1, 2. Ongiini aapiya yaKalunga ya li yu ulike nkene ya tala ko onkalelo yuuyuni mbuka, nomeityo lini ye na egumbo lyokukala?

 MBELA oho kala wu uvite uugumbo nowa gamenwa muuyuni mbuka? Ngele hasho, hangoye awike wu uvite ngaaka. Momukokomo gwoomvula odhindji dha piti, aantu ayehe mboka ye hole Jehova oya kala yu uvite kutya yo oondjendi naakwiilongo monkalelo yuuyuni mbuka. Pashiholelwa, pethimbo aapiya yaKalunga aadhiginini sho ya li taya tembauka mevi lyaKaanan, oya li “ya dhimbulula [yu ulike montaneho, NW] kutya oyo oondjendi naakwiilongo [moshilongo, NW].” — Heb. 11:13.

² Sha faathana, aalanduli yaKristus aagwayekwa, mboka ‘uukwashilongo wawo wu li megulu’ oyi itala ko kutya yo oye li “oondjendi naakwiilongo” monkalelo yuuyuni mbuka. (Fil. 3:20; 1 Pet. 2:11) ‘Oonzi dhilwe’ dhaKristus nadho ‘kadhi shi dhomuuyuni ngaashi naanaa [Jesus kaa li] gwomuuyuni.’ (Joh. 10:16; 17:16) Nonando ongawo, shoka itashi ti kutya oshigwana shaKalunga kashi na “egumbo” lyokukala. Otu li nokuli megameno ndyoka itaali vulu okuyelekwa nasha notu na wo egumbo lyokukala ndyoka hali monika owala nomeho geitaalo. Moses okwa li a nyola a ti: ‘OMUWA, ongoye wa kala aluhe egameno lyetu.’ * (Eps. 90:1) Jehova okwa li u ulike ngiini kutya oku li “egameno” lyashili kaapiya ye aadhiginini yonale? Ongiini e li “egameno” lyashili koshigwana she kunena? Nongiini ta ka ulika monakuyiwa kutya oye owala egameno lyetu?

3. MEpisalomi 90:1 Jehova ota yelekanithwa nashike, nomolwashike?

³ Omathimbo gamwe Ombiimbeli ohayi yelekanitha Jehova niinima mbyoka hatu vulu okumona, opo tu uve ko nuupu uukwatya we. Pashiholelwa, mEpisalomi 90:1 Jehova  ota yelekanithwa ‘negameno,’ nenge negumbo. Uuna tu uvu oshitya egumbo, ohatu dhiladhila kombinga yehala moka mu na ohole, ombili nosho wo egameno. Omolwashike Jehova ta yelekanithwa negumbo? Ombiimbeli otayi ti kutya Jehova oye ohole. (1 Joh. 4:8) Oku li wo Kalunga kombili, ngoka ha ningitha aapiya ye aadhiginini ya kale ‘yaa na mbudhi, ye li megameno.’ (Eps. 4:8) Pashiholelwa, tala kunkene a li u ungaunga nootatekulululwa aadhiginini, okutameka ngaa naAbraham.

4, 5. Ongiini Kalunga a li u ulike kutya oku li “egameno” lyashili kuAbraham?

⁴ Otatu vulu okudhiladhila kunkene Abraham a li u uvite sho Jehova e mu lombwele a ti: “Za mo mevi lyaandjeni, mezimo lyeni . . . u ye kevi ndyoka tandi ke li ku ulukila.” Ngele Abraham okwa li e na omaipulo shi na ko nasha naashoka, otashi vulika a li a mbilipalelwa sho Jehova e mu lombwele oohapu ndhika: “Otandi ke ku pa oluvalo olwindji, notalu ka ninga oshigwana oshinene. Otandi ku yambeke, edhina lyoye otandi li ningi enene . . . Otandi ka yambeka mboka taye ku yambeke, ihe otii ka tula omutima mboka taye ku tula omutima.” — Gen. 12:1-3.

⁵ Oohapu ndhoka, otadhi ulike kutya Jehova ota ka ninga egameno lyaAbraham nosho wo lyoluvalo lwe. (Gen. 26:1-6) Jehova okwa li a gwanitha euvaneko lye ndyoka. Pashiholelwa, okwa li a keelele Farao gwaEgipiti nosho wo omukwaniilwa Abimelek gwaGera kaaya gume Sara nokaaya dhipage Abraham. Okwa li wo a gamene Isak naRebekka momukalo gwa faathana. (Gen. 12:14-20; 20:1-14; 26:6-11) Ombiimbeli otayi ti: “Kalunga ina pitika ya hepekwe; okwe ya gamene nokwa ganda aapangeli ta ti: ‘Inamu ningila aahogololwa yandje uuwinayi, inamu ehameka aahunganeki yandje.’” — Eps. 105:14, 15.

6. Isak okwa li a lombwele Jakob a ninge shike, naJakob otashi vulika a li u uvite ngiini?

⁶ Jakob, omutekulu gwaAbraham, naye okwa li gumwe gwomaapolofeti mboka. Sho ethimbo lya li lya thikana opo Jakob i ikongele omukulukadhi, he Isak okwa li e mu lombwele a ti: “Ino hokana omukadhona Omukaanana. Inda kuMesopotamia, kaandjahokulu Betuel, u hokane gumwe gwomaana yahokulu Laban.” (Gen. 28:1, 2) Jakob okwa li a vulika kuhe Isak nokwa li a thigi po egumbo lyaandjawo muKaanan, e ta yi molweendo lwookilometa omathele oye awike u uka kuHaran. (Gen. 28:10) Otashi vulika a li ti ipula ta ti: ‘Mbela otandi ka kala ko ethimbo li thike peni? Mbela tatekulu ota ka taamba ndje ko ngaa nombili e ta pe ndje omukulukadhi omutilikalunga?’ Ngele Jakob osho a li ti ipula ngawo, osha yela kutya omadhiladhilo ngoka oga li ga kana mo muye sho a thiki muLus, shoka shi li ookilometa 100 okuza kuBeersheba. Oshike sha li sha ningwa muLus?

7. Kalunga okwa li a shilipaleke Jakob shike okupitila mondjodhi?

⁷ PuLus Jehova okwa li i ihololele Jakob mondjodhi, e te mu lombwele ta ti: ‘Otandi kala nangoye  e tandi ku gamene shaa nkonka to yi, notandi ke ku galulila kevi ndika. Itandi ku etha, sigo nda gwanitha ayihe nde yi ku uvanekele.’ (Gen. 28:15) Oohapu ndhoka kadha li tuu dha shilipaleke Jakob noku mu hekeleka! Mbela owa fa wu mu wete te endelele a halelela oku ka mona nkene Kalunga ta gwanitha Oohapu dhe? Ngele owa thiga po egumbo lyaandjeni tashi vulika to longo miilonga yaJehova koshilongo shilwe, otashi vulika wu uvite ko onkalo yaJakob. Nopwaahe na omalimbililo, owa mona nkene Jehova a li e ku sile oshimpwiyu.

8, 9. Omomikalo dhini Jehova a li “egameno” lyashili kuJakob, notatu ilongo mo shike moshinima shika?

⁸ Sho Jakob a thiki muHaran, hekulu Laban okwa li e mu taamba ko nombili nokonima okwa li e mu pe Lea naRakel ya ninge aakulukadhi ye. Ihe momukokomoko gwethimbo lyontumba, Laban okwa li a kambadhala okulongitha Jakob nokwa li a lundulula ondjambi ye lwiikando omulongo. (Gen. 31:41, 42) Ihe Jakob okwa li i idhidhimikile okwaanuuyuuki huka nokwa li i inekela kutya Jehova ota ka tsikila noku mu sila oshimpwiyu naJehova osho tuu a li a ningi shili! Pethimbo mpoka sho Kalunga a li a lombwele Jakob a shune kuKaanan, tatekulululwa ngoka okwa li e na “iimuna oyindji, aapika, oongamelo nuusino.” (Gen. 30:43) Jakob okwa li a pandula noonkondo nokwa li a galikana a ti: “Inandi opalela esilohenda lyoye nuudhiginini woye we u ulukile ndje, ngame omuntu gwoye. Onda tokolele Jordan ndi li iikaha yowala, eeno, ondhimbo ayike nda li ndi yi na, ihe nena onda galuka ndi na oongundu mbali.” — Gen. 32:10.

⁹ Shoka kasha li tuu sha gandja uushili woohapu dhaMoses sho a li a galikana a ti: “OMUWA, ongoye wa kala aluhe egameno lyetu”! (Eps. 90:1) Oohapu ndhoka otadhi gwanithwa nokunena, molwaashoka Jehova ngoka ‘puye kaapu na nando elunduluko nenge epingathano lyuuyelele nomilema,’ ota tsikile nokukala e li egameno kaapiya ye aadhiginini. (Jak. 1:17) Natu ka konakoneni kutya shika ohashi ningwa ngiini.

10. Omolwashike tatu vulu okukala nuushili kutya Jehova ota tsikile okukala egameno lyaapiya ye?

¹⁰ Dhiladhila kwaashika: Natu tye nduno owu li mompangu to gandja uunzapo wu li ompinge nehangano hali longo iimbuluma muuyuni awuhe. Omuwiliki gwehangano ndyoka oku na omakoto, omunankondo, omuniifundja ye mwenemwene nomudhipagi. Oto ka kala wu uvite ngiini ngele wa yi pondje konima yompangu? Mbela oto ka kala wu uvite wa gamenwa? Aawe! Otashi vulika wu ka kale wu uvite kutya owa pumbwa egameno. Oshinima shoka otashi thaneke nkene aapiya yaJehova mboka haya popile Jehova nomukumo nohaya aneke Satana pomutenya ngoka e li omutondi gwe omukwanyanya taye shi ningi kaaye na uumbanda. (Lesha Ehololo 12:17.) Mbela Satana okwa vula ngaa okumweneka oshigwana shaKalunga? Aawe! Uushili owo kutya otashi tsikile nokuhuma komeho pambepo. Oshinima shoka otashi vulika owala omolwetompelo limwe ndyoka kutya Jehova oye omupopili gwetu, noku li “egameno” lyetu lyashili, unene tuu momasiku ngaka gahugunina. (Lesha Jesaja 54:14, 17.) Nonando osho shi li ngawo, Jehova ita ka kala egameno lyetu ngele otwe etha Satana e tu kuthe mo mehala lyetu lyegameno.

11. Oshiilongomwa shini tatu ilongo kootatekulululwa?

¹¹ Natu i ilonge ishewe oshiilongomwa shimwe kootatekulululwa. Nonando oya li ya kala muKaanan, kaya li ye na ekwatathano naantu yomoshilongo shoka noya li ye tonde omikalo dhawo omiwinayi nodha nyata. (Gen. 27:46) Oya li aalumentu ye shi omithikampango dhaJehova nokaya li ya pumbwa omusholondondo omuleeleka gwaashoka ye na okuninga nogwaashoka kaaye na okuninga. Shoka ya li ye shi kombinga yaJehova nosho wo yuukwatya we, osha li she ya gwanena. Molwaashoka okwa li egameno lyawo, kaya li ya hala okukala ye na ekwatathano lela n nuuyuni. Ihe oya li yi i  kaleke kokule nawo ngaashi tashi vulika. Inaye tu tulila po tuu oshiholelwa oshiwanawa! Mbela oho kambadhala ngaa wu holele ootatekulululwa mboka aadhiginini uuna to hogolola ookuume koye nosho wo omainyanyudho? Shinikitha oluhodhi, Aakriste yamwe megongalo ohaya ulike kutya oyu uvite ya gwanenwa momikalo dhontumba nodhongandi muuyuni waSatana. Ngele osho wu uvite ngawo unene nenge nokuli kashona owala, galikana kombinga yasho. Dhimbulukwa kutya, Satana oye mwene gwuuyuni mbuka nohawu ulike ombepo ye yonyanya noyokwiihola mwene. — 2 Kor. 4:4; Ef. 2:1, 2.

12. (a) Jehova oha sile oshimpwiyu ngiini aanegumbo lye yopambepo? (b) Owu uvitile ngiini omasiloshimpwiyu ngaka?

¹² Ngele otwa hala kaatu kwatwe ko kuSatana niihelele ye, otwa pumbwa okulongitha omasiloshimpwiyu agehe ngoka Jehova a tulila po aanegumbo lye mboka ye mu ninga egameno lyawo. Omasiloshimpwiyu ngaka oga kwatela mo okugongala kwopaKriste, elongelokalunga lyuukwanegumbo, nosho wo “aantu omagano,” sha hala okutya, aasita yoshigunda mboka ya langekwa po kuKalunga ye tu hekeleke noku tu ambidhidha sho tatu kondjo nomaupyakadhi gonkalamwenyo. (Ef. 4:8-12) Omumwatate George Gangas ngoka a li oshilyo shOlutuwiliki uule woomvula dhontumba, okwa nyola a ti: “Uuna ndi li [noshigwana shaKalunga] ohandi kala nda mangulukila aanegumbo yaandjetu moparadisa yopambepo.” Mbela nangoye osho ho kala wu uvite ngawo?

13. MAahebeli 11:13 otatu ilongo mo oshiilongomwa shini sha simana?

¹³ Uukwatya wulwe natango wootatekulululwa mboka tu shi okuholela, owo okukala ya yooloka ko kaantu mboka ya li ye ya kundukidha. Ngaashi sha popiwa  mokatendo ko-1, oya li “ya dhimbulula [yu ulike montaneho, NW] kutya oyo oondjendi naakwiilongo [moshilongo, NW].” (Heb. 11:13) Mbela ngoye owa tokola toko wu kale wa yooloka ko kaantu yomuuyuni? Kala wu shi kutya oku shi ninga haaluhe okupu. Ihe oto vulu okupondola pakwatho lyaKalunga nosho wo lyAakriste ooyakweni. Dhimbulukwa kutya hangoye awike. Ayehe mboka ya hala okulongela Jehova oye na okukondja aluhe. (Ef. 6:12) Otatu vulu okusindana mekondjo ndyoka ngele otwa kala twi inekela muJehova noku mu ninga egameno lyetu.

14. “Oshilando” shini aapiya yaJehova ya tegelela?

¹⁴ Shoka sha simana osho wo kutya holela Abraham mokukala wa tala kondjambi. (2 Kor. 4:18) Omuyapostoli Paulus okwa nyola kutya Abraham “okwa li a tegelela oshilando shoka shi na omikanka dha kolelela, sha sindwa nosha tungwa kuKalunga mwene.” (Heb. 11:10) “Oshilando” shoka osho Uukwaniilwa wopaMesiasa. Osha yela kutya, Abraham okwa li e na okutegelela “oshilando” shoka. Tse katu na oku shi tegelela ngaashi Abraham, molwaashoka Uukwaniilwa  wopaMesiasa otawu pangele nale megulu. Otu na uunzapo owundji mboka tawu ulike kutya masiku Uukwaniilwa mboka otawu ka pangela ombanda yevi alihe. Uukwaniilwa mboka owu li ngaa oshinima sholela kungoye? Mbela onkalamwenyo yoye, omukalo moka ho tala ko iinima yuuyuni mbuka nosho wo omalalakano goye otayi ulike ngaa kutya owe wu lenga? — Lesha 2 Petrus 3:11, 12.

15. Mboka ya tula einekelo lyawo muuyuni mbuka oya tegelela oku ka ningilwa shike monakuyiwa?

¹⁵ Sho uuyuni waSatana wu uka pehulilo, ‘oshitheta’ nenge omaupyakadhi otaga ka lunda. (Mat. 24:7, 8) Onkalo otayi ka pimbila lela puudhigu uunene. Iinima ayihe otayi ka yonuka po naantu otaya ka kwatwa kuumbanda. (Hab. 3:16, 17) Omolwuumbanda, aantu otaya ka konga uuholameno “momakololo nokohi yomamanya gokoondundu” dhopathaneko. (Eh. 6:15-17) Ihe omakololo go genegene nenge omahangano gopapolotika ngoka ga fa oondundu nosho wo omahangano gopangeshefa itaga ka vula oku ya gamena.

16. Otu na okutala ko ngiini egongalo lyopaKriste, nomolwashike?

¹⁶ Oshigwana shaJehova otashi ka tsikila nokukala shi li ‘megameno’ lyashili. Egameno ndyoka olyo Jehova Kalunga. Ngaashi Omulopofeti Habakuk, otashi ka ‘nyanyukilwa mOMUWA.’ Otashi ka kala ‘sha panda, oshoka Kalunga oye omuhupithi gwasho.’ (Hab. 3:18, yelekanitha OB-1954.) Omomikalo dhini Jehova ta ka kala “egameno” lyashili pethimbo ndyoka lyiihuna? Otu na owala okutegelela tu ka tale shoka tashi ka ningwa po. Ihe otatu vulu okukala nuushili moshinima shika: Ngaashi owala sho Aaisraeli ya li taya tembuka muEgipiti, ‘ongundu onene’ otayi ka kala yu unganekwa notayi ka pewa omalombwelo kuKalunga. (Eh. 7:9; lesha Eksodus 13:18.) Otashi vulika omalombwelo ngoka Kalunga te ke ga gandja okupitila megongalo. Omagongalo omayuvi ogendji ngoka ge li muuyuni oga fa ‘omagumbo’ gegameno ngoka ga hunganekwa muJesaja 26:20. (Lesha.) Mbela owa lenga ngaa okugongala kehe kwegongalo? Mbela oho katuka ngaa nziya ngele Jehova a gandja omalombwelo okupitila megongalo? — Heb. 13:17.

17. Omomukalo guni Jehova e li “egameno” lyashili nokuli nokaapiya ye aadhiginini mboka ya sa?

¹⁷ Jehova ota ka kala ‘egameno’ lyashili nokuli nokwaamboka ya sa aadhiginini manga uudhigu uunene inaawu tameka. Ngiini mbela? Konima yethimbo ele sho ootatekulululwa aadhiginini ya si, Jehova okwa li a lombwele Moses a ti: “Ongame Kalunga . .  kaAbraham, Kalunga kaIsak naKalunga kaJakob.” (Eks. 3:6) Konima sho Jesus a totha moohapu ndhoka, okwa gwedha ko a ti: “Kalunga ke shi Kalunga kaasi, aawe, okaanamwenyo; oshoka mekwatathano naye ayehe otaa kala ye na omwenyo.” (Luk. 20:38) Aapiya yaJehova ayehe mboka ya sa aadhiginini, kuye oya fa ye na omwenyo, molwaashoka oku shi kutya ote ke ya yumudha shili. — Omuuv. 7:1.

18. Ongiini Jehova ta ka ulika kutya oku li “egameno” lyashili koshigwana she momukalo gwi ikalekelwa muuyuni uupe?

¹⁸ Muuyuni uupe mboka twa tegelela, Jehova ota ka kala “egameno” lyashili momukalo gwi ikalekelwa. Ehololo 21:3 otali ti: “Ngashingeyi egumbo lyaKalunga oli li paantu! Oye ota ka kala pamwe nayo.” Tango, Jehova ota ka longitha Jesus Kristus a pangele ombanda yevi. Jesus ota ka shunitha Uukwaniilwa kuHe pehulilo lyoomvula eyuvi, konima sho a gwanitha thiluthilu elalakano lyaHe li na ko nasha nevi. (1 Kor. 15:28) Konima yaashono, aantu ya gwanenena itaya ka kala we ya pumbwa Jesus oye a kale omupokati gwawo, molwaashoka Jehova mwene ota ka kala pamwe nayo. Ndyoka ka li shi tuu etegameno ekumithi! Ngashingeyi natu ninge oonkambadhala tu holele aapiya yaJehova yonale aadhiginini mokuninga Jehova “egameno” lyetu lyashili.