1, 2. Con sirbidornan di Dios ta sinti nan den e mundo aki, y den ki sentido nan tin un cas of refugio?

  BO TA sinti bo na cas den e mundo aki? Si no ta asina, bo no ta bo so, pasobra otro sirbidornan di Jehova tampoco no ta sinti nan na cas. A traves di siglonan, tur hende cu di berdad a stima Jehova a sinti nan manera stranhero den e mundo aki. Por ehempel, e fiel sirbidornan di Dios cu tabata muda di un luga pa otro den e tera di Canan “a declara publicamente cu nan tabata stranhero y habitante temporal den e tera ey.”—Heb. 11:13.

² E siguidornan ungi di Cristo tambe ta considera nan mes “stranhero y habitante temporal den e mundo aki”, ya cu nan “ciudadania ta den cielo.” (Flp. 3:20; 1 Ped. 2:11) E ‘otro carnenan’ di Cristo tampoco ‘no ta parti di mundo, mescos cu Hesus no tabata parti di mundo.’ (Juan 10:16; 17:16) Sinembargo, esaki no kiermen cu e pueblo di Dios no tin un cas of “refugio.” Nos no por mira e refugio cu e pueblo di Dios tin cu nos wowo, pero e ta e luga di mas safe y mas caluroso cu nos por imagina. Cua refugio esaki ta? Moises a skirbi: “SEÑOR, bo tabata un refugio pa nos den tur generacion.” * (Sal. 90:1) Con Jehova a duna prueba di ta manera un cas of “refugio” pa su fiel sirbidornan di pasado? Con e ta “un refugio” pa e pueblo cu ta carga su nomber awe? Y con lo e demostra di ta e unico refugio pa nan den futuro?

3. Cu kico Jehova ta ser compara na Salmo 90:1, y dicon?

³ Tin biaha Bijbel ta compara Jehova cu cosnan cu nos por mira, ya asina nos por compronde su  personalidad mihor. Por ehempel, Salmo 90:1 ta compara Jehova cu “un refugio” of un cas. Dicon? Pasobra ora nos pensa riba un cas, nos ta pensa riba un luga caminda tin amor, paz y proteccion. Y Bijbel ta bisa cu Jehova ta amor. (1 Juan 4:8) E ta bisa tambe cu e ta un Dios di paz y cu e ta proteha su sirbidornan. (Sal. 4:8) Por ehempel, laga nos analisa con Jehova tabata un refugio pa e fiel patriarcanan, cuminsando cu Abraham.

4, 5. Con Dios a duna prueba di ta “un refugio” pa Abraham?

⁴ Nos no sa con Abraham a sintie ora Jehova a bis’e: “Sali for di bo tera, y for di bo famianan y ... bay na e tera cu lo mi mustra bo.” Pero si acaso el a sinti un poco miedo, e siguiente palabranan di Jehova lo mester a trankilis’e: “Lo mi haci bo un nacion grandi, y lo mi bendiciona bo, y haci bo nomber grandi ... Y lo mi bendiciona esnan cu bendiciona bo, y esun cu maldiciona bo lo mi maldiciona.”—Gen. 12:1-3.

⁵ Cu e palabranan ey, Jehova a priminti di bira un refugio pa Abraham y pa su descendientenan, y el a cumpli cu su promesa. (Gen. 26:1-6) Por ehempel, Jehova a impedi Farao di Egipto y Rey Abimelek di Gerar di viola Sara y mata Abraham. Y el a proteha Isaak cu Rebeca den e mes manera. (Gen. 12:14-20; 20:1-14; 26:6-11) Bijbel ta bisa cu Jehova “no a permiti ningun hende oprimi nan; el a reprende reynan pa nan motibo, bisando: ‘No mishi cu mi unginan, ni haci malo na mi profetanan.’”—Sal. 105:14, 15.

6. Kico Isaak a bisa Jacob pa haci, y con kisas Jacob a sintie?

⁶ Un di e profetanan ey tabata Jacob, nieto di Abraham. Ora a bira tempo pa Jacob busca un esposa, su tata Isaak a bis’e: “No tuma un esposa for di e yiu muhernan di Canan. Lanta, bay Padan-aram, na cas di Betuel, tata di bo mama; y tuma pa bo mes for di ayanan un esposa for di e yiu muhernan di Laban.” (Gen. 28:1, 2) Di biaha Jacob a haci loke su tata a bis’e. El a laga e ambiente di proteccion cu su famia a brind’e na Canan y a biaha cientos di kilometer, probablemente su so, bay na e area di Haran. (Gen. 28:10) Kisas el a puntra su mes: ‘Cuanto tempo lo mi keda fo’i cas? Mi omo lo keda contento di mira mi y duna mi un esposa cu ta stima Dios?’ Si e cosnan ey tabata preocupa Jacob, sin duda el a sinti su mes mas trankil despues cu el a yega un luga cu yama Luz, un 100 kilometer for di Beerseba. Kico a pasa na Luz?

7. Con Jehova a trankilisa Jacob pa medio di un soño?

⁷ Na Luz, Jehova a aparece na Jacob den  un soño y a bis’e: “Mira, mi ta cu bo, y lo mi warda bo unda cu bo bay, y lo trece bo bek den e tera aki; pasobra lo mi no laga bo te ora mi a cumpli cu loke mi a priminti bo.” (Gen. 28:15) E palabranan bondadoso ey mester a trankilisa Jacob y consol’e! Casi sigur el a sigui su caminda cu animo, ansioso pa mira con Dios lo a cumpli cu su palabra. Si abo a laga bo cas, kisas pa bay sirbi den un otro pais, podise bo tambe lo tabata preocupa manera Jacob. Pero sin duda bo a mira prueba cu Jehova ta percura pa bo den hopi manera.

8, 9. Den ki maneranan Jehova a duna prueba di ta “un refugio” pa Jacob, y kico nos por siña for di esaki?

⁸ Ora Jacob a yega Haran, su omo Laban a ricibie brasa habri y despues a dun’e Lea y Raquel como esposa. Pero cu tempo, Laban a purba di probecha di Jacob y a cambia su pago dies biaha. Imagina bo! (Gen. 31:41, 42) Pero Jacob a wanta tur e inhusticianan ey, confiando cu Jehova lo a sigui percura p’e, y esey ta loke Jehova a haci tambe! Ora Dios a bisa Jacob pa bay Canan bek, e patriarca “tabatin masha hopi bestia chikito y sirbidor homber y muher y camel y burico.” (Gen. 30:43) Jacob tabata masha agradecido mes y a bisa Jehova den oracion: “Mi no ta digno di tur e misericordia y di tur e fieldad cu bo a mustra na bo sirbidor, pasobra ta cu solamente mi garoti mi a crusa e Jordan aki, y awor mi a bira dos campamento.”—Gen. 32:10.

⁹ Si, e ehempelnan aki ta mustra cu en berdad Moises tabatin rason ora el a bisa: ‘Jehova, bo tabata un refugio pa nos den tur generacion’! (Sal. 90:1) E palabranan ey ta aplicabel awe tambe, pasobra Jehova, “kende no ta varia ni cambia manera sombra cu ta move”, te awe ta stima, proteha y cuida su sirbidornan leal. (Sant. 1:17) Laga nos analisa den ki manera.

10. Dicon nos por ta sigur cu Jehova ainda ta un refugio pa su sirbidornan?

¹⁰ Imagina bo esaki: Bo ta den corte ta testifica contra un homber masha inteligente y poderoso. E ta un gañado y un asesino sin piedad, y e tin hende rond mundo ta traha p’e. Con lo bo sinti bo ora bo sali for di e sala di corte? Lo bo sinti bo safe? Claro cu no! Lo bo tin bon motibo pa pidi proteccion. E escenario aki ta ilustra e situacion cu e sirbidornan di Jehova ta aden, ya cu nan ta duna testimonio na fabor di Jehova y sin miedo ta expone su enemigo malbado, Satanas. (Lesa Revelacion 12:17.) Pero acaso Satanas a logra silencia e pueblo di Dios? No! Al contrario, nos a sigui prospera spiritualmente, y tin un solo splicacion pa esey: Jehova ainda ta nos refugio, specialmente durante e ultimo dianan aki. (Lesa Isaias 54:14, 17.) Pero Jehova no por ta un refugio pa nos si nos laga Satanas gaña nos y pone nos sali bay for di nos refugio.

11. Ki les mas nos por siña for di e patriarcanan?

¹¹ Laga nos wak un otro les cu nos por siña for di e patriarcanan. Aunke nan tabata biba den e tera di Canan, nan a keda separa for di e hendenan di e tera ey, y nan a odia e cosnan malbado y inmoral cu e hendenan ey tabata haci. (Gen. 27:46) E patriarcanan tabata hende di principio cu no tabatin mester di un lista largo di regla pa guia nan. Nan tabata conoce Jehova y su personalidad, y esey tabata suficiente pa nan. Como cu ta Jehova tabata nan refugio, nan no kier a yega mas cerca posibel di mundo. Al contrario, nan a keda mas leu posibel for di dje. Esta un bon ehempel nan a pone pa nos! Abo ta haci esfuerso pa imita e patriarcanan fiel aki? Bo ta mustra cu bo no kier ta  parti di mundo den e manera cu bo ta scoge bo amistadnan y diberticion? Lamentablemente, tin hende den e congregacion cristian cu ta mustra cu, te na cierto grado, nan ta sinti nan na cas of comodo den e mundo di Satanas. Si abo ta sinti asina, maske ta un tiki, pidi Jehova yuda bo. Corda cu e mundo aki ta di Satanas y ta refleha e mesun actitud cu ne. E ta egoista y no tin interes den nos.—2 Cor. 4:4; Efe. 2:1, 2.

12. (a) Con Jehova ta percura pa su cas spiritual? (b) Kico abo ta pensa di e yudansa aki cu Jehova ta percura?

¹² Si nos kier resisti e trampanan di Satanas, nos tin cu probecha plenamente di tur e yudansa spiritual cu Jehova ta percura pa su cas spiritual, pa esnan cu ta hacie nan refugio. Por ehempel, Jehova a percura reunionnan cristian, adoracion como famia y “regalo den forma di hende”, esta, ancianonan cu ta duna nos consuelo y apoyo segun cu nos ta lucha cu e dificultadnan di bida. (Efe. 4:8-12) Ruman George Gangas, kende tabata un miembro di Cuerpo Gobernante pa hopi aña, a skirbi con el a sintie meymey di e pueblo di Dios: “Ora mi ta cu mi rumannan den fe, mi ta sinti mi manera na cas hunto cu mi famia, den un paradijs spiritual.” Bo tambe ta sinti asina?

13. Ki les importante nos por siña for di Hebreonan 11:13?

¹³ Un otro les importante cu nos por siña for di e patriarcanan ta cu nos no mester tin miedo di ta diferente for di e hendenan rond di nos. Manera nos a lesa den  paragraf 1, nan “a declara publicamente cu nan tabata stranhero y habitante temporal den e tera ey.” (Heb. 11:13) Abo ta determina pa mustra cu bo ta diferente for di hende di mundo? Ta berdad cu esaki no ta semper facil. Pero cu yudansa di Jehova y cu e apoyo di bo rumannan cristian, bo por demostra esey. Corda cu bo no ta bo so. Tur hende cu kier sirbi Jehova tin un lucha contra Satanas y e mundo aki! (Efe. 6:12) Pero esaki ta un lucha cu nos por gana, basta nos confia den Jehova y hacie nos refugio.

14. Ki “stad” e sirbidornan di Jehova a spera?

¹⁴ Un otro punto importante ta esaki: Imita Abraham y keda cu bo bista fiha riba e premio. (2 Cor. 4:18) Apostel Pablo a skirbi cu Abraham “tabata spera e stad cu tin berdadero fundeshi, e stad di cua Dios mes ta e diseñador y constructor.” (Heb. 11:10) E “stad” ey ta e Reino di Dios. Di mes Abraham tabatin cu spera e “stad” ey. Pero nos, den un sentido, no tin  cu spera. E Reino ta gobernando caba den cielo. Ademas, tin varios profecia biblico ta indica cu pronto e lo tuma pleno control di tera. E manera cu bo ta hiba bo bida ta mustra cu e Reino ey ta real pa bo? Bo ta pone e Reino na prome luga y ta keda separa for di e mundo aki?—Lesa 2 Pedro 3:11, 12.

15. Kico lo ta futuro di hende cu ta confia den e mundo aki?

¹⁵ Segun cu e mundo di Satanas ta yega su fin, su problemanan lo bira pio. (Mat. 24:7, 8) Y ora e gran tribulacion cuminsa, bida sigur lo bira mas dificil. Hopi cos cu hende a traha lo basha den otro y lo tin confusion rond mundo. Hende lo ta morto spanta. (Hab. 3:16, 17) Nan lo ta asina desespera cu nan lo busca refugio “den cueba y meymey di baranca den sero.” (Rev. 6:15-17) Pero ni cueba literal ni organisacionnan politico y comercial grandi manera baranca lo por duna nan proteccion.

16. Con nos mester mira e congregacion, y dicon?

¹⁶ Pero e pueblo di Jehova lo sigui gosa di e siguridad di nan “refugio”, Jehova Dios. Mescos cu profeta Habacuk, nan ‘lo alegra den Jehova y regociha den e Dios di nan salbacion.’ (Hab. 3:18) Den ki manera Jehova lo resulta di ta “un refugio” durante e tempo turbulento ey? Nos lo tin cu warda y mira kico ta bay pasa. Pero un cos nos por ta sigur di dje: E “multitud grandi” lo keda un pueblo organisa y lo ricibi instruccion for di Jehova, mescos cu e Israelitanan durante e Exodo for di Egipto. (Lesa Exodo 13:18; Rev. 7:9) Jehova probablemente lo uza e congregacion pa bisa nos kico pa haci. E Scritura ta papia di “cambernan” cu lo duna proteccion na e pueblo di Dios. Esaki podise ta referi na e miles di congregacionnan cu tin rond mundo. (Lesa Isaias 26:20.) Abo ta balora e reunionnan di congregacion? Bo ta cumpli mesora cu e instruccionnan cu Jehova ta duna bo mediante e congregacion?—Heb. 13:17.

17. Den ki manera Jehova ta “un refugio” hasta pa su sirbidornan leal cu a muri?

¹⁷ Jehova lo ta “un refugio” hasta pa rumannan fiel cu kisas ta muri prome cu e tribulacion grandi cuminsa. Con? Hopi tempo despues cu e patriarcanan fiel a muri, Jehova a bisa Moises: “Ami ta e Dios di ... Abraham, e Dios di Isaak y e Dios di Jacob.” (Exo. 3:6) Hesus a cita e palabranan ey y a agrega: “E no ta Dios di e mortonan, sino di e bibonan, pasobra p’e nan tur ta bibo.” (Luc. 20:38) Si, e resureccion di Jehova su sirbidornan leal ta asina sigur cu pa Jehova ta comosifuera nan ta bibo caba.—Ecl. 7:1.

18. Con Jehova lo bira “un refugio” pa su pueblo den e mundo nobo?

¹⁸ Den e mundo nobo nos dilanti, Jehova lo bira “un refugio” pa su pueblo den un otro sentido mas. Revelacion 21:3 ta bisa: “Tende! E tent di Dios lo ta cu humanidad, y lo e biba hunto cu nan.” Na principio, Jehova lo biba hunto cu su subditonan riba tera mediante e gobernacion di Cristo Hesus cu lo represent’e. Na fin di e mil aña, Hesus lo a cumpli plenamente cu Dios su proposito pa tera y lo entrega e Reino bek na su Tata. (1 Cor. 15:28) E ora ey, humanidad lo ta perfecto y lo no tin mester di Hesus mas pa intercede pa nan; Jehova lo goberna nan directamente. Esta un futuro maraviyoso nos tin nos dilanti! Pues, mientrastanto, laga nos haci esfuerso pa imita e generacionnan fiel di pasado y haci Jehova nos “refugio” awor.