1. Xiñee naquiiñeʼ guchá ca piloto ca ti lista ante guiasanecaʼ ti avión.

 ÑEE nannuʼ xi runi ti piloto ante guiasané ti avión la? Ruchabe ti lista ra zeeda jma de treinta cosa ni naquiiñeʼ gúʼyabe ante guireebe. Pa qué gúnibe ni la? zándaca jma nagueenda gueeda guizaacabe xiixa desgracia. Ñee nannuʼ tuu nga ca piloto ni jma rinábacabe guchá lista riʼ cada biaje chiné ti avión la? ¡Cani maʼ napa stale iza de rizané avión! Xiñee yaʼ. Cumu maʼ xadxí nga de rúnicabe dxiiñaʼ riʼ la? zándaca guiníʼ íquecabe maʼ nánnacabe stale ne maʼ cadi caquiiñeʼ guchácabe lista que.

2. Xi naquiiñeʼ guni cada xpinni Cristu gatigá.

² Cásica runi ti piloto ni nuu xpiaaniʼ ante guiasané ti avión, laanu laaca casi ora ñápanu ti lista ra zeeda caadxi cosa ni naquiiñeʼ guidúʼyanu para gánnanu pa nuu fe stinu naguidxi ti gacaneni laanu ora tiidinu xiixa guendanagana. Pa deruʼ guyuunísanu o pa maʼ napa stale iza, gatigá naquiiñeʼ guidúʼyanu pabiáʼ naguidxi nuu fe stinu ne ximodo cayuni adorarnu Jiobá. Pa qué gúninu ni la? zándaca chuʼ xiixa guendanagana ni guxheleʼ laanu de Dios. Nga runi caguixhená Biblia laanu: «Pa nuu tu na ma zuhuaa chaahui la? guuya gá qué guiaba» (1 Cor. 10:12).

3. Xi caquiiñeʼ guni ca xpinni Cristu de Galacia.

³ Pur guendaguti stiʼ Jesús bixeleʼ ti neza para ca binni ni gapa fe laabe ti zacá ganda gunibiáʼ chaahuicaʼ Dios ne ¡gueeda gácacaʼ xiiñiʼ Dios! Ngapeʼ nga ni caquiiñeʼ guni ca xpinni Cristu de Galacia que, guʼyaʼ chaahuicaʼ pabiáʼ naguidxi nuu fe sticaʼ ne gusisácacaʼ guiráʼ ni maʼ bisiidiʼ Dios laacaʼ (Gál. 4:9). Caadxi de ca xpinni Cristu que caniʼcaʼ naquiiñeʼ chinanda binni Ley stiʼ Moisés para chuulaʼdxiʼ Dios modo runi adorar. Peru Dios maʼ cadi caquiiñeʼ Ley que ne laaca qué huayuu dxi iquiiñeʼ ca xpinni Cristu de sti guidxi ni. Ngue runi, ca  judíu ne ca binni de sti guidxi caquiiñeʼ guiniisicaʼ lu stiidxaʼ Dios, ne para nga naquiiñeʼ guiénecabe maʼ cadi caquiiñeʼ chinándacabe Ley stiʼ Moisés para guʼyaʼ Dios laacabe casi binni runi ni jneza.

4, 5. Xi conseju bidii Pablu ca binni de Galacia, ne xiñee risaca carta riʼ para laanu.

⁴ Xiñee biaana conseju bidii apóstol Pablu ca binni de Galacia que lu Biblia. Biaanani para gacaneni cani dxandíʼ xpinni Cristu ti gusisácacaʼ guiráʼ ni rusiidiʼ Biblia ne cadi guibiguétacaʼ lu guiráʼ ni bíʼnicaʼ dxiqué. Ngue runi gudxi Jiobá apóstol riʼ gucaa ti carta para uguu gana guiráʼ ca xpinni Dios ti ganda guzuubacaʼ diidxaʼ, racá ridúʼyanu cadi para ca binni ridagulisaa si ni guyuu Galacia que nga gucuá carta riʼ.

⁵ Galán guietenaláʼdxinu ximodo bireʼnu lu gueelacahui ra nuu stale binni ne xiñee gudixhe íquenu gácanu testigu stiʼ Jiobá. Guníʼ ique lu guiropaʼ guendarinabadiidxaʼ riʼ: Ñee rietenaláʼdxiluʼ xi bíʼniluʼ ante chuʼnísaluʼ la? Ñee rietenaláʼdxiluʼ ximodo binibiaʼluʼ Dios ne xi biʼniʼ sentirluʼ ora binibiaʼbe lii casi xhamígube la?

6. Xi zazíʼdinu lu tema riʼ.

⁶ Nuu gaʼ cosa ni rúninu para ganda chuʼnu ndaaniʼ xquidxi Dios, laacani nga zeeda gácacani casi ti lista ra cá xi rinabaʼ Dios gúninu. Biiyaʼ cuadru ra na:  «Cani naquiiñeʼ gúninu para chuʼnísanu ne para cadi gusaana de guiniisinu lu stiidxaʼ Dios». Pa guietenaláʼdxinu cani gatigá la? zacanécani laanu para gaca fe stinu jma naguidxi ti cadi chuuláʼdxinu guibiguétanu lu ca cosa ni runi binni guidxilayú. Cásica ruuyaʼ ti piloto lista stiʼ ante guiasané ti avión, laanu laaca naquiiñeʼ guidúʼyanu pa cayúninu xhiiñaʼ Jiobá jneza, zacá nga casi ora ñuuyaʼ chaahuinu lista ra zeeda ca cosa ni rinabaʼ Dios laanu ti cadi guixélenu de laabe.

7. Xii nga «ni dxandíʼ» ni naquiiñeʼ chinándanu, ne xiñee.

⁷ Lista ni ruchá piloto que rusietenaláʼdxini laabe xi naquiiñeʼ gúnibe ante guiasanebe ti avión. Laanu laaca naquiiñeʼ guʼyaʼ chaahuinu pabiáʼ ziniisinu lu stiidxaʼ Dios ne pa cayúninu guiráʼ ni rinábabe laanu dede dxi guyuunísanu. Pablu bicaa ca diidxaʼ riʼ ra nuu Timoteu: «Yenanda ni bisiide lii purti nga nga ni dxandíʼ. Cadi ixele lu de ni runi cre nu, nin usaanu de ganaxhii lu binni. Zanda ganaxhii saa nu purti nuu né nu Cristu Jesús tobi si» (2 Tim. 1:13). Lu Stiidxaʼ Dios nga zeeda guiráʼ «ni dxandíʼ» (1 Tim. 6:3). Cásica zanda ganna ti pintor ximodo chiguiaana ti dibuju stiʼ ni caʼruʼ guiluxe chaahuiʼ la? cani rusiidiʼ Biblia zanda gacanécani laanu gánnanu xi guiráʼ rinabaʼ Dios gúninu. Nga runi, guietenaláʼdxinu xi guiráʼ bíninu ante chuʼnísanu ne guiduʼyaʼ chaahuinu pa zinándanu guiráʼ ni rusiidiʼ Biblia.

8, 9. 1) Xiñee naquiiñeʼ guizíʼdinu jma de Dios ne gápanu fe. 2) Xiñee risaca guiniisinu lu stiidxaʼ Dios, ne ximodo nga zeeda gácani casi riniisi ti yaga.

⁸ Primeca ni rúninu nga rizíʼdinu de Dios ne rápanu fe. Peru cadi naquiiñeʼ guiaanadxinu racá (2 Tes. 1:3). Nga runi, despué de chuʼnísanu naquiiñeʼ gúninu stipa pur chuʼnu jma gaxha de Dios ti cadi gusaana de guiniisinu lu stiidxabe.

⁹ Naquiiñeʼ guiniisinu lu stiidxaʼ Dios, cásica riniisi ti yaga. Nabé ridxagayaa binni pabiáʼ naroʼbaʼ raca ti yaga ora nabé gueteʼ nuu xcu ni. Quíxhenu ti ejemplu: nuu caadxi yaga cedru naroʼbaʼ lu Líbano, risoo cani biaʼ 37 metru, nadipaʼ raca xcu cani ne nabé riaazini dede gueteʼ ne raca tiʼxhiʼ yaga ca biaʼ 12 metru (Cant. de Cant. 5:15). Ora nahuiiniʼ yaga riʼ rihuinni pabiáʼ nagueenda ziniisi, peru ora maʼ naroʼbaʼ ni maʼ qué rihuinni pa ziniisi ni. Cada iza tiidiʼ raca tiʼxhiʼ ni jma naroʼbaʼ ne maʼ ruchiaanáʼ xcu ni, ne  zacá ruzuhuaa ni jma dxiichiʼ. Ngaca nga ni rizaaca ora maʼ ziniisinu lu stiidxaʼ Dios. Ora guzulú guʼndanécabe laanu Biblia la? rihuinni pabiáʼ nagueenda ziniisinu dede ridxiña dxi chuʼnísanu; ne zándaca gueeda gácanu precursor o guicaanu xcaadxi dxiiñaʼ risaca ndaaniʼ xquidxi Dios. Ne riecheʼ guiráʼ ca binni ridagulisaa ora ruuyacaʼ pabiáʼ nagueenda ziniisinu. Peru ra tiidiʼ iza zándaca maʼ qué zahuínnipeʼ ni. Neca zacá, cadi naquiiñeʼ gusaana de gápanu fe ne gunibiáʼ chaahuinu Dios, purtiʼ «zacá zaniisi nu lu stiidxa Cristu dede idxiña dxi gaca nu casi laa» (Efes. 4:13). Ora gúninu stipa pur guiniisinu lu stiidxa Dios, maʼ qué zácanu casi ti biitu huiiniʼ, sínuque zácanu casi ti yaga nasoo ne naroʼbaʼ.

10. Xiñee caquiiñeruʼ guiniisi ca xpinni Cristu lu stiidxaʼ Dios neca maʼ xadxí de nuucaʼ ndaaniʼ xquídxibe.

¹⁰ Peru cadi naquiiñeʼ gusaana de guiniisinu. Caquiiñeʼ guizíʼdinu jma de Dios ne gaca fe stinu jma naguidxi, zacá nga casi ora nuzuhuaʼnu jma dxiichiʼ lu Stiidxaʼ Dios (Prov. 12:3). Stale xpinni Cristu maʼ biʼniʼ zacá. Guzéʼtenu de ti Testigu ni maʼ ziné jma de treinta iza de naca binnigola, laa bidii cuenta ziniisi lu stiidxaʼ Dios cada dxi tiidiʼ. Laabe guniʼbe: «Jma rusisacaʼ guiráʼ ni rusiidiʼ Biblia yanna. Gatigá ridxelaʼ xcaadxi modo guneʼ ni na ca principiu ne ca ley stiʼ Biblia. Ne cada dxi tiidiʼ jma riuuladxeʼ gucheecheʼ diidxaʼ».

11. Xi naquiiñeʼ gúninu para gunibiáʼ chaahuinu Jiobá ra zidiʼdiʼ dxi.

¹¹ Pa riuuláʼdxinu guiniisinu casi xpinni Cristu la? naquiiñeʼ chuʼnu gaxha de Jiobá ne guidúʼyanu laabe casi ti Xhamígunu ne Bixhózenu. Laabe racaláʼdxibe guni sentirnu nuu tu nadxii laanu ne qué zácanu gastiʼ, casi runi sentir ti baʼduhuiiniʼ ora maʼ nuu ndaaniʼ náʼ bixhoze o casi runi sentirnu ora maʼ nuunu gaxha de tuuxa ni dxandíʼ xhamígunu. Peru para gaca xhamígunu Jiobá zacá la? naquiiñeʼ tiidiʼ tiempu ti ganda gunibiáʼ chaahuinu laabe ne gannaxhiinu laabe. Nga runi, gudixhe ique cueeluʼ tiempu para gúʼndaluʼ Stiidxabe guiráʼ dxi. Laaca biindaʼ guiráʼ revista Torre stiʼ ni rapa ne ¡Despertad!, ne xcaadxi libru ne folletu ni nápanu.

12. Xi naquiiñeʼ gúninu para gaca xhamígunu Dios jma cada dxi tiidiʼ.

¹² Ca xhamigu Dios laaca riniisicaʼ lu stiidxabe purtiʼ runi orarcaʼ de guidubi ladxidoʼcaʼ ne ridxaagacaʼ binni runi ni jneza. Biblia na: «Dxiqué, cani ridxibi Jiobá guníʼnecaʼ xcaadxi binni, cada tobi guniʼné  xcompañeru, ne bicaadiaga chaahuiʼ Jiobá laacabe. Ne nezalube bizulú gucuá lu ti libru lá cani ridxibi Jiobá ne lá cani riníʼ ique lu labe para guietenaláʼdxibe laacaʼ» (Malaquías 3:16). «Rucaa diaga [Jiobá] laaca ora iníʼ né ca laabe.» (1 Ped. 3:12.) Cásica rucaadiaga bixhoze binni laa, zacaca nga rucaadiaga Jiobá ca oración stinu ne rúnibe ni purtiʼ nadxiibe laanu. Nga runi cadi naquiiñeʼ gusaananu de guinínenu Dios (Rom. 12:12). Qué zanda gaca xhamígunu Dios pa qué gacanebe laanu. Nabé naroʼbaʼ ca guendanagana cadídinu tiempu riʼ, nga runi qué zanda gudxíʼlunu cani stúbisinu. Pa gusaana de guni orarnu la? maʼ qué zápanu stipa ni racalaʼdxiʼ Dios gudii laanu. Ñee riníʼneluʼ Jiobá casi riníʼneluʼ tuuxa ni nabé xhamíguluʼ la? o caquiiñeʼ guchaaluʼ modo riniʼluʼ ora maʼ cayuni orarluʼ (Jer. 16:19).

13. Xiñee naquiiñeʼ guidxaaganu ca xpinni Cristu para ganda guiniisinu lu stiidxaʼ Dios.

¹³ Jiobá riuulaʼdxiʼ ni runi guiráʼ «cani ruyubi guilá ra nuube». Nga runi, neca maʼ runibiaʼnu Dios, naquiiñeʼ guidagulisaanenu ca xpinni Cristu, purtiʼ laaca runibiáʼcabe Jiobá (Nah. 1:7). Ndaaniʼ guidxilayú riʼ nuu stale cosa ni zanda cuee gana laanu, peru pa guidxaaganu ca bíʼchinu ne ca bizáʼnanu la? ziuʼnu gana. Xi ndaayaʼ zacaanu pa gúninu nga yaʼ. Lade ca binni ridagulisaa zadxaaganu binni ni zaguu gana laanu para gannaxhiinu stobi ne laaca zacanécabe laanu gúninu ni jneza (Heb. 10:24, 25). Qué zanda diʼ chinándanu conseju ni bicaa Pablu ra nuu ca hebreu pa qué cueenu tiempu para chuʼnu tobi si ne guidagulisaanenu ca xpinni Cristu. Nga runi, bicaa ique cheluʼ guiráʼ guendaridagulisaa ne guicábiluʼ lúcani, nga nga stobi de ca cosa ni zeeda lu lista stiluʼ.

14. Xiñee caquiiñeruʼ gaca arrepentirnu ne gusaananu ca cosa malu bíninu dxiqué.

¹⁴ Para gúcanu xpinni Cristu gupa xidé guca arrepentirnu ne bisaananu ca cosa malu bíninu dxiqué. Peru cadi naquiiñeʼ gusaananu de gaca arrepentirnu. Guendaruchee gulenenu zeeda gácani casi ti beendaʼ ni cabeza si pora guquiichiʼ laanu (Rom. 3:9, 10; 6:12-14). Chuʼnu cuidadu ne cadi guiníʼ íquenu qué zucheʼnu. Riéchenu gánnanu qué ridxiichiné Jiobá laanu nagueenda laga cayúninu stipa pur guixélenu de ca cosa ni zándaca gucaa laanu gucheʼnu ne guchaʼnu pa caquiiñeʼ gúninu ni (Filip. 2:12; 2 Ped. 3:9). Nabé risaca iquiiñenu tiempu ne stipa stinu né guendabiaaniʼ ne cadi guicá íquenu puru si ni riuuláʼdxinu. Ti gunaa xpinni Cristu bicaa: «Biniiseʼ ndaaniʼ xquidxi Dios, peru qué ñuuyaʼ Jiobá cásica ruuyaʼ xcaadxi xpinni Cristu laabe. Ridxibeʼ ora guiníʼ iqueʼ laabe ne rabeʼ qué ziuu dxi chuuláʼdxibe ni runeʼ». Qué ñanda ñaca xhamígube Jiobá pur guiráʼ ni gudíʼdibe. Laabe guniʼbe: «Cumu qué ñannaxhieeʼ Jiobá de guidubi ladxiduáʼ la? qué ñanda ñunebiaʼyaʼ laabe modo racaláʼdxibe. Peru despué maʼ bineʼ orar laabe de guidubi ladxiduáʼ ne chaahuiʼ chaahuiʼ bichaaʼ modo naa. Óraque nga bineʼ sentir naazeʼ Jiobá nayaʼ casi rinaazecabe náʼ ti baʼduhuiiniʼ, cayacanebe naa gudxieeluáʼ ca guendanagana stinneʼ, qué nusaana de ñannaxhiibe naa ne biluiʼbe naa xi naquiiñeʼ guneʼ».

15. Xi ruuyaʼ Jesús ne Jiobá.

¹⁵ «Lagüíʼ né binni stiidxa» Dios. Nga nga ca diidxaʼ gudxi ti ángel stiʼ Dios Pedru ne xcaadxi apóstol que bireesicaʼ de ra deguyoocaʼ (Hech. 5:19-21). Stobi de ca cosa ni zeeda lu lista stiluʼ nga gucheecheluʼ diidxaʼ guiráʼ semana. Jesús ne Jiobá ruuyacaʼ pabiáʼ naguidxi fe stinu ne pabiáʼ risaca para laanu gucheechenu diidxaʼ (Apoc. 2:19). Binnigola ni bizéʼtenu lu tobi de ca párrafo que guníʼ: «Gucheechenu diidxaʼ nga ni naquiiñeʼ gúninu lu xquendanabáninu».

16. Xiñee naquiiñeʼ guiníʼ íquenu dxi bidiʼnu laanu Jiobá.

¹⁶ Guníʼ ique dxi bidiiluʼ lii Jiobá. Ni jma risaca para laanu nga chuʼnu gaxha de Jiobá.  Laabe nánnabe tuu nga ca xpínnibe. Biblia na: «Tobi zaníʼ: “Xpinni Jiobá naa”. Ne stobi que zacaa lá Jacob, ne stobi zucaa lu náʼ: “Stiʼ Jiobá naa”. Ne Israel nga gaca apellidu stiʼ» (Isaías 44:5). Biiyaʼ ximodo nuuluʼ né Jiobá ne biʼniʼ orar para gacanebe lii chuʼluʼ jma gaxha de laabe. Laaca naquiiñeʼ guiníʼ íqueluʼ dxi guyuunísaluʼ; zacá qué ziaandaʼ lii maʼ bidiiluʼ lii Jiobá ne nga nga ni jma risaca ni bíʼniluʼ.

17. Xiñee caquiiñeʼ guni huantarnu para chuʼnu gaxha de Jiobá.

¹⁷ Lu carta ni bicaa Pablu ra nuu ca xpinni Cristu de Galacia, bisihuínnibe pabiáʼ risaca guni huantar binni (Gál. 6:9). Laaca naquiiñeʼ guni huantarluʼ ca dxi riʼ. Zadíʼdiluʼ guendanagana, peru zacané Jiobá lii. Cadi gusaana de guinábaluʼ espíritu santu. Laabe zacanebe lii para chuʼluʼ nayecheʼ ne gatadxí ladxidoʼloʼ, neca qué ganda gaca chaahuiʼ xiixa ni cadíʼdiluʼ (Mat. 7:7-11). Guníʼ ique ndiʼ: rapa Jiobá guiráʼ maniʼ huiiniʼ ripapa. Yanna, ñee qué zápabe lii pa nadxiiluʼ laabe ne pa maʼ bidiiluʼ laabe xquendanabániluʼ la? (Mat. 10:29-31.) Intiica guendanagana tiidiluʼ, qué chuʼ dxi guiábayuluʼ. ¡Nabé stale ndaayaʼ nga ricaanu purtiʼ ruuyaʼ Jiobá laanu casi xhamigu!

18. Xi naquiiñeʼ gúniluʼ yanna ra maʼ runibiaʼluʼ Dios.

¹⁸ Yanna, xi naquiiñeʼ gúniluʼ pa deruʼ binibiaʼluʼ Dios ne maʼ guyuunísaluʼ yaʼ. Cadi gusaana de gunibiáʼ chaahuiluʼ Jiobá ne guiniisiluʼ lu stiidxabe. Peru pa maʼ xadxí de guyuunísaluʼ yaʼ. Laaca naquiiñeʼ gucaa íqueluʼ guiéneluʼ jma ne gunibiáʼ chaahuiluʼ Jiobá. Cadi guiníʼ íqueluʼ maʼ runibiaʼluʼ Dios ne cadi caquiiñeruʼ gunibiaʼluʼ laabe jma. Gatigá naquiiñeʼ gúʼyaluʼ lista stiluʼ para cadi guixéleluʼ de Jiobá, Bixhózenu, Xhamígunu ne Dios stinu (biindaʼ 2 Corintios 13:5, 6).