Zeova, nou landrwa reste
Zeova, nou landrwa reste
“O Zeova, ou menm ou en vre landrwa reste pour nou, pour zenerasyon apre zenerasyon.”—PS. 90:1.
KI OU POU REPONN?
Ki mannyer Zeova ti vin “en vre landrwa reste” pour bann zonm fidel dan lepase?
Ki nou kapab aprann atraver legzanp fidelite Abraam?
Konman nou kapab montre ki Zeova i nou “vre landrwa reste”?
1, 2. Ki mannyer bann serviter Bondye i santi anver sa lemonn konmela e dan ki sans zot annan en lakour?
ESKI ou santi ou alez dan sa lemonn konmela? Si non, ou pa tousel! Tou dilon listwar, tou dimoun ki ti vreman kontan Zeova ti santi zot parey bann etranze dan sa lemonn. Par egzanp, ler zot ti bezwen sanz landrwa reste detanzaot dan pei Kanaan, bann adorater fidel Bondye ti “deklare [“an piblik,” NW] ki zot ti bann etranze e bann egzile lo later.”—Ebr. 11:13.
2 Pareyman, bann Kretyen swazir ki “sitwayen lesyel” i konsider zot lekor konman bann “etranze ek vwayazer” dan sa lemonn. (Fili. 3:20; 1 Pyer 2:11) “Lezot mouton” Kris osi “pa fer parti lemonn parey [Zezi pa ti] fer parti lemonn.” (Zan 10:16, NW; 17:16) Kantmenm sa, pep Bondye i annan en “lakour.” Anfet, nou annan proteksyon ki nou gannyen dan sa lakour kot i annan lanmour e kot nou santi nou pli an sekirite. Sa kalite proteksyon dan sa lakour, nou vwar li atraver nou lizye lafwa. Moiz ti ekrir: “O Zeova, ou menm ou en vre landrwa reste pour nou, pour zenerasyon apre zenerasyon.” * (Ps. 90:1) Ki mannyer Zeova ti prouve ki i ti “en vre landrwa reste” pour son bann serviter fidel dan letan lontan? Ki mannyer i “en vre landrwa reste” pour son pep ozordi? Ki mannyer i pou montre ki i sa sel landrwa reste an sekirite a lavenir?
ZEOVA, “EN VRE LANDRWA RESTE” POUR SON BANN SERVITER LONTAN
3. Avek kwa Zeova i ganny konpare dan Psonm 90:1 e akoz?
3 Par ler, Labib i konpar Zeova avek bann keksoz ki nou kapab vwar pour ki nou pli byen konpran son personnalite. Par egzanp, Psonm 90:1 i konpar Zeova avek en “landrwa reste” oubyen en lakour. Ler nou mazin en lakour, nou mazin en landrwa kot i annan lanmour, lape ek proteksyon. Akoz Zeova i ganny konpare avek en lakour? Labib i dir ki Zeova i lanmour. (1 Zan 4:8) Zeova i osi en Bondye lape, ki fer son bann serviter fidel “viv an sekirite.” (Ps. 4:8) Par egzanp, annou vwar ki mannyer i ti tret bann patrias fidel, komansan par Abraam.
4, 5. Ki mannyer Zeova ti montre ki i ti “en vre landrwa reste” pour Abraam?
4 Nou zis kapab imazinen ki mannyer Abraam, ki sa letan ti apel Abram ti santi ler Zeova ti dir li: “Kit ou pei, e ou bann fanmir . . . e al dan sa pei ki mon pou montre ou.” Si Abraam ti trakase, san dout sa ki Zeova ti dir li apre ti soulaz li: “Mon pou fer ou vin en gran nasyon e mon pou beni ou e mon pou fer ou non gran . . . E mon pou beni sa bann ki beni ou, e sa enn ki swet ou maler mon pou modi li.”—Zen. 12:1-3.
5 Anliny avek sa parol, Zeova li menm ti deside pour vin en landrwa reste ki an sekirite pour Abraam ek son desandans. (Zen. 26:1-6) Zeova ti akonplir son promes. Par egzanp, i ti anpes Faraon Lezip ek Abimelek, lerwa Gerar vyol Sara e touy Abraam. I ti protez Izaak ek Rebeka dan sa menm fason. (Zen. 12:14-20; 20:1-14; 26:6-11) Nou lir: “[Zeova] pa ti les okenn imen fer zot ditor, i ti reprimann bann lerwa akoz zot, an dizan: ‘Pa tous sa bann ki mon’n swazir, e pa fer okenn keksoz mal mon bann profet.’”—Ps. 105:14, 15.
6. Ki Izaak ti demann Zakob pour fer e ki mannyer Zakob ti santi?
6 Sa bann profet ti enkli Zakob, pti zanfan Abraam. Kan i ti’n ariv ler pour Zakob marye, son papa Izaak ti dir li: “Ou pa devret pran en madanm parmi bann fiy Kanaan. Leve, al Padan-Aram kot lakaz Betouel papa ou manman e pran en madanm pour ou parmi bann fiy Labann.” (Zen. 28:1, 2) Zakob ti deswit obeir Izaak. I ti kit son fanmir deryer Kanaan kot i ti santi li an sekirite e vwayaz li tousel plizyer santenn kilomet pour al dan rezyon Arann. (Zen. 28:10) Petet i ti mazinen: ‘Ki kantite letan mon pa pou la? Eski mon tonton pou akey mwan byen e donn mwan en madanm ki annan lakrent pour Bondye?’ Si Zakob ti annan okenn traka, san dout tousala ti disparet ler i ti ariv Louz, apepre 100 kilomet avek Beer-Seba. Ki ti arive Louz?
7. Ki mannyer Zeova ti reasir Zakob dan en rev?
7 Zeova ti aparet avek Zakob dan en rev ler i ti Louz, an dizan: “La mon la avek ou e mon pou vey lo ou tou dilon semen kot ou pe ale e mon pou fer ou retourn lo sa later, akoz mon pa pou kit ou ziska ki mon’n vreman fer sa ki mon’n dir ou.” (Zen. 28:15) Pa sa zoli parol ti’n bezwen reasir e rekonfort Zakob! Eski ou kapab vwar li apre sa pe marse, enpasyan pour vwar konman Bondye ti pou akonplir Son promes? Petet ou pou kapab konpran santiman Zakob si ou’n kit ou lakour pour servi dan en lot pei. Me san okenn dout, ou’n vwar konman Zeova in pran swen avek ou.
8, 9. Dan ki fason Zeova ti en “vre landrwa reste” pour Zakob e ki nou kapab aprann atraver sa?
8 Ler Zakob ti ariv Arann, son tonton Labann ti byen akeyir li e pli tar i ti donn li Lea ek Rasel konman madanm. Me avek letan, Labann ti esey profit lo Zakob par sanz son lapey dis fwa. (Zen. 31:41, 42) Zakob ti andir tou sa bann lenzistis avek lasirans ki Zeova ti pou kontinyen pran swen avek li, e se sa ki Zeova ti fer. Anfet, ler Bondye ti demann Zakob pour retourn Kanaan, sa patrias ti’n ganny “bann gran troupo ek bann servant madanm ek serviter zonm, e bann samo ek bourik.” (Zen. 30:43) Avek bokou lapresyasyon, Zakob ti priye: “Mon pa merite ganny tou sa labonte leker ek fidelite ki ou’n demontre anver ou serviter, akoz zis avek mon baton mon ti travers Zourden e aprezan mon’n vin de kan.”—Zen. 32:10.
9 Wi, pa sa lapriyer ki Moiz ti fer i vre: “O Zeova, ou menm ou en vre landrwa reste pour nou, pour zenerasyon apre zenerasyon”! (Ps. 90:1) Sa parol i aplik pour nou osi, parski avek Zeova “napa menm lonbraz en sanzman,” alor i touzour sa landrwa reste kot i annan lanmour ek sekirite pour son bann serviter fidel. (Zak 1:17) Annou vwar ki mannyer.
ZEOVA, NOU VRE “LANDRWA RESTE” OZORDI
10. Akoz nou kapab asire ki Zeova i ankor en landrwa reste ki an sekirite pour son serviter?
10 Imazin sa: Ou pe donn temwannyaz ankour kont en lorganizasyon kriminel. Sef antouk sa lorganizasyon i byen malen, pwisan, e i en manter enfini e en mertriye. Ki mannyer ou ti pou santi ou an deor lakour a lafen dizour? An sekirite? Ditou! Vreman, ou ti pou annan byen rezon pour demann lakour pour ganny proteksyon. Sa legzanp i montre sityasyon ki bann serviter Zeova i ladan. Avek lardyes ek kouraz, zot temwanny an faver Zeova e devwal son pli gran lennmi, Satan! (Lir Revelasyon 12:17.) Me eski Satan in reisi fer pep Bondye reste trankil? Non! O kontrer, nou kontinyen progrese spirityelman e sa in posib selman akoz Zeova i ankor nou refiz, “en vre landrwa reste” pour nou, sirtou la pandan sa bann dernyen zour. (Lir Izai 54:14, 17. *) Par kont, Zeova pa pou kapab vin en landrwa reste ki an sekirite pour nou si nou les Satan atir nou ver li.
11. Ki leson nou kapab aprann avek bann patrias?
11 Annou ankor enn fwa aprann en leson avek bann patrias. Menm si zot ti reste Kanaan, zot ti reste separe avek bann zabitan sa pei, akoz zot ti ay zot bann move fason imoral. (Zen. 27:46) Zot ti viv dapre bann bon prensip, e alor zot pa ti bezwen ganny dir ki pour fer oubyen ki zot pa ti devret fer. Sa ki zot ti konnen lo Zeova ek son personnalite ti ase pour zot. Vi ki Zeova ti zot landrwa reste, zot pa ti anvi koste pli pros ki zot kapab avek sa lemonn, plito zot ti reste byen lwen avek li. Pa zot in kit en bon legzanp pour nou! Eski ou fer zefor pour imit legzanp bann patrias fidel, ler ou swazir ou bann zanmi oubyen ou divertisman? Malerezman, serten dan kongregasyon i montre ki ziska en serten degre, zot santi zot konfortab dan lemonn Satan. Si ou santi ou koumsa, petet menm en ptigin, priy lo la. Rapel byen, sa i lemonn Satan kot napa lanmour e dimoun i egois parey li menm.—2 Kor. 4:4; Efe. 2:1, 2.
12. (a) Ki mannyer Zeova i pran swen avek son fanmir spirityel? (b) Ki mannyer ou santi anver sa bann provizyon?
12 Pour nou kapab reisi reziste bann riz Dyab, nou bezwen servi byen bann provizyon spirityel ki Zeova i donn son fanmir dan lafwa, setadir bann ki fer li vin zot landrwa reste. Sa bann provizyon i enkli bann renyon Kretyen, ladorasyon fanmir ek bann zonm konman “kado” andotmo, bann berze ki Bondye in swazir pour rekonfort e donn nou sipor anmezir nou lalit avek bann defi dan lavi. (Efe. 4:8-12) Frer George Gangas ki ti en manm lo Konsey Direkter pour plizyer lannen ti ekrir: “Ler mon avek [pep Bondye] mon santi konmsi mon dan lakour avek mon fanmir dan en paradi spirityel.” Eski ou santi parey?
13. Ki leson enportan nou kapab aprann dan Ebre 11:13?
13 En lot kalite ki bann patrias ti demontre ki vo lapenn imite i zot lanvi pour reste diferan avek lezot dimoun otour zot. Parey nou’n vwar dan paragraf 1, zot ti “deklare [“an piblik,” NW] ki zot ti bann etranze e bann egzile lo later.” (Ebr. 11:13) Eski ou determinen pour reste diferan avek lezot? I vre, i pa toultan fasil, me avek led Bondye ek sipor ou bann frer ek ser Kretyen, ou pou reisi. Zis mazinen, ou pa tousel. Tou bann ki anvi servi Zeova i bezwen lite! (Efe. 6:12) Kantmenm sa, nou kapab reisi ganny laviktwar si nou met nou konfyans dan Zeova e fer li vin nou landrwa reste ki an sekirite.
14. Ki “lavil” bann serviter Zeova ti pe espere?
14 Sa osi i enportan: Imit Abraam par reste konsantre lo sa pri. (2 Kor. 4:18) Zapot Pol ti ekrir ki Abraam “ti pe esper sa lavil avek fondasyon solid, ki Bondye i limenm arsitek e konstrikter.” (Ebr. 11:10) Sa “lavil” i Rwayonm Bondye kot Kris i dirize konman Lerwa. I vre, Abraam ti pou bezwen esper sa “lavil.” Dan en sans, nou pa bezwen espere akoz aprezan i pe dirize dan lesyel. Deplis, i annan en kantite levidans ki montre ki tre byento i pou pran kontrol konplet lo later osi. Eski sa Rwayonm i reel pour ou? Eski i annan en lefe lo ou lavi, lo lafason ki ou vwar sa lemonn, ek ou bann priyorite?—Lir 2 Pyer 3:11, 12.
NOU “VRE LANDRWA RESTE” ANMEZIR LAFEN I APROSE
15. Ki kalite lavenir bann ki met zot konfyans dan sa lemonn pou gannyen?
15 Anmezir lemonn Satan i ariv ver son lafen, son bann “douler” pou vin pli for. (Mat. 24:7, 8) Keksoz pou definitivman vin pli pir pandan gran ladetres. Bann lenfrastriktir pou tonbe e dimoun pou per pangar zot mor. (Aba. 3:16, 17) Akoz zot pou vreman dezespere, zot pou rod refiz “dan kavern ek dan ros montanny.” (Rev. 6:15-17) Me, ni bann vre kavern, ni bann montanny senbolik, setadir bann lorganizasyon politik e komersyal pa pou kapab protez zot.
16. Ki mannyer nou merit konsider kongregasyon Kretyen e akoz?
16 Par kont, pep Zeova pou kontinyen ganny proteksyon Zeova, sa enn ki zot “vre landrwa reste.” Parey profet Abakouk, zot pou “dan en gran lakontantman akoz Zeova.” Zot “pou zwaye akoz Bondye ki pou sov [zot].” (Aba. 3:18) Dan ki fason Zeova pou vin “en vre landrwa reste” pandan sa letan boulverse? Nou pou bezwen espere e vwar. Me nou kapab asire ki: Parey bann Izraelit ler zot ti kit Lezip, sa “gran lafoul” pou reste organize e zot pou vizilan anver gidans Bondye. (Rev. 7:9; lir Egzod 13:18. *) Nou pou ganny sa bann gidans dan en fason teokratik, posibleman atraver laranzman kongregasyon. Vreman, i paret ki sa plizyer milye kongregasyon partou dan lemonn i annan en lyen avek bann “lasanm enteryer” ki donn proteksyon parey i ti ganny predir dan Izai 26:20. * (Lir.) Eski ou apresye bann renyon kongregasyon? Eski ou azir deswit an armoni avek konsey ki Zeova i donn ou atraver laranzman kongregasyon?—Ebr. 13:17.
17. Dan ki fason Zeova i “en vre landrwa reste” menm pour son bann serviter fidel ki’n mor?
17 Menm bann ki kapab mor fidelman, avan sa gran ladetres i konmanse pou reste an sekirite avek Zeova, zot “vre landrwa reste.” Ki mannyer sa? Plizyer lannen apre lanmor bann patrias, Zeova ti dir Moiz: “Mwan, mon Bondye . . . Abraam, Bondye Izaak ek Bondye Zakob.” (Egz. 3:6) Apre ki Zezi ti’n sit sa parol, i ti azoute: “I pa en Bondye dimoun mor, me dimoun vivan; akoz pour li tou i vivan.” (Lik 20:38) Wi, pour Zeova, son bann serviter fidel ki’n mor i konmsi zot ankor vivan. Zeova pou sirman resisit zot.—Ekle. 7:1.
18. Dan nouvo lemonn, dan ki fason Zeova pou vin “en vre landrwa reste” pour son pep dan en fason spesyal?
18 Dan sa nouvo lemonn ki pros pour arive, Zeova pou vin “en vre landrwa reste” pour son pep dan en lot fason. Revelasyon 21:3 i dir: “La aprezan Bondye in fer son demer parmi zonm. I pou reste avek zot.” O konmansman, Zeova pou reste avek son bann sitwayen ki lo later par mwayen Kris Zezi. A lafen sa mil an, Zezi pou remet Rwayonm dan lanmen son Papa, apre ki i pou’n konpletman akonplir lavolonte Bondye pour later. (1 Kor. 15:28) Apre sa, bann imen ki pou’n vin parfe pou nepli bezwen Zezi konman zot entermedyer, akoz Zeova pou avek zot. Pa sa i en zoli lespwar pour nou! Alor, antretan, annou fer bokou zefor pour imit legzanp bann serviter fidel dan letan lontan par fer Zeova vin nou “vre landrwa reste.”
[Not anba lo paz]
^ par. 2 Contemporary English Version in tradwir Psonm 90:1 koumsa: “Dan tou zenerasyon, nou Senyer ou’n toultan nou lakour.”
^ par. 10 Izai 54:14, 17: “14 Ou pou solidman ganny etablir dan ladrwatir. Ou pou lwen avek lopresyon akoz ou pa pou per nanryen e ou pou lwen avek okenn keksoz ki fer per akoz i pa pou apros ou.” “17 ‘Nenport ki zarm ki pou ganny formen kont ou pa pou reisi, e nenport ki lalang ki pou lev kont ou dan zizman ou pou kondannen. Sa i posesyon erediter bann serviter Zeova, e zot ladrwatir i sorti kot mwan,’ se sa ki Zeova in dir.”
^ par. 16 Egzod 13:18: “Apre sa, Bondye ti fer sa pep fer letour an pasan par semen dan dezer Lanmer Rouz. Me bann garson Izrael ti sorti Lezip dan en fason annord parey larme.”
^ par. 16 Izai 26:20: “Ale, mon pep, antre dan ou bann lasanm enteryer, e ferm ou bann laport deryer ou. Kasyet ou pour selman en moman ziska ki mon lakoler i pase.”
[Kestyon]
[Portre lo paz 19]
[Portre lo paz 20]
“Mon pa pou kit ou”
[Portre lo paz 22]
Bann lanz Bondye i siport e protez son bann serviter
