Jehofa ke Bodulo bja Rena
“Wena Jehofa, wena ka bowena o bile bodulo bja rena bja kgonthe go tloga molokong o mongwe go ya go o mongwe.”—PS. 90:1.
1, 2. Bahlanka ba Modimo ba ikwa bjang ka tshepedišo ye ya dilo, gona ke ka kgopolo efe ba nago le legae?
NA O ikwa o le gae ga mahlaku lefaseng le? Ge e ba go se bjalo, gona o ikwa go swana le bahlanka ba bangwe ba Jehofa! Go theoša le nywaga, bohle bao ba tlogago ba rata Jehofa ba ile ba ikwa ba swana le badiiledi goba bašele tshepedišong ye ya dilo. Ka mohlala, ge barapedi ba botegago ba Modimo ba be ba huduga lefelong le lengwe ba eya go le lengwe nageng ya Kanana, ba ile “ba bolela phatlalatša gore e be e le bašele le badiiledi nageng.”—Baheb. 11:13.
2 Ka tsela e swanago, balatedi ba Kriste ba tloditšwego, bao e lego “baagi ba legodimong,” ba itebelela e le ‘badiiledi e bile e le badudi ba nakwana’ tshepedišong ye ya dilo. (Bafil. 3:20; 1 Pet. 2:11) “Dinku tše dingwe” tša Kriste le tšona “ga se karolo ya lefase go etša ge [Jesu e be e] se karolo ya lefase.” (Joh. 10:16; 17:16) Lega go le bjalo, seo ga se re gore batho ba Modimo ga ba na “legae.” Ge e le gabotse, re na le legae leo le šireletšegilego kudu le leo le nago le lerato, legae leo le bonwago ka mahlo a tumelo. Moshe o ngwadile gore: “Wena Jehofa, wena ka bowena o bile bodulo bja rena bja kgonthe go tloga molokong o mongwe go ya go o mongwe.” * (Ps. 90:1) Jehofa o ile a itlhatsela bjang go ba ‘bodulo bja kgonthe’ go bahlanka ba gagwe ba botegago ba bogologolo? Ke ‘bodulo bja kgonthe’ ka tsela efe go batho bao lehono ba bitšwago ka leina la gagwe? Le gona o tla itlhatsela bjang go ba bodulo bjo bo šireletšegilego kudu nakong e tlago?
JEHOFA E BILE ‘BODULO BJA KGONTHE’ GO BAHLANKA BA GAGWE BA BOGOLOGOLO
3. Jehofa o bapišwa le eng go Psalme 90:1, gona ka baka la’ng?
3 Ka dinako tše dingwe, Beibele e bapiša Jehofa le dilo tšeo re ka kgonago go di bona e le gore re kwešiše semelo sa gagwe. Ka mohlala, Psalme 90:1 e bapiša Jehofa le “bodulo,” goba legae. Ge re nagana ka legae, re nagana ka lefelo leo le nago le lerato, khutšo le tšhireletšego. Ke ka baka la’ng Jehofa a bapišwa le legae? Beibele e re Jehofa ke lerato. (1 Joh. 4:8) Le gona ke Modimo wa khutšo, yo a dirago gore bao ba mmotegelago ba “dule ka polokego.” (Ps. 4:8) Ka mohlala, ela hloko tsela yeo a dirišanego ka yona le bapatriareka ba botegago, go thoma ka Aborahama.
4, 5. Modimo o itlhatsetše bjang go ba ‘bodulo bja kgonthe’ bja Aborahama?
4 Re ka akanya kamoo Aborahama, yo a bego a bitšwa Aborama, a ilego a ikwa ka gona ge Jehofa a mmotša gore: “Tloga nageng ya geno le go metswalo ya gago . . . o ye nageng yeo ke tlago go go bontšha yona.” Ge e ba Aborahama a ile a tlelwa ke pelaelo le ge e le efe, gona go molaleng gore e ile ya fela ge Jehofa a bolela mantšu a latelago: “Go wena ke tla ntšha setšhaba se segolo, ka go šegofatša ka ba ka dira gore leina la gago e be le legolo . . . Ke tla šegofatša bao ba go šegofatšago, ka rogaka yoo a go rogago.”—Gen. 12:1-3.
5 Ka mantšu ao, Jehofa o ile a ithweša boikarabelo bja go ba bodulo bjo bo šireletšegilego bja Aborahama le ditlogolo tša gagwe. (Gen. 26:1-6) Jehofa o ile a phethagatša kholofetšo ya gagwe. Ka mohlala, o ile a thibela Farao wa Egipita le Kgoši Abimeleke wa Gerara gore ba se tšee Sara gomme ba bolaye Aborahama. O ile a šireletša Isaka le Rebeka ka tsela e swanago. (Gen. 12:14-20; 20:1-14; 26:6-11) Re bala gore: “[Jehofa] ga se a ka a dumelela gore motho le ge e le ofe a ba radie, eupša o kgalemile dikgoši ka baka la bona, a re: “Le se kgwathe batlotšwa ba ka, le baporofeta ba ka le se ba dire selo se sebe.’”—Ps. 105:14, 15.
“Nka se go tlogele”
6. Isaka o boditše Jakobo gore a dire eng, gona Jakobo a ka ba a ile a ikwa bjang?
6 Baporofeta bao ba be ba akaretša setlogolo sa Aborahama e lego Jakobo. Ge nako ya gore Jakobo a nyale mosadi e fihla, Isaka tatagwe o ile a re go yena: “O se ke wa tšea mosadi go barwedi ba Kanana. Ema o ye Padana-arama ntlong ya Bethuele tatago mmago, gomme gona moo o tšee mosadi go barwedi ba Labane kgaetšedi ya mmago.” (Gen. 28:1, 2) Gateetee Jakobo o ile a kwa Isaka. Jakobo o ile a tlogela ba leloko labo bao ba bego ba dula Kanana, gomme a sepela dikhilomithara tše makgolo a le noši a ya tikologong ya Harane. (Gen. 28:10) Mohlomongwe o ile a ipotšiša gore: ‘Ke tla fetša nako e kaaka’ng ke le moo? Na malome o tla nkamogela ka borutho gomme a nnea mosadi yo a boifago Modimo?’ Ge e ba Jakobo a ile a tlelwa ke dipelaelo tšeo, gona go molaleng gore di ile tša fela ge a be a fihla Lutsi, yeo e ka bago dikhilomithara tše 100 go tloga Beresheba. Go diregile eng kua Lutsi?
7. Modimo o ile a kgodiša Jakobo bjang torong
7 Ge Jakobo a le kua Lutsi, Jehofa o ile a iponagatša go yena torong, a re: “Ke nna yo ke na le wena, gomme ke tla go lota tseleng ka moka yeo o tlago go sepela go yona ka ba ka go bušetša mo mmung wo, ka gobane nka se go tlogele, e bile ke tla dira seo ke go boditšego sona.” (Gen. 28:15) Ruri mantšu ao a botho a swanetše go ba a ile a kgodiša le go homotša Jakobo! Na o ka akanya o mmona a phakiša, a fagahletše go bona kamoo Modimo a bego a tla phethagatša lentšu la Gagwe? Ge e ba o tlogetše legae, mohlomongwe o hlankela nageng e šele, go ka direga gore o kwešiša maikwelo a hlakahlakanego a Jakobo. Lega go le bjalo, ga go pelaelo gore o ile wa bona ge Jehofa a go hlokomela.
8, 9. Ke ka ditsela dife Jehofa a ilego a ba ‘bodulo bja kgonthe’ bja Jakobo, gona ke eng seo re ithutago sona tabeng ye?
8 Ge Jakobo a be a fihla Harane, malomeagwe Labane o ile a mo amogela ka borutho gomme ka morago a mo nea Lea le Ragele gore e be basadi ba gagwe. Lega go le bjalo, ge nako e dutše e eya, Labane o ile a leka go ikhola ka Jakobo, gomme a fetoša moputso wa gagwe galesome! (Gen. 31:41, 42) Eupša, Jakobo o ile a kgotlelela go swarwa ka tsela yeo ya go hloka toka, a kgodišegile gore Jehofa o be a tla tšwela pele a mo hlokomela. Modimo o ile a dira bjalo! Ruri go bile bjalo, nakong ya ge Modimo a botša Jakobo gore a boele Kanana, mopatriareka yoo o be a na le “mehlape e megolo, bahlanka ba bantši ba banna le ba basadi, dikamela le dipokolo.” (Gen. 30:43) Ge Jakobo a be a bontšha tebogo e tseneletšego, o ile a rapela ka gore: “Ga ke swanelwe ke botho bja gago bjohle le potego ya gago ka moka yeo o mpontšhitšego yona, nna mohlanka wa gago, ka gobane ke tshetše Noka ye ya Jorodane ka lehlotlo feela gomme bjale ke na le dihlopha tše pedi.”—Gen. 32:10.
9 Ee, mantšu a thapelo ya Moshe a be a tloga a rereša, ge a re: “Wena Jehofa, wena ka bowena o bile bodulo bja rena bja kgonthe go tloga molokong o mongwe go ya go o mongwe”! (Ps. 90:1) Mantšu ao a šoma ka tsela e swanago lehono, ka ge Jehofa, yena “yo a sa fetofetogego goba a fetoga go etša meriti yeo e šuthago,” a tšwela pele go ba bodulo bjo bo ruthetšego le bjo bo šireletšegilego go bao ba mmotegelago. (Jak. 1:17) Anke re hlahlobeng kamoo seo se diregago ka gona.
JEHOFA KE “BODULO BJA RENA BJA KGONTHE” LEHONO
10. Ke ka baka la’ng re ka kgodišega gore Jehofa o tšwela pele e le bodulo bjo bo šireletšegilego bja bahlanka ba gagwe?
10 Akanya ka se: A re re o biditšwe gore o yo nea bohlatse kgorong ya tsheko kgahlanong le mokgatlo o mogolo wa disenyi. Moetapele wa wona o bohlale kudu, o na le matla e bile o na le maaka a matala gape ke mmolai yo sehlogo. O be o ka ikwa bjang ge o etšwa ka kgorong mafelelong a letšatši? Na o be o ka ikwa o šireletšegile? Le gatee! Ruri o be o tla ba le lebaka le lebotse la gore o nyake go šireletšwa. Boemo bjo bo bontšha kamoo bahlanka ba Jehofa ba hlatselago Jehofa ka sebete gomme ka go se boife ba pepentšhago lenaba la gagwe le lešoro, e lego Sathane! (Bala Kutollo 12:17.) Eupša na Sathane o ile a kgona go homotša batho ba Modimo? Le gatee! Ge e le gabotse, re gatela pele moyeng, e lego therešo yeo e hlaloswago ka lentšu letee: Jehofa e sa dutše e le setšhabelo sa rena, “bodulo bja rena bja kgonthe,” kudukudu mehleng ye ya bofelo. (Bala Jesaya 54:14, 17.) Lega go le bjalo, Jehofa a ka se be setšhabelo sa rena ge e ba re dumelela Sathane gore a re tloše kgauswi le bodulo bja rena.
Barongwa ba Modimo ba thekga bahlanka ba gagwe le go ba šireletša
11. Ke thuto efe yeo re ka ithutago yona go tšwa go bapatriareka?
11 Anke re ithuteng thuto e nngwe go tšwa go bapatriareka. Gaešita le ge ba ile ba phela nageng ya Kanana, ba ile ba dula ba arogile bathong ba naga yeo, gomme ba be ba hloile ditsela tša bona tše kgopo le tše gobogilego. (Gen. 27:46) E be e le banna bao ba phelago ka melao ya motheo go e na le go ithekga ka lelokelelo le letelele la melao yeo ba swanetšego go e latela. Seo ba bego ba se tseba ka Jehofa le semelo sa gagwe se be se lekane go bona. Ka ge Jehofa e be e le bodulo bja bona, ba ile ba dira sohle seo ba ka se kgonago gore ba se batamele lefase. Go e na le moo, ba ile ba dula ba le kgole kudu le lona kamoo go bego go ka kgonega. Ruri ba re beetše mohlala o mobotse! Na o katanela go ekiša bapatriareka ba botegago ge o kgetha bagwera le boithabišo? Go a nyamiša gore ba bangwe ka phuthegong ya Bokriste ba bontšha gore ka tekanyo e itšego, ba ikwa ba le gae ga mahlaku lefaseng la Sathane. Ge e ba o ikwa ka tsela yeo, gaešita le ge e le ka tekanyo e nyenyane, gona rapela ka taba yeo. Gopola gore lefase le ke la Sathane. Le bontšha moya wa gagwe o sehlogo le wa boithati.—2 Bakor. 4:4; Baef. 2:1, 2.
12. (a) Jehofa o hlokomela bjang ba lapa la gagwe la moya? (b) O ikwa bjang ka ditokišetšo tšeo Modimo a re diretšego tšona?
12 E le gore re lwantšhe ditiro tša bohwirihwiri tša Sathane, re swanetše go diriša ka botlalo ditokišetšo tša moya tšeo Jehofa a di lokišeditšego ba lapa la gagwe la tumelo, bao ba mo dirago bodulo bja bona. Ditokišetšo tše di akaretša diboka tša Bokriste, borapedi bja lapa le “dimpho tšeo e lego banna”—badiši bao ba kgethilwego ke Modimo go re homotša le go re thekga ge re dutše re katana le mathata a bophelo. (Baef. 4:8-12) Ngwanabo rena George Gangas, yo e bego e le setho sa Sehlopha se Bušago ka nywaga e mentši, o ngwadile gore: “Ge ke na le [batho ba Modimo] ke ikwa ke le gae ga mahlaku, ke le paradeiseng ya moya.” Na o ikwa ka tsela e swanago?
13. Ke thuto efe e bohlokwa yeo re e hwetšago go Baheberu 11:13?
13 Seka se sengwe seo re swanetšego go se ekiša sa bapatriareka ke go ikemišetša ga bona go dula ba sa swane le batho bao ba ba dikologilego. Ka ge go bontšhitšwe serapeng sa pele, ba ile “ba bolela phatlalatša gore e be e le bašele le badiiledi nageng.” (Baheb. 11:13) Na o ikemišeditše go dula o sa swane le lefase? Ke therešo gore go dira bjalo ga se ka mehla go lego bonolo. Eupša ka thušo ya Modimo le thekgo ya Bakristegotee le wena, o ka atlega. Gopola gore ga o noši. Bohle bao ba nyakago go hlankela Jehofa ba ntweng! (Baef. 6:12) Lega go le bjalo, ntwa ye re ka kgona go e fenya ge e ba re bota Jehofa gomme re mo dira bodulo bja rena bjo bo šireletšegilego.
14. Bahlanka ba Jehofa ba be ba letetše “motse” ofe?
14 Le gona selo se sengwe se bohlokwa se se: Ekiša Aborahama ka go iša mahlo a gago moputsong. (2 Bakor. 4:18) Moapostola Paulo o ngwadile gore Aborahama “o be a letetše motse wo o nago le metheo ya kgonthe, woo mohlami le moagi wa wona e lego Modimo.” (Baheb. 11:10) “Motse” woo ke Mmušo wa Mesia. Ke therešo gore Aborahama o ile a swanelwa ke go leta “motse” woo. Ka kgopolo e itšego, rena ga go nyakege gore re lete. Ge e le gabotse Mmušo woo o a buša kua legodimong. Go oketša moo, bohlatse bjo bo oketšegago bo bontšha gore go se go ye kae Mmušo woo o tla buša lefase. Na Mmušo woo ke wa kgonthe go wena? Na o tutuetša tsela ya gago ya bophelo, pono ya gago ka lefase le le dilo tše di tlago pele bophelong bja gago?—Bala 2 Petro 3:11, 12.
“BODULO BJA RENA BJA KGONTHE” GE BOFELO BO BATAMELA
15. Ke bokamoso bofe bjo bo letetšego bao ba botago lefase le?
15 Ge bofelo bja lefase la Sathane bo dutše bo batamela, ‘dihlabi tša lona tša tlalelo’ di tla mpefala. (Mat. 24:7, 8) Nakong ya masetlapelo a magolo dilo di tla mpefalela pele. Ditirelo tša motheo di tla phuhlama gomme batho ba tla tšhogela maphelo a bona. (Habak. 3:16, 17) Ka baka la go tlalelwa o šoro, ba tla tšhabela “ka maweng le maswikeng a dithaba.” (Kut. 6:15-17) Eupša ga go na mawa a kgonthe goba mekgatlo ya dipolitiki le ya kgwebo yeo e swanago le dithaba yeo e tla ba šireletšago.
16. Re swanetše go lebelela bjang phuthego ya Bokriste, gona ka baka la’ng?
16 Lega go le bjalo, batho ba Jehofa ba tla tšwela pele ba šireleditšwe ke ‘bodulo bja bona bja kgonthe,’ e lego Jehofa Modimo. Go etša moporofeta Habakuku, ba “tla hlalalela Jehofa.” Ba ‘tla thabela Modimo wa bona yo a phološago.’ (Habak. 3:18) Ke ka ditsela dife Jehofa a tlago go ba ‘bodulo bja kgonthe’ nakong yeo ya khuduego? Re tla swanelwa ke go letela seo. Eupša re ka kgonthišega ka se: Go etša nakong ya ge Baisiraele ba be ba Huduga Egipita, “lešaba le legolo” le tla dula le rulagantšwe, le phafogetše go kwa tlhahlo ya Modimo. (Kut. 7:9; bala Ekisodo 13:18.) Go ka direga gore tlhahlo yeo e tla tla ka diphuthego. Ruri diphuthego tše diketekete lefaseng ka bophara di tswalanywa le ‘diphapoši tša ka gare’ tša tšhireletšo tšeo go boletšwego ka tšona go Jesaya 26:20. (Bala.) Na o tšeela godimo diboka tša phuthego? Na o arabela gateetee tlhahlong yeo Jehofa a e neago ka thulaganyo ya phuthego?—Baheb. 13:17.
17. Ke ka tsela efe Jehofa e lego ‘bodulo bja kgonthe’ le go bahlanka ba gagwe bao ba hwilego ba mmotegela?
17 Jehofa e tla ba ‘bodulo bja kgonthe’ gaešita le go bao ba ka hwago pele ga ge masetlapelo a magolo a thoma. Seo se bjalo bjang? Nako e telele ka morago ga ge bapatriareka ba botegago ba hwile, Jehofa o boditše Moshe gore: “Ke nna Modimo wa . . . Aborahama, Modimo wa Isaka le Modimo wa Jakobo.” (Ek. 3:6) Ka morago ga gore Jesu a tsopole mantšu ao, o ile a oketša ka gore: “Ke Modimo wa ba phelago, e sego wa bahu, gobane go yena bohle ba a phela.” (Luka 20:38) Ee, go Jehofa, bao ba hwilego ba mmotegela go bjalo ka ge eka ba a phela; tsogo ya bona ke selo seo se kgonthišeditšwego.—Mmo. 7:1.
18. Lefaseng le lefsa, Jehofa e tla ba bjang ‘bodulo bja kgonthe’ bja batho ba gagwe ka tsela e kgethegilego?
18 Lefaseng le lefsa leo le letšego ka pele, Jehofa e tla ba ‘bodulo bja kgonthe’ bja batho ba gagwe ka kgopolo e itšego. Kutollo 21:3 e re : “Bonang! Tente ya Modimo e bathong, o tla dula le bona.” Jehofa o tla diriša Jesu Kriste go buša lefase ka nywaga ya mathomo e sekete. Bofelong bja nywaga e sekete, Jesu o tla gafela Mmušo go Tatagwe, ka ge a tla be a phethagaditše ka botlalo morero wa Modimo ka lefase. (1 Bakor. 15:28) Ka morago ga moo, batho e tla ba e le ba phethagetšego, gomme go ka se sa hlwa go nyakega gore Jesu e be mmoelanyi wa bona le Modimo; Jehofa o tla ba le bona. Yeo ke tebelelo e kgahlišago gakaakang yeo e letšego ka pele ga rena! Ka gona, ga bjale anke re kataneleng go ekiša meloko ya bogologolo e botegago ka go dira gore Jehofa e be “bodulo bja rena bja kgonthe.”
^ ser. 2 Contemporary English Version e fetolela Psalme 90:1 ka gore: “Morena wa rena, wena o bile legae la rena melokong ka moka.”
