1, 2. Jméni xi tsín mangóson josʼin nikjaʼaitsjeen ñá xi tʼatsʼe jaʼaínle Niná kʼoa josʼin síkjaʼaitsjen je relijión xi ngikʼa.

ME NGATSʼI relijión xi tjín, xi chjotale Cristo tsole yaole, likui titjíosíchjénni jaʼaínle Niná. Tobʼelañá, jngo Biblia kijna xi i̱ tso jña fitsʼiani: “Tsa jngo jaʼaín kʼoailee Niná, xi tojngo mani, [...] nʼio chʼaosʼin tíjna xi kao kjoamakjain xi tjínle ngatsʼi xi chjotale Cristo ma jngo tjíjtsa Sonʼnde” (Revised Standard Version).

² Tonga ñá xi testigole Jeobá maa nʼio tsjoa tjínná nga jaʼaínle Niná kichʼá kʼoa nga chʼasjengʼaa (tʼexkiai Salmo 86:12 kao Isaías 43:10). Kʼoa xi ijngosani, nʼio tse kjoanda tíbʼainá nga ʼyaa josʼin tsoyanile jaʼaínle Jeobá kʼoa nga sʼe̱ndajin je énndiso xi kisʼene ánni nga kuitjotsjesíni jaʼaínle (Mat. 6:9, TNM). Tonga alikui koa̱n nga tokʼoéjngoaa tokoán nga jeʼyaa jebi. Janla koya kataʼyaa xi nʼio koasenkaoná: Xi títjon, jmé xi kitjenkao nga ʼyaa je jaʼaínle Niná. Xi majaoni, jósʼin tíbakó Jeobá jme xi tsoyanile jaʼaínle. Kʼoa xi majanni, jósʼin tsoyanile nga jaʼaínle Jeobá kuitsomakoaa.

3. Jmé xi kitjenkao nga ʼyaa je jaʼaínle Niná.

³ Kʼianga ʼyaa je jaʼaínle Niná ali tsa toyajin tje̱n tíjna nga Jeobá kuixoán. Machjénní nga kataʼyaa ʼyáni je Jeobá, jókjoan, jmé xi tjínndajinle kʼoa jósʼín, tobʼelañá, jósʼin bekon choʼndale. Je Jeobá choa choa tíbʼéjnatsen jebi tojosʼin nga tíbitjoson jme xi tjínndajinle (Prov. 4:18). Je Jeobá kitsoyale je Adán kao Eva joʼmi. Kʼoa je Eva saʼnda kisikʼaxki je jaʼaínle Niná kʼianga kitsin je Caín (Gén. 4:1). Kʼoa je Noé, Abrahán, Isaac kao Jacob kʼoati tsabe joʼmi Niná, kʼoa ngisa tinda tsabengáni jokjoan je Jeobá kʼianga kisichikontʼain, kʼianga kisikuinda kʼoa kʼianga sa tse sa tse tsakʼéjnatsenle jme xi tjínndajinle. Kʼoa nga koanskanni, nʼio chjíle jme xi tsakakóyale je Moisés xi tʼatsʼe jaʼaínle.

4. Ánni nga kui kiskonangisíni je Moisés joʼmi je Niná, kʼoa ánni nga tje̱nsíni ndiaale jme xi kiskonangi.

⁴ Tʼexkiai Éxodo 3:10-15. Kʼianga ñokan nóle  je Moisés i kitsole Niná: “Chʼa̱sjai ya Egipto je naxinandána, je xtile Israel”. Kʼoa je Moisés nʼio chjíle xi kiskonangile Niná, kui kiskonangile jóʼmi. Tonga ánni nga kui kiskonangisíni je Moisés nga̱ tokʼoa jekjoatse ʼyale je jaʼaínle Niná nga kui nichxin. Je Moisés kui xi koanmele skoe̱sa ʼyáni je Jeobá, ánni nga koa̱n kʼoakuitsonile je chjota israelita nga kʼoasjentjai kjoaixi je Niná. Jmeni xi kiskonangi je Moisés tjeen ndiaale, nga̱ je chjota israelita jekjoatse nga choʼnda sʼin tjío ya Egipto, kʼoa tsakui nichxin to jao sa̱tío kon tsa koa̱nle kʼoasjentjai kjoaixi je Jeobá. Saʼnda tjíokʼa xi jekui tsakʼétsʼoale je niná xi bexkón je chjota egipcio nga kui nichxin (Ezeq. 20:7, 8).

5. Jósʼin ngisa nda tsakʼéjnatsen josʼin tsoyanile je jaʼaínle Jeobá jmeni xi kitsole je Moisés.

⁵ Kʼoa jókitso je Jeobá tʼatsʼe xi kiskonangi je Moisés. I kitso: “Kui jebi xi kʼuínlai je xtile Israel: AN KOA̱N kasíkasénna. [...] Je Jeobá je Ninále chjotajchíngano [...] kʼoasʼin kasíkasénna”. Je én jebi kui xi tsonile nga je Jeobá, koaanle nga kui koa̱n tojmeni xi mele kʼianga sitjoson jme xi tjínndajinle. Kui xi tsonile nga sitjoson ngantsjai én xi nchja̱. Ya Éxodo 3:15 i kitso je Jeobá: “Kui jebi jaʼaínna tokʼia saʼndani, kʼoa kui koa̱n ngantsjai nichxin”. Nʼiojin koantajasa je kjoamakjainle Moisés kʼoa ngisajin nʼio kitsokjonkesa je Niná kʼianga tsabe xi tʼatsʼe jebi.

6, 7. Jósʼin tsakakó Jeobá jme xi tsoyanile je jaʼaínle.

⁶ Tosʼa choatse jaʼato nga kitsjoale xá je Moisés kʼianga tsakakó Jeobá jme xi tsoyanile jaʼaínle kʼianga tsakʼasjentjai je naxinandá Israel. Te kjoañʼai kisikasénne je naxinandá Egipto, kʼoa yaa tsaʼyanile nga tsínni jme nganʼio tjínle je faraón kao ninále je chjota egipcio (Éx. 12:12). Xijekoan, kisijaoya je ndáchikon xi Ní ʼmi nga koan jaʼatojin je chjota israelita kʼoa yaa kisikʼienjin je faraón kao chjota kjoajchánle (Sal. 136:13-15). Je Jeobá koanle kisikatíokon je chjota israelita “ya ʼndekixí xi nʼio tse kijna, jña nʼio xkón chon”, kitsjoale je tsojmi xi kiskine kao nandá xi tsakʼi ninga nkjín miyón mani. Kʼoa jokji tse tsakʼetsoma ya ʼndekixí alikui kixijnda je najñole kʼoa kao jténʼóle (Deut. 1:19; 29:5). Jebi kui xi bakóná nga lijme xi kʼoechjoale Jeobá nga kʼoasʼin jmeni xi tso. Je Jeobá i kitsole je profeta Isaías: “An... anña Jeobá, kʼoa tsínsa xi kjaʼaí xi male bʼasjentjai” (Is. 43:11).

⁷ Kʼoa je Josué xi tsakʼejnayangajaole Moisés nga koanskanni kʼoati tsabe josʼin tsakakó nganʼiole Jeobá ya Egipto  kao ya ʼndekixí. Kuinga koan i̱ kitsosínile je chjota israelita kʼianga tojeme kuiyá: “Jon nanda ʼyao kao ngayeje ni̱ma̱no kʼoa kao ngayeje kjoabijnachonno nga nijngojin énnda xi kinchja̱ je Jeobá Nináno xi tsín kitjoson. Ñaki kitjoson ngayeje xi totʼatsaon. Nijngojin én jebi xi tsín kitjoson” (Jos. 23:14). Je Jeobá ñaki kʼoasʼin kisitjoson jmeni xi kitso.

8. Jósʼin tíbakó Jeobá ndʼaibi jme xi tsoyanile je jaʼaínle.

⁸ Nichxin xi tiyoaa ndʼaibi, je Jeobá kʼoatísʼín josʼin tsoyanile jaʼaínle. Tobʼelañá, kisichjén je ʼNdíle nga kʼoakitso nga je nichxin xi kjoetʼa kʼuínyason je énnda chjotse “ngakijnda sonʼnde” (Mat. 24:14). A tsí kjoaixi nga toje Jeobá xi koa̱nle tongini kʼoakuitso jmeni xi koa̱n kʼoa nga je sichjén je xi “toxkia ʼndíchjota [...] xi tsín tsa tse kiskotʼaya” nga kʼoasʼin kuitjoson én jebi (Hech. 4:13). Kʼianga ʼmiyasoán kʼoasʼin tibʼainganʼioá nga katabitjoson je én xi tongini kitso Jeobá. Xi ijngosani, chʼasjengʼañá kʼoa bakoñá nga ñaki kʼoatjín tokoán kʼianga i̱ bixoán nga bʼetsʼoaa: “Kataʼyaxkón jaʼaínli. Katjinroa kjoatéxomali. Kʼoakatasʼín josʼin nga meli, joni ya ngʼajmi kʼoatisʼin i̱ sonʼnde” (Mat. 6:9, 10).

9, 10. Jmésa xi bakóyaná xi tʼatsʼe Jeobá josʼin tsakʼejnakao je naxinandá Israel.

⁹ Kʼianga jekitjo ya Egipto je chjota israelita, je Jeobá ijngosa koya tsakʼéjnatsenle xi tʼatsʼe. Kʼianga kitsjoale kjoatéxoma kʼoakitsole nga kʼoasʼin sikuinda josʼin síkuinda jngo xʼin je chjoónle (Jer. 3:14). Kʼoa je chjota israelita jngoyale chjoón sʼin tsakʼejna xi kao Jeobá kʼoa jaʼaínle kisikʼa (Is. 54:5, 6). Je Jeobá kisichikontʼain je naxinandále kʼianga kisitjoson je kjoatéxomale, kisikuinda kʼoa nyʼán sʼin kisikatío (Núm. 6:22-27). Kʼoa nga kʼoakoan, je naxinandá xi ngikʼa tsabe nga tsínsa ijngo Niná xi mangóson kao je Jeobá (tʼexkiai Deuteronomio 4:5-8 kao Salmo 86:7-10). Kʼoa jokjitse nga naxinandále Niná koan je chjota israelita, nkjín koanni chjota xi xin tsʼe xi kʼoati Jeobá tsakʼétsʼoale. Chjota jebi kʼoati kitso joná kitsole Rut je Noemí: “Je naxinandáli, naxinandána koa̱n, kʼoa je Nináli, Ninána koa̱n” (Rut 1:16).

¹⁰ Jokji tse jaʼato xi jngo jmi basen nó nga tsʼe koan Jeobá je naxinandá Israel nʼio tse xi tsakakó jokjoan je Jeobá. Ninga nʼio xíjin koan naxinandále kjitʼa tsakakó nga “tjínle kjoamatokon”, nga nʼio tsejta kʼoa nga “likui tokjoan síjtile yaole” (Éx. 34:5-7). Tonga je chjota israelita nʼio kisikʼatonele jokisʼin nga tsakʼasjengi je Jesús kʼoa nga kisikʼien. Tonga chan likui tikiskanile Niná (Mat. 23:37, 38). Je chjota israelita alikui tijaʼaínle  Niná tsakʼani. Jngoyale kʼien ngixko̱n Jeobá, joni tsa jngo yá xi kixí (Luc. 23:31). Jósʼin tsabekon je jaʼaínle Niná xijekoanni.

11. Ánni nga chan tsín tikisichjénsíni jaʼaínle Niná je chjota israelita.

¹¹ Jokji nga ki nichxin, je chjota judío nʼio nkjín koya jmeni xi kitso. Tobʼelañá, kʼoakitso nga xkónni nga jaʼaínle Niná kʼoaxki̱ (Éx. 20:7). Tobijbi chan tsín tikisichjénni jaʼaínle Niná. Nʼiojin aon koanle Jeobá nga tsín titsabexkónni jaʼaínle je naxinandále (Sal. 78:40, 41). Mani nga “je Jeobá, xi Chi̱ni̱ ʼmile” nʼio bechjí jaʼaínle. Jmé xi kisʼin nga kʼoasʼin tsakʼasjengi jaʼaínle je chjota israelita. Tsakjaʼáxinle kjoandale kʼoa alikui tijaʼaínle kisikʼani (Éx. 34:14). Jebi kui xi bakóyaná nga nʼio chjíle nga jchaxkoán je jaʼaínle Niná.

12. Kʼiáni tsakʼétsʼiakao Jeobá nga kiskoejin je naxinandá chjotse xi jaʼaínle kisikʼa.

¹² Je Jeobá jé Jeremías kisichjén nga tsakʼéjnatsen nga “jngo kjoasʼendajin chjotse” kʼoendajin kao jngo naxinandá chjotse. Je Jeremías kʼoakitso nga je chjota xi koatiojin naxinandá jebi skoee xi tʼatsʼe Jeobá “xi ʼndí saʼnda xi jekoanjchínga” (Jer. 31:31, 33, 34). Je én jebi kʼiaa kitsʼiani nga kitjoson kʼianga nó 33 nga kisʼejna sʼuí Pentecostés. Kʼiaa tsakʼéndajin Niná je kjoasʼendajin chjotse kao je naxinandá chjotse xi “Israel xi tsʼe Niná” ʼmi. Naxinandá jebi jaʼaínle Niná tsakʼa, kʼoa tjíojin chjota xi judío kao xi tsín judío. Je Niná i kitso xi tʼatsʼe naxinandá jebi: “Yʼa jaʼaínna” (Gál. 6:16; tʼexkiai Hechos 15:14-17; Mat. 21:43).

13. 1) Jósʼin ʼyañá nga kisichjén je jaʼaínle Niná je chjotale Cristo xi títjon tsakatio. 2) Jókji ʼyachjí ji nga nokjoani je jaʼaínle Jeobá kʼianga ʼmiyasuin.

¹³ Je naxinandá chjotse jebi nʼio kisichjén je jaʼaínle Jeobá. Tobʼelañá, kisichjénní kʼianga kitsoya je énle Niná xi Escrituras Hebreas ʼmi. * Kuilakji je pastro Pedro, kʼianga kisʼejna je sʼuí Pentecostés nga nó 33 nkjín kʼa kisichjén je jaʼaínle Niná kʼianga tsakjákao je chjota judío kʼoa kao chjota xi xin naxinandá jaʼaini (Hech. 2:14, 20, 21, 25, 34, TNM). Tojosísʼin tiʼyaa, je chjotale Cristo xi títjon tsakatio tsabexkón je jaʼaínle Jeobá, kʼoa kuinga kisichikontʼainni kʼianga kitsoyason. Nichxin xi tiyoaa ndʼaibi, je Jeobá kʼoati síchikontʼainná kʼianga nokjoañá xi tʼatsʼe jaʼaínle nga ʼmiyasoán kʼoa nga bakolee je chjota xi nrʼoéná joʼmi, kʼoa ngisa nga yakjoan Bibliale bakonilee. Kʼianga kʼoanʼia joxi tibʼejnatsenlee je chjota ʼyáni je Jeobá. Jmé sikjitse kjoanda tíbʼaininá nga tiʼmiyalee chjota joʼmi Niná. Tsakui nichxin ya kjuinroani nga sa nda sa nda koatio ngixko̱n Jeobá kʼoa tosi tonda kʼoasʼin tokʼia saʼndani.

14, 15. Ningalani kʼoasʼin tsangabason je kjoandiso xi kitsoya je xi yátsʼi̱n tsakinyále Niná, jméni xi tísʼín Jeobá nga tsín katachangi je jaʼaínle.

¹⁴ Tonga tjíokʼa je chjotale Cristo xi yátsʼi̱n tsakinyále Niná kʼoa xi kjoandiso kitsoya kʼianga jekʼien ngatsʼi je pastrole Jesús (2 Tes. 2:3-7). Tjíokʼa xi ya kiskenngile kostumbrele je chjota judío nga tsín tikisichjénni je jaʼaínle Niná. A kitsjoaʼnde Jeobá nga kichangi je jaʼaínle, nga̱ kʼoanákitso nga kʼoakʼuín tokʼia saʼndani. Mai. Ningalani tsín ʼyaa jókjoansʼin kinokjoa je jaʼaínle Niná nichxin kjoatse, tonga tojo tíjna je jaʼaínle saʼnda ndʼaibi. Jokji nga tínroa nichxin nkjín Biblia tíbitjo jña tísʼetʼa je jaʼaínle Niná kʼoa kʼoati tjíobatio kʼa chjota xi nʼio nda  tjíokotʼayason Biblia xi tjíobʼétʼa je jaʼaínle Jeobá je xo̱n xi tjíobʼasje. Tobʼelañá, kʼianga nó 1757 je xi Charles Peters tsakʼin jngo xo̱n tsakʼasje xi kʼoakitso nga je én xi Jeobá tso ngisa nda bʼéjnatsen jokjoan Niná tikʼoajinni je én xi machjénsa josʼin nga ʼmile Niná. Kʼoa je chjota xi Hopton Haynes tsakʼin jngo libro tsakʼasje kʼianga nó 1797 xi kui kinchja̱ni josʼin ʼyaxkón Niná. Ya kapítulo 7 xi tsʼe libro jebi itso én xi tsakʼétsʼiakaoni: “JEOBÁ, kui jaʼaín xi tsjoále Niná je chjota judío, kʼoa toje chjota judío xi tsakʼétsʼoale, kʼoa kʼoati kisʼin je Cristo kʼoa kao Pastrole”. Kʼoa je xi Henry Grew tsakʼin (1781-1862) kʼoati kisichjén je jaʼaínle Niná, kʼoa tsabení nga tsín xkón tíʼya jaʼaín jebi kʼoa nga tjínnele kuitjotsje. Kʼoa je xi George Storrs tsakʼin (1796-1879) xi ya kitsjoanganʼiole je Charles T. Russell, kʼoati kisichjén je jaʼaínle Niná tojo kisʼin je Russell.

¹⁵ Kʼoa nga kicho nó 1931 nʼio chjíle jmeni xi koan. Je ndsʼee xi ya tjíojin naxinandále Niná nga kui nichxin Chjota xi kotʼaya Biblia sʼin ʼyale. Tonga nó jebi kʼiaa kisikʼantjaiya jaʼaínle nga testigole Jeobá tsakʼin (Is. 43:10-12). Kʼoasʼin tsakakóni nga nʼio tsjoa tjíole nga tjíosíxále je Niná Jeobá, nga jaʼaínle yʼa kʼoa nga kʼoasjengʼa jaʼaínle (Hech. 15:14). Jmeni xi koan nga nó 1931 kui síkjaʼaitsjenjinná je én xi kinchja̱ Jeobá xi tjítʼa ya Malaquías 1:11, jñani i̱ tso: “Je jaʼaínna nʼio jeya kʼoéjna yajinle naxinandáyʼai josaʼnda nga kuitjo je tsʼuí kʼoa saʼnda nga ska̱ntjai”.

16. Ánni nga nʼio tse kjoanda tje̱nkaosíni nga jaʼaínle Jeobá bitsomakoaa.

¹⁶ Je profeta Miqueas i kitso: “Ngatsʼi naxinandá yaa kʼoétsomakao nga jngó jngó je jaʼaínle ninále; tonga ñá yaa kuitsomakoaa je jaʼaínle Jeobá je Nináná tokʼia saʼndani, ngantsjai nichxin” (Miq. 4:5). Je Chjota xi kotʼaya Biblia nʼio tsjoa kisatiole nga kʼoasʼin kitsjoaʼndele Jeobá nga jaʼaínle tsakʼa kʼoa jebi kui xi tsakakóle nga nda tsakatio ngixko̱n Jeobá (tʼexkiai Malaquías 3:16-18). Kʼoa ji, jókji ʼyachjí nga jaʼaínle Jeobá kichʼai. A bʼenelai yaoli nga bitomjekoai je jaʼaínle Jeobá. A majinli jósʼin tsoyanile nga jaʼaínle Jeobá bitsomakoaa.

17. Jósʼin tsoyanile nga jaʼaínle Jeobá bitsomakoaa.

¹⁷ Nga jaʼaínle Niná bitsomakoaa, xi tonikʼaxkila jan koya tjínni josʼin tsoyanile. Xi títjon, tjínnele kuinókjoañá jaʼaínle nga̱ ʼyañá nga je “xi sikʼaxki̱ je jaʼaínle Jeobá, kuitjontjainí” (Rom. 10:13, TNM). Xi majaoni, tjínnele nga chjénngilee jokjoan Niná, kʼoa xi ngisa tjínnele nga koakoá kui kjoatsjoacha (1 Juan 4:8). Kʼoa xi majanni, tjínnele nga kao kjoatsjoa si̱tjosoán kjoatéxomale ánni nga tsín chʼaosʼin si̱kʼéjnasíñá je jaʼaínle (1 Juan 5:3). A tijnandaní nga tosi tonda ya kuitómjekoai “je jaʼaínle Jeobá [...] tokʼia saʼndani”.

18. Ñá xi ʼyaxkoán je jaʼaínle Jeobá, ánni nga tsín kuijkónsínilee jme xi sʼa koa̱n nichxin xi nroaján.

¹⁸ Ngatsʼi chjota xi tsín bexkón Jeobá jeme skoe̱ ʼyáni je Jeobá kʼianga ni̱kjeson (Ezeq. 38:23). Je chjota jebi yaa mangóson je faraón nga i̱ná kitso: “ʼYáni xi Jeobá ʼmi nga sitjosonsíña jotítso”. Je faraón kjoanʼio tsabe ʼyani je Jeobá ninga tsín mele tsakai (Éx. 5:1, 2; 9:16; 12:29). Tonga ñá nʼio tsjoa tjío tokoán nga jaʼaínle kichʼá kʼoa nga ya tiyojiaan je naxinandá xi yʼa jaʼaínle, nga̱ kʼoasʼin koanmená kʼianga tsaʼyaa xi tʼatsʼe. Alijme xi nokjonlee jme xi sʼa koa̱n nichxin xi nroaján, nga̱ ʼyañá nga kuitjoson je én jebi: “Je xi be jaʼaínli sinʼiotʼali, nga̱ likui kuinjiótokuin je xi básjaili, ji Jeobá” (Sal. 9:10).