Jehova Ki Mapilelo A Luna

‘Mulena, ki wena mapilelo a luna, mwa linako za masika ni masika.’—SAMU 90:1.

MU KONA KU ALABA CWAÑI?

Jehova naa bile cwañi “mapilelo” ku Abrahama, Isaka, ni Jakobo?

Lu kona ku itutañi kwa mutala wa Abrahama?

Lu kona ku bonisa cwañi kuli Jehova ki “mapilelo” a luna?

1, 2. Batanga ba Mulimu ba ikutwile cwañi mwa lifasi le, mi ki sibaka mañi se ba na ni sona?

 KANA mwa ikutwanga ku silelezwa ni ku lukuluha mwa lifasi le li maswe le? Haiba ha mu ikutwangi cwalo, mu hupule kuli haki mina mu nosi. Batanga ba Jehova ba bañwi ni bona ha ba ikutwi ku silelezwa ni ku lukuluha mwa lifasi le. Ku zwa feela kwamulaho, batu kaufela ba ba lata Jehova luli ba ikutwile inge bazwahule mwa lifasi le. Ka mutala, balapeli ba Mulimu ba ba sepahala be ne ba tuta-tutanga mwa naha ya Kanana ne ba ikutwile cwalo. Bibele i bulela kuli batu bao ne ba “shaela fapilaa nyangela kuli ne ba li bazwahule ni baenyi mwa naha.”—Maheb. 11:13.

² ‘Munzi’ wa balateleli ba Kreste ba ba tozizwe u kwa mahalimu. Bakreste ba ba tozizwe ni bona ba ikutwa kuli ki “bazwahule ni baenyi mwa lifasi” le. (Mafil. 3:20; 1 Pit. 2:11) “Lingu ze ñwi” za Kreste ni zona ‘hasi za lifasi’ sina feela Jesu ha naa si wa lifasi. (Joa. 10:16; 17:16) Nihakulicwalo, batu ba Mulimu ba na ni sibaka sa bona. Ha lu koni ku bona sibaka seo ka meeto a luna, kono ki sibaka mo lu kona ku silelezwa ni ku boniswa lilato ku fita kai kamba kai. Sibaka seo ki nto mañi? Mushe naa ñozi kuli: “Mulena, ki wena ya kile a ba mapilelo a luna, mwa linako za masika ni masika.” (Samu 90:1) Jehova ki ‘mapilelo a luli,’ kamba sibaka mo ba kona ku silelezwa batanga ba hae ba ba sepahala. Kana mwa ziba mo Jehova naa bezi mapilelo kwa batanga ba hae ba kwamulaho? Jehova ki mapilelo kwa batu ba hae kacenu kamukwaufi? Mi u ka ba cwañi mapilelo kwa batanga ba hae kwapili?

JEHOVA NAA LI ‘MAPILELO A LULI’ KWA BATANGA BA HAE BA KWAMULAHO

3. Kwa Samu 90:1, Jehova u bapanywa kwañi, mi ki kabakalañi?

³ Bibele fokuñwi i bapanyanga Jehova kwa lika ze lu kona ku bona ilikuli lu utwisise hande tulemeno  twa hae. Ka mutala, Samu 90:1 i bapanya Jehova kwa “mapilelo,” kamba sibaka. Mwa sibaka hañata ku banga ni lilato, kozo, ni silelezo. Ki kabakalañi Jehova ha bapanywa kwa sibaka? Bibele i bulela kuli Jehova ki lilato. (1 Joa. 4:8) Hape Bibele i bulela kuli Jehova ki Mulimu wa kozo ni kuli u silelezanga batanga ba hae. (Samu 4:8) Ka mutala, ha lu nyakisiseñi mo Jehova naa sebelisanezi ni batanga ba hae ba ba sepahala ba ba cwale ka Abrahama, Isaka, ni Jakobo.

4, 5. Mulimu naa fuyauzi cwañi Abrahama ni ku mu sileleza?

⁴ Mwendi Abrahama naa komokile Jehova ha naa mu bulelezi kuli: “U zwe mwa naha ya henu ni mwa mushobo wa henu ni mwa ndu ya ndataho, u ye mwa naha ye ni ka ku supeza.” Kono mwendi naa omba-ombilwe ki manzwi a naa bulezi Jehova hamulaho aa li: “Ni ka ku eza sicaba se situna, ni ku fuyole, ni hulise libizo la hao.” Jehova a zwelapili ku bulela kuli: “Ni ka fuyola ba ba ku fuyola, ni kute ba ba ku kuta.”—Gen. 12:1-3.

⁵ Jehova naa sepisize Abrahama kuli naa ka mu fuyola ni ku sileleza yena ni baikulu ba hae mi Jehova naa ezize cwalo luli. (Gen. 26:1-6) Ka mutala, Jehova naa tibezi Faro wa kwa Egepita ni Mulena Abimeleke wa kwa Gerari kuli ba si ke ba bulaya Abrahama ni ku mu amuha musalaa hae, Sara. Jehova naa silelelize Isaka ni Rebeka ka nzila ye swana. (Gen. 12:14-20; 20:1-14; 26:6-11) Bibele i bulela kuli Jehova naa “si ka lumelela mutu ku ba eza maswe, mane a nyaza malena kabakala bona; a li: ‘Si swali batoziwa ba ka, mu si ke mwa eza bapolofita ba ka maswe.’”—Samu 105:14, 15.

6. Isaka naa bulelezi Jakobo kuli a ezeñi, mi mwendi Jakobo naa ikutwile cwañi?

⁶ Jehova hape naa babalezi Jakobo muikulu wa Abrahama. Jakobo ha naa bata ku nyala, ndatahe Isaka naa mu bulelezi kuli: “U si ke wa ikungela musali kwa bana ba basizana ba Makanana. Nanuha, u ye kwa Padan-Arami, ku ba ndu ya Betuele kuku wa hao, u yo ikungela musali kwateñi, kwa bana ba Labani malumaho.” (Gen. 28:1, 2) Jakobo naa ezize ka mwa naa mu bulelezi ndatahe. Naa siile lubasi lwa hae mwa Kanana mi naa zamaile musipili o mutelele ku liba kwa Karani, mi mwendi naa zamaya a nosi. (Gen. 28:10) Mwendi Jakobo naa ipuzize kuli: ‘Ni ka yo tanda nako ye kuma kai ko ni ya? Kana bo malume ba ka yo taba ha ba ka yo ni bona? Kana ni ka yo fumana musali ya lata Jehova?’ Kono ha naa li mwa munzi wa Luzi ili likilomita ze 100 ku zwa kwa Beeresheba, kwa ezahala nto ye ñwi ye ne tisize kuli Jakobo a tuhele ku bilaela. Ne ku ezaheziñi?

7. Mulimu naa omba-ombile cwañi Jakobo?

⁷ Jakobo ha naa li mwa munzi wa Luzi,  Jehova a itahisa ku yena mwa tolo mi a li: “Na, ni inzi ni wena; ni ka ku babalela kaufela mo ka ya, mane ni ku kutiseze mwa naha ye; kakuli ha ni na ku ku tokolomoha, ni si ka eza se ni ku bulelezi.” (Gen. 28:15) Jakobo u lukela ku ba ya naa omba-ombilwe hahulu ki manzwi a mande ao! Hamulaho wa tolo yeo, Jakobo u lukela ku ba ya naa nyolelwa ku bona mo Jehova naa ka taleleleza sepiso ya hae. Haiba mu siile lubasi lwa mina kuli mu yo sebeleza kwa naha i sili ili ku yo zwisezapili za mubuso, mwendi mu ikutwa mwa naa ikutwezi Jakobo. Kono ku si na ku kakanya, Jehova u mi babalelezi mwa linzila ze ñata.

8, 9. Jehova naa bile cwañi ‘mapilelo a luli’ ku Jakobo, mi mitala ya Abrahama, Isaka, ni Jakobo i lu lutañi ka za Jehova?

⁸ Jakobo ha naa fitile mwa Karani, malumahe, Labani a mu amuhela hande mi hamulaho a mu fa Lea ni Rahele kuli ba be basali ba hae. Nihakulicwalo, Labani hamulaho wa nako a kala ku nyandisa Jakobo ni ku cinca halishumi tifo ya naa swanela ku lifa Jakobo. (Gen. 31:41, 42) Kono Jakobo naa tiyezi miinelo yeo kaufela bakeñisa kuli naa sepile kuli Jehova naa ka mu babalela. Bakeñisa kuli Jakobo naa tiyezi miinelo yeo, Jehova naa mu fuyauzi. Mulimu ha naa bulelezi Jakobo kuli a kutele kwa Kanana, Jakobo na saa luwile “mitapi ye miñata, a luwa ni batanga ba basizana ni batanga ba bashimani, ni likamele ni limbongolo.” (Gen. 30:43) Jakobo naa itumezi hahulu ku Jehova mi a lapela kuli: “Ha ni swanelwi ki ka kanyinyani kwa lituso kaufela za sishemo sa hao, ni ku za buniti bwa hao kaufela, zo ezelize mutangaa hao: kakuli ni kile na sila Jordani yo, ni na ni mulamu wa ka feela, mi cwale ni fetuhile litopa ze peli.”—Gen. 32:10.

⁹ Mitala ye lu nyakisisize i bonisa kuli manzwi a Mushe ki a niti. Mushe naa bulezi kuli: “Mulena, ki wena ya kile a ba mapilelo a luna, mwa linako za masika ni masika.” (Samu 90:1) Jehova ha si ka cinca. U sa lata batanga ba hae ba ba sepahala, mi mane u sa ba sileleza ni ku ba babalela. (Jak. 1:17) Ha lu nyakisiseñi mwa ezeza cwalo.

JEHOVA KI “MAPILELO” A LUNA KACENU

10. Ki kabakalañi ha lu kona ku kolwa kuli Jehova u ka zwelapili ku ba “mapilelo” a luna ka ku ba batanga ba hae?

¹⁰ Mu nge kuli mu mwa kuta mi mu paki wa mutu yo muñwi ya zekisana ni mutu ya butali ili ya na ni maata a ku zamaisa. Mutu yo ya zekisana ni mutu ye mu pakela ki lihata le li situhu, ki mubulai, mi u na ni batu mwa lifasi kaufela ba ba mu sebeleza. Mu ka ikutwa cwañi ha mu ka zwa mwa kuta yeo hamulaho wa muzeko? Kana mu ka lukuluha? Kutokwa! Mu ka tokwa batu ba bañwi kuli ba mi sileleze. Kamukwaoswana, ka ku ba batanga ba Jehova, lu lipaki ze yemela Jehova ya lwanisana ni Satani sona sila sa hae. (Mu bale Sinulo 12:17.) Satani u likile ku tuhelisa musebezi o ba eza batu ba Mulimu. Kana u konile ku eza cwalo? Kutokwa! Mane lu konile ku zwelapili ku kutaza kwa batu ba bañata mwa lifasi kaufela. Ki nto mañi ye lu tusize ku zwelapili ku kutaza? Ki nto iliñwi feela ye lu tusize, Jehova ki “mapilelo” a luna. Jehova u sweli ku sileleza ni ku fuyaula batu ba hae mwa mazazi a mafelelezo a, ku fita haisali. (Mu bale Isaya 54:14, 17.) Jehova u kona ku zwelapili ku ba “mapilelo” a luna haiba feela lu sa tuheleli Satani ku lu puma.

11. Ki lika mañi ze ñwi ze lu kona ku ituta ku Abrahama, Isaka, ni Jakobo?

¹¹ Ha lu boneñi hape ze lu kona ku ituta kwa mutala wa Abrahama, Isaka, ni Jakobo. Nihaike kuli batu bao ne ba pilile mwa naha ya Kanana, ne ba si ka swalisana ni batu be ne ba pila mwa naha yeo mi ne ba toile lika ze maswe ze ne ba eza batu bao. (Gen. 27:46) Batu bao ne ba sa tokwi mukoloko  wa mulao o ne u ka ba bonisa lika ze nde kamba lika ze maswe. Ne ba ziba za lata Jehova ni za toile. Kamukwaocwalo, ne ba sebelize ka taata kuli ba si ke ba ba ba lifasi. Kaniti batu bao ba lu tomezi mutala o munde! Kana mwa sebeza ka taata kuli mu likanyise batanga ba Jehova ba ba sepahala bao? Kana mwa bonisa kuli ha mu tabeli ku ba ba lifasi ka ku keta ka tokomelo balikani ba mina ni lika ze mu itabisa ka zona? Ka bumai, batu ba bañwi mwa puteho ya Sikreste ba ikutwa ku lukuluha mwa lifasi la Satani mwa miinelo ye miñwi. Haiba kona mo mu ikutwela ni mina nihaiba feela hanyinyani, mu kupe Jehova kuli a mi tuse. Mu si ke mwa libala kuli lifasi le ki la Satani ya na ni buitati ili ya si na taba ni luna.—2 Makor. 4:4; Maef. 2:1, 2.

12. (a) Jehova u tusa cwañi batanga ba hae? (b) Mu ikutwa cwañi ka za lituso za lu fa Jehova?

¹² Haiba ha lu bati ku pumiwa ki Satani, lu swanela ku itebuha lituso kaufela za fa Jehova kwa batanga ba hae. Ka mutala, Jehova wa lu tusanga ha lu li kwa mikopano ya Sikreste, ha lu lapela sina lubasi, mi hape Jehova u itusisanga baana-bahulu ku lu omba-omba ni ku lu tusa kuli lu kone ku tiyela miinelo ye taata ye lu kopana ni yona mwa bupilo. (Maef. 4:8-12) Muzwale George Gangas ya naa bile mwa Sitopa se si Etelela ka lilimo ze ñata, naa ñozi mwa naa ikutwelanga ha naa banga mwahalaa batu ba Mulimu. Muzwale yo naa ize: “Ha ni banga ni batu ba Mulimu, ni ikutwanga ku lukuluha inge ya inzi ni lubasi lwa ka.” Kana kona mo mu ikutwelanga ni mina?

13. Ki tuto mañi ya butokwa ye lu kona ku ituta kwa liñolo la Maheberu 11:13?

¹³ Nto ye ñwi ye lu ituta kwa mutala wa Abrahama, Isaka, ni Jakobo kikuli ha lu swaneli ku sabiswa ki taba ya kuli lu eza lika ka ku shutana ni batu ba mwa lifasi. Sina mo lu itutezi mwa  paragilafu ya pili, batanga ba ba sepahala bao ne ba “shaela fapilaa nyangela kuli ne ba li bazwahule ni baenyi mwa naha.” (Maheb. 11:13) Kana mu pila ka nzila ye bonisa kuli mwa shutana ni batu ba lifasi? Ku eza cwalo fokuñwi ku kona ku ba taata. Kono ka tuso ya Mulimu ni mizwale ni likaizeli, mwa kona ku pila ka nzila ye bonisa kuli ha mu ba lifasi. Mu hupule kuli Jehova u ka mi tusa. Batu kaufela ba ba bata ku sebeleza Jehova ba lwanisana ni Satani ni lifasi le! (Maef. 6:12) Kono lwa kona ku tula mwa ndwa yeo haiba lu sepa Jehova ni ku lumela kuli ki yena mapilelo a luna.

14. Ki “muleneñi” mañi wa naa libelezi Abrahama?

¹⁴ Lu swanela ku likanyisa Abrahama ka ku nahana mupuzo o lu ka fiwa kwapili. (2 Makor. 4:18) Muapositola Paulusi naa ñozi kuli Abrahama “naa libelela muleneñi  o na ni mitomo ya niti, o lalilwe ni ku yahiwa ki Mulimu.” (Maheb. 11:10) “Muleneñi” wo ki Mubuso wa Mulimu. Abrahama naa na ni ku libelelela kuli “muleneñi” wo u tahe. Ka mubulelelo o muñwi, luna ha lu libeleli inge Abrahama. Mubuso wo u sweli wa busa mwa lihalimu. Mi bupolofita bwa mwa Bibele bu bonisa hande kuli Mubuso wo u tuha u busa lifasi kaufela. Kana mu pila ka nzila ye bonisa kuli mu sepile Mubuso wa Mulimu? Kana mu beile za Mubuso mwa sibaka sa pili mwa bupilo bwa mina ni ku sa swalisana ni lifasi?—Mu bale 2 Pitrosi 3:11, 12.

JEHOVA U KA ZWELAPILI KU BA “MAPILELO” A LUNA

15. Ki lika mañi ze ka ezahala kwa batu ba ba sepile lifasi le?

¹⁵ Miinelo ye taata ya mwa lifasi le i ka zwelapili ku ekezeha pili mafelelezo a si ka taha kale. (Mat. 24:7, 8) Ñalelwa ye tuna ha i ka kalisa, bupilo bu ka tatafala. Mwa lifasi kaufela ku ka ba ni sinyeho mi batu ha ba na ku ziba ze ka ezahala mi ba ka saba hahulu. (Hab. 3:16, 17) Bibele i bulela kuli batu ba ka ziyeleha hahulu kuli mane ba ka “ipata mwa mikoti ya macwe ni mwahalaa macwe a mwa malundu” kuli ba silelezwe. (Sin. 6:15-17) Kono batu bao ha ba na ku silelezwa ki mikoti kamba likopano za lipisinisi nihaiba zona likopano za bupolitiki.

16. Lu swanela ku nga cwañi puteho, mi ki kabakalañi?

¹⁶ Jehova u ka lu sileleza ka nako ya ñalelwa ye tuna. Sina mupolofita Habakuki, lu ka wabelelwa Mulimu ya lu pilisa. (Hab. 3:18) Jehova u ka lu sileleza cwañi ka nako ya ñalelwa ye tuna? Lu ka tokwa ku libelela ni ku bona mwa ka lu sileleleza. Sina Maisilaele be ne ba zwile mwa Egepita mo ne ba fezwi litaelo ki Mulimu, ni luna lwa kona ku kolwa kuli batu ba Jehova ba ka swalisana ni ku amuhela litaelo ku zwelela ku yena. (Mu bale Exoda 13:18; Sin. 7:9) Jehova u ka lu fa cwañi litaelo zeo? Mwendi Jehova u ka itusisa puteho kuli a lu bulelele ze lu swanela ku eza. Liñolo la Isaya 26:20 li bulela za ‘mizuzu ya ndu’ mo ba ka silelezwa batu ba Mulimu. Mwendi mizuzu yeo i talusa liputeho za mwa lifasi kaufela. (Mu bale Isaya 26:20.) Kana mwa itebuha mikopano ya puteho? Kana kamita mwa ezanga za mi bulelela Jehova ka ku itusisa puteho?—Maheb. 13:17.

17. Ki mwa nzila mañi mo Jehova a li “mapilelo” nihaiba kwa batanga ba hae ba ba shwile inze ba sepahala?

¹⁷ Jehova u ka ba “mapilelo” nihaiba kwa batu ba ba sepahala ba ba ka shwa pili ñalelwa ye tuna i si taha kale. Kamukwaufi? U ka ba zusa kwa bafu. Hamulaho wa nako ye telele ku zwa fa naa shwezi Abrahama, Isaka, ni Jakobo, Mulimu naa bulelezi Mushe kuli naa sa li Mulimu wa batu bao be ne ba shwile. (Ex. 3:6) Jesu naa kutezi manzwi ao ni ku ekeza kuli: “Hasi Mulimu wa ba ba shwile, kono ki wa ba ba pila, kakuli ku yena, kaufelaa bona ba pila.” (Luka 20:38) Batanga ba Jehova ba ba sepahala ba ka zusiwa luli kakuli ku Jehova ku swana feela inge kuli batu bao ba pila.—Muek. 7:1.

18. Jehova u ka ba cwañi “mapilelo” a batu ba hae mwa lifasi le linca?

¹⁸ Mwa lifasi le linca, Jehova u ka ba “mapilelo” kwa batu ba hae ka nzila ye ipitezi. Liñolo la Sinulo 21:3 li bulela kuli: “Bona! Tende ya Mulimu i inzi ni batu, mi u ka yaha ni bona.” Jehova u ka itusisa Jesu Kreste kwa ku busa lifasi mwa lilimo ze sikiti. Kwa mafelelezo a lilimo ze sikiti, Jesu u ka be a petile mulelo wa Ndatahe ka za lifasi, mi u ka kutisa Mubuso ku Jehova. (1 Makor. 15:28) Mi cwale Jehova kasibili u ka busa batu ba ba petehile. Kaniti luli bupilo bu ka tabisa kwapili! Haike lu likanyise batanga ba Jehova ba kwamulaho ka ku nga Jehova sina “mapilelo” a luna.

[Lipuzo za Tuto]

[Siswaniso se si fa likepe 20]

“Ha ni na ku ku tokolomoha”

[Siswaniso se si fa likepe 22]

Mangeloi a Mulimu a tusa batanga ba Mulimu ni ku ba sileleza