Gbògbéna Oyín Daho Jehovah Tọn

‘Yẹn na nọ pagigona oyín towe kakadoi.’—PS. 86:12.

BE HIẸ SỌGAN NA GBLỌNDO YA?

Etẹwẹ e zẹẹmẹdo nado yọ́n yinkọ Jiwheyẹwhe tọn?

Nawẹ Jehovah de yinkọ etọn hia vudevude gbọn?

Etẹwẹ e zẹẹmẹdo nado zinzọnlin to oyín Jehovah tọn mẹ?

1, 2. To vogbingbọn mẹ na ṣọṣi Mẹylọhodotọklisti tọn lẹ, nukun tẹwẹ Kunnudetọ Jehovah tọn lẹ nọ yí do pọ́n oyín Jiwheyẹwhe tọn?

 ṢỌṢI Mẹylọhodotọklisti tọn lẹ ko wà nuhe go yé pé lẹpo nado dapana yinkọ Jiwheyẹwhe tọn yiyizan. Di apajlẹ, lẹdogbedevomẹ Biblu tọn lọ Revised Standard Version dohia to weda etọn tintan lẹ mẹ dọmọ: ‘Oyín jọnun depope yiyizan na Jiwheyẹwhe dopo akàn lọ . . . ma sọgbe paali hẹ yise Ṣọṣi Klistiani he tin lẹdo aihọn pé lẹ tọn.’

² To vogbingbọn mẹ, homẹ nọ hùn Kunnudetọ Jehovah tọn lẹ dọ yé tindo oyín Jiwheyẹwhe tọn to ota bosọ nọ pagigona ẹn. (Hia Psalm 86:12; Isaia 43:10.) Humọ, lẹblanulọkẹyi de wẹ e yin na mí nado mọnukunnujẹ zẹẹmẹ yinkọ enẹ tọn po nuhewutu e do yin nujọnu nado nọ klan oyín lọ do wiwe po mẹ. (Mat. 6:9) Ṣigba, mí ma dona yí nukunpẹvi do pọ́n lẹblanulọkẹyi enẹ gbede. Enẹwutu, mì gbọ mí ni gbadopọnna kanbiọ titengbe atọ̀n delẹ: Etẹwẹ e zẹẹmẹdo nado yọ́n yinkọ Jiwheyẹwhe tọn? Nawẹ Jehovah yinuwa sọgbe hẹ oyín daho etọn bo gbọnmọ dali yidogọna gigo etọn gbọn? Nawẹ mí sọgan zinzọnlin to oyín Jehovah tọn mẹ gbọn?

NUHE E ZẸẸMẸDO NADO YỌ́N YINKỌ JIWHEYẸWHE TỌN

3. Etẹwẹ e zẹẹmẹdo nado yọ́n oyín Jiwheyẹwhe tọn?

³ Oyín Jiwheyẹwhe tọn yinyọnẹn bẹ nususu hẹn hugan nado jẹakọ hẹ hogbe lọ “Jehovah” poun. E sọ bẹ mẹhe Jehovah yin yinyọnẹn hẹn, yèdọ jẹhẹnu etọn lẹ, lẹndai etọn gọna lehe ewọ nọ yinuwa do, titengbe hẹ omẹ etọn lẹ. Na nugbo tọn, Jehovah nọ na mí nukunnumọjẹnumẹ ehe vudevude, dile lẹndai etọn to hẹndi mọ. (Howh. 4:18) Jehovah hẹn yinkọ etọn zun yinyọnẹn na asu po asi po tintan lọ; podọ Evi yí yinkọ lọ zan to whenue e ji Kaini. (Gẹn. 4:1, NW) Devizọnwatọ nugbonọ Jehovah tọn lẹ taidi Noa, Ablaham, Isaki, po Jakọbu po yọ́n oyín Jiwheyẹwhe tọn. Humọ, to whenue Jehovah dona yé, penukundo yé go bosọ do adà lẹndai etọn tọn delẹ hia yé, pinpẹn-nutọn-yinyọnẹn  yetọn na oyín lọ jideji. To nukọn mẹ, Jiwheyẹwhe wá na nukunnumọjẹnumẹ vonọtaun de Mose gando yinkọ Etọn go.

4. Naegbọn Mose do kàn yinkọ Jiwheyẹwhe tọn sè, podọ naegbọn ahunmẹdunamẹnu etọn do sọgbe?

⁴ Hia Eksọdusi 3:10-15. To whenue Mose tindo owhe 80, Jiwheyẹwhe de azọngban sinsinyẹn de na ẹn dọmọ: “Hẹn omẹ ṣie lẹ ovi Islaeli tọn lẹ tọ́n sọn Egipti.” Ṣigba, Mose gbọn sisi dali kàn kanbiọ he siso de sè Jehovah dọmọ: ‘Eyin ovi Islaeli tọn lẹ kanse mi dọ, etẹwẹ oyín towe, etẹwẹ yẹn na dọna yé?’ To whenuena e yindọ yinkọ Jiwheyẹwhe tọn ko yin yinyọnẹn sọn ojlẹ dindẹn, etẹwutu Mose sọ kàn kanbiọ enẹ sè? Na nugbo tọn, Mose jlo na yọ́n nususu dogọ gando mẹhe tindo yinkọ enẹ go nado sọgan hẹn Islaelivi lẹ kudeji dọ Jiwheyẹwhe penugo nado tún yé dote nugbonugbo. Ahunmẹdunamẹnu Mose tọn sọgbe, na Islaelivi lẹ ko tin to kanlinmọgbenu na ojlẹ dindẹn, podọ vlavo yé sọgan ko tindo ayihaawe gando nugopipe Jehovah tọn nado tún yé dote go. Humọ, Islaelivi delẹ tlẹ ko jẹ yẹwhe Egipti tọn lẹ sẹ̀n ji.—Ezek. 20:7, 8.

5. To gblọndo he Jehovah na Mose mẹ, nawẹ e hẹn zẹẹmẹ yinkọ etọn tọn họnwun na ẹn dogọ gbọn?

⁵ Etẹwẹ yin gblọndo Jehovah tọn na kanbiọ Mose tọn? Jẹnukọn whẹ́, e dọmọ: “Le wẹ hiẹ na dọhlan ovi Islaeli tọn lẹ, YẸN NA YIN ko do mi hlan mì dè.” a Enẹgodo, e yidogọ dọmọ: ‘Jehovah Jiwheyẹwhe otọ́ mìtọn lẹ tọn ko do mi hlan mì dè.’ Jiwheyẹwhe dohia dọ emi na lẹzun nudepope he e biọ dọ emi ni lẹzun nado sọgan hẹn lẹndai emitọn di, podọ emi na yin nugbonọ na ohó emitọn to whepoponu. Abajọ, Jehovah do dọ gando ede go to wefọ 15tọ mẹ dọmọ: “Ehe wẹ oyín ṣie kakadoidoi ehe sọ wẹ oflin ṣie hlan whẹndo lẹpo.” Lehe hogbe enẹlẹ na ko hẹn yise Mose tọn lodo bosọ hẹn awuji i do sọ!

JEHOVAH NỌ YINUWA SỌGBE HẸ YINKỌ ETỌN

6, 7. Nawẹ Jehovah yinuwa to gigọ́ mẹ sọgbe hẹ oyín daho etọn gbọn?

⁶ Ojlẹ vude to whenue Jehovah ko deazọ́nna Mose godo, Jehovah yinuwa sọgbe hẹ oyín etọn to gigọ́ mẹ gbọn ede hinhẹn zun Mẹwhlẹngántọ Islaeli tọn dali. E yí azọ̀nylankan mẹvasudo tọn ao do dowinyan Egipti bo gbọnmọ dali hùngona nugomape yẹwhe Egipti tọn lẹ tọn kakajẹ Falo lọsu tọn ji. (Eks. 12:12) Enẹgodo, Jehovah má Ohù Vẹẹ lọ do awe, deanana Islaelivi lẹ gbọn e mẹ bo siọ Falo po awhànpa etọn lẹ po do ohù lọ mẹ. (Ps. 136:13-15) To “zungbo daho bosọ dobu” lọ mẹ, Jehovah hẹn ede zun Gbẹwhlẹngántọ de gbọn awuwiwlena núdùdù po osin po na omẹ etọn lẹ dali, vlavo na gbẹtọ livi awe yì  atọ̀n kavi humọ. Podọ, ewọ tlẹ hẹn yọnbasi bọ avọ̀ po afọpa yetọn lẹ po ma dohó. (Deut. 1:19; 29:5) E họnwun dọ, nudepope ma sọgan glọnalina Jehovah nado yinuwa sọgbe hẹ oyín etọn he nkọ ma pé awe. To nukọn mẹ, e dọna Isaia dọmọ: “Yẹn, yèdọ yẹn wẹ [Jehovah] podọ dogọ yẹn, Whlẹngántọ de ma tin.”—Isa. 43:11.

⁷ Jọṣua—mẹjẹmẹtẹnmẹ Mose tọn—lọsu yí nukun do mọ azọ́njiawu Jehovah tọn lẹ to Egipti podọ to zungbo mẹ. Enẹwutu, ojlẹ vude jẹnukọnna okú etọn, e yí nujikudo do dọna Islaelivi hatọ etọn lẹ dọmọ: “Mìwlẹ sọ yọnẹn to ayiha mìtọn lẹpo mẹ podọ to gbigbọ mìtọn lẹpo mẹ, dọ onú dopo ma gbòpò sọn onú dagbe he [Jehovah] Jiwheyẹwhe mìtọn dọ gbọn mì dali lẹ de mẹ; popolẹpo wẹ ṣẹ hlan mì, onú dopo ma gbòpò to e mẹ gba.” (Jọṣ. 23:14) Jehovah hẹn opagbe etọn di to gigọ́ mẹ bo gbọnmọ dali yinuwa sọgbe hẹ yinkọ etọn he zẹẹmẹdo “E nọ hẹn nado lẹzun.”

8. Nawẹ Jehovah to nuyiwa sọgbe hẹ oyín etọn to egbehe gbọn?

⁸ Mọdopolọ to egbehe, Jehovah nọ yinuwa sọgbe hẹ yinkọ etọn. Gbọn Visunnu etọn gblamẹ, e dọ dọdai dọ to azán godo tọn lẹ mẹ, yẹwheho wẹndagbe Ahọluduta lọ tọn na yin didọ “to aigba fininọ lẹpo ji.” (Mat. 24:14) Gbọnvona Jiwheyẹwhe Ganhunupotọ lọ, mẹdevo tẹwẹ sọgan dọ dọdai azọ́n mọnkọtọn tọn bo hẹn ẹn diun dọ e yin wiwà bosọ yí gbẹtọ susu he “ma sewé bosọ yin omẹ tata” lẹ zan nado wà azọ́n enẹ dotana? (Owalọ 4:13) Enẹwutu, to whenue mí to mahẹ tindo to azọ́n ehe mẹ, dọdai Biblu tọn enẹ hẹndi wẹ mí te. Humọ, mí sọ nọ gbògbéna Jehovah bo nọ dohia dọ mí jlo nugbonugbo dọ odẹ̀ mítọn ehe ni mọ hẹndi, enẹ wẹ: “Na oyín towe ni yin kinklandowiwe. Na ahọluduta towe ni wá. Na ojlo towe ni yin wiwà, kẹdẹdi to olọn mẹ, mọdopolọ to aigba ji.”—Mat. 6:9, 10.

OYÍN ETỌN KLO

9, 10. Nudevo tẹlẹ wẹ aliho he mẹ Jehovah yinuwa hẹ akọta Islaeli tọn te sọ plọn mí gando ewọ go?

⁹ Ojlẹ kleun de to whenue Islaelivi lẹ tọ́n sọn Egipti godo, Jehovah wleawuna haṣinṣan vonọtaun de hẹ yé. Gbọn alẹnu Osẹ́n tọn lọ gblamẹ, e lẹzun “asu” de na akọta lọ bo desọn ojlo mẹ nado didá azọngban he haṣinṣan yọyọ enẹ bẹhẹn lẹpo. (Jel. 3:14) To yẹhiadonu-liho, Islaelivi lẹ lẹzun asi etọn, yèdọ akọta he tindo oyín etọn to ota. (Isa. 54:5, 6) Eyin yé litaina ẹn bo setonuna gbedide etọn lẹ, ewọ na dona yé, basi hihọ́na yé bosọ hẹn yé tin to jijọho mẹ. (Sọh. 6:22-27) Ehe na zọ́n bọ oyín daho Jehovah tọn na yin gigopana to akọta lẹ ṣẹnṣẹn. (Hia Deutelonomi 4:5-8; Psalm 86:7-10.) Na taun tọn, to whenuho Islaelivi lẹ tọn mẹ, jonọ susu wẹ kẹalọyi sinsẹ̀n-bibasi nugbo lọ. Yé yinuwa taidi Luti, Moabinu lọ he dọna Naomi dọmọ: “Omẹ towe lẹ wẹ na yin omẹ ṣie lẹ, Jiwheyẹwhe towe Jiwheyẹwhe ṣie.”—Luti 1:16.

 ¹⁰ Aliho he mẹ Jehovah yinuwa hẹ akọta Islaeli tọn te na nudi owhe 1 500 do jẹhẹnu voovo etọn lẹ hia. Mahopọnna tasinsinyẹn akọta lọ tọn, whlasusu wẹ Jehovah do ede hia nado yin ‘Jiwheyẹwhe he gọna lẹblanu’ podọ “awuwhletọ nado sadi.” Jiwheyẹwhe fahomẹ bosọ sinyẹnlin hẹ yé taun. (Eks. 34:5-7) Ṣigba, homẹfa Jehovah tọn tindo dogbó, podọ Juvi lẹ zẹ̀ dogbó enẹ go to whenue yé gbẹ́ Visunnu etọn dai bo hù i. (Mat. 23:37, 38) Bẹsọn whenẹnu, kúnkan Islaeli agbasa tọn lọ tọn masọ sọgan yin yiylọ gbọn oyín Jiwheyẹwhe tọn dali ba. To nukun Jehovah tọn mẹ, yé taidi atin he kú bo masọ sọgan de sinsẹ́n depope tọ́n ba. (Luku 23:31) Nawẹ ehe yinuwado pọndohlan yetọn gando oyín Jiwheyẹwhe tọn go ji gbọn?

11. Naegbọn Ju lẹ wá doalọtena yinkọ Jiwheyẹwhe tọn yiyizan?

¹¹ Whenuho dohia dọ dile ojlẹ to yìyì, Ju lẹ wá jẹ pọndohlan agọ̀ tindo ji gando oyín Jiwheyẹwhe tọn go, bo nọ pọ́n oyín lọ hlan taidi nuhe yé ma dona dọtọ́n. (Eks. 20:7) Vudevude, Ju lẹ doalọtena yinkọ Jiwheyẹwhe tọn yiylọ. Ayihaawe ma tin dọ Jehovah na ko gblehomẹ taun nado mọdọ Ju lẹ ma na sisi depope oyín emitọn. (Ps. 78:40, 41) Ṣigba, e họnwun dọ Jiwheyẹwhe, “oyín mẹhe tọn nọ yin Awuwhàntọ,” ma na dike oyín etọn ni gbọṣi ota na akọta enẹ he ko dogodo e bọ ewọ lọsu ko gbẹ́ dai lọ gba. (Eks. 34:14) Ehe dona whàn mí nado nọ yí nukun nujọnu tọn do pọ́n yinkọ Mẹdatọ mítọn tọn bosọ nọ na ẹn sisi to nuyiwa mítọn lẹpo mẹ.

AKỌTA YỌYỌ DE HE TINDO YINKỌ JIWHEYẸWHE TỌN TO OTA

12. Nawẹ Jehovah wleawuna akọta yọyọ de he tindo oyín etọn to ota gbọn?

¹² Gbọn Jelemia gblamẹ, Jehovah dọ dọdai dọ emi na basi “alẹnu yọyọ de” hẹ akọta yọyọ de, yèdọ Islaeli gbigbọmẹ tọn. Dọdai lọ dohia dọ hagbẹ akọta lọ tọn lẹpo, “sọn mẹwhiwhè yetọn mẹ jẹ mẹkiklo yetọn mẹ,” wẹ na ‘yọ́n Jehovah.’ (Jel. 31:31, 33, 34) Dọdai enẹ jẹ hẹndi mọ ji to Pẹntikọsti 33 W.M. Ojlẹ enẹ mẹ wẹ Jiwheyẹwhe ze alẹnu yọyọ lọ dai te. Akọta yọyọ lọ, yèdọ “Islaeli Jiwheyẹwhe tọn” he bẹ Ju po mẹhe ma yin Ju lẹ po hẹn, wá lẹzun ‘akọta he tindo oyín Jiwheyẹwhe tọn to ota.’ Jehovah dlẹnalọdo mẹhe akọta enẹ bẹhẹn lẹ taidi “[mẹhe] nọ yin yiylọ gbọn oyín ṣie dali lẹ.”—Gal. 6:16; hia Owalọ lẹ 15:14-17; Mat. 21:43.

13. (a) Be Klistiani dowhenu tọn lẹ yí oyín Jiwheyẹwhe tọn zan ya? Basi zẹẹmẹ. (b) Nukun tẹwẹ hiẹ nọ yí do pọ́n lẹblanulọkẹyi lọ nado hẹn yinkọ Jehovah tọn zun yinyọnẹn na mẹdevo lẹ?

¹³ E họnwun dọ hagbẹ Islaeli gbigbọmẹ tọn lọ tọn lẹ “he nọ yin yiylọ gbọn oyín [Jiwheyẹwhe tọn] dali lẹ” yí yinkọ Jiwheyẹwhe tọn zan, titengbe to whenue yé to hoyidọ sọn Owe-wiwe Heblu tọn lẹ mẹ. b Di apajlẹ, to whenue apọsteli Pita to hodọna mẹplidopọ akọjọpli tọn de he bẹ Ju po mẹdiọzun Juvi lẹ po hẹn to Pẹntikọsti 33 W.M., ewọ yí oyín Jiwheyẹwhe tọn zan whlasusu. (Owalọ 2:14, 20, 21, 25, 34) Na Klistiani dowhenu tọn lẹ gbògbéna Jehovah wutu, ewọ dona vivẹnudido yetọn lẹ to azọ́n yẹwhehodidọ tọn lọ mẹ. Mọdopolọ to egbehe, Jehovah nọ dona lizọnyizọn mítọn to whenue mí yí ayajẹ do lá oyín etọn bosọ do e hia jlodotọ lẹ, vlavo to Biblu yetọn lẹ mẹ tlọlọ. Gbọnmọ dali, mí nọ gọalọna yé nado yọ́n Jiwheyẹwhe nugbo lọ. Lẹblanulọkẹyi nankọ die na yé podọ na míwlẹ lọsu! To whedelẹnu, oyín Jiwheyẹwhe tọn yinyọnẹn sọgan zọ́n bọ yé na jẹ awuwlena haṣinṣan pẹkipẹki de hẹ Jehovah ji, podọ haṣinṣan enẹ na to sinsinyẹn deji bo tlẹ sọgan wá gbọṣi aimẹ kakadoi.

14, 15. Mahopọnna atẹṣiṣi he lìn biọ agun Klistiani tọn mẹ, etẹwẹ Jehovah wà na oyín daho etọn?

¹⁴ Ṣigba to nukọn mẹ, atẹṣiṣi wá lìn biọ agun Klistiani dowhenu tọn mẹ, titengbe to okú apọsteli lẹ tọn godo. (2 Tẹs. 2:3-7)  Mẹplọntọ lalonọ lẹ tlẹ wá hodo aṣa Juvi lẹ tọn ma nado nọ yí oyín Jiwheyẹwhe tọn zan. Ṣigba, be Jehovah dike bọ oyín daho etọn busẹ sọn aimẹ wẹ ya? Paali! Nugbo wẹ dọ mí ma sọgan dọ lehe gbẹtọ lẹ nọ ylọ oyín Jiwheyẹwhe tọn do taun to hohowhenu, etomọṣo oyín lọ gbọṣi aimẹ. Na ojlẹ dindẹn, oyín lọ sọawuhia to lẹdogbedevomẹ Biblu tọn voovo lẹ mẹ podọ to kandai weyọnẹntọ Biblu tọn lẹ tọn mẹ ga. Di apajlẹ to 1757, Charles Peters wlan dọ to vogbingbọn mẹ na tẹnmẹ-yinkọ susu he Jiwheyẹwhe tindo lẹ, oyín lọ Jehovah “wẹ taidi dehe do mẹhe ewọ yin hia hugan.” Weta 7tọ owe he Hopton Haynes wlan to 1797 gando sinsẹ̀n-bibasi na Jiwheyẹwhe go bẹjẹeji po hogbe ehelẹ po dọmọ: “JEHOVAH wẹ yinkọ jọnun JIWHEYẸWHE tọn he Ju lẹ nọ yizan; ewọ kẹdẹ wẹ yé nọ sẹ̀n dile Klisti po Apọsteli etọn lẹ po lọsu wà do.” Gbọnvona dọ Henry Grew (1781-1862) yí oyín Jiwheyẹwhe tọn zan, ewọ sọ dohia dọ vlẹko ko yin hinhẹn wá oyín lọ ji bo dona yin kinklandowiwe. Mọdopolọ, George Storrs (1796-1879) he yin họntọn vivẹ́ Charles T. Russell tọn de yí yinkọ Jiwheyẹwhe tọn zan podọ Russell lọsu wàmọ.

¹⁵ Owhe ayidego tọn de wẹ 1931 yin, na to owhe enẹ mẹ wẹ Biblu Plọntọ Akọjọpli tọn lẹ, dile omẹ Jiwheyẹwhe tọn lẹ nọ yin yiylọ do to whenẹnu, kẹalọyi yinkọ lọ Kunnudetọ Jehovah tọn lẹ. (Isa. 43:10-12) Gbọnmọ dali, yé lá na gbẹtọ lẹpo dọ ayajẹnu wẹ e yin na emi nado yin devizọnwatọ Jiwheyẹwhe nugbo dopo akàn lọ tọn lẹ, nado yin ‘gbẹtọ he nọ yin yiylọ gbọn oyín etọn dali lẹ,’ bosọ to gigopana oyín etọn. (Owalọ 15:14) Diọdo ayidego tọn ehe flinnu mí gando hogbe Jehovah tọn he tin to Malaki 1:11 mẹ lẹ go dọmọ: “Sọn zizẹtẹn owhè tọn yèdọ jẹ tejijẹ yì dopolọ tọn wẹ oyín ṣie na yin kiklo to Kosi lẹ ṣẹnṣẹn.”

ZỌNLINZINZIN TO OYÍN JEHOVAH TỌN MẸ

16. Naegbọn mí dona nọ pọ́n zọnlinzinzin to oyín Jehovah tọn mẹ hlan taidi yẹyi daho de?

¹⁶ Yẹwhegán Mika wlan dọmọ: “Na gbẹtọ lẹpo wẹ zọnlinzin omẹ dopodopo to oyín yẹwhe etọn tọn mẹ, míwlẹ bo nasọ nọ zinzọnlin to oyín [Jehovah] Jiwheyẹwhe mítọn tọn mẹ kakadoi podọ doidoi.” (Mika 4:5) Gbọnvona dọ yẹyi daho de wẹ e yin na Biblu Plọntọ lẹ dọ Jehovah dike bọ yé tindo oyín etọn to ota, enẹ sọ vọ́ jide na yé dọ yé tindo nukundagbe etọn. (Hia Malaki 3:16-18.) Ṣigba, etẹwẹ dogbọn hiẹ dali? Be hiẹ to nuhe go a pé lẹpo wà nado nọ “zinzọnlin to oyín [Jehovah] tọn mẹ” ya? Be hiẹ nọ yọ́n pinpẹn nuhe mọwiwà bẹhẹn lẹ tọn ya?

17. Etẹwẹ zọnlinzinzin to oyín Jiwheyẹwhe tọn mẹ bẹhẹn?

¹⁷ E whè gbau zọnlinzinzin to oyín Jehovah tọn mẹ bẹ onú atọ̀n hẹn. Tintan, mí dona lá oyín enẹ na mẹdevo lẹ to yinyọnẹn mẹ dọ mẹhe “dawhá ylọ oyín Jehovah tọn” lẹ kẹdẹ wẹ “na yin whinwhlẹngán.” (Lom. 10:13) Awetọ, mí dona nọ lẹnnupọndo jẹhẹnu Jehovah tọn lẹ ji, titengbe owanyi etọn. (1 Joh. 4:8) Podọ atọ̀ntọ, mí nọ zinzọnlin to oyín Jiwheyẹwhe tọn mẹ to whenue mí desọn ojlo mẹ bo setonuna nujinọtedo dodo tọn etọn lẹ, na awugbopo nado wàmọ sọgan hẹn vlẹko wá oyín wiwe Otọ́ mítọn tọn ji. (1 Joh. 5:3) Be hiẹ magbe nado nọ “zinzọnlin to oyín [Jehovah] Jiwheyẹwhe mítọn tọn mẹ kakadoi” ya?

18. Naegbọn mẹhe nọ gbògbéna oyín daho Jehovah tọn lẹpo sọgan pọ́n sọgodo hlan po jide po?

¹⁸ To madẹnmẹ, mẹhe nọ diọnukunsọ Jehovah kavi gbẹ́ oyín etọn dai lẹpo wẹ na tin to dandannu glọ nado yọ́n ewọ. (Ezek. 38:23) Enẹ na bẹ gbẹtọ he taidi Falo nkọ lẹ hẹn, mẹhe dọmọ: “Mẹnu wẹ [Jehovah] bọ yẹn nado dotoai hlan ogbè etọn?” E ma dẹn bọ gblọndo lọ wá họnwun na Falo. (Eks. 5:1, 2; 9:16; 12:29) Ṣigba, míwlẹ ko desọn ojlo mẹ nado wá yọ́n Jehovah. Ayajẹnu wẹ e yin na mí nado tindo oyín etọn to ota podọ nado do míde hia taidi omẹ etọn lẹ gbọn tonusise mítọn dali. Enẹwutu, mí to nukọnpọnhlan sọgodo po jide po to opagbe he tin to Psalm 9:10 mẹ dọmọ: ‘Yé he yọ́n oyín towe lẹ na dotudo gowe: Na hiẹ, Jehovah, ma gbẹ́ yé he dín we lẹ dai gba.’

[Nudọnamẹ odò tọn]

[Kanbiọ Oplọn tọn lẹ]

[Yẹdide to weda 25]

Zẹẹmẹ yinkọ Jiwheyẹwhe tọn yinyọnẹn hẹn yise Mose tọn lodo

[Yẹdide to weda 26]

Falo gbẹ́ nado kẹalọyi dọ Jehovah wẹ Jiwheyẹwhe