1, 2. Logona hifo fēfē e tau fekafekau he Atua hagaao ke he lalolagi nei? Ko e kaina fe ne moua e lautolu?

  LOGONA nakai e koe e haohao mitaki mo e hagahaga mitaki he lalolagi kelea nei, ke tuga ko koe i kaina? Ka nakai, ti logona a koe tuga ne falu fekafekau ha Iehova. He tau vahā i tuai, ko lautolu oti kua fakaalofa mooli ki a Iehova kua tuga e tau tagata kehe he lalolagi nei. Ma e fakatai, ko e tau tagata tapuaki fakamooli he Atua ne hiki mai he taha matakavi ke he taha matakavi he motu ko Kanana ne logona pihia. Pehē e Tohi Tapu kua “talahau mai ko e tau tagata kehe a lautolu mo e tau tagata o fano ke he lalolagi.”​​—Hepe. 11:13.

² Ko e tau tutaki fakauku he Keriso ne moua e “māga moli” ha lautolu he lagi. Ne logona foki e lautolu kua tuga e “tau tagata paea mo e tau tagata kehe” he lalolagi nei. (Filipi 3:20; 1 Pete. 2:11) Ko e ‘tau mamoe kehe’ foki he Keriso kua “nakai ko e tau tagata he lalolagi,” ke tuga a Iesu ne “nakai ko e tagata he lalolagi.” (Ioane 10:16; 17:16) Ka e fai kaina e tau tagata he Atua. Nakai ko e kaina kua kitia aki e tau mata ha tautolu ka ko e kaina kua mua atu e haohao mitaki mo e fakaalofa lahi kua maeke ke moua e tautolu. Ko e heigoa e kaina nei? Ne tohi e Mose: “Ko e Iki [Iehova] na e, kua eke a koe mo mena ke nonofo ai a mautolu ke he taha hau mo e taha hau.” (Sala. 90:1) Ko Iehova ko e “mena ke nonofo ai,” po ke kaina, ma e tau fekafekau fakamooli haana. Iloa nakai e koe e puhala ne eke a Iehova mo kaina he tau fekafekau haana i tuai? Eke fēfē a ia mo kaina he tau tagata haana he vahā nei? Ti eke fēfē a ia mo kaina haohao mitaki hokoia ma e tau fekafekau haana anoiha?

3. Fakatatai ke he heigoa a Iehova ia Salamo 90:1, ti ko e ha?

³ He falu mogo ne fakatatai he Tohi Tapu a Iehova ke he  tau mena ka kitia e tautolu ke maeke ia tautolu ke maama mitaki e aga haana. Ma e fakatai, kua fakatatai he Salamo 90:1 a Iehova ke he “mena ke nonofo ai,” po ke kaina. Ka manamanatu a tautolu ke he kaina, kua manamanatu a tautolu ke he matakavi kua ha ha i ai e fakaalofa, mafola, mo e puipuiaga. Ko e ha kua fakatatai a Iehova ke he kaina? Ne pehē e Tohi Tapu ko Iehova ko e fakaalofa. (1 Ioa. 4:8) Kua talahau foki i ai ko ia ko e Atua he mafola mo e puipui e ia e tau fekafekau haana. (Sala. 4:8) Tuga ma e fakatai, kia fakatutala a tautolu ke he puhala ne tatai a Iehova ke he kaina ma e tau fekafekau tua fakamooli haana ko Aperahamo, Isaako, mo Iakopo.

4, 5. Fakamonuina mo e puipui fēfē he Atua a Aperahamo?

⁴ Kua liga manamanatu a Aperahamo ke he kakano ne tala age a Iehova ki a ia: “Kia toka e koe hau a kelekele, mo e hau a motu ne fanau ai, mo e faoa he hau a matua tane, ti fano ke he motu ke fakakite atu e au kia koe.” Ka e lahi e mafanatia foki he tau kupu ha Iehova ne tala age ki a ia: “To eke foki e au a koe mo motu lahi, to fakamonuina e au a koe, to fakalilifu e au hau a higoa.” Ne lafi atu e Iehova: “To fakamonuina e au a lautolu kua fakamonuina a koe, ka e fakamalaia e au a lautolu kua kaialu kia koe.”​​—Kene. 12:1-3.

⁵ Ne mavehe e Iehova to fakamonuina e ia mo e puipui a Aperahamo mo e haana tau hologa, ti ko e mena tonu nei ni ne taute e ia. (Kene. 26:1-6) Ma e fakatai, ne taofi e ia a Farao i Aikupito mo e Patuiki ko Apimeleko ha Kira mai he tamate a Aperahamo mo e fofō haana hoana ko Sara. Ne puipui e ia a Isaako mo Repeka he puhala taha. (Kene. 12:14-20; 20:1-14; 26:6-11) Ne pehē e Tohi Tapu ko Iehova “nakai toka e ia taha tagata ke favale atu kia lautolu; ne akonaki atu e ia e tau patuiki ha ko lautolu. Kua pehe atu ki ai, Aua neke piki atu kia lautolu ne fakauku e au; aua foki neke mahani kelea ke [he] haku a tau perofeta.”​​—Sala. 105:14, 15.

6. Ko e heigoa ne tala age e Isaako ki a Iakopo ke taute? Fēfē e logonaaga ha Iakopo?

⁶ Ne leveki fakamitaki foki e Iehova e mokopuna ha Aperahamo ko Iakopo. He magaaho ne amanaki a Iakopo ke fai hoana, ne tala age e matua taane haana ko Isaako ki a ia: “Aua neke faihoana a koe ke he taha fifine Kanana. Matike ā mo e fano a koe ki Patanarama, ke he faoa a Petueli, ko e matua tane he hau a matua fifine, ti faihoana ai a koe ke he taha he tau tama fifine a Lapana.” (Kene. 28:1, 2) Ne taute e Iakopo e mena tonu ia ne tala age he matua haana ki a ia. Ne toka e ia e magafaoa haana i Kanana ti totou teau e kilomita he fano ke he faahi uta ha Harana, liga tokotaha. (Kene. 28:10) Liga manatu a ia: ‘To fiha e leva he fano kehe au? To fiafia nakai e agikolo haaku ke kitia au? To moua nakai e au e hoana kua fakaalofa ki a Iehova?’ Ka e fai mena ne tupu i Lusa, 100 e kilomita mai i Peresepa ne lagomatai a Iakopo ke oti e tupetupe. Ko e heigoa e mena ia?

7. Ko e heigoa e mafanatia ne foaki he Atua ki a Iakopo?

 ⁷ I Lusa, ne tū atu a Iehova ki a Iakopo he miti mo e pehē: “Kua fakalataha au mo koe, to leveki foki e au a koe ke he tau mena oti ke fano a koe ki ai, to liuaki mai foki e au a koe ke he motu nai; ha ko e mena nakai tiaki e au a koe, ato eke e au e mena ne tala atu ai au kia koe.” (Kene. 28:15) Liga foaki he tau kupu totonu ia e mafanatia lahi ki a Iakopo! Mole ia, kua liga makai a Iakopo ke kitia e puhala ne fakamooli e maveheaga ha Iehova. Ka fano kehe a koe he kaina, liga fekafekau he taha motu, liga tupetupe a koe tuga a Iakopo. Ka e liga logona mooli e koe e puhala ne leveki e Iehova a koe ke he tau puhala loga.

8, 9. Eke fēfē a Iehova mo ‘mena ke nofo ai’ a Iakopo? Ko e heigoa e fakafifitakiaga ha Iakopo kua fakaako ki a tautolu hagaao ki a Iehova?

⁸ He hoko atu a Iakopo ki Harana, ne fakafeleveia mafanatia he agikolo haana ko Lapana a ia ti age ki a ia a Lea mo Rahela mo tau hoana he mogo fakamui. Ka e fai magaaho he mole ne kamata a Lapana ke nakai mahani mitaki ki a Iakopo ti hiki e totogi haana laga hogofulu! (Kene. 31:41, 42) Ka kua fakauka a Iakopo ke he tau mena oti nei ha kua falanaki a ia to leveki e Iehova a ia. Ti ko e fua, ne fakamonuina e Iehova a Iakopo. He mogo ne fekau he Atua a ia ke liu ki Kanana, ha ha ia Iakopo e “tau mamoe loga, mo e tau fekafekau fifine, mo e tau fekafekau tane, mo e tau kamela, katoa mo e tau asini.” (Kene. 30:43) Ne loto fakaaue lahi a Iakopo ki a Iehova ti liogi: “Kua nakai aoga au mo e tau mena fakaalofa oti, mo e tau kupu moli oti kua fakahoko mai e koe ke he hau a fekafekau; ha kua hau au he fahi atu a Ioritana na, mo e haku a tokotoko noa ni; ka ko ainei kua hau au mo e na vahega ua.”​​—Kene. 32:10.

⁹ Ko e tau fakafifitakiaga nei kua fakakite e mooli he tau kupu ha Mose: “Ko e Iki [Iehova] na e, kua eke a koe mo mena ke nonofo ai a mautolu ke he taha hau mo e taha hau”! (Sala. 90:1) Nakai hiki a Iehova. Kua ofania, puipui, mo e leveki agaia e ia e tau fekafekau fakamooli haana. (Iako. 1:17) Kia fakatutala la tautolu ke he puhala.

10. Ko e ha kua iloa mooli e tautolu kua matutaki a Iehova ke eke mo “mena ke nonofo ai” e tau fekafekau haana?

¹⁰ Manamanatu ke he tuaga nei: Ko koe he fakafiliaga ne eke mo tagata fakamooli he totoko ke he tagata malolō lahi mo e iloilo lahi. Ko ia ko e tagata pikopiko kelea lahi mo e kelipopo tagata, ti fai tagata a ia he lalolagi katoa ne gahua ma haana. Fēfē la e logonaaga haau ka toka e koe e hopoaga he fakaotiaga he aho? To logona nakai e koe e haohao mitaki? Nakai pihia! Ha ha ia koe e kakano mitaki ke ole ma e puipuiaga. He puhala pihia, ko e tau fekafekau ha Iehova ko tautolu e tau fakamooli he totoko e fī kelea lahi mahaki ha Iehova, ko Satani. (Totou Fakakiteaga 12:17.) Ne lali a Satani ke taofi e tau tagata he Atua. Ka kua maeke nakai a ia ke taute e mena ia? Nakai! Ka kua eketaha a tautolu ke fakamatala ke he tau tagata tokologa he lalolagi katoa. Maeke fēfē e mena nei? Taha maka ni e fakamaamaaga: Ko Iehova ko e “mena ke nonofo ai” a tautolu. Kua puipui mo e fakamonuina lahi e ia e tau tagata haana he tau aho fakamui nei. (Totou Isaia 54:14, 17.) Ka e maeke ia Iehova ke matutaki mo “mena ke nonofo ai” a tautolu ni kaeke kua nakai fakaatā e tautolu a Satani ke fakahehē a tautolu.

11. Ko e heigoa falu fakaakoaga ka fakaako e tautolu mai ia Aperahamo, Isaako, mo Iakopo?

¹¹ Kia fakaako a tautolu mogonei ke he taha fakaakoaga foki mai ia Aperahamo, Isaako, mo Iakopo. Pete he nonofo a lautolu he motu ha Kanana, ne nonofo kehe a lautolu mai he tau tagata he motu ti vihiatia e tau mena kelea ne taute he tau tagata ia. (Kene. 27:46) Nakai lata a lautolu mo e laupepa  loagitu he tau matafakatufono ke iloa e mena hako po ke hepe. Ne iloa e lautolu e mena ne fiafia a Iehova mo e mena ne vihiatia e ia. Ti taute e lautolu e tau mena oti ke nakai fai vala he lalolagi. Ko e fakafifitakiaga mitaki a lautolu ma tautolu! Lali fakamalolō nakai a koe ke fifitaki e tau fekafekau fakamooli ia ha Iehova? Fakakite nakai e koe kua nakai manako a koe ke fai vala he lalolagi he fifili fakamitaki e tau kapitiga mo e tau fakafiafiaaga haau? Momoko ai, falu he fakapotopotoaga Kerisiano, he falu puhala, ne logona e haohao mitaki he lalolagi ha Satani. Ka fai logonaaga pihia a koe, liogi ma e lagomatai ha Iehova. Manatu, ko e lalolagi nei kua haia he pule a Satani, ti lotokai a ia mo e nakai leveki e ia a tautolu.​​—2 Kori. 4:4; Efeso 2:1, 2.

12. (a) Lagomatai fēfē e Iehova e tau fekafekau haana? (e) Fēfē e logonaaga haau ke he lagomatai ne foaki e Iehova ki a tautolu?

¹² Ka nakai manako a tautolu ki a Satani ke fakahehē a tautolu, kua lata ia tautolu ke aoga mai he tau lagomataiaga oti ne foaki e Iehova ke he tau fekafekau haana. Ma e fakatai, ne foaki e ia ki a tautolu e lagomatai puhala he tau feleveiaaga Kerisiano, tapuakiaga magafaoa, mo e tau motua ne foaki ki a tautolu e mafanatia mo e lalagoaga ke maeke ia tautolu ke fakauka ke he tau lekua he moui. (Efeso 4:8-12) Ko e Matakainaga ko George Gangas, ne eke mo taha he Kau Fakatufono ke he tau tau loga, ne tohi hagaao ke he logonaaga haana he haia mo e tau tagata he Atua: “He magaaho ne ha ha au mo lautolu, kua logona e au e totoka mitaki mo e haku a magafaoa.” Pihia nakai e logonaaga haau?

13. Ko e heigoa e fakaakoaga aoga ka fakaako e tautolu mai ia Heperu 11:13?

¹³ Taha fakaakoaga aoga foki kua fakaako e tautolu mai ia Aperahamo, Isaako, mo Iakopo kua nakai lata ia tautolu ke matakutaku he kehe mai he tau tagata ne viko takai ia tautolu. He totou e tautolu he  paratafa 1, ko e tau tagata taane fakamooli ia ne “talahau mai ko e tau tagata kehe a lautolu mo e tau tagata o fano ke he lalolagi.” (Hepe. 11:13) Fakakite nakai e koe kua kehe a koe mai he tau tagata he lalolagi? Uka e mena nei he falu mogo. Ka e maeke a koe ke taute mena nei mo e lagomatai he Atua mo e mai he haau a tau matakainaga. Manatu, nakai ko koe ni tokotaha. Ko lautolu oti kua manako ke fekafekau ki a Iehova kua tau he totoko atu ki a Satani mo e lalolagi haana! (Efeso 6:12) Ka e kautū a tautolu ke he tau nei ka falanaki a tautolu ki a Iehova ti eke a ia mo puipuiaga malolō ha tautolu.

14. Ko e heigoa e “māga” ne fakatali a Aperahamo ki ai?

¹⁴ Kua lata ia tautolu ke fifitaki a Aperahamo mo e tokaloto e palepale. (2 Kori. 4:18) Ne tohi he aposetolo ko Paulo ko Aperahamo  ne “tatali atu a ia ke he māga kua fai fakaveaga, ko ia ne eke mo e tufugatia ai ko e Atua haia.” (Hepe. 11:10) Ko e “māga” ia ko e Kautu he Atua. Ne leo a Aperahamo ke he “māga” ia ke hoko mai. Ka e nakai pihia a tautolu. Kua pule e Kautu mogonei he lagi. Ti fakakite fakamaali he perofetaaga he Tohi Tapu to nakai leva to pule ai ke he lalolagi katoa. Fakakite kia he puhala kua moui a koe kua talitonu mooli a koe ke he Kautu ia? Tuku fakamua kia e koe e Kautu he moui haau mo e vevehe kehe mai he lalolagi nei?​​—Totou  2 Peteru 3:11, 12.

15. Ko e heigoa e amaamanakiaga ha lautolu kua falanaki ke he lalolagi nei?

¹⁵ Ko e tau lekua he lalolagi nei to matutaki ke holo ki mua e kelea ato hoko e fakaotiaga. (Mata. 24:7, 8) Ti he matematekelea lahi, to uka lahi mooli e moui. He lalolagi katoa, to ha ha i ai e moumouaga mo e fakagogoa, ti to matakutaku e tau tagata. (Hapa. 3:16, 17) Pehē e Tohi Tapu to manako lahi a lautolu ti kumi huaga a lautolu he “tau ana mo e tau kaumaka he tau mouga.” (Fakakite. 6:15-17) Ka e nakai fai ana ka puipui a lautolu, po ke fakatokatokaaga lalahi fakapisinisi po ke fakapolitika.

16. Lata ke fēfē e onoonoaga ha tautolu ke he fakapotopotoaga? Ko e ha?

¹⁶ To fakatumau a Iehova ke puipui a tautolu he matematekelea lahi. Tuga e perofeta ko Hapakuka, to fiafia a tautolu ke he Atua he fakamouiaga. (Hapa. 3:18) He tau puhala fe ka puipui e Iehova a tautolu he magaaho uka ia? To fakatali a tautolu ke kitia. Ka e mauokafua a tautolu ko e tau tagata ha Iehova to fakamaopoopo fakalataha mo e moua e tau fakaakoaga mai ia ia, tuga e tau Isaraela ne toka a Aikupito he O Kehe mai. (Totou Esoto 13:18; Fakakite. 7:9) To foaki fēfē e Iehova ki a tautolu e tau fakaakoaga nei? To liga fakaaoga e Iehova e fakapotopotoaga ke talahau ki a tautolu e mena ke taute. Talahau he Isaia 26:20 e “tau poko” ka foaki e puipuiaga ke he tau tagata he Atua. Liga hagaao e tau mena nei ke he tau fakapotopotoaga he lalolagi katoa. (Totou Isaia 26:20.) Uho nakai ki a koe e tau feleveiaaga he fakapotopotoaga? Taute tumau nakai e koe e tau mena oti ne tala atu e Iehova ki a koe puhala he fakapotopotoaga?​​—Hepe. 13:17.

17. Eke fēfē a Iehova mo “mena ke nonofo ai” foki a lautolu ko e tau fekafekau fakamooli haana kua mamate?

¹⁷ Ko Iehova ko e “mena ke nonofo ai” a lautolu foki ne mahani fakamooli ne liga mamate ato hoko e matematekelea lahi. Fēfē? To fakaliu tu mai e ia a lautolu. Pete kua leva e mamate ha Aperahamo, Isaako, mo Iakopo, ne tala age a Iehova ki a Mose ko Ia agaia e Atua ha lautolu. (Esoto 3:6) Ne fatiaki e Iesu e tau kupu ia mo e lafi: “Nakai ko e Atua a ia ha lautolu kua mamate, ka ko lautolu kua momoui; ha ko e mena kua momoui oti ia ia.” (Luka 20:38) Ko e liu tu mai he tau fekafekau fakamooli ha Iehova to hoko mooli, ki a Iehova kua tuga e fitā a lautolu he momoui.​​—Fakama. 7:1.

18. To eke fēfē a Iehova mo “mena ke nonofo ai” e tau tagata haana he lalolagi foou?

¹⁸ He lalolagi foou, to eke a Iehova mo “mena ke nonofo ai” e tau tagata haana ke he puhala pauaki. Pehē e Fakakiteaga 21:3: “Kitiala, kua fakalataha mo e tau tagata e fale uta fano he Atua, to nofo a ia mo lautolu.” To fakaaoga e Iehova a Iesu Keriso ke pule ke he lalolagi katoa he tau afe tau fakamua. He matahiku he afe tau, to fakakatoatoa e Iesu e finagalo he haana Matua ma e lalolagi, ti to liuaki age e ia e Kautu ki a Iehova. (1 Kori. 15:28) To pule fakahako hifo a Iehova ke he tau tagata mitaki katoatoa. Ko e vahā homo ue atu anoiha ma tautolu! Kia fifitaki a tautolu ke he tau fekafekau tua fakamooli i tuai he taute a Iehova mo “mena ke nonofo ai” a tautolu mogonei.