ចូរលើកតម្កើងនាមដ៏ឧត្ដមរបស់ព្រះយេហូវ៉ា
ចូរលើកតម្កើងនាមដ៏ឧត្តមរបស់ព្រះយេហូវ៉ា
«ទូលបង្គំ . . . នឹងលើកដំកើងព្រះនាមទ្រង់ជាដរាបតទៅ»។—ទំនុក. ៨៦:១២
តើអ្នកអាចពន្យល់បានឬទេ?
តើការស្គាល់នាមព្រះមានន័យយ៉ាងណា?
តើតាមរបៀបណាព្រះយេហូវ៉ាបានបើកបង្ហាញអំពីនាមរបស់លោកបន្ដិចម្ដងៗ?
តើការប្រព្រឹត្តតាមនាមរបស់ព្រះយេហូវ៉ាមានន័យយ៉ាងណា?
១, ២. ផ្ទុយពីពិភពគ្រិស្តសាសនា តើសាក្សីព្រះយេហូវ៉ាមានទស្សនៈយ៉ាងណាចំពោះនាមរបស់ព្រះ?
ជាទូទៅពិភពគ្រិស្តសាសនាជៀសមិនប្រើនាមរបស់ព្រះទេ។ ជាឧទាហរណ៍ បុព្វកថានៃសេចក្ដីបកប្រែមួយចែងថា ជា«ការមិនសមរម្យទាល់តែសោះ»ដែលពិភពគ្រិស្តសាសនាហៅព្រះដោយប្រើឈ្មោះណាមួយ (Revised Standard Version)។
២ ផ្ទុយទៅវិញ សាក្សីព្រះយេហូវ៉ាមានមោទនភាពដោយសារពួកគេតំណាងនាមរបស់ព្រះ ហើយលើកតម្កើងនាមនោះ។ (សូមអាន ទំនុកតម្កើង ៨៦:១២; អេសាយ ៤៣:១០) ម្យ៉ាងទៀត យើងចាត់ទុកថាជាឯកសិទ្ធិមួយដែលយើងអាចយល់អត្ថន័យនៃនាមនោះ ហើយយល់អំពីចំណោទដែលទាក់ទងនឹងការធ្វើឲ្យនាមរបស់ព្រះបានបរិសុទ្ធ។ (ម៉ាថ. ៦:៩) ប៉ុន្តែ នេះគឺជាឯកសិទ្ធមួយដែលយើងមិនត្រូវចាត់ទុកថាជាអ្វីដែលធម្មតានោះទេ។ ហេតុនេះ សូមយើងពិចារណានូវសំណួរសំខាន់បីយ៉ាងគឺ តើការស្គាល់នាមរបស់ព្រះមានន័យយ៉ាងណា? តើព្រះយេហូវ៉ាបានបង្ហាញយ៉ាងណាថាលោកសមនឹងនាមដ៏ឧត្តមរបស់លោក? ហើយតើតាមរបៀបណាយើងអាចប្រព្រឹត្តតាមនាមរបស់ព្រះយេហូវ៉ា?
តើការស្គាល់នាមរបស់ព្រះមានន័យយ៉ាងណា?
៣. តើការស្គាល់នាមរបស់ព្រះមានន័យយ៉ាងណា?
៣ ការស្គាល់នាមរបស់ព្រះមានន័យច្រើនជាងការគ្រាន់តែស្គាល់ពាក្យថា«យេហូវ៉ា»។ នេះរួមបញ្ចូលការស្គាល់អំពីកេរ្ដិ៍ឈ្មោះ គុណសម្បត្ដិ គោលបំណងនិងសកម្មភាពរបស់លោក ព្រមទាំងរបៀបដែលលោកបានប្រព្រឹត្តចំពោះរាស្ត្ររបស់លោកដែលគម្ពីរបានបើកសម្ដែងឲ្យដឹង។ ដូចព្រះយេហូវ៉ាបានសម្រេចនូវគោលបំណងរបស់លោក បន្ដិចម្ដងៗលោកបានបង្ហាញថា លោកជាព្រះបែបណា។ (សុភ. ៤:១៨) ព្រះយេហូវ៉ាបានប្រាប់នាមរបស់លោកដល់ប្ដីប្រពន្ធដំបូងគឺអាដាមនិងអេវ៉ា ហេតុនេះអេវ៉ាបានប្រើនាមនេះក្រោយពីនាងបានបង្កើតកាអ៊ីន។ (លោ. ៤:១) បុរសដ៏ស្មោះត្រង់ដូចជាណូអេ អាប្រាហាំ អ៊ីសាក និងយ៉ាកុបស្គាល់នាមរបស់ព្រះ។ ម្យ៉ាងទៀត ពួកគេកាន់តែឲ្យតម្លៃទៅលើនាមរបស់ព្រះ កាលដែលលោកបានឲ្យពរដល់ពួកគេ បានថែរក្សាពួកគេ និងបានបង្ហាញផ្នែកខ្លះនៃគោលបំណងរបស់លោកដល់ពួកគេ។ ជាយូរក្រោយមក ព្រះបានបើកសម្ដែងឲ្យម៉ូសេដឹងអ្វីមួយដ៏ពិសេសស្តីអំពីអត្ថន័យនៃនាមរបស់លោក។
៤. ហេតុអ្វីម៉ូសេសួរព្រះអំពីនាមរបស់លោក? ហេតុអ្វីគាត់ចង់ធ្វើឲ្យជនជាតិអ៊ីស្រាអែលជឿជាក់ថា ព្រះនឹងសង្គ្រោះពួកគេ?
៤ សូមអាន និក្ខមនំ ៣:១០-១៥។ ពេលម៉ូសេមានអាយុ៨០ឆ្នាំ ព្រះបានឲ្យបង្គាប់ដ៏សំខាន់មួយដល់គាត់ថា៖ «[ចូរ]នាំរាស្ត្រអញ គឺជាពួកកូនចៅអ៊ីស្រាអែលចេញពីស្រុកអេស៊ីព្ទមក»។ បន្ទាប់មក ម៉ូសេបានសួរព្រះយេហូវ៉ានូវសំណួរមួយដែលមានអត្ថន័យជ្រាលជ្រៅថា៖ ‹បើគេសួរទូលបង្គំថា តើព្រះទ្រង់នាមជាអ្វី នោះតើត្រូវឲ្យទូលបង្គំប្រាប់គេថាដូចម្ដេច?›។ ដោយសាររាស្ត្រព្រះបានស្គាល់នាមនេះតាំងពីយូរយារណាស់មកហើយ តើហេតុអ្វីម៉ូសេសួរសំណួរនេះ? ពីព្រោះគាត់ចង់ស្គាល់ថែមទៀតថាព្រះយេហូវ៉ាជាព្រះបែបណា។ ម៉ូសេចង់ធ្វើឲ្យជនជាតិអ៊ីស្រាអែលជឿជាក់ថា ព្រះពិតជានឹងសង្គ្រោះពួកគេមែន ហើយយើងអាចយល់នូវមូលហេតុដែលម៉ូសេចង់ធ្វើដូច្នេះ។ ជនជាតិអ៊ីស្រាអែលធ្លាប់ជាខ្ញុំបម្រើរបស់ជនជាតិអេស៊ីបអស់រយៈពេលជាយូរ ហើយពួកគេទំនងជាឆ្ងល់ថា ព្រះយេហូវ៉ាអាចសង្គ្រោះពួកគេបានឬមិនបាន។ ជនជាតិអ៊ីស្រាអែលខ្លះៗបានគោរពបូជាព្រះរបស់ជនជាតិអេស៊ីប!—អេស. ២០:៧, ៨
៥. ពេលព្រះយេហូវ៉ាតបឆ្លើយទៅម៉ូសេ តើលោកបានពន្យល់ថែមទៀតអំពីអត្ថន័យនៃនាមរបស់លោកយ៉ាងដូចម្ដេច?
៥ តើព្រះយេហូវ៉ាបានឆ្លើយនឹងសំណួររបស់ម៉ូសេយ៉ាងដូចម្ដេច? លោកបានមានប្រសាសន៍ថា៖ «ឯងត្រូវឆ្លើយប្រាប់ដល់ពួកកូនចៅអ៊ីស្រាអែលដូច្នេះថា ព្រះដ៏ជាព្រះទ្រង់ បានចាត់ឲ្យខ្ញុំមកឯអ្នករាល់គ្នា»។ * បន្ទាប់មកលោកបានបន្ថែមថា៖ «ព្រះយេហូវ៉ាជាព្រះនៃពួកឰយុកោអ្នករាល់គ្នា . . . បានចាត់ឲ្យខ្ញុំមកឯអ្នករាល់គ្នា»។ ព្រះបានប្រាប់ថា លោកនឹងក្លាយទៅជាអ្វីក៏ដោយដែលលោកចង់ក្លាយទៅជា ដើម្បីបំពេញគោលបំណងរបស់លោក ហើយថាលោកនឹងធ្វើតាមប្រសាសន៍របស់លោកជានិច្ច។ ហេតុនេះ ខ១៥ចែងថា ព្រះយេហូវ៉ាបានមានប្រសាសន៍ដោយផ្ទាល់ថា៖ «នោះជាឈ្មោះអញនៅអស់កល្បជានិច្ច ហើយក៏សំរាប់ជាសេចក្ដីរំឭកពីអញ ដល់គ្រប់ទាំងដំណរៀងរាបតទៅ»។ ការបើកបង្ហាញនោះពិតជាបានពង្រឹងជំនឿរបស់ម៉ូសេ ហើយធ្វើឲ្យគាត់នឹកអស្ចារ្យក្នុងចិត្តមែន!
ព្រះយេហូវ៉ាធ្វើតាមនាមរបស់លោក
៦, ៧. តើតាមរបៀបណាព្រះយេហូវ៉ាធ្វើតាមនាមដ៏ឧត្តមរបស់លោកគ្រប់ជំពូក?
៦ មិនយូរក្រោយពីព្រះយេហូវ៉ាបានមានប្រសាសន៍ទៅកាន់ម៉ូសេ លោកបានធ្វើតាមពាក្យសន្យារបស់លោក ហើយបានរំដោះជនជាតិអ៊ីស្រាអែល។ លោកបានធ្វើឲ្យស្រុកអេស៊ីបអាម៉ាស់មុខដោយសេចក្ដីវេទនា១០ប្រភេទ ដំណាលគ្នានោះលោកបានបកអាក្រាតព្រះរបស់ជនជាតិអេស៊ីប រួមទាំងផារ៉ូថាគ្មានឫទ្ធានុភាព។ (និក្ខ. ១២:១២) ក្រោយមកព្រះយេហូវ៉ាបានញែកសមុទ្រក្រហម ហើយនាំជនជាតិអ៊ីស្រាអែលឆ្លងកាត់សមុទ្រនោះ ព្រមទាំងបានធ្វើឲ្យផារ៉ូនិងកងទ័ពរបស់គាត់លង់ទឹកស្លាប់។ (ទំនុក. ១៣៦:១៣-១៥) នៅ«ទីរហោស្ថានសំបើម គួរស្ញែងខ្លាច» ព្រះយេហូវ៉ាបានបង្ហាញថាលោកជាអ្នកការពារជីវិត ពេលលោកផ្ដល់អាហារនិងទឹកដល់រាស្ត្ររបស់លោក ប្រហែលជាមានចំនួនពីរទៅបីលាននាក់ឬច្រើនជាងនេះ! លោកថែមទាំងធ្វើឲ្យសម្លៀកបំពាក់និងស្បែកជើងរបស់ពួកគេមិនសឹករេចរឹលផងដែរ។ (ចោ. ១:១៩; ២៩:៤) មែនហើយ គ្មានអ្វីអាចបញ្ឈប់ព្រះយេហូវ៉ាមិនឲ្យធ្វើតាមនាមរបស់លោកដែលគ្មានអ្វីអាចប្រៀបបានឡើយ។ ក្រោយមកលោកបានប្រាប់អេសាយថា៖ «គឺអញ អញនេះហើយជាយេហូវ៉ា ក្រៅពីអញ គ្មានអ្នកសង្គ្រោះណាទៀតឡើយ»។—អេ. ៤៣:១១
៧ យ៉ូស្វេជាអ្នកបន្តតំណែងពីម៉ូសេ ក៏បានឃើញដោយផ្ទាល់ភ្នែកនូវការប្រព្រឹត្តដ៏គួរឲ្យស្ញែងខ្លាចរបស់ព្រះយេហូវ៉ានៅស្រុកអេស៊ីបនិងនៅតំបន់ស្ងាត់ជ្រងំដែរ។ ដូច្នេះ ពេលគាត់ជិតស្លាប់ យ៉ូស្វេអាចនិយាយដោយជឿជាក់យ៉ាងស្មោះទៅជនជាតិអ៊ីស្រាអែលដែលជាជនរួមជាតិរបស់គាត់ថា៖ «នៅក្នុងចិត្តហើយក្នុងវិញ្ញាណរបស់ឯងនោះក៏ដឹងទាំងអស់គ្នាថា ឯអស់ទាំងសេចក្ដីល្អដែលព្រះយេហូវ៉ាជាព្រះនៃឯងទ្រង់បានមានបន្ទូលសន្យាហើយ នោះគ្មានខ្វះណាមួយសោះ ទាំងអស់បានសំរេចគ្រប់ជំពូក ឥតមានខ្វះណាមួយឡើយ»។ (យ៉ូស. ២៣:១៤) ព្រះយេហូវ៉ាបានធ្វើតាមពាក្យសន្យារបស់លោក។
៨. នៅសម័យយើងនេះ តើព្រះយេហូវ៉ាធ្វើតាមនាមរបស់លោកយ៉ាងដូចម្ដេច?
៨ នៅសព្វថ្ងៃនេះ ព្រះយេហូវ៉ាក៏បានធ្វើតាមពាក្យសន្យារបស់លោកដែរ។ តាមរយៈបុត្ររបស់លោក លោកបានទាយថា ក្នុងអំឡុងគ្រាចុងក្រោយបង្អស់ ដំណឹងអំពីរាជាណាចក្ររបស់ព្រះនឹងត្រូវផ្សព្វផ្សាយ«នៅគ្រប់ទីអាស្រ័យនៅផែនដី»។ (ម៉ាថ. ២៤:១៤) មានតែព្រះយេហូវ៉ាប៉ុណ្ណោះអាចទាយប្រាប់អំពីកិច្ចការនេះ។ លោកមានឫទ្ធានុភាពដើម្បីឲ្យកិច្ចការនេះបានសម្រេច ហើយលោកប្រើមនុស្សសាមញ្ញធម្មតាដើម្បីធ្វើកិច្ចការនេះ! (សកម្ម. ៤:១៣) ដូច្នេះពេលយើងរួមចំណែកក្នុងកិច្ចការនេះ តាមការពិតយើងរួមចំណែកក្នុងការសម្រេចទំនាយក្នុងគម្ពីរ។ យើងលើកកិត្ដិយសបិតារបស់យើង ហើយបង្ហាញថាយើងពិតជាធ្វើតាមសេចក្ដីអធិដ្ឋានរបស់យើង ពេលយើងអធិដ្ឋានថា៖ «សូមឲ្យនាមរបស់លោកបានបរិសុទ្ធ។ សូមឲ្យរាជាណាចក្ររបស់លោកបានមកដល់។ សូមឲ្យបំណងប្រាថ្នារបស់លោកបានសម្រេចនៅផែនដី ដូចនៅស្ថានសួគ៌ដែរ»។—ម៉ាថ. ៦:៩, ១០
នាមរបស់លោកគឺប្រសើរឧត្តម
៩, ១០. តាមរយៈរបៀបដែលព្រះយេហូវ៉ាប្រព្រឹត្តទៅលើជនជាតិអ៊ីស្រាអែល តើយើងរៀនអ្វីថែមទៀតអំពីលោក?
៩ មិនយូរក្រោយពីជនជាតិអ៊ីស្រាអែលចេញពីស្រុកអេស៊ីប ព្រះយេហូវ៉ាបានបើកសម្ដែងថែមទៀតអំពីខ្លួនលោកដល់ពួកគេ។ តាមរយៈច្បាប់នៃកិច្ចព្រមព្រៀង លោកបានក្លាយជា«ប្ដី»របស់ពួកគេក្នុងន័យធៀប ហើយលោកស្ម័គ្រចិត្តទទួលភារកិច្ចទាំងអស់របស់ប្ដី។ (យេ. ៣:១៤) ជាលទ្ធផល ជនជាតិអ៊ីស្រាអែលបានក្លាយទៅជាប្រពន្ធរបស់លោកក្នុងន័យធៀប គឺជារាស្ត្រដែលជាតំណាងនាមរបស់លោក។ (អេ. ៥៤:៥, ៦) កាលដែលពួកគេចុះចូលនឹងលោកដោយស្ម័គ្រចិត្ត លោកបង្ហាញថាលោកជា«ប្ដី»ដ៏ល្អឥតខ្ចោះរបស់ពួកគេ។ លោកនឹងបន្តឲ្យពរ រក្សាការពារនិងឲ្យពួកគេមានសេចក្ដីសុខសាន្ត។ (ជន. ៦:២២-២៧) ដូច្នេះនាមដ៏ឧត្តមរបស់ព្រះយេហូវ៉ានឹងត្រូវសរសើរតម្កើងក្នុងចំណោមប្រជាជាតិនានា។ (សូមអាន ចោទិយកថា ៤:៥-៨; ទំនុកតម្កើង ៨៦:៧-១០) មែនហើយ ក្នុងប្រវត្ដិសាស្ត្ររបស់អ៊ីស្រាអែល ជនបរទេសជាច្រើននាក់បានចូលមកក្នុងការគោរពប្រណិប័តន៍ពិត។ តាមការពិត ពួកគេនិយាយអ្វីដែលរូថ ដែលជាស្ត្រីជនជាតិម៉ូអាប់បាននិយាយទៅន៉ាអូមីថា៖ «សាសន៍របស់អ្នកម្ដាយនឹងបានជាសាសន៍របស់ខ្ញុំ ហើយព្រះរបស់អ្នកម្ដាយនឹងបានជាព្រះរបស់ខ្ញុំដែរ»។—រស់. ១:១៦
១០ អស់រយៈពេលប្រហែលជា១.៥០០ឆ្នាំ របៀបដែលព្រះយេហូវ៉ាបានប្រព្រឹត្តទៅលើបណ្ដាជនអ៊ីស្រាអែលបានបង្ហាញអំពីបុគ្គលិកលក្ខណៈថ្មីជាច្រើនរបស់លោក។ ទោះជាប្រជាជាតិអ៊ីស្រាអែលមិនស្ដាប់បង្គាប់លោកក៏ដោយ ម្ដងហើយម្ដងទៀតព្រះយេហូវ៉ាបានបង្ហាញថាលោកជាព្រះដែលមាន«ព្រះហឫទ័យមេត្ដាករុណា» ហើយ«យឺតនឹងខ្ញាល់»។ លោកជាព្រះដែលមានចិត្តអត់ធ្មត់និងចិត្តធ្ងន់យ៉ាងអស្ចារ្យ។ (និក្ខ. ៣៤:៥-៧) ក៏ប៉ុន្តែចិត្តអត់ធ្មត់របស់ព្រះយេហូវ៉ាមានកម្រិត។ ពេលដែលប្រជាជាតិយូដាមិនព្រមជឿលើលោកយេស៊ូ ហើយបានសម្លាប់លោក នោះព្រះយេហូវ៉ាបានលែងអត់ធ្មត់តទៅទៀត។ (ម៉ាថ. ២៣:៣៧, ៣៨) កូនចៅនៃប្រជាជាតិអ៊ីស្រាអែលលែងជារាស្ត្រដែលជាតំណាងនាមរបស់ព្រះទៀត។ ចំពោះព្រះយេហូវ៉ា ពួកគេគឺដូចជាស្លាប់ ដូចជាដើមឈើដែលក្រៀមស្វិតទៅ។ (លូក. ២៣:៣១) តើក្រោយមកជនជាតិអ៊ីស្រាអែលមានអារម្មណ៍យ៉ាងណាអំពីនាមរបស់ព្រះ?
១១. ហេតុអ្វីជនជាតិអ៊ីស្រាអែលឈប់ប្រើនាមរបស់ព្រះ?
១១ ក្រោយមក ប្រវត្ដិសាស្ត្របង្ហាញថា ជនជាតិយូដាមានអបិយជំនឿចំពោះនាមរបស់ព្រះ ហើយពួកគេចាត់ទុកថានាមនោះជាអ្វីដែលពួកគេមិនគួរនិយាយនោះទេ។ (និក្ខ. ២០:៧) បន្ដិចម្ដងៗ ជនជាតិយូដាឈប់ប្រើនាមរបស់ព្រះទៀត។ នេះប្រាកដជាធ្វើឲ្យព្រះយេហូវ៉ាឈឺចិត្ត ពេលដែលលោកឃើញថាពួកគេមិនគោរពនាមរបស់លោកទាល់តែសោះ។ (ទំនុក. ៧៨:៤០, ៤១) នាមរបស់ព្រះយេហូវ៉ាគឺសំខាន់ណាស់ចំពោះលោក។ តាមការពិត គម្ពីរចែងថាលោកប្រច័ណ្ឌឬហួងហែងចំពោះនាមរបស់លោក។ ដោយសារជនជាតិអ៊ីស្រាអែលបង្អាប់នាមរបស់ព្រះយេហូវ៉ា ពួកគេមិនសមធ្វើជារាស្ត្រដែលជាតំណាងនាមនេះតទៅទៀតឡើយ។ (និក្ខ. ៣៤:១៤) ហេតុការណ៍ពិតនេះបង្រៀនយើងអំពីសារៈសំខាន់នៃការប្រព្រឹត្តចំពោះនាមនៃអ្នកបង្កើតរបស់យើងដោយការគោរពដ៏ជ្រាលជ្រៅ។
រាស្ត្រថ្មីមួយដែលបានត្រូវហៅដោយនាមរបស់ព្រះ
១២. តើអ្នកណាបានក្លាយជារាស្ត្រមួយដែលជាតំណាងនាមរបស់ព្រះ?
១២ តាមរយៈយេរេមា ព្រះយេហូវ៉ាបានបើកសម្ដែងអំពីគោលបំណងរបស់លោក ដើម្បីរៀបចំ«សញ្ញាថ្មី»ឬកិច្ចព្រមព្រៀងថ្មីជាមួយនឹងប្រជាជាតិថ្មីមួយ ពោលគឺអ៊ីស្រាអែលនៃព្រះ។ យេរេមាបានទាយថា សមាជិកទាំងអស់នៃប្រជាជាតិនេះ«តាំងពីអ្នកតូចបំផុត រហូតដល់អ្នកធំបំផុត»នឹង«ស្គាល់ព្រះយេហូវ៉ា»។ (យេ. ៣១:៣១, ៣៣, ៣៤) ទំនាយនេះចាប់ផ្ដើមសម្រេចនៅបុណ្យថ្ងៃទី៥០ ឆ្នាំ៣៣ គ.ស. ពេលព្រះបានរៀបចំកិច្ចព្រមព្រៀងថ្មី។ ព្រះយេហូវ៉ាបានមានប្រសាសន៍ថា ប្រជាជាតិថ្មីដែលជា«អ៊ីស្រាអែលនៃព្រះ»ដែលរួមបញ្ចូលជនជាតិយូដានិងជនជាតិដទៃ បានក្លាយជា«រាស្ត្រមួយជាតំណាងនាមរបស់[ព្រះ]» ឬជា«ជាតិសាសន៍ ដែលបានត្រូវហៅដោយឈ្មោះរបស់ខ្ញុំ»។—កាឡ. ៦:១៦; សូមអាន សកម្មភាព ១៥:១៤-១៧; ម៉ាថ. ២១:៤៣
១៣. (ក) តើគ្រិស្តសាសនិកនៅសតវត្សរ៍ទី១ប្រើនាមរបស់ព្រះឬទេ? សូមពន្យល់។ (ខ) តើអ្នកមានទស្សនៈយ៉ាងណាចំពោះឯកសិទ្ធិរបស់អ្នកក្នុងការប្រើនាមរបស់ព្រះយេហូវ៉ាក្នុងកិច្ចបម្រើផ្សាយ?
១៣ ជា«រាស្ត្រមួយជាតំណាងនាមរបស់[ព្រះ]» សមាជិកនៃប្រជាជាតិថ្មីនេះបានប្រើនាមរបស់លោក។ ពួកគេប្រាកដជាបានធ្វើដូច្នេះពេលដកស្រង់ពាក្យពីបទគម្ពីរហេប្រឺ។ * ដូច្នេះ ពេលសាវ័កប៉ូលនិយាយទៅកាន់អ្នកស្ដាប់ជនជាតិយូដានិងអ្នកចូលសាសនាយូដានៅបុណ្យថ្ងៃទី៥០ ឆ្នាំ៣៣ គ.ស. គាត់បានប្រើនាមរបស់ព្រះជាច្រើនលើក។ (សកម្ម. ២:១៤, ២០, ២១, ២៥, ៣៤) គ្រិស្តសាសនិកនៅសតវត្សរ៍ទី១លើកតម្កើងនាមរបស់ព្រះ ជាលទ្ធផល លោកបានឲ្យពរដល់ពួកគេចំពោះការប្រឹងប្រែងក្នុងកិច្ចផ្សព្វផ្សាយ។ ដូចគ្នាដែរ សព្វថ្ងៃនេះព្រះយេហូវ៉ាឲ្យពរទៅលើកិច្ចបម្រើរបស់លោក ពេលយើងប្រកាសអំពីនាមរបស់លោក ហើយពេលយើងបង្ហាញនាមនោះចំពោះអ្នកចាប់អារម្មណ៍ នៅក្នុងគម្ពីររបស់ពួកគេបើអាចធ្វើបាន។ ដោយធ្វើដូច្នេះ យើងណែនាំពួកគេឲ្យស្គាល់ព្រះពិត។ នេះគឺពិតជាឯកសិទ្ធិដ៏អស្ចារ្យមែន! សម្រាប់ពួកគេនិងសម្រាប់យើង។ ចំពោះពួកអ្នកដែលស្គាល់ព្រះ នេះអាចជាទីចាប់ផ្ដើមនៃចំណងមិត្តភាពដ៏អស្ចារ្យមួយជាមួយព្រះយេហូវ៉ា ហើយចំណងមិត្តភាពនេះនឹងកាន់តែជិតស្និទ្ធិហើយស្ថិតស្ថេរជារៀងរហូត។
១៤, ១៥. ទោះជាការក្បត់ជំនឿបានរាលដាលក៏ដោយ តើព្រះយេហូវ៉ាបានធ្វើយ៉ាងណាចំពោះនាមរបស់លោក?
១៤ ក្រោយមកការក្បត់ជំនឿបានចាប់ផ្ដើមមានឥទ្ធិពលលើក្រុមជំនុំគ្រិស្តសាសនិកនៅសតវត្សរ៍ទី១ ជាពិសេសក្រោយពេលដែលពួកសាវ័កស្លាប់អស់ទៅ។ (២ថែ. ២:៣-៧) គ្រូក្លែងក្លាយថែមទាំងបានធ្វើតាមទំនៀមទម្លាប់ជនជាតិយូដា ដែលមិនប្រើនាមរបស់ព្រះ។ ប៉ុន្តែ តើព្រះអនុញ្ញាតឲ្យគេលុបនាមរបស់លោកឬទេ? លោកប្រាកដជាមិនឲ្យគេធ្វើដូច្នេះទាល់តែសោះ! ពិតមែនតែសព្វថ្ងៃនេះយើងមិនដឹងរបៀបអាននាមនោះយ៉ាងត្រឹមត្រូវក៏ដោយ ប៉ុន្តែនាមនោះគឺនៅគង់វង្ស។ កាលដែលពេលវេលាកន្លងទៅ នាមរបស់ព្រះមាននៅក្នុងសេចក្ដីបកប្រែផ្សេងៗនៃគម្ពីរ ក៏ដូចជានៅក្នុងសំណេររបស់បណ្ឌិតផ្សេងៗខាងគម្ពីរដែរ។ ជាឧទាហរណ៍ នៅឆ្នាំ១៧៥៧ ឆាល ភីធឺបានសរសេរថា បើប្រៀបធៀបនឹងឋានៈជាច្រើនរបស់លោក «តាមមើលទៅឈ្មោះយេហូវ៉ាបញ្ជាក់ច្បាស់បំផុតអំពីធាតុពិតរបស់លោក»។ ក្នុងសៀវភៅមួយដែលចេញនៅឆ្នាំ១៧៩៧ស្តីអំពីការគោរពប្រណិប័តន៍ព្រះ ហបថឹន ហេណេសបានចាប់ផ្ដើមជំពូកទី៧ថា៖ «យេហូវ៉ាជាឈ្មោះរបស់ព្រះក្នុងចំណោមជនជាតិយូដា ដែលជាព្រះតែមួយគត់ដែលពួកគេបានគោរពប្រណិប័តន៍ ដូចគ្រិស្តនិងសាវ័ករបស់លោកក៏បានគោរពប្រណិប័តន៍ដែរ»។ ហេនរី គ្រូរ (ឆ្នាំ១៧៨១-១៨៦២) មិនត្រឹមតែបានប្រើនាមរបស់ព្រះប៉ុណ្ណោះទេ តែគាត់ក៏ទទួលស្គាល់ថានាមរបស់ព្រះបានត្រូវគេបង្អាប់ ហើយត្រូវតែធ្វើឲ្យនាមនេះបានបរិសុទ្ធ។ ដូចគ្នាដែរ ចច ស្ទ័រ (ឆ្នាំ១៧៩៦-១៨៧៩) ដែលជាមិត្តភក្ដិជិតស្និទ្ធរបស់បងឆាល ថេស រ៉ាសិល បានប្រើនាមរបស់ព្រះដូចបងរ៉ាសិលដែរ។
១៥ ឆ្នាំ១៩៣១ជាឆ្នាំដែលគួរឲ្យកត់សម្គាល់ ដោយសារឆ្នាំនោះនិស្សិតគម្ពីរអន្តរជាតិ ដែលជារាស្ត្រមួយជាតំណាងនាមរបស់ព្រះ បានយកឈ្មោះរបស់ពួកគេតាមបទគម្ពីរ ជាសាក្សីព្រះយេហូវ៉ា។ (អេ. ៤៣:១០-១២) ដូច្នេះពួកគេបានប្រកាសដល់ពិភពលោកថា ពួកគេមានមោទនភាពធ្វើជាអ្នកបម្រើព្រះពិតតែមួយ ហើយមានមោទនភាពធ្វើជា«រាស្ត្រមួយជាតំណាងនាមរបស់លោក» ព្រមទាំងសរសើរតម្កើងនាមនោះ។ (សកម្ម. ១៥:១៤) ព្រឹត្ដិការណ៍ទាំងនេះ ធ្វើឲ្យនឹកឃើញដល់ពាក្យរបស់ព្រះយេហូវ៉ានៅម៉ាឡាគី ១:១១ ដែលចែងថា៖ «ចាប់តាំងពីទិសខាងកើត រហូតដល់ទិសខាងលិច នោះឈ្មោះអញនឹងបានជាធំ នៅកណ្ដាលពួកសាសន៍ដទៃ»។
ចូរប្រព្រឹត្តតាមនាមនៃព្រះយេហូវ៉ា
១៦. ហេតុអ្វីយើងគួរចាត់ទុកការប្រព្រឹត្តតាមនាមរបស់ព្រះយេហូវ៉ាជាកិត្ដិយស?
១៦ អ្នកប្រកាសទំនាយមីកាបានសរសេរថា៖ «ទោះបើអស់ទាំងសាសន៍ប្រព្រឹត្តតាមឈ្មោះរបស់ព្រះនៃគេរៀងខ្លួន គង់តែយើងរាល់គ្នានឹងប្រព្រឹត្តតាមព្រះនាមនៃព្រះយេហូវ៉ា ជាព្រះនៃយើង ជាដរាបរៀងតទៅវិញ»។ (មីកា ៤:៥) ការដែលព្រះយេហូវ៉ាអនុញ្ញាតឲ្យនិស្សិតគម្ពីរប្រើនាមរបស់លោក មិនត្រឹមតែជាកិត្ដិយសដ៏ខ្ពង់ខ្ពស់ប៉ុណ្ណោះទេ តែក៏ជាភ័ស្តុតាងមួយដែលធ្វើឲ្យពួកគេទុកចិត្តថា ពួកគេទទួលការពេញចិត្តពីលោក។ (សូមអាន ម៉ាឡាគី ៣:១៦-១៨) ប៉ុន្តែចុះយ៉ាងណាចំពោះអ្នកផ្ទាល់? តើអ្នកខំប្រឹងអស់ពីសមត្ថភាពដើម្បី«ប្រព្រឹត្តតាមព្រះនាមនៃព្រះយេហូវ៉ា»ឬទេ? តើអ្នកយល់ថានោះជាប់ទាក់ទងនឹងអ្វីទេ?
១៧. តើការប្រព្រឹត្តតាមនាមរបស់ព្រះជាប់ទាក់ទងនឹងអ្វីខ្លះ?
១៧ ការប្រព្រឹត្តតាមនាមរបស់ព្រះ ជាប់ទាក់ទងយ៉ាងហោចណាស់នឹងអ្វីបីយ៉ាង។ ទី១ យើងត្រូវប្រកាសនាមនោះដល់អ្នកឯទៀត ដោយទទួលស្គាល់ថា មានតែពួកអ្នកដែល«ហៅរកនាមព្រះយេហូវ៉ានឹងត្រូវសង្គ្រោះ»។ (រ៉ូម ១០:១៣) ទី២ យើងត្រូវបង្ហាញឲ្យឃើញនូវគុណសម្បត្ដិរបស់ព្រះយេហូវ៉ា ជាពិសេសសេចក្ដីស្រឡាញ់។ ទី៣ យើងត្រូវគោរពច្បាប់របស់ព្រះដោយស្ម័គ្រចិត្ត ហើយតាមរបៀបនោះយើងលើកតម្កើងនាមរបស់បិតាយើង។ (១យ៉ូន. ៤:៨; ៥:៣) តើអ្នកតាំងចិត្ត«ប្រព្រឹត្តតាមព្រះនាមនៃព្រះយេហូវ៉ា ជាព្រះនៃយើង ជាដរាបរៀងតទៅ»ឬទេ?
១៨. ហេតុអ្វីអស់អ្នកដែលលើកតម្កើងនាមដ៏ឧត្តមរបស់ព្រះអាចទន្ទឹងរង់ចាំអនាគតដោយមានទំនុកចិត្ត?
១៨ មិនយូរទៀតអស់អ្នកដែលមិនអើពើឬប្រឆាំងព្រះយេហូវ៉ានឹងត្រូវបង្ខំឲ្យទទួលស្គាល់លោក។ (អេស. ៣៨:២៣) នោះរួមបញ្ចូលបុគ្គលដែលដូចផារ៉ូ ដែលនិយាយថា៖ «តើព្រះយេហូវ៉ាជាអ្នកណាដែលអញត្រូវស្ដាប់តាមទ្រង់?»។ ផារ៉ូបានត្រូវបង្ខំឲ្យទទួលស្គាល់ថា ព្រះយេហូវ៉ាខ្លាំងក្លាយ៉ាងណា។ (និក្ខ. ៥:១, ២; ៩:១៦; ១២:២៩) ប៉ុន្តែយើងបានស្គាល់ព្រះយេហូវ៉ាដោយស្ម័គ្រចិត្ត។ យើងមានមោទនភាពធ្វើជារាស្ត្រដែលស្ដាប់បង្គាប់លោក ហើយបានត្រូវហៅដោយនាមរបស់លោក។ ដូច្នេះ យើងទន្ទឹងរង់ចាំអនាគតដោយមានទំនុកចិត្តទៅលើសេចក្ដីសន្យារបស់លោកដែលបានកត់ទុកនៅទំនុកតម្កើង ៩:១០ដែលចែងថា៖ «អស់អ្នកដែលស្គាល់ព្រះនាមទ្រង់ គេនឹងទុកចិត្តដល់ទ្រង់ ដ្បិត ឱព្រះយេហូវ៉ាអើយ ទ្រង់មិនបានបោះបង់ចោលពួកអ្នកដែលស្វែងរកទ្រង់ឡើយ»។
[កំណត់សម្គាល់]
^ វគ្គ 5 នាមរបស់ព្រះគឺមកពីពាក្យហេប្រឺដែលមានន័យថា «ក្លាយជា»។ ដូច្នេះពាក្យ«យេហូវ៉ា»មានន័យថា «លោកដែលធ្វើឲ្យក្លាយជា»។
^ វគ្គ 13 នាមរបស់ព្រះយេហូវ៉ាមានក្នុងឯកសារភាសាហេប្រឺដែលគ្រិស្តសាសនិកនៅសតវត្សរ៍ទី១ប្រើ។ នាមរបស់ព្រះយេហូវ៉ាក៏ទំនងជាមានក្នុងឯកសារគម្ពីរសេបធួជីន ដែលជាសេចក្ដីបកប្រែនៃបទគម្ពីរភាសាហេប្រឺជាភាសាក្រិចដែរ។
[សំណួរសម្រាប់វគ្គនីមួយៗ]
[រូបភាពនៅទំព័រ២៤]
[រូបភាពនៅទំព័រ២៥]
ម៉ូសេស្គាល់អត្ថន័យនៃនាមរបស់ព្រះ ហើយនោះបានពង្រឹងជំនឿរបស់គាត់
[រូបភាពនៅទំព័រ២៦]
ផារ៉ូបានបដិសេធមិនទទួលស្គាល់ព្រះយេហូវ៉ាជាព្រះ
លោកអ្នកក៏ប្រហែលជាចូលចិត្តដែរ
រាជាណាចក្ររបស់ព្រះចាប់ផ្ដើមគ្រប់គ្រងហើយ!
ព្រះយេហូវ៉ាលើកតម្កើងនាមរបស់លោក
ស្តីអំពីនាមរបស់ព្រះ តើរាជាណាចក្ររបស់លោកបានសម្រេចអ្វីខ្លះ? តើអ្នកអាចចូលរួមធ្វើឲ្យនាមរបស់ព្រះបានបរិសុទ្ធយ៉ាងដូចម្ដេច?
