1, 2. Engtin nge Pathian mite chuan he khawvêl hi an thlîr a, eng kawngin nge awmna an neih?

HE KHAWVELAH hian i tlângnêl viau em? I tlângnêl lo a nih chuan ṭhian ṭha i kâwm tihna a ni. Hmân lai aṭang tawhin Jehova hmangaihtu dik takte chu he khawvêlah hian mikhual leh khualzin ang an lo ni tawh ṭhîn a ni. Entîr nân, Pathian betu mi rinawmte kha Kanaan rama an pêm kual reng lai khân “mikhual leh khualzin mai an ni tih an inhriattîr” a ni.—Heb. 11:13.

² Chutiang bawkin, Krista zuitu hriak thih, ‘vân khua leh tuite’ chu he khawvêlah hian “mikhual leh khualzin” angin an inhria a. (Phil. 3:20; 1 Pet. 2:11) Krista ‘berâm dangte’ pawh ‘khawvêla mi an ni lo, [Krista kha] khawvêla mi a ni lo ang bawkin.’ (Joh. 10:16; 17:16) Nimahsela, Pathian mite chu “awmna” nei lo an ni lo. A nihna takah chuan, rinna mita kan hmuh theih, awmna azawnga him leh nuam ber chu kan nei a ni. Mosia chuan: “Lalpa, nang chu chhuan zawng zawng chenah kan awmna i ni ṭhîn,” * tiin a ziak a. (Sâm 90:1) Engtin nge Jehova chu hmân laia a chhiahhlawh rinawmte “awmna” a nih? Engtin nge tûn laia a hming putu, a mite tâna “awmna” a nih? Engtin nge nakinah awmna him awmchhun a nih dâwn?

3. Sâm 90:1-ah thupui, mitthla theih, leh inanna lai eng nge kan hmuh?

³ Bible-a tehkhin thu hman ṭhin tam takte ang bawkin, Sâm 90:1 chuan thupui, mitthla theih, leh inanna lai a nei a. A thupui chu Jehova a ni a. Mitthla theih chu awmna, a nih loh leh chênna in hi a ni. Jehova chuan chutiang awmna hmun nên chuan inanna tam tak a nei a. Entîr  nân, Jehova chuan a mite tân vênhimna a pe a. Chu chu hmangaihna chhinchhiahna ber a nihna nên chuan a inmil a ni. (1 Joh. 4:8) Ani chu a mi rinawmte ‘him taka awmtîrtu,’ thlamuanna Pathian a ni bawk. (Sâm 4:8) Entîr nân, Abrahama aṭanga inṭana thlahtu rinawmte a dâwr dân hi han ngaihtuah teh.

4, 5. Engtin nge Pathian chu Abrahama tan “awmna” a nih?

⁴ Chutih hun laia Abrama tia hriat Abrahama hnêna Jehova’n: “I khaw lam ata leh i laichînteho zîng ata . . . ram ka la entîr tûr che lamah kal rawh,” a tih laia a awm dân tûr chu kan ngaihruat thei mai âwm e. Abrahama chuan lungkhamna a nei a nih chuan, a dawta Jehova thusawi: “Chi ropui takah ka siam ang chia, mal pawh ka sâwm ang chia, i hming ka tiropui bawk ang . . . malsâwmsaktu apiang che chu mal ka sâwm ang a, ânchhe lawhtu che chu ânchhia ka lawh ang,” tih chuan a tireh ngei ang.—Gen. 12:1-3.

⁵ Chûng thute hmang chuan, Jehova chu Abrahama leh a thlahte tân awmna him takah a insiam ta a. (Gen. 26:1-6) A thutiam chu a hlen a ni. Entîr nân, Aigupta lal Pharaoa leh Gerar lal Abimeleka te’n Abrahama that a, a nupui an neihsak tûr chu a dang a. Isaaka leh Rebeki pawh chutiang tho chuan a vênghim bawk. (Gen. 12:14-20; 20:1-14; 26:6-11) Heti hian kan chhiar a ni: “[Jehova chuan] tuma hnehchhiah a phal lo va: a ni, anmahni avângin lalte pawh a zillhau va; ‘Ka hriak thihate chu tawk suh ula, ka zâwlneite pawi rêng rêng pawh khawih suh u,’” tiin.—Sâm 105:14, 15.

6. Isaaka chuan Jakoba chu engti tûrin nge a hrilh a, Jakoba’n chu chu engtin nge a ngaih mai theih?

⁶ Chûng zâwlneite zîngah chuan Abrahama tupa, Jakoba pawh a tel a. Jokoba tân nupui neih a lo hun chuan a pa, Isaaka chuan heti hian a hrilh a ni: “Kanaan ram nulaho zînga mi hi nupuiah i nei tûr a ni lo. Tho la, Paddan-aram rama i nu pa Bethuela inah kal la, chuta mi chu i nu nuṭa Labana fanute zînga mi nupuiah va nei rawh,” tiin. (Gen. 28:1, 2) Jakoba chuan ihe lovin Isaaka thu chu a zâwm a. Kanaan rama a chhûngte chu kalsanin, mêl za tam taka awm Haran khaw lam panin a zin chhuak ta a, amah chauhva zin chhuak niin a lang a ni. (Gen. 28:10) Ani chuan: ‘Engtia rei nge ka thang bo vang? Ka pu chuan min lo lâwmin, Pathian ṭihtu nupui min neihtîr ang em?’ tiin a ngaihtuah pawh a ni thei. Jakoba chuan chutiang a lungkham a nih chuan, Beer-seba aṭanga mêl 60 (100 km) vêla hla Luz khua a thlen chuan chûng chu a reh huai ngei ang. Engvângin nge?

7. Engtin nge Pathianin Jakoba chu mumang hmanga a thlamuan?

⁷ Luz khuaah chuan Jehova chu Jakoba mumangah a inlanin: “Ngai teh, i hnênah ka  awm a, i kalna apiangah ka vêng zêl ang chia, he ramah hian ka hruai kîr leh ang che; i hnêna ka sawi hi ka tih hma loh chuan ka thlahthlam dâwn lo che a ni,” a ti a. (Gen. 28:15) Chu thusawi ngilnei takte chuan Jakoba chu a va thlamuan dâwn êm! Chu mi hnu chuan Pathianin a thute a hlen chhuah dân hmuh hlân chu nghâkhlel taka, a kal sauh sauh lai chu i mitthla thei em? Ram danga rawngbâwl tûr emawa i in i chhuahsan a nih chuan Jakoba rilru tûr chu i hre thiam ve ngei ang. Mahse, Jehova ngaihsakna che chu i hmu ngei bawk a ni.

8, 9. Eng kawngin nge Jehova chu Jakoba tân “awmna” a nih a, chuta ṭang chuan eng nge kan zir theih?

⁸ Jakoba’n Haran a va thlen chuan, a pu Labana chuan ṭha takin a lo lâwm a, a hnuah Leaii leh Rakili chu nupui atân a pe ta a ni. Mahse, hunte a han liam zêl chuan Labana chuan Jakoba chu dik lo taka chhawr tumin a hlawh chu vawi sâwm lai a tih danglamsak a. (Gen. 31:41, 42) Mahse, Jakoba chuan chûng dik lohnate chu Jehova’n a ngaihsak zêl dâwn tih ring tlat chungin a tuar chhuak a—A ngaihsak ta rêng a ni! A nihna takah chuan Pathianin Kanaan rama kîr leh tûra a hrilh meuh chuan, thlahtu Jakoba chuan “ran rual, rual lian tak tak te, bâwihnu te, bâwihpa te, sanghâwngsei te, sabengtung te a lo nei ta a.” (Gen. 30:43) A lâwm êm avângin, Jakoba chu: “I chhiahhlawh chunga khawngaihna zawng zawng i lantîr leh thutak zawng zawng i lantîr zîngahte hian, a tênau ber pawh hmu tlâk ka ni lo ve; he Jordan lui hi ka tiang nên chauh ka kân a; tûnah zawng pâwl hnih zet ka lo nih tâk hi,” tiin a ṭawngṭai a ni.—Gen. 32:10.

⁹ Ni e, hêng thute hian: “Lalpa, nang chu chhuan zawng zawng chenah kan awmna i ni ṭhîn,” tia Mosia ṭawngṭaina dikzia a va târ lang chiang tak êm! (Sâm 90:1) ‘Amaha danglamna leh herna hlim rêng rêng awm thei lo,’ Jehova tân chuan chûng thute chu tûn laiah pawh a dik reng a, a mi rinawmte tân awmna nuam leh him a ni zawm zêl a ni. (Jak. 1:17) Chutiang a nih dân chu i lo ngaihtuah ang u.

10. Engtin nge Jehova chu a chhiahhlawhte tâna awmna him a ni zawm zêl tih kan hriat chian theih?

¹⁰ Hei hi han mitthla teh: Rorêlna court-ah chuan khawvêl pum huap mi sual pâwl pakhat kalh zâwngin thuhretu-ah i ṭang a. Chu pâwl hruaitu chu fing tak, thiltithei tak, leh pawi tihna nei miah lova dâwt sawi hmang leh tual thattu a ni. Tlai a lo nih a, court i han chhuahsan dâwn chuan engtin nge i awm ang? Him niin i inhria em? Hre hauh lo vang! Vênhimna dîl chhan tûr ṭha tak i nei zâwk ngei ang. Hei hian Pathian Jehova tân huaisen taka thuhretu-a ṭang a, a hmêlma lian ber Setana dik lohna huai taka hai langtu, Jehova chhiahhlawhte dinhmun chu a va târ lang chiang tak êm! (Thu Puan 12:17 chhiar rawh.) Mahse, Setana chuan Pathian mite chu a ngawihtîr thei em? Thei lo! A nihna takah chuan thlarau lamah kan ṭhang chho zêl a, chu chu Jehova chu kan inhumhimna a la ni reng a, a bîk takin hêng ni hnuhnûngahte hian kan “awmna” a nih tlat vâng a ni. (Isaia 54:14, 17 chhiar rawh.) Amaherawhchu, Setana chu kan awmna ata kal chhuak tûra kan inbumtîr chuan Jehova chu kan awmna hmun him a ni thei lo vang.

11. Thlahtute hnên aṭangin eng nge kan zir theih?

¹¹ Thlahtute hnên aṭangin thil dang i lo zir leh ang u. Anni chu Kanaan ramah awm mah se, an thil huat, chu rama awmte nun dân suaksual leh bawlhhlawh lakah chuan an inthiar fihlîm chhun zawm zêl a ni. (Gen. 27:46) Anni chu anmahni kaihruaitu atâna tih tûr leh tih loh tûr tam tak ziak chhuahah ni lovin, thu bulah an innghat a ni. Jehova chungchâng leh a mizia an hriatte chu an tân a tâwk a. Ani chu an awmna a nih avângin, khawvêl hnaih thei ang bera awm chu an duh lo. A  hlat thei ang berah an awm zâwk a ni. Kan tân entawn tûr ṭha an va siam tak êm! Ṭhian kawm tûr leh intihhlimna i thlanna kawngah thlahtu rinawmte entawn chu i tum tlat em? Kristian kohhrana mi ṭhenkhatte’n Setana khawvêl nuam an tihzia lantîr châng an nei ṭhîn erawh hi chu a pawi hle. Chutiang i ni ve deuh a nih chuan, chu mi chungchângah chuan ṭawngṭai rawh. He khawvêl hi Setana ta a ni tih hre reng ang che. Khawvêl chuan Setana mizia, mahni hmasialna leh mi dangte ngaihsak lohna chu a târ lang a ni.—2 Kor. 4:4; Eph. 2:1, 2.

12. (a) Engtin nge Jehova’n a thlarau lam chhûngkua a châwm? (b) Engtin nge chu châwmnate chu i ngaih?

¹² Setana ngamthlêmnate do thei tûr chuan Jehova’n rinnaa a chhûngte, amah awmnaa hmangtute tâna thlarau lam chaw a pêk chu a ṭangkai thei ang bera kan hman a ngai a ni. Chûngah chuan Kristian inkhâwm te, chhûngkuaa Pathian biakna te, leh nuna harsatnate kan hmachhawn huna min thlamuan a, min ṭanpuitu tûra Pathian ruat berâm vêngtu, ‘mihringte hnêna thilpêkte’ chu a tel a ni. (Eph. 4:8-13) Kum tam tak chhûng Governing Body member lo ni tawh, Unau George Gangas-a chuan heti hian a ziak a: “[Pathian mite] zînga ka awm hian thlarau lam paradis-a kan in ngeia ka chhûngte bula awm ang maiin ka inhria,” tiin. Chutiang chuan i inhre ve em?

13. Hebrai 11:13 aṭangin eng thil pawimawh tak nge kan zir theih?

¹³ Thlahtute mizia kan entawn phu dang leh chu anmahni hual vêla awmte laka danglam bîk nih an inhuamna kha a ni. Paragraph 1-naa kan hmuh angin, anni chuan “leiah hian mikhual leh khualzin mai an ni tih an inhriattîr” a. (Heb. 11:13) Danglam bîk nih i tum tlat em? Chutianga tih chu thil awlsam a ni reng lo ngei mai. Mahse, Pathian leh Kristian unaute ṭanpuina nên chuan i hlawhtling thei a. Nangmah chauh i ni lo tih hre reng ang che. Jehova rawngbâwl duh zawng zawngte chuan do tûr an nei ṭheuh si a! (Eph. 6:12) Chuti chung chuan Jehova kan rinchhan a, awmna hmun him anga amah kan hman chuan chu indona chu kan hneh thei a ni.

14. Jehova chhiahhlawhte khân eng “khua” nge an nghah?

¹⁴ Hei pawh hi a pawimawh a ni: Lâwmman thlîr renga Abrahama entawn chu. (2 Kor. 4:18) Abrahama chuan “khua lungphûmte nei mi, Pathian rêlbâwl leh siam chu a nghâk reng si a,” tiin tirhkoh Paula chuan a ziak a. (Heb. 11:10) Chu “khua” chu Messia Lalram a ni. Abrahama chuan chu “khua” chu a nghah a ngai a. Kan tân chuan nghah a ngai ve lo anga sawi theih a ni. Chu Lalram chuan tûnah hian vânah ro a rêl mêk a. Chu bâkah,  Bible hrilh lâwkna chuan he lei pum puiah hian ro a rêl thuai dâwn tih chiang takin a târ lang. Chu Lalram chu i tân a tak em? Chu chuan nun i thlîr dân te, he khawvêl i thlîr dân te, leh i thil ngaih pawimawhte chu a thunun em?—2 Petera 3:11, 12 chhiar rawh.

15. He khawvêla an rinna nghattute chu eng hunin nge nghâk?

¹⁵ Setana khawvêl tâwpna a hnaih rual hian a ‘nau veina’ chu a nasa telh telh ang. (Mt. 24:7, 8) Hrehawmna nasa tak chhûngin thil awm dân chu a chhe lehzual dâwn a ni. Inrêlbâwl nâna thil ṭûl leh pawimawhte chu a tluchhia ang a, mite chu thih mai hlauhawmah an awm ang. (Hab. 3:16, 17) An beidawn êm avângin “pûkah leh tlânga lungpuiah” bihrûkna zawng ang maia sawi theih an ni ang. (Thup. 6:15-17) Mahse, pûk tak tak emaw, tlâng anga sawi theih politics leh sumdâwnna pâwlte emaw chuan eng vênhimna mah an pe thei lo vang.

16. Engtin nge Kristian kohhran chu kan thlîr ang a, engvângin nge?

¹⁶ Mahse, Jehova mite chu an “awmna” Pathian Jehovaah chuan an him chhunzawm zêl ang. Zâwlnei Habakuka angin, an ‘LALPA-ah chuan an lâwm zêl ang a, an chhandamna Pathianah chuan an lâwm cheu dâwn a ni.’ (Hab. 3:18) Chu hun buaithlâk tak chhûngin eng kawngin nge Jehova chu kan “awmna” a nih ang? Chu chu kan la hre hrih lo. Mahse, hei hi kan chiang thei a ni: Aigupta ram aṭang Israel mite an kal chhuah lai ang khân, ‘mipui tam takte’ chu ṭha taka inruahmanin, Pathian kaihhruaina chu an ngaichâng reng ang, tih hi. (Thup. 7:9; Exodus 13:18 chhiar rawh.) Chu kaihhruaina chu kohhran ruahmanna kal tlanga kan dawn a rinawm hle a ni. Dik takin, khawvêl puma kan inkhâwmna kohhran sâng tam takte chu Isaia 26:20-a sawi lâwk invênhimna ‘pindan chhûng’ anga sawi theih niin a lang. (Chhiar rawh.) Kohhran inkhâwmte chu i ngaihlu em? Kohhran ruahmanna hmanga Jehova kaihhruaina min pêk chu i zâwm nghâl ṭhîn em?—Heb. 13:17.

17. Eng kawngin nge Jehova chu a chhiahhlawh rinawm thi tawhte tân pawh “awmna” a nih?

¹⁷ Hrehawm nasa tak inṭan hmaa rinawm taka thite pawh an “awmna” Pathian Jehova-ah chu an him a. Engtin nge a nih theih? Thlahtu rinawmte an thih hnu daih khân, Jehova chuan Mosia hnênah: “Kei hi . . . Abrahama Pathian, Isaaka Pathian, Jakoba Pathian chu ka nih hi,” tiin a hrilh a. (Ex. 3:6) Isua chuan he thu hi sawi nawnin, heti hian a belhchhah a ni: “Ani chu mitthi Pathian a ni lo va, mi nung Pathian a ni zâwk e; ani ngaih chuan mi zawng zawng an nung vek si a,” tiin. (Lk. 20:38) Ni e, Jehova tân chuan a mi rinawm thi tate chu la nung ang mai an ni a, an tân chuan thawhlehna chu thil chiang sa a ni.—Thur. 7:1.

18. Engtin nge khawvêl tharah Jehova chu a mite tân “awmna” a nih ang?

¹⁸ Lo thleng mai tûr khawvêl tharah pawh Jehova chu kawng dangin a mite tân “awmna” a la ni chhun zawm zêl dâwn a. Thu Puan 21:3 chuan: “Ngai teh, Pathian bâwktê chu mihring zîngah a lo awm ta, ani chu an hnênah a awm ang,” tiin a sawi a. Atîrah chuan Jehova chu a aiawh Isua Krista hmangin lei lama a khua leh tuite hnênah a awm ang a. Isua’n lei atâna Pathian thiltum a tih zawh vek hnu, kum sâng khat tâwpah chuan Lalram chu a Pa hnênah a pe kîr leh ang. (1 Kor. 15:28) Chu mi hnuah chuan mihring ṭha famkimte chuan palai anga Isua rawngbâwlna chu an mamawh tawh lo vang a; Jehova chu an zîngah a awm tawh ang. Kan tân hma lam hun ropui tak a va ni êm! Chu hun a lo thlen hma chuan, Jehova chu kan “awmna” nihtîrin hmân laia mi rinawmte entawn chu i tum tlat ang u. (w13-E 03/15)