1. ¿Imanirtaq avionta manejaqkuna aeropuertopita manaraq yarqurnin ima pishinqankunata juk listawan alleq revisayanman?

MÁS seguro kaq avionkuna aeropuertopita manaraq yarquptinmi, ima pishikanqanta cuentata qokuyänampaq manejaqninkuna juk listawan 30 cösaskunata revisayan. Tsëta mana rurayaptinqa, itsa ima desgraciakunapis pasakunman. ¿Musyankiku pikunata tsë revisionta rurayänampaq mañayanqanta? ¡Más unëna manejaq kaqkunatam! ¿Imanir? Porque kikinkuna yachayanqanllaman markäkurmi manaraq yarqurnin ima pishinqankunata alleqllaqa revisayanmantsu.

2. ¿Imatataq alleq revisayänan llapan cristiänokuna?

² Avionta manejaqkuna, revisayänampaq listata precisaqpaq churayanqannöllam, markäkïniki imanö këkanqanta alleq rikänëkipaq qampis juk listata utilicëta puëdinki. Tsëllaraq bautizakushqa kar o atska watapana Testigo karpis, alläpam precisan markäkïnintsikchö y Jehoväta llapan kawënintsikwan sirwikanqantsikchö imanö këkanqantsikta alleq rikänantsik. Tsëta mana rurarninqa, Diospa kaqchö alli kënintsiktam oqrarishwan. Tsëmi Biblia kënö nimantsik: “Pipis, ‘Firmim criyicuycä’ nirga, shumag cuidacutsun jutsaman mana ishquinanpag” (1 Cor. 10:12, NTCN).

3. ¿Ima rurëtataq necesitäyarqan Galaciapita cristiänokuna?

³ Galacia markapita cristiänokunaqa alleqmi rikäyänan karqan markäkïninkuna imanö këkanqanta, y espiritual kaqchö libre këninkunatam precisaqpaq churayänan karqan. Jesusqa, kawëninta sacrificarninmi, pëman markäkoq nunakunata yanaparqan Diosta reqiyänampaq, y tsë nunakunaqa, ¡Diospa wamrankuna këmanmi chäyänan karqan! (Gal. 4:9.) Y tsënö këta mana oqrariyänampaqmi, Galacia cristiänokunaqa, judaizantes nishqankunapa yachatsikïninkunata chaskiyänantsu karqan; porque tsë judaizantekunaqa Moises qellqanqan Leytam cumplitsita tïrayaq. Pero Galacia congregacionchö këkaq mana judío kaqkunaqa manam tsë Ley ninqannötsu imëpis kawashqa kayarqan. Judío kaqkuna y  mana judío kaqkunapis Dios mandakunqatam alleq musyëta necesitäyarqan, porque Diosqa manam Moisestawan qellqatsinqan Leyta cumpliyanqampitatsu alli nunatanö rikaq.

4, 5. ¿Ima consëjotataq chaskiyarqan galatas cristiänokuna, y imanirtaq noqantsiktapis yanapamantsik?

⁴ Galatas cristiänokunata Pablu consejanqantaqa, ¿imarëkurtaq Bibliaman qellqarqan? Rasumpa cristiänokuna, Bibliapa rasumpa kaq yachatsikïninta mana dejariyänampaq, ni unë kawëninkunaman mana kutiyänampaqmi. Y tsë consëjoqa manam galatas congregacionta animananllapaqtsu karqan, sinöqa Diosta llapan sirweqninkuna alli tsarakuyänampaqmi.

⁵ Llapantsikmi yarpänantsik espiritual kaqchö esclävonö kanqantsikpita imanö librakashqa kanqantsikta, y Jehoväpa testïgon këman imanö chanqantsikta. Tsëpaqqa pensari kë ishkë tapukïkunaman: ¿Yarpankiku bautizakunëkipaq imakunata ruranqëkita? ¿Yarpankiku Diosta imanö reqinqëkita y pë imanö reqishunqëkita, tsënöpa espiritual kaqchö libre sientikunqëkita?

6. ¿Ima precisaq listapitataq yachakushun?

⁶ Manaraq bautizakurninqa, llapantsikmi isqun precisaq rurëkunata rurarquntsik, y tsëkunaqa këkan  “Bautizakunapaq imakunata ruranqantsik y Diospa kaqchö sinchikur sïguinqantsik” neq rekuadrochömi. Tsë isqun precisaq rurëkunaman yarpachakunqantsikmi yanapamäshun, jaqinqantsik cösaskunaman mana kutinapaq. Imanömi avionta manejaq nuna aeropuertopita manaraq yarqurnin revisanan listata precisaqpaq churarnin revisionta ruran, tsënöllam qampis Diospa kaqchö llapan rurëkanqëkita alleq rikänëki y kallpachakur sïguinëki.

7. ¿Pablu ima ninqantataq yarpashwan, y imanir?

⁷ Revisanampaq listam, aeropuertopita manaraq yarquptin, avionta manejaq nunata yarpätsin imata ruranampaq kaqta. Tsënöllam noqantsikpis Diospa kaqchö imanö këkanqantsikta y bautizakunqantsikpita patsë imata ruranqantsikta alleq rikëta puëdintsik. Timoteumanmi Pablu kënö nir qellqarqan: “Alli yachatsiquicunata yachatsenqaqta yarparanqui, paqtam qonqecunquiman” (2 Tim. 1:13). Tsë ‘alli yachatsiquicunaqa’ Diospa Palabranchö këkan (1 Tim. 6:3). Papelchö puntata raslla dibujarinqanmi, juk dibujanteta yanapan tsë dibüjota ushariptin imanö quedanampaq kaqta musyanampaq, tsënöllam Bibliapa rasumpa kaq yachatsikïninta puntata musyanqantsikpis yanapamantsik Diosnintsik noqantsikpita imata shuyaranqanta musyanapaq. Tsëmi, bautizakunapaq imakunata ruranqantsikta yarpärishun y rikäshun rasumpa kaqta yachakuqantsiknölla kawëkanqantsikta o manapis.

8, 9. a) ¿Imanirtaq Diospita yachakïkanqantsikta y markäkïnintsikta winëkätsishwan? b) Juk igualatsikïwan willakaramï espiritual kaqchö winëkänantsik imanir precisanqanta y tsëllachö mana quedakunqanta.

⁸ Listantsikchöqa puntachö këkan, Diosta reqikïta necesitanqantsikmi. Tsëwanmi markäkïnintsikta winatsita puëdintsik. Pero ishkan rurëkunachömi winar sïguinantsik (2 Tes. 1:3). Winëkanqantsiktaqa rikätsikuntsik kawënintsikchö cambiokunata rurarmi. Tsëmi, bautizakunqantsikpita patsë, Diospa kaqchöqa winar sïguikänantsiklla.

⁹ Diospa kaqchö winëkanqantsiktaqa juk arboltawanmi igualaratsishwan. Arbolpa matsun o watsin ruriyaq y más karuyaq ëwaptinqa, alläpa jatunmi tikrarinman. Këllaman pensarishun, Líbano markachö këkaq cedro arbolkunaqa, 12 pïsokunayoq edificiopa tamäñonmanmi chëta puëdin, matsunkunapis alläpa sinchim y firuroqnimpa mediriyaptinqa tronconqa, 12 metroskunapitapis masmi medin (Cant. de Cant. 5:15). Raslla winëta usharirqa manam tsëllachötsu quedakun, sinöqa ichikpa ichikpa winar sïguikanllam. Wata watam tronconkuna más titayan y matsunkunapis más ruriyaq yëkuyan, tsëmi yanapan alli tsarakunampaq. Tsënöllam pasakun  espiritual kaqchö winëwampis. Bibliata estudiar qallarninqa rasllam winarishwan y hasta bautizakurishwampis; itsa precursor kashwan o ima cargokunatapis chaskishwan. Cristiano mayintsikkunaqa alläpam kushikuyan Diospa kaqchö ras winëkanqantsikta rikämarnintsik. Pero watakuna pasariptinqa itsa espiritual kaqchö winëkantsikqa alläpa rikakanmannatsu. Tsënö kaptimpis, markäkïnintsikta y yachënintsiktaqa mirëkätsishwanllam “Jesucristo cawangannö nogantsicpis Tayta Dios munangannö” kanapaq (Efes. 4:13, MTCS). Tsënöpam, jeqëkämoq planta cuentalla kanqantsikpita, juk poqushqa cristiänoman tikrarintsik, imëka shumaq winashqa y tita arbolkunanö.

10. ¿Imanirtaq precisan poqushqa cristiänokunapis espiritual kaqchö winar sïguiyänan?

¹⁰ Pero espiritual kaqchö winëkantsikqa manam juk tiempollatsu karinman. Diospita yachakïta y markäkïnintsik más miranantam necesitantsik, tsënöpam Diospa Palabranqa shonquntsikchö patsakanqa (Prov. 12:3). Mëtsika cristiänokunam tsëta rurayashqa. Këllaman pensarishun, 30 watapitapis masna anciänonö yanapakoq wawqim nirqan espiritual kaqchö winar sïguïkanqanta. Kënömi nirqan: “Bibliataqa masmi kuyä. Musyatsikïninkunata y leyninkunata tukïnöpa utilizänäpaqmi más yachakö. Jina Diospita yachatsikïtapis masmi kuyä”.

11. ¿Imakunata rurartaq Jehoväta alleq reqishun?

¹¹ Jina espiritual kaqchö winëqa Jehoväman imëka Amïgontsikmannö y Teytantsikmannö witimi. Pëqa munam kuyashqa y tsapashqa sientikunantsiktam, imëka juk wambra teytan waquraptin o makallaraptin seguro sientikoqnö, o juk alli amïgontsikwan këkarnin seguro sientikunqantsiknö. Rasun kaqchöqa, Jehoväwan amigo kënintsikqa manam illaqpitatsu yuririn. Alleq reqinapaq y alläpa kuyanapaqqa atska tiemporan pasanan. Tsëmi, llapan junaqkuna Palabranta leinëkipaq tiempïkita patsätsi. Jinamampis, llapan killakuna yarqamoq Täpakoq y ¡Despertad! revistakunata lei, y wakin publicacionkunatapis.

12. ¿Imatataq ruranantsik Dioswan amigo kënintsik más sinchiyar sïguinampaq?

¹² Diospa amïgonkunaqa espiritual kaqchö winayan shonqupita patsë mañakurninmi y alli amïgokunata akrarninmi (lei Malaquías 3:16 *).  Jehoväqa llapan “mañacushqancunatapis wiyanmi” (1 Ped. 3:12). Kuyakoq teytanömi, llapan mañakunqantsikkunata Jehoväqa wiyëkan. Tsëmi Diosmanqa ‘imepis mañaquicashwan’ (Rom. 12:12). Jehová mana yanapamashqaqa, manam poqushqa cristiano këta puëdintsiktsu. Ishkitsimënintsikta munaq tukï mana alli cösaskunataqa, manam kikintsikpa kallpantsikllawanqa vencita puëdintsiktsu. Mañakïta jaqirninqa, Dios yanapakïta qomänantsikpaq kaqpitam rakikäkurishwan. ¿Diosman imanö mañakunqëkiwan kushishqaku këkanki, o alliyänëkipaq pishinqantaku cuenta qokunki? (Jer. 16:19.)

13. Diospa kaqchö winanapaq, ¿imanirtaq alläpa precisan cristiano mayintsikkunawan imëpis junto këkänantsik?

¹³ Jehoväqa alläpam kushikun “pë kaqchö tsapäkïta” asheq nunakunapita. Tsëmi Diosta reqishqana karpis, mana jaqita reunionkunaman ëwanantsik, porque tsëchöqa Diosta reqeq cristiano mayintsikkunam këkäyan (Nah. 1:7). Kë mundochö mana animakoq nunakunawan kanapa rantinqa, allichi kanman cristiano mayintsikkunawan imëpis këkänantsik. Tsëta rurarqa, ¿ima yanapakïkunatataq tarishun? Congregacionchöqa kuyakoq kanapaq y alli kaqta ruranapaq animakoq wawqikunata y panikunatam tarishun (Heb. 10:24, 25). Juknin juknin kuyanakuyänampaq hebrëokunaman Pablu cartakurqa rikätsikïkarqan, kanan witsampis cristiänokunaqa kuyakoq kayänampaq kaqta, juk shonqulla Diosta adorayänampaq kaqta y juk markalla kayänampaq kaqtam. Tsënö rasumpa kuyakïtaqa rikätsikushun cristiano mayintsikkunawan junto këkarninmi. Precisaq listëkichö, mana qonqëta apuntari reunionkunaman mana faltëta ëwanqëkita y comentanqëkita.

14. ¿Imanirtaq imëpis arrepentikïkänantsiklla y jutsa ruranqantsikkunata jaqir sïguikänantsiklla?

¹⁴ Cristiano kanapaqqa, arrepentikurqantsikmi y jutsa ruranqantsikunatam jaqirirqantsik. Tsënö kaptimpis, manam juk ishkë kutillatsu arrepentikurishwan. Porque jutsasapam kantsik, y tsëqa imëka kanimänapaq listo këkaq culëbranömi imëpis pantëkätsimantsiklla (Rom. 3:9, 10; 6:12-14). Alkäbulla këkäshun y pantanqantsikkunata altsëta procurashun. Kushikïpaqqa, Jehová pacienciakoq kanqanmi, tsëmi mana alli rurënintsikkunata vencita tïrantsik y alli cristiano kanapaq kallpachakuntsik (Filip. 2:12; 2 Ped. 3:9). Imakunachö tempontsikta y kapamanqantsikta utilicëkanqantsiktaqa alleqmi rikänantsik, y munënintsikta rurëtam jaqirinantsik. Juk cristiänam kënö nin: “Testigo familiachömi winarqä, pero Jehoväpitaqa jukläyatam imëpis pensarqä. Pëman pensarqa mantsaqmi kä y imëpis mana kushitsinäpaq kaqtam pensaq kä”. Tiempowanqa tukï problëmakunapa pasarninmi kë paniqa Diospita rakikar qallëkurqan. Jina kënömi nirqan: “Jehovätaqa kuyarqämi, pero manam alleqllaqa reqirirqätsu. Tsënö kaptimpis, shonqöpita patsë mana dejëta pëman mañakuptimi, llapan pensanqäkuna cambiarirqan. Imëka wambratanö makïpita tsarirkur Jehová pushëkämanqantam sientirirqä, problëmakunata altsanäpaqmi yanapamarqan y kuyakïwanmi imata ruranäpaq kaqtapis rikätsimarqan”.

15. ¿Imatataq rikëkäyan Jesuswan Teytan?

¹⁵ Diospa alli willakïninta ‘nunacunata willapëkayë’. Tsënömi nirqan Jehoväpa angelnin Pëdrutawan wakin apostolkunata carcelpita librarirnin (Hech. 5:19-21). Llapan semänakuna Diospita yachatsikïpis listëkichömi këkänan. Jesuswan Teytanqa markäkïnintsikchö y Diospita yachatsikïchö imanö këkanqantsiktam rikëkäyan (Apoc. 2:19). Parlanqantsik anciänom kënö nin: “Kawanäpaqqa, Diospita yachatsikïraqmi alläpa precisan”.

16. ¿Imanirtaq yarpachakushwan Jehovällata sirwinapaq awnikunqantsikman?

¹⁶ Diosllata sirwinëkipaq awnikunqëkiman yarpachakï. Imapitapis más precisaqqa Jehoväwan alli kënintsikmi. Jehoväqa pëpa kaqkunata reqinmi  (lei Isaías 44:5 *). Diosman mañakurnin alleq rikë pëwan alli këniki imanö këkanqanta. Y tsënölla yarpachakï ima junaq bautizakunqëkita; tsëta rurarmi qonqankitsu bautizakunqëki imapitapis más precisaq kanqanta.

17. ¿Imanirtaq alli tsarakoq këta necesitantsik Jehoväpita mana rakikäkurinapaq?

¹⁷ Galatas cristiänokunaman cartata apatsinqanchömi, apóstol Pablu parlarqan alli tsarakoq kë alläpa precisanqanta (Gal. 6:9). Y kanan witsampis alli tsarakoq këqa alläpam precisan. Tukï mana allikunapam pasanki, pero Jehoväqa yanapashunkim. Mañakïta jaqitsu santo espïritunta. Allim sientikunki sufrikanqëkita ushakäratsir, alläpa kushikïta qoshuptiki; llakikïnikita ushakäratsir, yamë këta qoshuptiki (Mat. 7:7-11). Këllaman pensari: hasta pishqukunatapis Jehoväqa cuidanmi, tsëqa, ¿manatsuraq qamtapis cuentapaq churashunki, pëta kuyëkarnin pëllata sirwinëkipaq awnikushqa këkaptikiqa? (Mat. 10:29-31.) Imëkata pasarpis ama qepaman kutitsu ni vencishunëkita permititsu. ¡Jehoväpa reqishqan karmi tukï bendicionkunata chaskïkantsik!

18. ‘Diosnintsicta reqirishqana’ këkarqa, ¿imatataq ruranëki?

¹⁸ Tsëllaraq Diosta reqishqa kar y bautizakushqana karqa, ¿imataraq rurankiman? Jehoväta más reqitam tïranëki, y más poqu cristiano këtam procuranëki. ¿Y atska watakunana bautizakushqa karqa? Jina Jehoväpitam más yachakïta procuranëki. Y Jehoväwan alli kënikitaqa mana kaqpaq ama churaritsu. Tsëpa rantinqa, listëkita imëpis revisë, kuyakoq Teytantsik, Amïgontsik y Diosnintsik Jehoväwan imanö këkanqëkita rikänëkipaq (lei 2 Corintios 13:5, 6).