“Natan ta Kabat Yo Lay Dios”—Antoy Gawaen Yo?
“Kabat yo lay Dios.”—GAL. 4:9.
1. Akin ya walay listaan ya kaukolan ya i-check na saray piloto antis iran manpatikyab?
ANTIS ya manpatikyab na eroplano iray piloto, walay listaan ya kaukolan dan i-check. No agda itan sansakeyen ya nengnengen kada ombiahe ra, baleg so posibilidad ya walay nagawan aksidente. Siopad saray piloto so responsablin man-check ed satan kada ombiahe ra? Samay eksperiensyado! Balet posiblin ibaliwala to la itan tan agto la sansakeyen so akalista.
2. Antoy kaukolan mon i-check?
2 Singa saray maalwar ya piloto, sarag mo met so mangusar na listaan pian nasegurom ya ag-onkapuy so pananisiam lalo la no walay subok. Balanglan agano ka nin abautismoan odino abayag lan manlilingkor ed Dios, kaukolan mon usisaen so pananisia tan talek mod si Jehova. No agmo regular tan seetan ya i-check iratan, posiblin onkapuy kad espiritual. Oniay pasakbay na Biblia: “Samay maniisip a sikatoy akaalagey et manalwar komon ya agnatumba.”—1 Cor. 10:12.
3. Antoy kaukolan ya gawaen na saray Kristiano ed Galacia?
3 Kaukolan na saray Kristiano ed Galacia nensaman ya usisaen so pananisia ra tan umaney datin panmoria ra. Panamegley na dondon nen Jesus et sarag na saray Kristiano ya lalon kabatey Dios tan magmaliw ya ananak To! (Gal. 4:9) Pian napansiansia ray relasyon dad Dios, kaukolan ya ipulisay na saray taga Galacia so bangat na saray panatikon Judio, ya mangipipilit nin siansia ed Mosaikon Ganggan. Agbalot nagmaliw a sakop na satan a Ganggan iray ag-asegat ya Gentil diad kongregasyon. Sirin, Judio man o Gentil, kaukolan dan paaligwasey espiritualidad da. Nepeg dan awaten ya anggapo la rad silong na Mosaikon Ganggan.
SARAY GAWAEN PIAN NAKABAT SO DIOS
4, 5. Antoy insimbawa nen Pablo ed saray taga Galacia, tan akin ya importante itan ed sikatayo?
4 Walay importantin gagala no akin ya akarekord so simbawa nen apostol Pablo ed saray taga Galacia: pian panonotan so amin a Kristiano ya agdan balot lilingwanan iray katuaan ed Biblia tan agla ompapawil ed saray binenegan da la. Saman ya impaisulat nen Jehova ed saray taga Galacia et makatulong ed sikatayon amin natan pian makapansiansia itayon matoor.
5 Maabig no nodnonoten tayo no panon itayon nagmaliw ya sakey ed Saray Tasi nen Jehova. Makatulong irayan duaran tepet: Kasin natandaan mo ni ray ginawam pian onkualipika kad bautismo? Natandaan mo ni no panon mon akabat so Dios tan no antoy aliknam sanen akabat to ka?
6. Anton listaan so pantongtongan tayo?
6 Walay siameran ginawa tayo sanen naamtaan tayoy katuaan. Akalista iratan ed kahon ya “Saray Ginawa Tayo Pian Nabautismoan tan Tuloytuloy ya Onaligwas.” No naynay tayon nodnonoten iraman ya ginawa tayo, ombiskeg so determinasyon tayon agla pawilen iray binenegan tayod sayan mundo. No panon ya seseguroen na maalwar ya piloto a na-check so amin ya walad listaan to, kaukolan tayo met ya repasoen so espiritual ya listaan tayo.
ITUTULOY NA SARAMAY KABAT NA DIOS SO ONALIGWAS ED ESPIRITUAL
7. Anton “pangaligan” so kaukolan tayon tumboken, tan akin?
7 No panon ya seseguroen na piloto ya na-check so listaan to kada ombiahe, kaukolan tayo met a regular ya i-check no kasin onaaligwas tayo ed espiritual. Oniay insulat nen Pablo ed si Timoteo: “Pansiansiam ed inkasika so pangaligan a maabig iran salita a nadngel mo ed siak pati say pananisia tan panangaro ed si Kristo Jesus.” (2 Tim. 1:13) Saraman ya “maabig iran salita” et walad Biblia. (1 Tim. 6:3) Singa say simplin drowing ya mangiiter na ideya no antoy itsura na sakey a bengatla, say ‘pangaligan a katuaan’ et ontulong met ed sikatayon naamtaan iray kakaukolanen nen Jehova ed sikatayo. Pantongtongan tayo natan iramay ginawa tayo antis itayon abautismoan pian nanengneng no kasin manbibilay itayo unong ed katuaan.
8, 9. (a) Akin a kaukolan tayon tuloytuloy ya padaakey pikakabat tan pabiskegey pananisia tayo? (b) Iyilustra no akin ya importante so tuloytuloy ya iyaligwas ed espiritual.
8 Say unona ed listaan tayo et say pangala na pikakabat. Insan, say pakawalaay pananisia. Balet kaukolan tayon tuloytuloy ya padaaken so pikakabat tan pabiskegey pananisia tayo. (2 Tes. 1:3) Kanian kayari bautismo tayo, kaukolan tayon itultuloy ya paeleten so relasyon tayod Dios, pian ag-ontunday iyaaligwas tayo.
Tuloytuloy so ibabaleg na kiew, ontan met komon so iyaaligwas tayo
9 Say iyaaligwas tayod espiritual et niyaliling ed ibabaleg na sakey a kiew. Nayarin ombaleg ya maong so sakey a kiew, lalo la no aralem so lamot to. Singa bilang, wala ray sedro na Lebanon ya ombaleg anggad singa katagey na 12-floor ya bilding, angkakabaleg so lamot da tan onabet ed 12 metro so kalapar na sengeg da. (Kanta nen Sol. 5:15) Diad gapo, maples so ibaleg na satan a kiew. Legan ya onaaralem tan onaarawi nasasabi lamot to, ontatagey tan onlalapar met so sengeg to. Kabekta, ngalngali agla naimanoy ibabaleg to. Ontan met so espiritual ya iyaaligwas na sakey a Kristiano. Nayarin manlapud impanaral tayoy Biblia et maples so inyaligwas tayod espiritual anggad impanpabautismo tayo. Sankaimano na saray agagi so iyaaligwas tayo. Ompan nampayunir odino akaawat tayoy arum a pribilehyo. Kalabas na saray taon, nayarin agla tanto naimanoy iyaaligwas tayod espiritual. Balet kaukolan tayo nin siansian pabiskegey pananisia tan padaakey pikakabat tayo anggad “magmaliw itayon baleg lan too, a naabot tayoy suston kaatagey ya asabi nen Kristo.” (Efe. 4:13) Kanian no onaaligwas tayod espiritual, singa itayo bukel a tinmubo tan nagmaliw ya baleg a kiew.
10. Akin ya kaukolan so tuloytuloy ya iyaaligwas anggan matatken lad espiritual?
10 Balet agkomon ditan mangangga so iyaligwas tayo. Kaukolan tayon padaakey pikakabat tan pabiskegey pananisia tayo pian mas onlamot itayod Salita na Dios. (Uli. 12:3) Dakel ya agagi so tuloytuloy ya manggagawa ed satan. Singa bilang, imbaga na sakey ya 30 taon lan elder ya sikatoy siansia nin onaaligwas ed espiritual. Inkuan to: “Mas nanaapresyak so Biblia. Dakel ni nanaaralan kon paraan no panon kon niyaplika iray prinsipyo tan ganggan ed Biblia. Lalok met ya naaaroy ministeryok.”
PAELETEN SO PIKAKAARO ED DIOS
11. Panon tayon mas nakabat si Jehova?
11 Makatulong met ed iyaligwas tayo so iyapit ed si Jehova bilang Kaaro tan Ama. Labay ton nalikna tayoy panangaro tan panangasikaso to, a singa say liknaan na sakey ya ugaw sano lakapen na maaron ateng to odino samay liknaan tayo no kaiba tayoy malet ya kaaro tayo. Siempre aliwa itan ya automatiko. Kaukolan so panaon pian nakabat tan naaro tayoy Jehova. Nagawaan tayo itan no mangigana tayoy panaon parad inagew-agew a panagbasay Biblia, pambasa ed kada isyu na Say Panag-bantayan tan Onliing!, tan arum nin publikasyon tayo.
12. Antoy kaukolan tayon gawaen pian nakabat itayo nen Jehova?
12 Baleg so nitulong na impapuson pikakasi tan maabig ya pililimog pian onaligwas tayod espiritual. (Basaen so Malaquias 3:16.) Dedengelen nen Jehova so “masimoon a pikakasi” na saray kaaro to. (1 Ped. 3:12) Singa maaron ateng, tatalinengen to ray pikakasi tayo parad tulong. Kanian, kaukolan tayoy ‘mantultuloy ed pikakasi.’ (Roma 12:12) Ag-itayo mansiansian matatken ed espiritual no anggapoy tulong na Dios. Agtayo nasarag a bukor iray pananesdes na sayan mundo. No ag-itayo mantultuloy ed pikakasi, agtayo naawat so biskeg ya iiter nen Jehova. Kasin kontento ka la ed paraan na panagpikasim, odino wala ni ray papaaligwasen mo?—Jer. 16:19.
13. Akin ya importante so pililimog ed saray agagi pian onaligwas ed espiritual?
13 Inaro nen Jehova iramay “pasasalimbengan ed sikato,” kanian anggan kabat tayo lay Dios, siansia nin regular itayon mililimog ed saray kaaro to. (Nah. 1:7, NW) Dakel so pakadismayaan ed sayan mundo, kanian maabig no miulop tayod saray agagin mamabiskeg ed sikatayo. Akin? Lapud walad kongregasyon iray totoon mamaseseg ed sikatayon “mangaro tan manggawa na maabig.” (Heb. 10:24, 25) Agtayo niyaplika itan a simbawa nen Pablo no agtayo milimog ed kongregasyon. Seguroen tayo sirin ya kaibad listaan tayo so regular ya iyatendi tan pankomento ed saray aral.
14. Akin ya aliwan pinsanan so pagbabawi tan panguman?
14 Nagmaliw itayon Kristiano lapud nagbabawi tan anguman itayo. Balet aliwan pinsanan so pagbabawi. Aliwa itayon perpekto kanian magmainomay tayoy mankasalanan. Say kasalanan et singa uleg a naynay ya akaparaan a mangetket. (Roma 3:9, 10; 6:12-14) Agtayon balot iisipen ya anggapoy kakapuyan tayo. Makapaliket, maan-anos si Jehova legan tayon panggugunaetan a labanan iray kakapuyan tayo tan gagawaen iray nakaukolan a pananguman. (Fil. 2:12; 2 Ped. 3:9) Maabig no usaren tayoy panaon tan biskeg tayo diad panlingkor ed si Jehova, imbes ya diad sarilin panlabayan tayo. Oniay insulat na sakey ya sister: “Binmaleg ak ed katuaan, balet dumay panmoriak ed si Jehova. Antakotakot ko, tan parad siak et agkon balot napaliket.” Diad inlabas na panaon, ag-inmaligwas so espiritualidad to lapud wala ray lingon agawaan to. Intuloy to: “Aliwan lapud agko inaroy Jehova, noagta sikatoy agkon talaga kabat. Balet kayari dakel a pikakasi, ginapoan koy anguman. Aliknak ya inggiya ak nen Jehova a singa ugaw, maar-aro to ak a tutulongan ed saray problemak, maas-asikaso, tan ibabangat to ray nepeg kon gawaen.”
15. Antoy iimanoen nen Jehova tan Jesus?
15 “Itultuloy yon ibaga ed totoo” so maong a balita. Satan so imbaga na anghel na Dios ed si Pedro tan arum ya apostol kayari mamilagron inkibulos dad prisoan. (Gawa 5:19-21) On, kaibad listaan tayo so sinimban pibiang ed ministeryo. Iimanoen nen Jehova tan Jesus so pananisia tan panlilingkor tayo. (Apo. 2:19) Onia ni inkuan na samay elder ya abitla nen niman: “Say panagpulong so sankaimportantian ed bilay tayo.”
16. Akin ya importantin nonoten tayon naynay so dedikasyon tayod si Jehova?
16 Nonoten tayon naynay so dedikasyon tayo. Say sankaimportantian a walad sikatayo et say relasyon tayod si Jehova. Kabat to no siopa ray kayarian to. (Basaen so Isaias 44:5.) Kanian, kaukolan tayon i-check so relasyon tayod si Jehova tan ipikasin tulongan to tayon napaelet itan. Agtayo met lilingwanan so petsa na bautismo tayo lapud ipapanonot na satan so sankaimportantian a desisyon ya ginawa tayo.
MANSUNGDO PIAN MANSIANSIAN MAAPIT ED SI JEHOVA
17. Akin ya kaukolan tayoy mansungdo pian mansiansian maapit ed si Jehova?
17 Diad samay sulat nen Pablo ed saray taga Galacia, indanet to ya importante so pansungdo. (Gal. 6:9) Kaukolan tayo met iya natan ta dakel iray problema. Balet tulongan itayo nen Jehova. Kerewey tulong na masanton espiritu To pian nalikna tayoy liket tan deen anggano wala ray problema. (Mat. 7:7-11) Isipen iya: No aasikasoen nen Jehova iray siwit, agta mas asikasoen to ka ya mangaaro tan angidedika na bilay mo ed sikato? (Mat. 10:29-31) Antokaman so problemam, agka onsusuko. Amayamay so bendisyon ya naaawat tayo lapud kabat itayo nen Jehova!
18. “Natan ta kabat [mo] lay Dios,” antoy nepeg mon gawaen?
18 No agano ka nin abautismoan, antoy gawaen mo? Itultuloy mon kabaten si Jehova pian ontatken kad espiritual. Tan no abayag ka lan abautismoan, antoy gawaen mo? Kaukolan mo nin siansian paaralemen tan padaaken so pikakabat mod si Jehova. Agtayo iisipen ya kabkabat tayo lay Jehova tan kontento ti’ lad relasyon tayod sikato. Imbes, naynay tayon i-check so espiritual ya listaan tayo pian naseguron oneelet so relasyon tayod maaron Ama, Kaaro, tan Dios tayo—si Jehova.—Basaen so 2 Corinto 13:5, 6.
