1, 2. Dihlatse tša Jehofa di lebelela leina la Modimo bjang ka go se swane le dikereke tša Bojakane?

KA KAKARETŠO, dikereke tša bojakane di phema go diriša leina la Modimo. Ka mohlala, mantšu a ketapele ya Beibele ya Revised Standard Version a re: “Go dirišwa ga leinaina le ge e le lefe go Modimo a nnoši . . . ke mo go se gwa swanelago e le ka kgonthe tumelo ya legohle ya Kereke ya Bokriste.”

² Ka lehlakoreng le lengwe, Dihlatse tša Jehofa di ikgantšha ka gore di bitšwa ka leina la Modimo e bile di a le tagafatša. (Bala Psalme 86:12; Jesaya 43:10.) Go feta moo, re bona se e le tokelo go kwešiša seo leina le le se bolelago le kgang ya bogoši yeo e akaretšago go kgethagatšwa ga lona. (Mat. 6:9) Lega go le bjalo, ye ke tokelo yeo le ka mohla re sa swanelago go e tšea gabohwefo. Ka gona, anke re hlahlobeng dipotšišo tše tharo tše bohlokwa: Go bolela eng go tseba leina la Modimo? Jehofa o ile a phelela leina la gagwe le legolo bjang, ka go re’alo a oketša letago la lona? Le gona, re ka sepela bjang ka leina la Jehofa?

3. Go tseba leina la Modimo go bolela’ng?

³ Go tseba leina la Modimo go akaretša se se fetago go fo tlwaelana le lentšu “Jehofa.” Go akaretša go tseba botumo bja Jehofa, dika tša gagwe, morero wa gagwe gotee le mediro ya gagwe yeo go bolelwago ka yona ka Beibeleng, e bjalo ka ditirišano tša gagwe le bahlanka ba gagwe. Go ba gona, Jehofa o re nea temogo e tšwelago pele yeo e sepedišanago le go phethagatšwa ga morero wa gagwe. (Die. 4:18) Jehofa o utolotše leina la gagwe go banyalani ba pele; ka go re’alo Efa o ile a le diriša ka morago ga go belega Kaine. (Gen. 4:1) Bapatriareka ba botegago e lego Noa, Aborahama, Isaka le Jakobo le bona ba be ba tseba leina la Modimo. Go oketša moo, go tšeela godimo ga bona leina leo go ile gwa oketšega ge Jehofa a be a ba šegofatša, a ba hlokomela le go ba utollela dibopego tša morero wa gagwe. Moshe o ile a newa temogo e kgethegilego ya go tseba seo se bolelwago ke leina la Modimo.

4. Ke ka baka la’ng Moshe a ile a botšiša Modimo mabapi le seo se bolelwago ke leina la gagwe, gona ke ka baka la’ng seo Moshe a bego a tshwenyegile ka sona se be se kwagala?

 ⁴ Bala Ekisodo 3:10-15. Ge Moshe a be a na le nywaga e 80, Modimo o ile a mo nea taelo e matla, a re: “O ntšhe batho ba ka e lego bana ba Isiraele kua Egipita.” Moshe o ile a arabela ka go botšiša potšišo e bohlokwa kudu. Ge e le gabotse, Moshe o ile a botšiša gore: ‘Leina la gago o mang?’ Ka ge e be e le kgale leina la Modimo le tsebja, ke ka baka la’ng Moshe a ile a botšiša potšišo yeo? Go molaleng gore o be a nyaka go tseba ka mo go oketšegilego ka motho yo a bego a emelwa ke leina leo, e lego ditherešo tšeo di bego di tla kgodiša batho ba Modimo gore O be a tla ba hlakodiša. Go tshwenyega ga Moshe go be go kwagala ka ge Baisiraele e bile makgoba ka nako e telele. Go ka direga gore ba ile ba ipotšiša ge e ba Modimo wa borakgolokhukhu ba bona a be a ka ba phološa. Ruri go bjalo, ka gobane Baisiraele ba bangwe ba be ba rapela medimo ya Baegipita!—Hesek. 20:7, 8.

5. Ge Jehofa a be a araba Moshe o ile a hlabiša seetša se oketšegilego bjang mabapi le seo se bolelwago ke leina la gagwe?

⁵ Jehofa o ile a araba potšišo ya Moshe bjang? Ka boripana, o itše: “Se ke seo o tlago go se botša bana ba Isiraele wa re: ‘Mo go lena ke romilwe ke: KE TLA BA SEO KE NYAKAGO GO BA SONA.’” * Ke moka o ile a oketša ka gore: “Jehofa Modimo wa borakgolokhukhu ba lena . . . o nthomile go lena.” Modimo o utolotše gore o tla ba selo le ge e le sefe seo a nyakago go ba sona gore a phethagatše morero wa gagwe, e bile o tla dula a phetha seo a se boletšego. Ka gona, go temana 15 re bala gore Jehofa ka boyena o itše: “Le ke lona leina la ka go iša mehleng ya neng le neng, ke lona leo ke tlago go gopolwa ka lona go iša melokong le melokong.” Ruri seo se swanetše go ba se ile sa matlafatša tumelo ya Moshe gomme sa mo dira gore a boife Modimo!

6, 7. Jehofa o ile a phelela bjang ka botlalo leina la gagwe le legolo?

⁶ Nakwana ka morago ga gore a rome Moshe, Jehofa o ile a phelela leina la gagwe ka botlalo ka gore a be seo a ‘nyakago go ba sona’ ka go ba Mohlakodiši wa Isiraele. O ile a kokobetša Baegipita ka dikotlo tše lesome tše šoro, ka nako e swanago o ile a pepentšha gore medimo ya Egipita ga e na matla, go akaretša le Farao. (Ek. 12:12) Ke moka Jehofa o ile a bula Lewatle le Lehwibidu, a dira gore Baisiraele ba phatše go lona, gomme Farao le madira a gagwe ba kgangwa ke meetse. (Ps. 136:13-15) Ge ba le “lešokeng leo ka moka le legolo le leo le boifišago,” Jehofa o ile a ba Mophološi wa bophelo ge a nea setšhaba sa gagwe dijo le meetse, seo go ka diregago gore ka nako yeo se be se bopša ke batho ba dimilione tše pedi go ya  go tše tharo goba go feta moo! O ile a ba a dira gore diaparo tša bona le diramphašane tša bona di se onale. (Doit. 1:19; 29:5) Ee, ga go selo le setee seo se ka thibelago Jehofa go dira seo a nyakago go se dira mabapi le leina la gagwe leo le ka se bapišwego le selo. Ka moragonyana o boditše Jesaya gore: “Nna, ke nna Jehofa gomme ga go mophološi ka ntle le nna.”—Jes. 43:11.

⁷ Mohlatlami wa Moshe e lego Joshua, le yena o ile a bona ditiro tše di boifišago tša Jehofa kua Egipita le lešokeng. Ka gona, ge Joshua a be a le kgauswi le go hwa, o ile a bolela ka kgodišego le Baisiraelegotee le yena gore: “Le tseba gabotse ka dipelo tša lena ka moka le ka meoya ya lena ka moka gore ga go le lentšu letee mantšung ka moka a mabotse ao Jehofa Modimo wa lena a le boditšego ona leo le sa kago la phethega. Ka moka a ile a phethega go lena. Ga go lentšu leo le sa kago la phethega.” (Josh. 23:14) Ee, ga go pelaelo gore Jehofa o ile a phethagatša lentšu la gagwe—o ile a ba ‘seo a nyakago go ba sona.’

8. Jehofa o phelela bjang leina la gagwe mehleng ya rena?

⁸ Ka mo go swanago lehono, Jehofa o ba seo a ‘nyakago go ba sona.’ O ile a diriša Morwa wa gagwe go bolela e sa le pele gore mehleng ya bofelo molaetša wa Mmušo o be o tla bolelwa “lefaseng ka moka.” (Mat. 24:14) Eupša ke mang ntle le Modimo Ramatlaohle yo a bego a ka bolela e sa le pele ka modiro o bjalo, a kgonthišetša gore o a dirwa gomme a diriša ‘batho ba bantši ba sa rutegago le ba tlwaelegilego’ gore a phethe modiro woo? (Dit. 4:13) Ka gona, ge re tšea karolo modirong wo, ge e le gabotse re kgatha tema go phethagatšweng ga boporofeta bja Beibele. Re godiša Tatago rena le go bontšha gore re tloga re tiišitše ge re rapela gore: “Leina la gago a le kgethagatšwe. Mmušo wa gago a o tle. Thato ya gago a e direge le mo lefaseng bjalo ka ge e direga legodimong.”—Mat. 6:9, 10.

9, 10. Re ithuta eng mabapi le leina la Jehofa tseleng yeo a ilego a dirišana le Baisiraele ka yona, gomme se se bile le mafelelo afe?

⁹ Gateetee ka morago ga gore Baisiraele ba huduge Egipita, Jehofa o ile a itsebatša go batho ba gagwe ka tsela e mpsha. Ka kgwerano ya Molao, o ile a fetoga ‘monna wa bona,’ a ithaopela go rwala boikarabelo ka moka bjo bo tswalanago le yona. (Jer. 3:14) Ka baka leo, Baisiraele ba ile ba ba mosadi wa gagwe wa seswantšhetšo, batho bao ba bitšwago ka leina la gagwe. (Jes. 54:5, 6) Ge ba be ba ikokobeletša yena ka go rata gomme ba boloka melao ya gagwe, o be a eba bjalo ka ‘Monna’ yo a phethagetšego. O be a ba šegofatša, a ba lota gomme a ba nea khutšo. (Num. 6:22-27) Ka go re’alo leina le legolo la Jehofa le be le tla tagafatšwa ditšhabeng ka moka. (Bala Doiteronomio 4:5-8; Psalme 86:7-10.) Ruri go bile bjalo historing ya Isiraele, ka gobane bašele ba bantši ba ile ba kgetha borapedi bja therešo. Ge e le gabotse, ba boletše seo se ilego sa bolelwa ke mosadi wa Moaba e lego Ruthe ge a botša  Naomi gore: “Batho ba geno e tla ba ba gešo, gomme Modimo wa gago ya ba Modimo wa ka.”—Ruthe 1:16.

¹⁰ Ka nywaga e ka bago e 1 500, ditirišano tša Jehofa le Baisiraele di utolotše dibopego tše dintši tše mpsha ka semelo sa gagwe. Go sa šetšwe bonganga bja setšhaba seo, ka makga a mantši Jehofa o ile a ba “Modimo yo a gaugelago” le “yo a diegago go galefa.” E be e le Modimo wa go se fele pelo e bile a na le kgotlelelo. (Ek. 34:5-7) Lega go le bjalo, go se fele pelo ga Jehofa go be go fihla bokgoleng bjo itšego, gomme seo se ile sa bonagala ge setšhaba sa Bajuda se be se latola le go bolaya Morwa wa gagwe. (Mat. 23:37, 38) Ditlogolwana tša Baisiraele di ile tša kgaotša go ba batho bao ba bitšwago ka leina la Modimo. Ka kakaretšo, di ile tša hwa ka kgopolo ya moya, go swana le sehlare seo se omeletšego. (Luka 23:31) Seo se ile sa kgoma bjang boemo bja tšona bja kgopolo ka leina la Modimo?

11. Leina la Modimo le ile la se sa tswalanywa bjang le setšhaba sa Bajuda?

¹¹ Histori e bontšha gore ge nako e dutše e eya, Bajuda ba ile ba kgomarela pono e fošagetšego ka leina la Modimo, ba nagana gore ke le lekgethwa moo e lego gore ga se la swanelwa go bitšwa. (Ek. 20:7) Ganyenyane-ganyenyane leina la Modimo le ile la se sa hlwa le dirišwa bodumeding bja Sejuda. Ga go pelaelo gore Jehofa o ile a kwa bohloko ge a bona leina la gagwe le gobošwa. (Ps. 78:40, 41) Lega go le bjalo, Modimo, “yo leina la gagwe e lego Lehufa,” o be a ka se itswalanye le batho bao ba ilego ba mo latola le bao yena a ilego a ba latola. (Ek. 34:14) Se se swanetše go gatelela bohlokwa bja gore re sware leina la Mmopi wa rena ka tlhompho e kgolo.

12. Jehofa o tšweleditše bjang batho bao ba bitšwago ka leina la gagwe?

¹² Jehofa o ile a utolla ka Jeremia morero wa gagwe wa go hloma “kgwerano e mpsha” le setšhaba se sefsa, e lego Isiraele ya moya. Jeremia o boletše e sa le pele gore ditho tša sona ka moka, “go tloga ka yo monyenyane wa bona go fihla ka yo mogolo wa bona,” di be di tla ‘tseba Jehofa!’ (Jer. 31:31, 33, 34) Boporofeta bjoo bo ile bja thoma go phethagala ka Pentekoste ya 33 C.E. ge Modimo a be a hloma kgwerano e mpsha. Setšhaba seo se sefsa, e lego “Isiraele ya Modimo,” seo se bego se akaretša Bajuda le bao e sego Bajuda, se ile sa fetoga “batho ba leina la [Modimo]” goba ‘batho bao Jehofa a itšego ba bitšwa ka leina la gagwe.’—Bagal. 6:16; bala Ditiro 15:14-17; Mat. 21:43.

13. (a) Na Bakriste ba lekgolong la pele la nywaga ba ile ba diriša leina la Modimo? Hlalosa. (b) O lebelela bjang tokelo ya go diriša leina la Jehofa bodireding bja gago?

¹³ Ka ge e le “batho bao ba bitšwago ka leina la [Modimo],” ditho tša setšhaba seo sa moya di ile tša diriša leina la Modimo, gomme di dirile seo ge di be di tsopola Mangwalo a Seheberu. * Ka go re’alo, ge moapostola Petro a be a bolela le Bajuda le bao ba sokologetšego tumelong ya Sejuda ka Pentekoste ya 33 C.E., o ile a diriša leina la Modimo ka makga a mantši. (Dit. 2:14, 20, 21, 25, 34) Bakriste ba lekgolong la pele la nywaga ba ile ba godiša Jehofa, ka gona Jehofa le yena o ile a šegofatša maiteko a bona modirong wa boboledi. Ka mo go swanago lehono, Jehofa o šegofatša bodiredi bja rena ge re ikgantšha ka go bolela ka leina la gagwe gomme re le bontšha bao ba thabelago ka Dibeibeleng tša bona ge e ba go kgonega. Ka go re’alo re ba tsebiša Modimo wa therešo. Ruri se e tloga e le tokelo go bona le go rena! Maemong a mangwe go ba tsebiša leina leo e ka ba mathomomayo a tswalano e kgahlišago le Jehofa yeo e tlago go dula e gola ka matla gomme ya swarelela ka mo go sa felego.

14, 15. Go sa šetšwe go phatlalala ga bohlanogi, re tseba bjang gore Jehofa o ile a šireletša leina la gagwe?

¹⁴ Ka morago ga moo bohlanogi bo ile bja thoma go tsena ka phuthegong ya Bokriste ya lekgolong la pele la nywaga, kudukudu ka  morago ga lehu la baapostola. (2 Bathes. 2:3-7) Barutiši ba maaka ba ile ba ba ba amogela moetlo wa Bajuda wa go se diriše leina la Modimo. Eupša na Jehofa o be a tla dumelela gore leina la gagwe leo le dirilwego segopotšo le phumolwe? Le gatee! Ke therešo gore ga re tsebe mmiletšo wa lona wa bogologolo, eupša leina leo le sa dutše le le gona. Ge nako e dutše e eya, le ile la tšwelela diphetolelong tše di fapafapanego tša Beibele, gaešita le dingwalweng tša diithuti tša Beibele. Ka mohlala, ka 1757, Charles Peters o ngwadile gore leina “Jehofa,” ka go se swane le direto tše dintši tša Modimo, “le bonagala le hlalosa semelo sa gagwe ka botlalo.” Pukung ya gagwe ya mabapi le borapedi bja Modimo ya 1797, Hopton Haynes o thomile kgaolo 7 ka gore: “JEHOFA ke leina la MODIMO la maleba gare ga Bajuda; e lego yena feela yoo ba bego ba mo rapela; go etša ge a be a rapelwa ke Kriste le Baapostola ba gagwe.” Henry Grew (1781-1862) ga se a fo diriša leina la Modimo eupša o ile a lemoga gore le gobošitšwe e bile le swanetše go kgethagatšwa. Ka mo go swanago, George Storrs (1796-1879), e lego mogwera wa kgauswiuswi wa Charles T. Russell, o ile a diriša leina la Modimo, go etša ge Russell ka boyena a le dirišitše.

¹⁵ Ngwaga wa 1931 e be e le o kgethegilego kudu, ka ge ka ngwaga woo Barutwana ba Beibele ba Ditšhabatšhaba, go etša ge batho ba Modimo ba be ba bitšwa bjalo ka nako yeo, ba ile ba amogela leina la Mangwalo la Dihlatse tša Jehofa. (Jes. 43:10-12) Ka go re’alo ba ile ba tsebiša lefase gore ba be ba ikgantšha ka go ba bahlanka ba Modimo a nnoši wa therešo, ba ikgantšha ka go ba “batho ba leina la gagwe,” gomme ba tumiša leina leo. (Dit. 15:14) Ditiragalo tše di re gopotša mantšu a Jehofa a hwetšwago go Maleaki 1:11, a rego: “Leina la ka le tla godišwa ditšhabeng go tloga ka bohlabela go fihla ka bodikela.”

16. Ke ka baka la’ng re swanetše go lebelela go sepela ka leina la Jehofa e le tokelo?

¹⁶ Moporofeta Mika o ngwadile gore: “Morafo o mongwe le o mongwe o tla sepela ka leina la modimo wa wona; eupša ge e le rena, re tla sepela ka leina la Jehofa Modimo wa rena go iša mehleng ya neng le neng, gaešita le ka mo go sa felego.” (Mika 4:5) Taba ya gore Jehofa o ile a dumelela Barutwana ba Beibele gore ba amogele leina la gagwe e be e tloga e le tokelo e kgolo. Le gona se e be e le pontšho ya gore o amogela seo. (Bala Maleaki 3:16-18.) Lega go le bjalo, go thwe’ng ka wena? Na o dira sohle seo o ka se kgonago go “sepela ka leina la Jehofa”? Na o kwešiša seo se akaretšwago ke go sepela ka leina leo?

17. Go sepela ka leina la Modimo go akaretša eng?

¹⁷ Go sepela ka leina la Modimo go akaretša bonyenyane dilo tše tharo. Sa pele, re swanetše go botša ba bangwe leina leo, re lemoga gore ke feela bao ba ‘bitšago leina la Jehofa ba tlago go phološwa.’ (Baroma 10:13) Sa bobedi, re swanetše go bontšha dika tša Jehofa, kudukudu lerato la gagwe. Sa boraro, re sepela ka leina la Modimo ge re thabela go ikokobeletša ditekanyetšo tša gagwe tše di lokilego, e le gore re se goboše leina le lekgethwa la Tatago rena. (1 Joh. 4:8; 5:3) Na o ikemišeditše go “sepela ka leina la Jehofa Modimo wa rena go iša mehleng ya neng le neng”?

18. Ke ka baka la’ng bohle bao ba godišago leina le legolo la Jehofa ba ka lebelela bokamoso ka kgodišego?

¹⁸ Kgauswinyane bohle bao ba hlokomologago goba bao ba sa kwego Jehofa ba tla gapeletšega gore ba mo tsebe. (Hesek. 38:23) Seo se akaretša batho bao ba swanago le Farao yo a ilego a re: “Jehofa ke mang, moo nka kwago lentšu la gagwe?” Go se go ye kae o ile a gapeletšega go bona gore Jehofa ke Modimo yo mogolo! (Ek. 5:1, 2; 9:16; 12:29) Lega go le bjalo, rena re ikgethetše go tseba Jehofa. Re ikgantšha ka go bitšwa ka leina la gagwe le ka go ba batho ba gagwe bao ba kwago. Ka gona, re lebeletše pele bokamosong ka kgodišego kholofetšong yeo e lego go Psalme 9:10, e rego: “Bao ba tsebago leina la gago ba tla go bota, gobane wena Jehofa o ka se tlogele bao ba go tsomago.”