelize ku kutaza taba ye nde ku ba bañwi.—2 Makor. 4:13
8 Ne lu ineezi ku Jehova ilikuli lu latelele hande Jesu.—1 Pit. 4:2
9 Se lu kolobezwa mwa mezi.—1 Pit. 3:21
