1, 2. Wẽn-tũudbã manesem yaa wãn dũniyã pʋgẽ, la bõe yĩng tɩ d tõe n yeel tɩ b tara yiri?

 DŨNI-KÃNGÃ pʋgẽ, yãmb yam gãeyã bãan wa y sẽn be y yir bɩ? Y yamã sã n pa gãe bãane, y pa y yembr ye. Hal pĩnd n tãag masã, sẽn nong-b a Zeova wã yaa sãamb dũniyã pʋgẽ. Wala makre, a Abrahaam, a Izaak la a Zakoob sẽn wa n be Kanaã soolmẽ wã, b ra yikdame n toeemd zĩisi. Wakat kãnga, b wilgame tɩ “bãmb mensã yaa sãamb la kaoos-weto.”—Heb. 11:13, Kãab-paalgã Koe-noogo.

² Kiris-neb nins sẽn paam vʋʋsem sõng zaeebã me “ba-yir” sẽn yaa saasẽ wã yaa “sãamb la pa-wet dũniyã ka.” (Fil. 3:20; 1 Pɩɛ. 2:11) Kiristã “piis a taabã” me “ka dũniyã rẽnda,” wa yẽ mengã sẽn pa dũniyã rẽndã. (Zã 10:16; 17:16) La baasgo, Wẽnnaam nin-buiidã fãa zoe n tara yiri. Pa yir d sẽn tõe n yã ne nifu, la yaa be la d tõe n paam koglg n yɩɩda. Be me la d tõe n yã nonglem n yɩɩd zĩis a taabã. A Moiiz yeela woto: “Zusoaba, yãmb yaa tõnd laafɩ zĩig zãmaan fãa.” (Yɩɩl 90:1) Wãn to la a Zeova yɩ a pĩnd wẽndẽ nin-buiidã “laafɩ zĩiga”? Wãn to la a yaa tõnd “laafɩ zĩig” rũndã-rũndã? La wãn to la a na n kell n yɩɩ d “laafɩ zĩiga”?

3. Yɩɩl Sõamyã 90:1 wã maka a Zeova ne bõe, la bõe yĩnga?

³ Biiblã wae n makda a Zeova ne bũmb toor-toor d sẽn tõe n yã, sẽn na yɩl tɩ d bãng a sẽn yaa Wẽnnaam ning buudã. Wala makre, Yɩɩl Sõamyã 90:1 soabã yeelame t’a Zeova yaa “laafɩ zĩiga,” bɩ [yiri, MN]. B sã n gomd yir yelle, d tagsda  zĩig neb sẽn nong taab sẽn tõe n zĩnd ne laafɩ n paam koglgo. Bõe yĩng tɩ b mak a Zeova ne yiri? Biiblã wilgame t’a Zeova yaa nonglem. (1 Zã 4:8) A wilgame me t’a yaa Wẽnnaam sẽn kõt laafɩ, la t’a kogenda a nin-buiidã. (Yɩɩl 4:9) Bɩ d ges a Zeova sẽn yɩ a Abrahaam, a Izaak la a Zakoob laafɩ zĩig to-to.

4, 5. Wãn to la Wẽnnaam yɩ a Abrahaam “laafɩ zĩiga”?

⁴ Tõe t’a Abrahaam ra rat n bãnga bũmb ning sẽn kɩt t’a Zeova yeel t’a ‘yik n bas a tẽngã ne a buudã la a yirã n kẽng tẽng ning yẽ sẽn na n wilg-a wã.’ La sãmbg sẽn ka be, a Zeova sẽn paas bũmb ningã kenga a pɛlga. A yeela woto: “Mam na n kɩtame tɩ f lebg buud sẽn yaa kãseng ba, la mam na n ninga f zug barka, n kɩt tɩ f yʋʋr yɩ kãsenga, la fo na n waa ne barka. Neb nins sẽn ningd fo zug barkã, mam na n ninga bãmb dãmb zut barka, la neb nins sẽn kãabd foom wẽngã, mam na n kãaba bãmb dãmb wẽnga.”—Sɩng. 12:1-3.

⁵ A Zeova sẽn yeel woto wã, a pʋlmame t’a na n kogla a Abrahaam ne a yagensã la a ning-b barka. (Sɩng. 26:1-6) A pidsa a pʋlenga. A gɩdga Ezipt Faraõ wã ne Geraar rĩm a Abimelɛk tɩ b baa a ye pa kʋ a Abrahaam la b rɩk a pag a Saara ye. A kogla a Izaak ne a Rebeka me woto. (Sɩng. 12:14-20; 20:1-14; 26:6-11) Biiblã yeelame t’a Zeova pa “sak tɩ neb nams bãmb ye.” La t’a “sɩbga rĩm-dãmb bãmb poorẽ n yeele: ‘Da sɩɩs-y mam nin-tũusdsã, la da maan-y mam no-rɛɛsdbã wẽng ye.’”—Yɩɩl 105:14, 15.

6. Bõe la a Izaak yeel a Zakoob t’a maane, la tõe t’a Zakoob ra sokda a meng sogs-bʋse?

⁶ Ned a to a Zeova sẽn sõng wʋsg yɩ a Abrahaam yageng a Zakoob. A sẽn wa n ta kãadmã, a ba a Izaak yeel-a-la woto: “Da rɩk pag Kanaã tẽng pʋg-sadbã sʋk ye. Yik n kẽng Padãn-Aram fo ma wã ba a Betuɛll yiri. Bao pag fo ma wã tão a Labã kom-pugli wã sʋka.” (Sɩng. 28:1, 2) A Zakoob maana wa a ba wã sẽn yeelã. A basa a roagdbã Kanaã, n kẽng Harã sẽn be kɩlo kobs zĩigẽ wã. (Sɩng. 28:10) Tõe t’a ra sokda a meng woto: ‘Yʋʋm a wãn la mam na n zĩnd be? M yasbã na n deeg-m-la ne sũ-noogo, n sak n kõ-m pag sẽn yaa wẽn-zoɛt bɩ?’ La a Zakoob sẽn wa n ta Luuz sẽn be kilo 100 zĩigẽ ne Bɛɛr-seba wã, bũmb n maan tɩ sõng-a t’a bas yɩɩre. Bõe la rẽ?

7. Wãn to la Wẽnnaam keng a Zakoob pɛlga?

⁷ A Zeova goma ne a Zakoob zãmsd pʋgẽ, n yeel woto: ‘Gese, mam bee ne  foom. Mam na n gũu foom zĩig ning fo sẽn dabdã. La mam na n le waa ne foom tẽn-kãngã pʋgẽ. Tɩ bõe, mam ka na n bas foom n ka pids m sẽn kãab foomã fãa ye.’ (Sɩng. 28:15) Sãmbg sẽn ka be, a Zeova sẽn yeel-a bũmb ningã kenga a pɛlga. Mams-y n ges-y rẽ poore, a Zakoob sẽn da yãgd n na n yã Wẽnnaam sẽn na n pids a pʋlengã to-to wã. Yãmb sã n yikame n kẽng tẽng a to n na n tɩ sõng n moon koɛɛgã, y tõe n wʋma a Zakoob sẽn da maand yɩɩrã võor nana-nana. La yaa vẽeneg tɩ y yãame t’a Zeova sõngd-y lame.

8, 9. Wãn to la a Zeova yɩ a Zakoob “laafɩ zĩiga,” la rẽ wilgda tõnd bõe?

⁸ A Zakoob sẽn ta Harã wã, a yasb a Labã reeg-a-la ne sũ-noogo, tɩ kaoosg zugẽ bɩ a kõ-a a Lea ne a Rasɛll t’a maan a pagba. La a Labã wa n yik n wẽgda a Zakoobe, hal n toeem a yaoodã naoor piiga. (Sɩng. 31:41, 42) La a Zakoob maana sũ-mar yel-kãngã taoore, bala a ra kɩsa sɩd t’a Zeova na n sõng-a lame. A Zeova sɩd sõng-a lame. A sẽn wa n yeel a Zakoob t’a yik n leb Kanaã wã t’a ra “tara dũms ne yem-pogse, la yem-daad ne yʋgma la bõens wʋsgo.” (Sɩng. 30:43) A Zakoob talla mi-beoog wʋsg ne a Zeova, n pʋʋs-a n yeel woto: “Mam ka zems ne bark la sɩd ning yãmb sẽn da wilg maamã ye. Tɩ bõe, mam sẽn wa n na n dʋʋg Zʋrdẽ-kãngã wã, rẽ tɩ yaa rasaar bal la mam tara. La masã, mam lebga kʋʋng a yiibu.”—Sɩng. 32:11.

⁹ Kiba-kãensã wilgdame t’a Moiiz sẽn yeel bũmb ningã yaa sɩda. A yeela woto: “Zusoaba, yãmb yaa tõnd laafɩ zĩig zãmaan fãa.” (Yɩɩl 90:1) A Zeova pa toeem ye. A ket n nonga neb nins sẽn tũud-a wã, n kogend-b la a get b yelle. (Zak 1:17) Bɩ d ges a sẽn maand rẽ to-to wã.

10. Bõe yĩng tɩ d tõe n kɩs sɩd t’a Zeova ket n yaa a nin-buiidã “laafɩ zĩiga”?

¹⁰ D rɩk makr ne yãmb sẽn na n be bʋ-kaoodb taoore, n gomd n ningd bi-bees siglg sẽn be dũniyã gill zug taale. Siglgã taoor soabã tara yam la pãng wʋsgo. Sẽn paase, a yaa nin-toaag sẽn nong ziri yagb la nin-kʋʋre. Y sã n gom n sa n yi, y yam na gãand bãan sɩda? Ayo! Yaa vẽeneg tɩ y na n kosa polɩɩs-rãmbã koglgo. Tõnd sẽn yaa a Zeova Kaset rãmbã, d maanda bũmb sẽn wõnd woto. D gomdame n ningd a Sʋɩtãan sẽn yaa a Zeova bɛ-kãsengã taale. (Karm-y Wilgr 12:17.) La rẽ yĩnga a Sʋɩtãan tõogame tɩ Wẽnnaam nin-buiidã bas mooneg bɩ? Ayo! D ket n moonda koɛɛgã dũniyã gill zugu, tɩ d koe-moonegã pãng paasdẽ. Bõe n kɩt tɩ d tõogd n maand rẽ? Yaa bũmb a ye yĩng bala: A Zeova yaa tõnd “laafɩ zĩiga.” Rũndã-rũndã sẽn yaa yaoolem wakatã la a kogend a nin-buiidã la a ningd-b bark n yɩɩda. (Karm-y Ezai 54:14, 17.) La tõnd ned kam fãa sã n dat t’a Zeova kell n yɩ a “laafɩ zĩiga,” yaa tɩlae t’a ra bas t’a Sʋɩtãan belg-a ye.

11. Bõe me la a Abrahaam, a Izaak la a Zakoob kibayã wilgd tõndo?

¹¹ A Abrahaam, a Izaak ne a Zakoob kibayã wilgda tõnd bũmb a to. Baa b sẽn da vɩ Kanaã soolmẽ wã, b ra welga b mens ne tẽngã nebã, n da kis tʋʋm-wẽns nins sẽn da tʋmdã. (Sɩng. 27:46) B ra pa baood t’a Zeova kõ-b noy wʋsg n wilg b sẽn tõe n maan la b sẽn pa tõe n maan ye. B sẽn da mi a Zeova  sõma wã kɩtame tɩ b ra tõe n bãng a sẽn nong la a sẽn kis n bake. Rẽ n so tɩ b maan b sẽn tõe fãa n pa yɩ dũniyã rẽnd ye. B kõo tõnd mak-sõngo. Yãmb maood n dɩkda nin-kãensã togs-n-taar bɩ? Tũud-n-taarã la reemã wɛɛngẽ, y wilgdame tɩ y pa rat n yɩ dũniyã rẽnd bɩ? Zu-bʋko, kiris-neb sãnda mi n tara manesem sẽn wilgd tɩ b nonga dũniyã bũmb kẽere. Y sã n wa yã tɩ yaa woto ne yãmb bɩ y pʋʋs a Zeova n kos sõngre. Tẽeg-y tɩ dũni-kãngã bee a Sʋɩtãan nugẽ, la t’a Sʋɩtãan toog ka be ne tõnd ye.—2 Kor. 4:4; Ef. 2:1, 2.

12. a) Wãn to la a Zeova sõngd a nin-buiidã? b) Yãmb tagsg yaa wãn ne a Zeova sẽn sõngd tõnd to-to wã?

¹² A Zeova maana bũmb toor-toor sẽn na yɩl n sõng a nin-buiidã tɩ b tẽebã kell n tall pãnga. D sã n pa rat t’a Sʋɩtãan tõog n belg-do, d segd n dɩɩ bõn-kãens nafa. Wala makre, d tara tigissã la zak pʋgẽ Biibl zãmsgã. Sẽn paase, a Zeova yãka kãsem-dãmbã n na n kengd tõnd raood la a teel-do, tɩ d tõog n mao ne zu-loeesã. (Ef. 4:8-12) A George Gangas sẽn yɩ Siglgã taoor lʋɩtb Sull ned n maan yʋʋm wʋsgã yeelame tɩ yẽ sã n be Wẽnnaam nin-buiidã sʋka, “a yam gãeyã bãan wa a sẽn be a yiri.” Yaa woto ne yãmb me bɩ?

13. Yam-bʋg la d tõe n dɩk Hebre dãmb 11:13 soabã goam pʋgẽ?

¹³ Bũmb a to a Abrahaam, a Izaak ne a Zakoob kibayã sẽn le wilgd tõnd yaa tɩ d segd n yɩɩ toor ne dũniyã nebã. Wa d sẽn yã  pipi sullã pʋgẽ wã, b ra wilgdame tɩ “bãmb mensã yaa sãamb la kaoos-wet tẽng zug ka.” (Heb. 11:13, Kãab-paalgã Koe-noogo) Yãmb me wilgdame tɩ y yaa toor ne dũniyã nebã bɩ? Yaa sɩd tɩ wakat ninga, woto pa nana ye. La y tõeeme. Bala, Wẽnnaam na n sõng-y lame. Y tẽed-n-taasã me na n sõng-y lame. Tẽeg-y tɩ pa yãmb y yembr n maood ye. Neb nins fãa sẽn dat n tũ a Zeova wã segd n maoa ne a Sʋɩtãan la a dũniyã. (Ef. 6:12) La d sã n teeg a Zeova n kɩt t’a yɩ d laafɩ zĩiga, d na n tõogame.

14. Tẽn-bʋg la a Abrahaam ra gũuda?

¹⁴ D segd n dɩka a Abrahaam togs-n-taar me, n tagsd keoorã yell wakat fãa. (2 Kor. 4:18) Tʋm-tʋmd a Poll yeelame t’a Abrahaam “ra gũuda tẽng sẽn tar yẽbgr sõma, a tãn-met ne a naand sẽn yaa Wẽnnaam.” (Heb. 11:10) Tẽn-kãng yaa Wẽnnaam Rĩungã. A Abrahaam ra segd n gũu tẽn-kãnga,  la tõnd yẽ nengẽ pa woto ye. Rĩungã zoe n dɩta naam saasẽ. Sẽn paase, bũmb wʋsg n wilgd tɩ ka la bilfu, a na n sooga tẽngã gilli. Yãmb sẽn vɩ to-to wã wilgdame tɩ y kɩsa sɩd ne rẽ bɩ? Yãmb lʋɩɩsda Wẽnnaam Rĩungã taoore, la y modg n yaa toor ne dũni-kãngã nebã bɩ?—Karm-y 2 Pɩɛɛr 3:11, 12.

15. Bõe n gũud sẽn teeg-b dũni-kãngã wã?

¹⁵ Dũni-kãngã saab sẽn kolgdã, zu-loeesã na n paasdame. (Mat. 24:7, 8) La to-kãsengã sã n wa sɩnge, yaa vẽeneg tɩ yɛlã na n maneg n zẽname. Dũniyã gill zugu, bũmb wʋsg na n sãamame tɩ rabeem yõk nebã hal tɩ b pa mi b sẽn maand ye. (Hab. 3:16, 17) Biiblã wilgame tɩ rabeemã na n kɩtame tɩ b zoe n “solg b mens bogd pʋsẽ la tãens kug sʋka.” (Wil. 6:15-17) La bok baa a ye kae n tõe n kogl-b ye. Politikã sigls la lɛɛbdbã sigls b sẽn mak ne tãensã me pa na n tõog n kogl-b ye.

16. Bõe yĩng tɩ tigingã segd n tall yõod wʋsg ne-do?

¹⁶ La a Zeova na n kogla tõnd to-kãsengã sasa. Wa no-rɛɛs a Habakuki, d na n “maana sũ-noog Zusoab a Wẽnnaam sẽn yaa [tõnd] fãagdã yĩnga.” (Hab. 3:18) Wãn to la a Zeova na n kogl tõnd wakat kãnga? D nan pa mi ye. La d tõe n kɩsa sɩd tɩ kʋʋn-kãsengã na n kell n yɩɩ neb sẽn sigl sõma, t’a Zeova wilgd-b sor wa sẽn yɩ to-to Israyɛll nebã sẽn wa n na n yi Eziptã. (Wil. 7:9; karm-y Yikr 13:18.) Wãn to la a Zeova na n wilg tõnd sor wakat kãnga? Tõe tɩ na n yɩɩ ne tigingã maasem. Ezai 26:20 goma “rot” Wẽnnaam nin-buiidã sẽn tõe n kẽ n paam koglg yelle. Tõe tɩ ro-kãens makda tigimsã sẽn be dũniyã gill zugã. (Karm-y Ezai 26:20.) Yãmb kẽnda tigissã n pa vaandẽ bɩ? Y sakda sor-wilgr ning a Zeova sẽn tũnugd ne tigingã n kõt-yã bɩ?—Heb. 13:17.

17. Wãn to la a Zeova na n yɩ “laafɩ zĩig” neb nins sẽn tũ-a n ta b kũumã yĩnga?

¹⁷ Baa ned sẽn tũud a Zeova sã n ki tɩ to-kãsengã nan pa ta, a Zeova na n kell n yɩ a soabã “laafɩ zĩiga.” Wãn to? A na n wa vʋʋg-a lame. Yʋʋm wʋsg a Abrahaam, a Izaak la a Zakoob kũumã poore, a Zeova yeela a Moiiz woto: “Mam yaa . . . a Abrahaam ne a Izaak la a Zakoob Wẽnnaam.” (Yik. 3:6) A Zezi sẽn lebs n togs gom-kãensã poore, a yeela woto: “Wẽnnaam ka kũum Wẽnnaam ye, bãmb yaa nin-vɩɩs Wẽnnaam, tɩ bõe, fãa vɩɩ bãmb yĩnga.” (Luk 20:38) A Zeova nifẽ, neb nins sẽn tũ yẽ n tãag kũumã ket n vɩɩme. Bala a miime t’a na n vʋʋg-b lame.—Koɛ. 7:1.

18. Wãn to la a Zeova na n yɩ a nin-buiidã “laafɩ zĩig” dũni-paalgã pʋgẽ?

¹⁸ Dũni-paalgã pʋgẽ, a Zeova na n maneg n yɩ a nin-buiidã “laafɩ zĩiga.” Wilgr 21:3 yeela woto: “Gese, Wẽnnaam yir bee nebã sʋka. La [yẽ] na n zĩnda ne bãmba.” Sɩngrẽ wã, na n yɩɩ ne a Zezi Kirist maasem la a Zeova na n zĩnd ne-ba. La a Zezi naamã sẽn na n kaoos yʋʋm tusrã saabẽ, rẽ t’a pidsa a Ba wã raabã ne tẽngã. A na n lebsa a Zeova Rĩungã. (1 Kor. 15:28) Nebã fãa sẽn na n zems zãngã, a Zezi pa na n le yõk a Zeova sɛɛg b yĩng ye. A Zeova meng n na n dɩ naam b zugu. Ad yaa vɩɩm sẽn be yamleoog n gũud tõndo! La nand tɩ wakat kãng ta, bɩ d mao n dɩk pĩnd wẽn-sakdbã togs-n-taare, n kɩt t’a Zeova yɩ d “laafɩ zĩiga.”